DOSECHO 8 - Wanaadi A'deddu

Saudo wwä Quidiito sotoi mamincha’jocoomo

¹ Saudo wacö’je Eteewa cöneemaicho. Yää anooto awä soto cönaajäntoicho tumjunne’da Quidiito sotoi Jeduusadén ñancomo maminchadööcomo. Yaawä tameedä ñanno Quidiito sotoi cönäämecantoicho Judheea ña, Samaadiya ña mmaja; anonta’como mma yäätä Jeduusadén ña cönä’ja’to.

² Anejjacoomo soto aashicha’como Eteewa cöneewaacaicho; jooje cönaamoa’to ijunnei.

³ Ñäädä Saudo Quidiito sotoi maminchadööcomooje cönä’jaacä yaawä. Ä’sa waadäi töwoomonge cönä’jaacä; tö’ji’che tömja’ca cönä’jaacä dhanwaacomo, wodiiñamo mmaja, jedeesoje adoojodööcomo wetä yaawä.

Samaadiya ña aashichaato wätunnä ecammajäätö’jödö

⁴ Ñanno Quidiito sotoi, Jeduusadén ñanno cönäämecantoichodö aashichaato wätunnä cöneecammajä’a’to tameedä anejja jataacä töwä’dödööcomo waadäi.

⁵ Yaawä Jediipe, ñanno yäämecanta’como jimmotoncomo, cöntämä Samaadiya ñano jataaca. Iiña soto wwäiñe Jesuuquidiito jäcä cöneecammajä’acä.

⁶ Tameedä soto töwe’jumma cönä’ja’to Jediipe necammajäätödö eta; töneene mmaja cönä’ja’to dea aashichaato iiñödö.

⁷ Jooje odo’sha ’ja’como cönaadoncaicho; töcä’tömjä’ancädäiñe soto acanno odo’sha töweeja’ca cönä’ja’to. Cönaadoncaicho dea jooje änönnä’ja’como, secumja’como mmaja.

⁸ Yääje yeijäcä ta’cwaiñe cönä’ja’to tameedä yää jataawoncomo.

⁹ Yäätä dhanwa cönä’jaacä Simón täätö. Töwö tö’waichö que Samaadiya ñancomo tönencu’täiñe töweiye cönä’jaacä; täneejuque töwäätä’tä cönä’ja’dea.

¹⁰ Tameedä soto dha’deddu töneeta cönä’ja’to, täneejuca’como mmaja, ema’jocoomo mmaja. Tönwanno töwä’döe cönä’ja’to: —Määdhä ñäädä Wanaadi jäduudu ’jano; quee.

¹¹ Tönwanno dha’deddu töneeta cönä’ja’to numa tö’waichö que täncu’to’jocoomo weijäcä.

¹² Yaawä Wanaadi töcaajichaanaije tödöödö jäcä Jediipe necammajäätödö eta’jäcä töwwäiñe, Jesuuquidiito ecammajäätödö eta’jäcä mmaja, ñanno soto cöneecamjöicho; wautisaaje cönä’döjoicho yaawä, dhanwaacomo, wodiiñamo mmaja.

¹³ Simón mmaja cöneecamjöi chea. Yaawä wautisaaje töwä’döja’jäcä Jediipe jadä töwäämannä’e cönä’jaacä. Tönoiñe töneene cönä’jaacä aashichaato tödöödö chäwwä, ene’ju’tojo tödöödö mmaja.

¹⁴ Yaawä anonta’como Jeduusadén ñancomo cöneeta’to aashicha Wanaadi a’deddu ecammajäätödö eta’jödö Samaadiya ñancomo wwä; yääje yeijäcä iiña cönaanontoicho Peedhodo, Juan mmaja.

¹⁵ Peedhodo wä’döa’comjäcä tönwanno Wanaadi wwä cöna’deuwöicho Samaadiya ñancomo quedeiyentecoomo jäcäiñe, Epíiditu Santo ’je yä’dödööcomo wetä,

¹⁶ Epíiditu Santo ’je’da dea yeichomjäcä, chääjäcäiñe ä’tä’da dea yeijäcä; wautisaaje mma cönä’ja’to Jesuuquidiito eetö joi.

¹⁷ Yaawä Peedhodo, Juan tamäädöcoomo cönnöicho ye’cäcäiñe; Epíiditu Santo ’je ñanno cönä’döicho yaawä.

¹⁸ Simón cöneeneaacä Epíiditu Santo ’je soto wä’dödööcomo anonta’como wwä tamäädöcoomo ye’wäiñe tödöödö que. Yaawä töwö jödaata cöneecammaacä anonta’como wwäiñe;

¹⁹ cönä’döaacä chäwwäiñe: —Öwwä änne’täcääde mädä tödöötojo, öwö yaamädö tödööa’jäcä Epíiditu Santo ’je soto ä’döiyetoode; quee cönä’döaacä.

²⁰ Yaawä Peedhodo cönä’döaacä chäwwä: —Ajöödatai nännanö’a’de ajaadä dea. Amäädä ätö’tajä’a täjeemaamö atäi mädä Wanaadi nutuudu.

²¹ Odhoowanoojönö mädä, äwwonoojönö mmaja. Ätö’tajäätödö chäänönge’da na Wanaadi owaadäädä.

²² Ätö’tajäätödö sha’duminchacä mädä ocoone’nadiiyö jonno; Wanaadi wwä adha’deucwä, töwö encwanno’joiye mädä ätö’tajä’aadö.

²³ Yoowanääcä na jooje tö’neiñe aweichö, ocoone’nadiiyö awä töwaatashiichuudä aweichö mmaja; quee cönä’döaacä Peedhodo Simón wwä.

²⁴ Yaawä Simón cönä’döaacä: —Wanaadi wwä adha’deutäcä jääcä, yää mecammaatoodö mma ejucca’no jääcä; quee cönä’döaacä.

²⁵ Yääje mma yaawä töwa’deuwödööcomo’jo, Wanaadi a’deddu ecammajäätödö’jo mmaja, ñanno anonta’como cönennacaicho yaawä Jeduusadén ña, aashichaato wätunnä ecammajä’ancädä Samaadiya ñancomo jata cäcäiñe.

Jediipe acä Eetiyoopía ñano yei’jocoomo

²⁶ Yääje mma yaawä Cajiichaana amoodedö cöna’deuwöi Jediipe wwä; cönä’döaacä: —Ääma’täcä; äjääne shii weja’catoojo suda’wawä, Jeduusadén ñanno Caasa ñano wötäädö tai; quee cönä’döaacä amoode chäwwä. Yää äämä jata ’jemjönö chäcoono wötäädö.

²⁷ Jediipe cönääma’tai yaawä; ääma tai töötädaawä Eetiyoopía ñano acä cönoojodöi. Candaase sotoi cönä’jaacä ñäädä, emuucaajä. Täneejucaato töwö cönä’jaacä, Candaase jödaatai edhaajä. Ñäädä Candaase cönä’jaacä wodi, Eetiyoopía ñano cajiichaanai’chädö. Jeduusadén ñano’jödö yennacaadö ñäädä Eetiyoopía ñano cönä’jaacä, Wanaadi wwä a’deunei’jödö.

²⁸ Töjaatacäi yennacaadö cönä’jaacä yaawä Jediipe acä cönoojodöichodaawä. Tadaada de’wä cöntaacä, Isaía nimennä’jödö a’de’tancädä.

²⁹ Yaawä Epíiditu Santo cönä’döaacä Jediipe wwä: —Amoinche’da äjääne tadaada jäcä; quee.

³⁰ Yaawä amoinche’da Jediipe wöta’jäcä töwö cöneetaacä Isaía nimennä’jödö a’de’tädö ñäädä wwä. Yaawä töwö cöneecamma’joi: —¿Odhoowanääcä nai mädä ma’de’taadö? quee cönä’döaacä.

³¹ Ñäädä Eetiyoopía ñano cönä’döaacä yaawä: —Aaquene mmaja yoowanääcä eichö deeade’, yoowanoomanei töweiye yeichöjöönö; quee cönä’döaacä. Yaawä ñäädä Eetiyoopía ñano Jediipe cönaajimaajoi tönnäcä tadaada de’wä.

³² Edä Wanaadi a’deddu imennaajä töwö cöna’de’taacä: Töwö cönaatadoojoi emaadö wetä oweeja adäädö töweiye naichöje; äucwätä’da töwö cönä’jaacä, tö’jotö töcaadawä oweeja ecaadaucwa’da töweiye naichöje mmaja.

³³ Ema’jödööje cönä’döjoi chäwwäiñe; tönwanno chäänönge ännö’da cöneiya’to. ¿Änääcö dhatö’jödö ämme’cu’tädö deeade’ ? tämaane emaatö’da chäwwäiñe; queeto cöna’de’taacä ñäädä Eetiyoopía ñano.

³⁴ Yaawä ñäädä Eetiyoopía ñano Jediipe cöneecamma’joi: —¿Änääcö ecammancädä yääje cömmennäi ñäädä Wanaadi wa’deuwödö ecammanei? ¿Tojääcä ’ja, anejja jäcääne? Ecammajä’cä öwwä; quee cönä’döaacä Jediipe wwä.

³⁵ Yaawä Wanaadi a’deddu imennaajä ñäädä na’de’tä’jödö jäcä Jediipe cönaajäntäi chäwwä ecammajäätödö Jesuuquidiito jäcä.

³⁶ Yaawä töwwäiñe tuna ija’dätäädawä ñäädä Eetiyoopía ñano cönä’döaacä Jediipe wwä: —Edä na tuna; ¿aaquene eduuwa wautisaaje wä’döja’jäcä? quee cönä’döaacä.

³⁷ Jediipe cönä’döaacä chäwwä: —Ätö’tajäätödö jadäädä ecaanö’a’jäcä, wautisaaje ä’döjoojai ma; quee. Ñäädä cönä’döaacä yaawä: —Wecaanö’a Jesuuquidiito Wanaadi nnedööje yeichö; quee.

³⁸ Yaawä tadaada cöneedennanö’joi; a’nädäncädä cönä’toicho na’cwaca, Jediipe, Eetiyoopía ñano mmaja. Jediipe wautisaaje cönnöi yaawä.

³⁹ Yaawä na’cwacanno töwäncudaawäiñe Epíiditu Santo Jediipe cönaadäi jadheedä; Eetiyoopía ñano aneene’da cöneiyacä yaawä. Ta’cwaiñe cöntämä yaawä.

⁴⁰ Jediipe mmaane Asooto ña cönäädantäi yaawä. Aashichaato wätunnä cöneecammajäätöi tameedä jata waadäi, Seesadeea ña töwä’dödö jonaane.