DUUCA 1 - Wanaadi A'deddu

Duuca wwä Teóojido wwadäädä imennä’jödö

¹ Jooje anejjacoomo cönoonejaicho wätunnä imennädö, yää ñaa antawä cöneeja’dätäichö jäcä.

² Tönwanno cömmennoicho Wanaadi a’deddu owaanomannamo wwäiñe towaanoma’jocoomo nönge dea, ñanno yaajäntä’jödö jonnoto’jödöödä yää enennamo’jödö wwäiñe.

³ Yääje yeijäcä, öwö mmaja tameedä yää jäcä ecamma’jo’jödö weijäcä öwwä yaajäntä’jödö jonno, aashicha cöntö’taacä öwwä yää wätunnä imennädö äwwadäädä, sa’donna jeene, amäädä Teóojido, aashichaato.

⁴ Edä wimenna chäänönge jeene odhoowanääcä yeichö wetä yää odhoowanooma’jödö.

Juan Wautiita wennutoojo ecamma’jödö

⁵ Yaawä Judheea ña Edoodhe cajiichaanaje yeichö, töweiye cönä’jaacä Wanaadi wwono wa’deuwödö, Saacadía täätö. Töwö cönä’jaacä Awía sotoi jimmäje. Ijiiñamo mmaja cönä’jaacä Aadón weichö, Ediisawé töwö chäätö.

⁶ A’nädä töweiye cönä’ja’to chäänöngeiñe Wanaadi owaadäädä. Tönnöe töweiye cönä’ja’to tameedä Cajiichaana waanontädö, tameedä iiñöjoodö mmaja. Yääje yeijäcä tämentämje’da tönwanno cönä’ja’to.

⁷ Tönwanno iiñacontoncomo ’je’da cönä’jaacä, Ediisawé ennecaajai’cha yeijäcä. Inchomje cönä’jaacä Saacadía, ijiiñamo mmaja no’samje.

⁸ Yaawä cönä’jaacä Saacadía jimmä wetaadawa’cajooto’como cu’nädö. Töwö Saacadía Wanaadi wwono wa’deuwödööje cöneetadaawa’cajaacä yaawä.

⁹ Tönnöeetöcoomojeedä wä’cana’canä döa’jäcä Wanaadi wwä töwa’deuwaamo wwäiñe, Wanaadi weichojo taca juu shimi’jotoojo yau’cwa Saacadía womontojo cönoojodöi.

¹⁰ Yaawä Saacadía womonga’jäcä, tameedä soto tujuumä cönä’ja’to jödo’na, Wanaadi wwä wa’deunäje, juu shimi’jotoojo yau’cwatoojo cu’nädaawä.

¹¹ Yaawä Cajiichaana amoodedö cönäänejoi Saacadía wwä. Juu shimi’jotoojo yau’cwatoojo a’täi ñäcä cönä’jaacä, jiidi, ämu’demjönö dö’se.

¹² Saacadía cönääcatoncai ñäädä eneedö’jo. Jooje tösaade cönä’jaacä.

¹³ Amoode cönä’döaacä chäwwä: —Määcatoncai, Saacadía. Wanaadi cöneetai töwwä awa’deuwö’jödö. Ajiiñamo Ediisawé acä adhennecaato’de dhanwaje. Juanje e’täcä’de.

¹⁴ Ta’cwaiñe ma’de amäädä yaawä; jooje soto ta’cwaiñe naato’dede, ännedö wennudu weijäcä.

¹⁵ Wanaadi wwä täneejuque na’de ännedö. Töwö aneenö’da na’de chääjedöödö eccudu, tödäu’cwato aneenö’da mmaja. Epíiditu Santo ’je na’de töwennudu owaajodä’jödöödä.

¹⁶ Töwö niiñacaanö’jaato’de jooje iisadaaediitacoomo Tädhaajotoncomo Wanaadi wwadäädä.

¹⁷ Ñäädä Juan Cajiichaana owaajo necammajä’a’de. Edía jäduudu cönä’ja’dö wa’cä mmaja ijäädudu na’de, chö’tajäätödö chäänönge mmaja. Töwö soto niyäätuujaato’de töwenneca’como tötö’tajäätödööcomo iiñacaiyeto tönnacontoncomo wwadäädä, Wanaadi waanontädö tödö’semjöncomo mmaja oowanoomaiyeto Wanaadi woije töweichöcoomo jäcä. Mädääje töwö soto nichoonecaato’de Cajiichaana weejödö owaajo; quee cönä’döaacä amoode Saacadía wwä.

¹⁸ Yaawä Saacadía cönä’döaacä amoode wwä: —¿Aaquene mädä chäänönge yeichö yoowanääcä eijai ñai? Inchomje dajaane wa, no’samje mmaja jiiñamo; quee cönä’döaacä.

¹⁹ Amoode cönä’döaacä chäwwä: —Caawidiyeede dajaane öwö, Wanaadi je’tacaano. Töwö dea yaanontäi äwwä a’deuwe, mädä aashichaato wätunnä ecamma äwwä.

²⁰ Eduuwa ta’deude’da ma’de. A’deuwö’da ma’de ännedö wennudu wa’cä, ya’deddu aneecamjö’da awei’jödö weijäcä. Neecamma’jödö nönge neja’dä’a’de chu’nädö aca yä’döa’jäcä; quee cönä’döaacä amoode.

²¹ Yaawä Saacadía womoocödööje soto cönä’ja’to. Tönwanno cönääcatonca’to numa eja’ca’da yeijäcä Wanaadi weichojo tacanno.

²² Yaawä töweeja’ca’jäcä Saacadía a’deujai’cha cönä’jaacä chäwwäiñe. Tönwanno dhowaanäcäiñe cönä’jaacä yaawä tönoiñato ene’jödö chäwwä Wanaadi weichojo taca. Töwö täneejojä’e mma cöneenejoojä’acä, ta’deude’da töweijäcä.

²³ Tötaadawaajui dödö töwä’ca’jäcä Saacadía tömmai chaca cönennacai yaawä.

²⁴ Yää ncäcäädä ijiiñamo Ediisawé cönwensu’tai. Töwö tömmai chawä töweiye cönä’jaacä ijaatoodea nuunä, eja’cajäätö’da.

²⁵ Edääje tötö’tajä’e cönä’jaacä ñäädä Ediisawé: “Aashicha mädääje yöödöne Cajiichaana Wanaadi, töjöiye’da weichö wetä soto antawäiñe,” quee tötö’tajä’e cönä’jaacä.

Jesuuquidiito wennutoojo ecamma’jödö

²⁶ Yääje mma yaawä tooni amoojato nuunä yä’döa’jäcä Wanaadi cönaanontäi tanoonö Caawidiyeede Naasade ña, Caadideea ñano jataaca,

²⁷ ajei’choto’jaato döiña. Ñäädä wodi cönä’jaacä dhanwa acä eijönö, Madía täätö. Töwäätöiñonoomöje töwö cönä’jaacä José jadä, töwäätäcamma’jo’jocoomo weijäcä. Dawí weichö cönä’jaacä ñäädä José.

²⁸ Ñäädä amoode cönä’döi yaawä Madía döiña; cönä’döaacä chäwwä: —Ta’cwaiñe eijai ma amäädä Madía. Cajiichaana ajaadä na. Wanaadi nutuudu aashichaato äwwä na, anejjacoomo wodiiñamo wwäiñe yeichö e’jodhe; quee cönä’döaacä amoode.

²⁹ Ñäädä eneea’jäcä Madía wwä töwö cönääcatoncai dha’deddu etaadö’jo. “ ¿Aaquene mädääje mä’dä na’deuwanä;” quee cöntö’tajä’acä.

³⁰ Yaawä amoode cönä’döaacä chäwwä: —Tösaade’daane eichä Madía. Wanaadi aashichaato nödööa äjääcä.

³¹ Awensu’ta’de; ännedö nennua’de dhanwa’cä. Jesuuquidiitoje e’täcä’de.

³² Töwö täneejuque na’de. O’jodhaato nnedööje nätä’täja’de. Cajiichaana Wanaadi nu’a’de chäwwä cajiichaanaje yeichojo, dhadai’jödö Dawí cönä’ja’döje mmaja.

³³ Töwö yeichöje na’de iisadaaediitacoomo Cajiichaanaichomooje. Cajiichaanaje yeichö ataame’da na’de; quee cönä’döaacä amoode Madía wwä.

³⁴ Yaawä Madía cönä’döaacä amoode wwä: —¿Aaquene mädääje eijai ñai, töiñoque weichöjöönö?

³⁵ Amoode cönä’döaacä: —Epíiditu Santo nä’ta’de äjääcä; O’jodhaato jäduudu aneejonta’de. Yääje yeijäcä ñäädä ännedö töwennueemö Aashichaatoje nätä’täja’de, Wanaadi nnedööje.

³⁶ Aweichacoono Ediisawé mmaja töwensu’de na dea, no’samje töweichaame, dhanwa’cä wensucu’tädööje. Tooni amoojato nuunä na eduuwa töwensu’de yeichö, ñäädä töwennecamjönööje täcammaamö’jödö.

³⁷ Wanaadi tödööjaichojöönö ’je’da na; quee cönä’döaacä amoode Madía wwä.

³⁸ Yaawä Madía cönä’döaacä: —Cajiichaana Wanaadi anoonö öwö. Yöödöa mma’ne, mecammannöje; quee cönä’döaacä. Yaawä amoode cöntämä choojonno.

Ediisawé döiña Madía wötä’jödö

³⁹ Yää anooto awä dea mma Madía cönääma’täi; jöö jona cöntämä, Judheea ñano jataaca.

⁴⁰ Cönoomomoi yaawä Saacadía mmai chaca; Ediisawé cöna’dejjai.

⁴¹ Madía wa’deuwödö eta’jäcä Ediisawé wwä, iiñedo cönä’jimiichöi iwenwaca. Epíiditu Santo ’je Ediisawé cönä’döi yaawä.

⁴² Töwö töcä’de cöna’deuwöi; cönä’döaacä Madía wwä: —Wanaadi nutuudu aashichaato äwwä na, tameedä wodiiñamo wwäiñe yeichö e’jodhe. Ännedö wwä mmaja aashichaato u’ajä na’dede, ñäädä awenwaca naadö.

⁴³ ¿Aaquene mädä wa’cä aashichaato nä’tuaanä öwwä, Yeedhajä dhenö öwwadäädä neejädö naane’ ?

⁴⁴ Yaawä dea mma, äwwä ya’dejjadö etaadö jadä mma, shiichu’cä nä’jimiichöi wenwaca, ta’cwaiñe töweijäcä.

⁴⁵ Ta’cwaiñe eijai ma amäädä ecaanö’nei. Chäänönge neja’dä’a’de Cajiichaana necamma’jödö äwwä; quee cönä’döaacä Ediisawé.

⁴⁶ Yaawä Madía cönä’döaacä: Cajiichaana jäcä aashicha tö’tajä’a;

⁴⁷ yeewanö jäcä ta’cwaiñe wa Wanaadi jäcä, ñäädä Yeewanaacanei,

⁴⁸ wentumje yeene’jödö weijäcä chäwwä, dho’noncomooje weichaame öwö dhanoonö. Eduuwa naadö jonno tameedä soto ye’taato’de Wanaadi ni’wa’tädööje,

⁴⁹ adai’jä tödö’jödö weijäcä jääcä ñäädä Wanaadi jäduujato wwä; aashichaato töwö.

⁵⁰ Töwö yeichöödäje wentumje töneeneiñe weneene tönontännamo.

⁵¹ Töwö tönnödö que jäduuje töweichö cöneenejoi. Töwö cöne’jodheinchaicho ñanno o’jodha’como wa’cä tö’tajäätödö.

⁵² Ñanno jäduuja’como töwö cunu’caicho cajiichaanaje yeichöcoomo jonno. Dho’noncomo tö’tajäätödö mmaane cajiichaanaje cönnöicho.

⁵³ Ämiija’como wwä aashichaato cuntui, imjummadööcomo wa’cä. Tönsomaaca’como mmaane tänwase’da cönenno’jaicho.

⁵⁴ Töwö cöni’wa’toicho tösootoi iisadaaediitacoomo, töneecamma’jödö jäcä chö’taqueejö’da töweijäcä, yää wentumje eneeto’como.

⁵⁵ Cadai’choncomo wwä yeichöödotooje töwö yää aashichaato cöneecammai, ñanno Aawadán wwä, dhatöödö wwäiñe mmaja; quee cönä’döaacä Madía.

⁵⁶ Yäätä Madía cönä’jaacä Ediisawé jadä aaduwaawä nuunä. Yää ’jeje cönennacai chea tömmai chaca.

Juan Wautiita wennu’jödö

⁵⁷ Yaawä Ediisawé nnedö wennutoojo cu’nädö aca yä’döa’jäcä, cönennui iiñedö, dhanwa’cä.

⁵⁸ Wanaadi wwä Ediisawé jäcä aashichaato tödö’jödö eta’jäcä ñanno Ediisawé jataawoncomo wwäiñe, ijimmä wwäiñe mmaja, tönwanno cöna’cwainchaicho chääjadä.

⁵⁹ Aaduwaawä amoojato anooto yä’döa’jäcä, soto cöneejoto yaawä shiichu’cä siicunsidaadoje tödööe. Saacadíaje e’tä’se cönä’ja’to, yuumö eetö joi.

⁶⁰ Yeenö mmaane cönä’döaacä: —Ng’jn, Juanje nei’ñojo; quee cönä’döaacä.

⁶¹ Tönwanno cönä’döa’to chäwwä: —¿Ane’que’nei? A’que dajaane na ajimmotoncomo mädääjato täätö.

⁶² Yuumö cöneecamma’joicho yaawä, täneejojä’e: “ ¿Aaquene ännedö e’täjo’se manä;” quee.

⁶³ Saacadía tömennäämö cöne’catäi yaawä. Edääje cömmennäi: “Juan täätö mä’dä;” quee. Tameedä soto cöneeta’jöjäätöicho yaawä.

⁶⁴ Yaawä dea mma Saacadía cöna’deutai. Töwö cönaajäntai yaawä Wanaadi jäcä aashicha töwa’deuwödö.

⁶⁵ Tameedä ijimmotoncomo cönääcatoncaicho yaawä. Yää jäcä töwa’deuwe cönä’ja’to tameedä Judheea ñancomo, ñanno jöö de’cäconcomo.

⁶⁶ Tameedä etannamo’jödö jooje cöntö’tajä’a’to: —¿Aaquene töwä’döeemö määdhä mude’cä’cä? quee cönä’döa’to. Tönwanno yääje töwä’döe cönä’ja’to Wanaadi ni’wa’tädööje yei’jödö weijäcä.

Saacadía wecanta’ñä’jödö

⁶⁷ Yääje mma yaawä yuumö Saacadía Epíiditu Santo ’je cönä’döi; Wanaadi woije cöna’deuwacä; cönä’döaacä:

⁶⁸ Aashicha wa’deutojooje na töwö Wanaadi, iisadaaediitacoomo Edhaajotoncomo, tösootoi jäcä tötö’tajä’e yeijäcä, cäwaanaca’jocoomo weijäcä mmaja.

⁶⁹ Töwö cuntui Cäwaanacaaneichomo jäduujato, ñäädä dhanoonö Dawí wä’jimmä’tädö dea.

⁷⁰ Jenaadä dea töwö Wanaadi mädä cöneecammajoi töwa’deuwödö ecammannamo aashicha’como wwäiñe.

⁷¹ Töwö cöneecammajoi cutu’de’tännamo jonnoiñe cäwaanacaadöcoomo, cöquimmajä’nenaamo jonnoiñe cäwaanacaadöcoomo mmaja.

⁷² Töwö mädääje cödööato wentumje cadai’choncomo ene’jocoomo weijäcä töwwä, chäänönge tödöödö wetä mmaja töneecamma’jödö aashichaato,

⁷³ yää cadai’choncomo Aawadán wwä cöneecammaichö.

⁷⁴ Töwö Wanaadi cöneecammai Aawadán wwä cutu’de’tännamo jonnoiñe cäwaanacaadöcoomo, tösaade’da yaanontädö tödöödö wetä yaawä cöwwäiñe,

⁷⁵ aashicha dhowaadäädä cöweichöcoomo wetä, chäänönge cöweichöcoomo wetä mmaja, cöweichöcoomoodäje.

⁷⁶ Amäädä shiichu’cä, Wanaadi o’jodhaato wa’deuwödö ecammaneije mätä’täja’de, Cajiichaana owaajo töötäämöje aweijäcä, chäämadö choonecaaneije,

⁷⁷ shootoi owaanomaadöcoomo wetä wääwanaacatoojo jäcä, choone’nadiiyöcoomo encwanno’jotoojo jäcä mmaja.

⁷⁸ Ñäädä Cöwaanadiiyöcoomo cujummatäiñe yeijäcä, wentumje cäneetäiñe yeijäcä mmaja, caju ñano weiyu que cöweijaato.

⁷⁹ Yää na’de ñanno tööjano’taca naatoodö weiyuuducoomoje, ñanno töwä’ja’aamo; täncanoode’da weiñä ai cä’se’täneichomooje mmaja yää na’dede; quee cönä’döaacä Saacadía.

⁸⁰ Yaawä Juan nnejeedö’cä cönaatö’nä’acä; cönsejjeta’dea. Jata ’jemjönö aca töweiye cönä’jaacä iisadaaediitacoomo wwäiñe töwäänejootojo cu’nädö aca töwä’dödö wa’cä.