DUUCA 14 - Wanaadi A'deddu

Töwaawojä’ato adonca’jödö

¹ Yääje mma yaawä wäädeetatoojo anooto awä Jesuuquidiito cönoomomöi jaadiseeo täneejucaato mmai chaca, ääwashinchä. Anejjacoomo jaadiseeo yäätä cönä’ja’to dea chu’de’tä’se ene’madööje.

² Yäätä Jesuuquidiito je’taca cönä’jaacä dhanwa töwaawojä’ato.

³ Yaawä Jesuuquidiito cöneecamma’joicho ñanno judhío owaanomannamo, jaadiseeocoomo mmaja: —¿Aashicha ca wäädeetatoojo anooto awä soto adoncadö töweiye nai, cone’daane? quee cönä’döaacä.

⁴ Tönwanno äucwätä’da cönä’ja’to. Jesuuquidiito ñäädä dhanwa töwaawojä’ato cönaajäi yaawä; cönaadoncai. Cönenno’jai yaawä.

⁵ Töwö cönä’döaacä jaadiseeo wwäiñe: —Wäädeetatoojo anooto awä ya’tadö aca adheecönööcomo wejucca’jäcä, ¿yaawä dea mma anu’ca’da ca eijai maato? quee cönä’döaacä.

⁶ Tönwanno yää eccujä’jai’cha cönä’ja’to.

Jötaanä ene ajä’ma’como

⁷ Yaawä Jesuuquidiito cöneene’ma’to ñanno ajä’ma’como täneejuca’como weicho’como dö’tä töwaatajiima’se yeichöcoomo. Töwö edääje cönwätuujaicho:

⁸ —Anejja wwä jötaanä ene adha’dejja’jäcä, täneejuca’como weicho’como dö’tä mma mataajimai’che. Yaawä adhe’jodhaato we’a’jäcä naadö naane’, töwaajä’maamö’jödö mmaja,

⁹ ñäädä a’nädä adhaajä’maneichomo’jödö e’jai naadö naane’ yaawä, töwö äwwä ä’döjai ña yaawä: “Ääsecaacä; määdhääne määtä nei’ñojo;” quee ä’döjai ña. Yaawä töjöiye ääsecaajai ma dho’noncomo weicho’como dö’tä.

¹⁰ Edääjeene eichä adhaajä’ma’jäcä: Dho’noncomo weicho’como dö’tääne ataajimaacä’de. Yaawä ñäädä adha’dejjanei’jödö we’a’jäcä, edääje äwwä ä’döjai ñaadö naane’: “Eetääne ataajimaacä weichacoono, täneejuca’como weicho’como dö’tääne;” quee ä’döjai ña äwwä. Aashichaatoje adheene’maato’de yaawä ñanno ajaadoncomo wääwashinchädö.

¹¹ Ñäädä o’jodhaato tö’tajäätödö dho’noncomooje nä’döja’de. Ñäädä dho’noncomo tö’tajäätödö o’jodhe nä’döja’de; quee cönä’döaacä Jesuuquidiito.

¹² Edääje Jesuuquidiito cönä’döa’dea ñäädä ta’dejjanei’jödö wwä: —Awaajä’ma’jäcä ajimmä mma mana’dejjaicho’de, adhaacontomo mmaja, ajaatawoncomo tönaudäca’como mmaja. Tönwanno yää ’jeje ääwashinchä adha’dejjajai ñaato dea, yää ta’dejja’jocoomo nwacaanoje. Yää que mma täjeema ma yaawä.

¹³ Edääjeene eichä’de awaajä’madaawä; wentumja’comoone ana’dejjacooto’de, cädäija’como mmaja, secumja’como mmaja, tänuuquemjöncomo mmaja.

¹⁴ Yaawä ta’cwaiñe eijai ma, ñanno adheejemaajai’cha yeichomjäcä. Yaawä jeene määjemaaja’de, chäänönga’como waadoncato’como awä jeene; quee cönä’döaacä Jesuuquidiito.

Jooja’como soto wääwashincho’jocoomo dö’seeno

¹⁵ Yää eta’jäcä tooni chääjadä cönääwashincha’dö cönä’döaacä Jesuuquidiito wwä: —Ta’cwaiñe na’de ñäädä Wanaadi jataacaiño wääwashinchädö; quee cönä’döaacä.

¹⁶ Yaawä Jesuuquidiito cönä’döaacä chäwwä: —Dhanwa cönaajä’mai; jooje soto cöna’dejjaicho yaawä.

¹⁷ Yaawä wääwashinchotoojo cu’nädö aca yä’döa’jäcä töwö tanoonö cönaanontäi ñanno töwääwashinchaamo wwäiñe ecamma: “Ä’täcä eduuwa; äwanshi nödöicho;” quee ä’döe.

¹⁸ Yaawä tameedä ñanno a’dejja’como töwaadäiñe cönaajäntoicho töwäätä’catäädöcoomo. Tooni cönä’döaacä: “Audaajä wejeemane. Eduuwa ene öötotoojo na. Eejö’da na ñäädä; quee caichä’de adhaanontänei’jödö wwä;” quee cönä’döaacä.

¹⁹ Anejja cönä’döaacä: “Amoojadä jaaca wejeemaneeto; eneiñe wöta eduuwa. Eejö’da na ñäädä; quee caichä’de adhaanontänei’jödö wwä;” quee cönä’döaacä.

²⁰ Anejja daja cönä’döa’dea: “Ijöötaanö öwö. Täjai’cha wa;” quee.

²¹ Ñäädä dhanoonö cönennacai yaawä. Töwö tädhaajä wwä cöneecammajäätöi yääje yä’dö’jocoomo. Chäädhajä cönäätömai yaawä; tanoonö cönaanontäi; cönä’döaacä: “Jata antai äjääne. Wentumja’como a’dejjataato, cädäija’como mmaja, secumja’como mmaja, tänuuquemjöncomo mmaja;” quee cönä’döaacä chäwwä.

²² Äcuude’cä ñäädä dhanoonö cönä’döaacä yaawä: “Cajiichaana, anaanontä’jödö wödöi. Yääje yeichaame töweiye dea na soto weicho’como;” quee.

²³ Yaawä chäädhajä cönä’döaacä chäwwä: “Ääma waadäi äjääne; anejjacoomo ene’coto’de yoijeiñe’da; ömmai chu’camöiye.

²⁴ Yääje wä’döa äwwäiñe, tameedä ñanno awa’de wa’dejjaneetodö onooneja’da naato’de edä äwanshi, neejodööjodö;” quee cönä’döaacä ñäädä chäädhajä tanoonö wwäiñe; quee cönä’döaacä Jesuuquidiito.

Jesuuquidiito jadä weiñä

²⁵ Yaawä jooje soto cönäämannä’a’to Jesuuquidiito jadä. Töwö cönä’jedennacai chäwwadäädäiñe; cönä’döaacä chäwwäiñe:

²⁶ —Ñäädä jaadä töwei’shato, tumö ämjumma’da yeiya’jäcä, senö mmaja, töjiiñamo mmaja, tönnacoomo mmaja, tacontomo mmaja, tuduichomo mmaja, töjaadui’chomo mmaja, töweichö jadä’jödöödö ämjumma’da yeiya’jäcä, ñäädä noowanoomadööje eijai’cha na.

²⁷ Ñäädä jaadä töweichö wetä öwö jääcäinchädä äntunaanö’jaichojöönö, cuduusa jäcä äämajaichojöönö mmaja, noowanoomadööje eijai’cha na.

²⁸ Ämmai amä’se aweiya’jäcä naadö naane’ ¿amootojo täje yeichö ämme’cu’tä’da ca eijai manä awa’de, chääwa’cä yeichö eneedö wetä ajöödatai?

²⁹ Dha’da ’quene, tajäntä mma ajänta’jäcä äwwä, acoichajai’cha aweichaame, tameedä enennamo adhenno’jä’jai ñaato yaawä,

³⁰ edääje töwä’döancädäiñe: “Määdhä amäädö cönaajäntäi, acoichajai’cha töweichaame;” quee töwä’döancädäiñe.

³¹ Cajiichaana yeiya’jäcä naadö naane’, amoojadä miide mma shootoi töweewänä’taamo yeiya’comjäcä, ¿aaquene mmaja chaana’cajai’cha töweichö jäcä tötö’tajäätödö’jo’da ewäänä’tä ääma’tädööde’ mänsennoto cajiichaana jadä, tooni soto miide’como shootoi jadä?

³² Chaana’cajai’cha tötö’ta’jäcä töwö tanoonö anontäjai ña ñanno wwadäädäiñe, amoinche yeichöcoomo dea, äätu’dedööje’da töweicho’como jäcä a’deuwe.

³³ Mädääje mmaja änwanno, ñäädä tameedä töwwä naadö änsancwajöönö, öwö noowanoomadööje eijai’cha na.

Saayu cadooquejöödö dö’seeno

³⁴ “Aashicha saayu töweiye nai. Yaawääne’, dha’cwötöödö wataamea’jäcä, ¿aaquene ma’cwötöömaiye yaawä?

³⁵ Nono aca tödööemje’da na, wecaatojo aca tödööemje’da mmaja. Töja’emje mma na yaawä. Eta’sato neta’ñojo; quee cönä’döaacä Jesuuquidiito.