DUUCA 15 - Wanaadi A'deddu

Oweeja sadiijangajä dö’seeno

¹ Tameedä acu’shänä jödaatai i’jummannamo Jesuuquidiito wwadäädä cöne’jumma’to yaawä, conemjönö dönnamo mmaja cöne’jumma’to dea, chäwwä ecammajäätödö eta.

² Yääje yeijäcä ñanno jaadiseeocoomo, judhío owaanomannamo mmaja, Jesuuquidiito jäcä cönenta’me’ca’to; cönä’döa’to: —Mä’dä conemjönö dönnamo jadä weneene, chääjadäiñe töwääwashinchä mmaja; quee cönä’döa’to.

³ Yaawä Jesuuquidiito cöna’deuwöi chäwwäiñe yö’seeno joi. Töwö cönä’döaacä:

⁴ —¿Aaquene töweiye maato änwanno? Dhanwa ecöntomo ijaatoodea soto oweeja weiya’comjäcä, tooni shaadijanga’jäcä, ¿ijimmä ännämä’da ca eijai ñai woi awä, ñäädä shaadijangajä ujiiye töötädö wetä, edantädö wa’cä?

⁵ Töwwä edanta’jäcä na’cwaincha yaawä; tänaawä nannä’a yaawä.

⁶ Tömmai chaca töwä’döa’jäcä töjimmä na’dejjaato, töjaatawoncomo mmaja. Chäwwäiñe nä’döa: “Jaadä adha’cwainchatääcä, yeecönö shaadijaamö’jödö edantä’jödö weijäcä öwwä;” quee nä’döa ñäädä dhanwa.

⁷ Chäänönge yääje wä’döa äwwäiñe, ñäädä dhanwa ta’cwaiñe cönä’ja’döje mmaja caju ñancomo ta’cwaiñe weneeneto dea tooni conemjönö tödöönei wwä tötö’tajäätödö sha’dumincha’jäcä, ijimmä aashicha’como jäcäiñe ta’cwaiñe töweichöcoomo e’jodhe’cä, ñanno tötö’tajäätödööcomo sha’duminchadö tujunnemjöncomo.

Jödaata wääma’jödö dö’seeno

⁸ “Wodi jödaatai amoojadä yeiya’jäcä, tooni yääma’jäcä yaawä, ¿tameedä yeichö wa’cä anuuji’cha ca eijai ñai, tä’sadö semeecancädä mmaja, edantädö wa’cä?

⁹ Töwwä edanta’jäcä töjimmä na’dejjaato yaawä, töjaatawoncomo mmaja. Töwö nä’döa chäwwäiñe: “Jaadä adha’cwainchatääcä, jöödatai wääma’jödö edantä’jödö weijäcä öwwä;” quee nä’döa ñäädä wodi.

¹⁰ Chäänönge yääje wä’döa äwwäiñe, ñäädä wodi ta’cwaiñe cönä’ja’döje mmaja Wanaadi amoodedö caju ñancomo töwa’cwaincha weneeneto dea tooni conemjönö tödöönei wwä tötö’tajäätödö sha’dumincha’jäcä; quee cönä’döaacä Jesuuquidiito.

Tumö jödaatai acoichanei’jödö dö’seeno

¹¹ Edääje Jesuuquidiito cönä’döa’dea: —Dhanwa aacä iiñacoomo cönä’ja’to.

¹² Yaawä dhacoono cönä’döaacä tumö wwä: “Jaaja, öwwä änne’cä tameedä yää öwwä töweiyemööje naadö;” quee cönä’döaacä tumö wwä. Yuumö cöneecamoi yaawä tönnacoomo waadäiñe.

¹³ Numa’da mma yää ’jeje ñäädä dhacoono cöneesomaajätöi; amoinche cöntämä anejja jataaca. Iiña tameedä töjöödatai cönaacoichai tömaasuduichadö jäcä.

¹⁴ Tameedä ijöödatai wataamea’jäcä ämi cönaajäntäi yaawä yää jataawä. Töwö ämi cöiñetuncaacä yaawä.

¹⁵ Yää jataawono sotoije cönääwaacai yaawä. Ñäädä cönaanontäi yaawä tönaudä’jödö aca, cuushi edai’chäneichomooje.

¹⁶ Cuushi uduucomo täcu’se töweiye cönä’jaacä yaawä, täwanshinchänei ’je’da yeijäcä.

¹⁷ Yääje mma yaawä töwö towaadäädä cönä’döi; edääje cöntö’tajä’acä: “Jaaja sotoi jadä’jödöödä chääwanshiñööcomo töwäädetööene weneene, öwö ämi awä wäämataame eetä.

¹⁸ Jaaja döiña yennacaiyede. Edääje wä’döa’de chäwwä: Jaaja, conemjönö wödööne Wanaadi jäcä, amäädä äjääcä mmaja.

¹⁹ Ännedööje ätä’täjoojai’cha wa eduuwa; osootoije mmaane cödööcä; quee wä’döa’de jaaja wwä;” quee cöntö’tajä’acä.

²⁰ Cönääma’täi yaawä; tumö döiña cönennacai. “Amoinche yeichö dea yuumö cöneedantäi; wentumje cöneeneaacä. Töwö cöneeca’tömöi tönnedö wwadäädä. Ijöncäcä cönaajäi yaawä shuumadö wetä.

²¹ Iiñedö cönä’döaacä yaawä: “Conemjönö wödööne, Jaaja, Wanaadi jäcä, amäädä äjääcä mmaja. Ännedööje ätä’täjoojai’cha wa eduuwa;” quee cönä’döaacä.

²² Yaawä yuumö cönä’döaacä tanoonö wwä: Ma’da’cä, yoomö eichantäcä, aashichaato, miyontätäiye. Shuuditiijai änu’täcä, shaajatui mmaja.

²³ Jaaca nnedö’cä ejuiñanö’caajä eichantäcä, mamiiñä’catäiye; ta’cwaiñe cääwashinchätäiye, tujuumä.

²⁴ Määdhä önnedö yäämaajä wa’cä cönä’jaacä; eduuwa cöjaadäiñe na. Tösaadijange cönä’ja’dea, eduuwa näädantojoi;” quee cönä’döaacä yuumö. Tönwanno töwääwashinchädööcomo cönaajäntoicho yaawä; jooje ta’cwaiñe cönä’ja’to.

²⁵ “Yui mmaane cönä’jaacä audaajä aca. Yaawä töwennacaadawä, maa taca ä’döjai töwä’döa’jäcä, shiwo etöödö cöneetaacä, yänwadööcomo mmaja.

²⁶ Tumö anoonö cöna’dejjai yaawä: “ ¿Ane’cäämö mädä?” quee cönä’döaacä chäwwä.

²⁷ Ñäädä cönä’döaacä: “Adhaacono nä’döi. Yääje yeijäcä jaaca nnedö’cä ejuiñanö’caajä oomo namiiñä’cajoi, tönnedö ääma’da tödöiña yä’dö’jödö weijäcä;” quee cönä’döaacä.

²⁸ Yui cönäätömai yaawä; töwoomomö’se’da cönä’jaacä. Yaawä yuumö cöneeja’cai; cönaamonno’jaacä.

²⁹ Töwö tumö cöneccujä’acä yaawä: “Numa adhaanonööje weichaame, tooniye awaanontä’jödö ämja’do’jo’da weichaame mmaja, chiiwo nnedö’cä mmädä äntu’da määnene öwwä, jimmä jadäiñe wääwashinchotoojoje.

³⁰ Mä’dä ännedö, masuuduichanä que tameedä ajöödatai acoichanei’jödö yä’döa’jäcä mmaane, jaaca nnedö’cä ejuiñanö’caajä jaiñoone mamiiñä’cajoi;” quee cönä’döaacä yui tumö wwä.

³¹ Yääje mma yaawä yuumö cönä’döaacä: “Etaacä dhanwa; amäädä jaadä määnene, aweichöje. Tameedä önnödö ännödööje mmaja na dea.

³² Eduuwa chäänönge ta’cwaiñe cääwashinchaato, määdhä adhaacono yäämaajä wa’cä cönä’ja’dö cöjoodö’jocoomo weijäcä. Töwö tösaadijange cönä’jaacä, eduuwa näädantojoi;” quee cönä’döaacä yuumö tönnedö wwä; quee cönä’döaacä Jesuuquidiito.