DUUCA 11 - Wanaadi A'deddu

Wanaadi wwä wa’deunä jäcä Jesuuquidiito nowaanoma’jödö

¹ Yääje mma yaawä Jesuuquidiito Wanaadi wwä cöna’deuwacä. Ya’deuwödö yä’ca’jäcä tooni ñoowanoomadö cönä’döaacä chäwwä: —Cajiichaana, ñaa owaanomaacä Wanaadi wwä wa’deunä jäcä, Juan tönoowanoomadö cönoowanoomaichodööje mmaja; quee.

² Jesuuquidiito cönä’döaacä chäwwäiñe: —Awa’deuwödaawäiñe edääje caichäcä’de: Jaaja caju ñano, Töwaanadiiyöcoomoje adhe’tä’ña’to soto; töcaajichaanaichomooje ayöödö’ña’to. Ämjummadö woije nödö’ña’to edä nono de’woncomo, caju ñancomo tönnöe weneenetoodöje mmaja.

³ Ñaa ewanshiñö änu’cä edä anootoi’chädö awä.

⁴ Ñaa cone’nadiiyö encwanno’jocä, ñaa mmaja tameedä töjääcä conemjönö tödöödö tönencwanno’jo ñaa weneenedööje mmaja. Ñaa mäiñunaacajoi’che; tösancwajoone ñaa sancwajoocä conemjönö jonno; quee caichäcä’de; quee cönä’döaaca Jesuuquidiito.

⁵ Edääje mmaja cönä’döa’dea chäwwäiñe: —Edääje yeiya’jäcä naadö naane’: Anejja yo’tawääne töweichacoono döiña iicha’jäcä uu e’ca’e, edääje ä’döjai ñaadö naane’ yaawäne’: “Aaduwaawä ecauwö’jödö uu änne’cä.

⁶ Weichacoono ömmai chaca nä’döi, aneiñajaano’jödö. Chääwanshiñö tödööemö ’je’da na öwwä;” quee ä’döjai ñaadö naane’ töweichacoono wwä.

⁷ Yaawä ñäädä tömmai chacaano eccujä’jai ñaadö naane’: “Canaaquiimai. Tajoijo önnata’tadö na. Önnacoomo’cä wönö’näje naato dea. Wä’tä’se’da wa äwwä utuudu wetä;” quee.

⁸ Edääje wä’döa äwwäiñe, ñäädä töweichacoonoje yeichö jäcäinchädä ä’tä’da töweichaame, wä’caaje’da yaatemeecödö weijäcääne töwö ä’täjai ña, imjummadö wa’cä chäwwä u’e.

⁹ Yääje yeijäcä yääje wä’döa äwwäiñe: Ane’ca’täcä, äwwäiñe Wanaadi äntuiye; anuujichääcä, maneedantätäiye; a’dejjatääcä, mönaatata äwwäiñe ata’deucaiye.

¹⁰ Ñäädä e’ca’nei wwä töwä’tue töweiye nai, ujiiñei wwä töwäädantojo, a’dejjanei wwä mönaatata töwaata’duca.

¹¹ “ ¿Änääcö adhantawäiñe täju u’jai ñai tönnedö wwä, tudu e’catäädawä? Na’cwacaano jeiñe mma e’ca’a’jäcä chäwwä, ¿änääcö äcääyu äntuduude’ ?

¹² I’moi jeiñe mma e’ca’a’jäcä, ¿änääcö mönäätä äntuduude’ ?

¹³ Änwanno cone’da aweichaameiñe odhoowanääcäiñe aashichaato utuudu ännacontoncomo wwä. Töwaacö’je Oomontoncomo caju ñano Epíiditu Santo u’jai ña töwwä e’ca’nei wwä; quee cönä’döaacä Jesuuquidiito.

Odo’sha ’je Jesuuquidiito e’tä’jödö

¹⁴ Yääje mma yaawä dhanwa acanno Jesuuquidiito odo’sha ana’deujojoojönö cömja’canö’jaacä. Tötaacanno odo’sha weja’ca’jäcä ñäädä ta’deudemjönö’jödö cöna’deutai. Ñanno soto cönääcatoncaicho yaawä.

¹⁵ Anejjacoomo ’quene cönä’döa’to: —Mä’dä dhanwa odo’shancomo tömja’canö’jo weneene Weesewú jäduudu que, ñäädä odo’sha edhaajotoncomo; quee cönä’döa’to.

¹⁶ Anejjacoomo Jesuuquidiito yuunacaadöje ene’ju’tojo cönnöja’to chäwwä, caju ñanooje töwäänejootojooje.

¹⁷ Töwö dhowaanäcä cönä’jaacä chö’tajäätödööcomo: cönä’döaacä chäwwäiñe: —Yää jataawoncomo dea wewäänä’ta’comjäcä, töwaatame mma ataamejai ñaato. Yää maa tawoncomo dea yä’tu’de’ta’comjäcä, ataamejai mmaja.

¹⁸ Mädääje mmaja Caajuushawa, töwwäädä yä’tu’de’ta’jäcä, ¿aaquene mmaja numa jäduuje eichö deeade’ ? Öwö yääje wä’döa äwwäiñe Weesewú jäduudu que odo’shancomo tömja’canö’jo ye’tädö weijäcä äwwäiñe.

¹⁹ ¿Caajuushawa jäduudu que ca odo’sha ija’canö’jodööcomo mecaanö’ato öwwä? Yääje yeiya’jäcä, ¿änääcö jäduudu que tömja’canö’jo weneeneto osootoichomo änwanno? Yääje yeijäcä osootoichomo dea nene’ju’jaato chäänönge’da aweichöcoomo.

²⁰ Öwö mmaane Wanaadi jäduudu que odo’sha tömja’canö’jo wäänene. Yääje yeijäcä odhoowanääcäiñe eijai ña Wanaadi acaajichaanaichomooje yä’dötoojoje yeicho.

²¹ “Dhanwa jäduujato wwä töwaichaque tömmai edai’cha’jäcä, tönsomaadö ememme’jojai’cha na yaawä.

²² Yaawääne’ jäduujato’cä jaiñoone yöiña ye’a’a’jäcä, ñäädä wwä näto’jodheinchaja yaawä. Ñäädä tameedä yaichadö que nenwajiiñajä’a yaawä, yää chäädha’me töweichö jäduujato wa’cä chö’tajä’eetö’jödö. Iiñöjäätödö nadääa yaawä töjimmä wwäiñe u’jätöödö wetä.

²³ “Ñäädä öwö jaadonoojönö, tu’de’tänei ñäädä. Ñäädä jaadä anaamu’jönö, töja’e mma nöja’a.

Odo’sha wennacaadö

²⁴ “Soto acanno odo’sha weja’ca’jäcä töwö näämannä’a nono sedejjato de’cäcä, töweejata’totoojo ujiiyancädä; aneedantä’daane. Aneedantä’da töweijäcä edääje nichö’tajä’a yaawä: “Iiña mmaja yennacaiyede; weeja’ca’jödö taca mmaja yoomomöiye;” quee.

²⁵ Yaawä iiña mmaja töwä’döa’jäcä täwöötö’jödö nedanta maa töseemeeca ñängajä eijai ñaadöje, töcoonecaajä’e mmaja.

²⁶ Töwö nöta yaawä töjimmä wetäiñe. Aacä amoojato odo’shancomo nene’aato yaawä, cone’daiñe’cä jeene tönwanno. Yaawä tönwanno nomongaato ñäädä soto aca, töweejata’tädööcomo wetä. Yaawä ñäädä soto wecoone’maajä na awa’de töwei’jödö e’jodhe’cä jeene; quee cönä’döaacä Jesuuquidiito.

Ñanno ta’cwaiñe töweiyaamo

²⁷ Yääje Jesuuquidiito wä’dötaame, tooni wodi ñanno soto do’tacaiñe töcä’de cöna’deuwöi; cönä’döaacä chäwwä: —Ta’cwaiñe eijai ña ñäädä wodi adhennuichanei’jödö, ñäädä imaanatöödö mennedö; quee cönä’döaacä.

²⁸ Jesuuquidiito cönä’döaacä yaawä: —Ñannoone ta’cwaiñe eijai ñaato, Wanaadi a’deddu etannamo, tödönnamo mmaja; quee cönä’döaacä.

Soto conemjöncomo ene’ju’tojo tönnöjo yeichöcoomo

²⁹ Jooje soto we’jumma’comjäcä, Jesuuquidiito cönaajäntäi töwa’deuwödö; cönä’döaacä: —Cone’da naato canno soto eduuwa naatoodö. Ene’ju’tojo tönnöjo weneeneto. Yääje yeichaame aneene’da naato’de. Joná wei’jödö mmaane nichö’tammecö’ña’to, ñäädä Wanaadi wa’deuwödö ecammanei’jödö.

³⁰ Joná cönä’jaacä chu’tädööje Niiniwe ñancomo wwä. Mädääje mmaja Soto nnedö chu’tädööje na’de canno soto wwäiñe.

³¹ Yaawä wätämmencajootojo anooto awä, canno soto eduuwa naatoodö wätääcamma’jojoodawäiñe, ñäädä wodi, shii weja’catoojo suda’wawoono cajiichaana, conemjöncomooje ne’taato’de. Ñäädä wodi amoinchenno cöneejä tösejjeque Saadomón wa’deuwödö eta. Saadomón e’jodhaato’cä jaiñoone eetä na eduuwa.

³² Yaawä wätämmencajootojo anooto awä mmaja, Niiniwe ñancomo mmaja conemjöncomooje ne’taato’dede canno soto eduuwa naatoodö, yäätäcamma’jojoodawäiñe. Ñanno Niiniwe ñancomo tötö’tajäätödööcomo cönsa’duminchaicho Joná necammajäätödö etaadö’jo. Joná e’jodhaato’cä jaiñoone eetä na eduuwa.

Soto dhawaadö

³³ “Tödhaawadö tönemjannädö aneetone’tä’da weiñä nai, wöwa aca aneewötö’tä’da mmaja. Dha’täi ye’wääne tödöödö, tameedä iiñancomo womoomödö wwä tawaane eiye.

³⁴ Soto enuudu na yeichö dhawaadöje. Aashicha adheenudu yeichawä aweijotä yaawä. Yaawääne’ adheenudu cone’da yeiya’jäcä, tööjano’taca ma amäädä yaawä.

³⁵ Odhoowoinchadä’da eichä, adhaawadööjato’jödö änweijo’da’da mma ei’che.

³⁶ Tameedä aweichö tawaanato aca yeiya’jäcä, she’caasa tööjato ’je’da aweiya’jäcä mmaja, tawaanato aca ma’de yaawä, adhaawa niweijodö awä weiñä naichöje.

Jesuuquidiito wwä judhío owaanomannamo ijiiyemeecö’jödö

³⁷ Yääje ya’deuwö’jeje jaadiseeo tä’saca Jesuuquidiito cöna’dejjai, ewanshinchädö wetä. Jesuuquidiito cönoomomöi yaawä; meesa dö’tä cönaatajiimai.

³⁸ Ñäädä jaadiseeo cone’da cönä’döjoi yaawä, töwääwashinchääje tamäädö anaamoicha’da Jesuuquidiito eneea’jäcä.

³⁹ Yaawä Cädhaajotoncomo Jesuuquidiito cönä’döaacä chäwwä: —Änwanno jaadiseeo ye’wä mma aashicha maato, incha’cäcä mma jadaaji atööäjä töweiye naichöje; aweichöcoomo mmaane tämeeneiñe, chäänönge’da mmaja.

⁴⁰ ¿Odhoowanääcäiñe’da ca’ nai ñäädä soto ejö tödöönei’jödö dea yo’tadö tödöönei’jödööje mmaja yeichö?

⁴¹ Wanaadi jummadö queene änu’täcä’de yää äwwäiñe naadö; yaawä tameedä amoije’da na’de äwwäiñe.

⁴² “Wentumje maato’de änwanno jaadiseeo. Änwanno Wanaadi wwonooje tunu’e määnetääne anaatödööcomo ejeedödö, yää jomi, wishu mmaja, tameedä anejja’cä mmädä mmaja, chäänönge weiñä, Wanaadi jummadö mmaja, anencano’tä’da aweichaameiñe. Mädääne tödööjai maato, mänööcomo tödöödö ane’nomja’da dea aweichaameiñe.

⁴³ “Wentumje maato’de änwanno jaadiseeo. Änwanno täneejuca’como a’täi ye’wä awei’sheiñe määnetääne we’jummanaawä. Tönoiñe adheene’madööcomo que jata antawä soto wwäiñe awaata’dejjajoodöcoomo awaacö’comje mmaja.

⁴⁴ “Wentumje maato’de änwanno owaanomannamo, jaadiseeocoomo mmaja, yääjönö wa’co’como wäänejoodö. Änwanno maato äwa äänejöönö töweiye naichöje, yää ye’cäcä soto töwäämannä’e töweiye naichodö, towaanäcäiñe’da yeiyancädä; quee cönä’döaacä Jesuuquidiito.

⁴⁵ Yaawä owaanomannamo jimmä cönä’döaacä: —Owaanomaanei, mädääje awa’deuwödö que ñaa mmaja cone’da ñaa mödööja dea; quee cönä’döaacä.

⁴⁶ Jesuuquidiito cönä’döaacä: —Änwanno mmaja, owaanomannamo, wentumje maato’dede. Änwanno soto wwäiñe ä’döque’jönööto tönnöjo määnetääne, tamiiñato adoojodö töweiye naichöje, i’wa’tädööcomo jäcä chö’tajäätö’da aweiyancädäiñe.

⁴⁷ “Wentumje maato’de änwanno. Änwanno tönnöe määnetääne äwa, Wanaadi wa’deuwödö ecammannamo’jödö ewaadöcoomo, ñanno adhaadai’choncomo canaadöje cönä’jajoichodö.

⁴⁸ Mädääje määne’ju’jaato adhaadai’choncomo nödö’jocoomo awaacö’comje yeichö. Tönwanno cömjajoicho; änwanno töja’a’como ewaadöcoomo mödööato.

⁴⁹ “Yääje yeijäcä Wanaadi tösejjeque töweichö woije yääje cönä’döaacä: “Wa’deuwödö ecammannamo, anejjacoomo yaanonö mmaja, wanaanontaato’de yöiñaiñe. Dhantai nöja’aato’de; dhantai ’chene nimaaminchaato’de;” quee Wanaadi cönä’döaacä.

⁵⁰ Canno soto eduuwa naatoodö nätä’maminchajaato’de tameedä Wanaadi wa’deuwödö ecammannamo töjaajo’jocoomo weijäcä, ñanno nono wamoodeta’jödö jonnoto’jödöödä imjajo’jocoomo,

⁵¹ Aweede ema’jödö jonnoto’jödöödä Saacadía ema’jödö jona tödööene, ñäädä saaquidiijiisiyo dötoojo ncadheedä cöneemaichodö Wanaadi weichojo tawä. Chäänönge yääje wä’döa, canno soto eduuwa naatoodö nätä’maminchajaato’de tameedä yää jo’tädööje.

⁵² “Wentumje maato’de änwanno owaanomannamo. Änwanno soto woowanoomato’comoojato’jödö töncone’ma määnetääne, yaawi che soto enwajiiñadö töweiye naichöje. Änwanno aashicha jeene oowanooma’da, ñanno töwoowanooma’sa’como onoowanoomajo’da mmaja; quee cönä’döaacä Jesuuquidiito.

⁵³ Yääje ya’deuwö’jeje, ñanno judhío owaanomannamo, jaadiseeocoomo mmaja cönäätömaicho jooje. Ecamma’jojäätödö que cönaaquiima’to yaawä.

⁵⁴ Tönwanno cone’da a’deudeme’jo’se cönä’ja’to, yää ’jeje chääjäcä cone’da töwa’deuwödööcomo wetä.