DOSECHO 6 - Wanaadi A'deddu

Aacä amoojato diyaacono ewaaca’jocoomo

¹ Yaawä quedeiyentecoomo cöneejanga’to jooje. Ñanno quidiiyeeco a’deucwa’como cönenta’me’ca’to yaawä judhío a’deucwa’como jäcä. Tönwanno cönä’döa’to: —Anooto waadäi äwanshi ecaamodaawä chääwa’cä ä’tu’da weneene ñaa jimmä iiño wääma’jödö wwäiñe; quee cönä’döa’to.

² Yaawä ñanno amoojadooto de’wä aaco’como anonta’como tameedä quedeiyentecoomo cöni’jummaicho; cönä’döa’to chäwwäiñe: —Wanaadi a’deddu ecammajäätödö e’nomjajai’cha ñaa na äwanshi ecaamodö wetä.

³ Yääje yeijäcä ajimmotoncomo aneedantätääcä aacä amoojato dhanwaacomo, aashicha’como chääcadö dea, towaanojo’na’como, Epíiditu Santo jäduudu ’ja’como mmaja. Ñanno wwäiñe mädä tödööjotääcä.

⁴ Ñaa mmaane Wanaadi a’deddu ecammajäätödö jäcä eijai ñaa na, Wanaadi wwä wa’deunä jäcä mmaja; quee cönä’döa’to anonta’como quedeiyente wwäiñe.

⁵ Yääje ya’deuwödööcomo yaacö’comje cönä’jaacä ñanno. Yaawä tönwanno cöneewaacaicho Eteewa; ñäädä cönä’jaacä Epíiditu Santo jäduudu ’je; jooje töneecanö’e cönä’jaacä. Jediipe mmaja cöneewaacaicho dea; Podoocodo mmaja; Niicanoodo mmaja; Timón mmaja; Paadameena mmaja; Niicodá mmaja, ñäädä Antiyooquía ñano, judhíoje yääwaacaajä.

⁶ Yaawä anonta’como döiñaiñe cönaadoicho. Ñanno anonta’como tamäädöcoomo cönnöicho ye’cäcäiñe; Wanaadi wwä cöna’deuwöicho chääjäcäiñe.

⁷ Yaawä Cajiichaana Jesuuquidiito a’deddu jooje cöneejangacä. Wanna soto quedeiyenteje cönä’döjoicho Jeduusadén ña; Wanaadi wwä töwa’deuwaamo jadä’jödöödä cöneecamjöicho.

Eteewa ajäi’jödö

⁸ Eteewa wwä cönä’jaacä Wanaadi nutuudu ecaanö’tojo; Wanaadi jäduudu ’je cönä’ja’dea. Töwö soto neneedöcoomoje aashichaato tönnöe cönä’jaacä, ene’ju’tojo mmaja.

⁹ Yaawä anejjacoomo judhío we’jummato’como tacancomo Eteewa jadä cönäätäccujä’a’to. Ñanno cönä’ja’to tanontäjä’aamo wätu’ca’como. Sideene ñancomo mmaja cönäätäccujä’a’to dea Eteewa jadä, Aadejantidía ñancomo mmaja, Sidiisiya ñancomo mmaja.

¹⁰ Tönwanno chaana’cajai’cha cönä’ja’to Epíiditu Santo nutuudu sejje que Eteewa wa’deuwödö weijäcä.

¹¹ Yaawä tönwanno cöneejemaicho anejjacoomo dhanwaacomo Eteewa jäcä cone’da ya’deuwödööcomo wetä. Ñanno dhanwaacomo Eteewa cöneementa’to; cönä’döa’to: —Ñaa cöneetaacä cone’da Eteewa wa’deuwödö Moisé jäcä, Wanaadi jäcä mmaja; quee cönä’döa’to.

¹² Yääje töwa’deuwödööcomo que Eteewa jäcä soto cöneetömaajoicho, inchoncomo mmaja, judhío owaanomannamo mmaja. Yaawä Eteewa maminchadö’jo ñanno cönaajoicho, cönaadoicho yaawä äcamma’jonnamo döiñaiñe.

¹³ Tönwanno Eteewa ementännamo cöneejodöicho; ñanno cönä’döa’to: —Määdhä dhanwa cone’da töwa’deuwe weneene Wanaadi weichojo amääajä jäcä, jenaado’jä waanontänä jäcä mmaja.

¹⁴ Edääje yä’dödö ñaa cöneetaacä: “Jesuuquidiito Naasade ñano Wanaadi weichojo nichaadaca’de, Moisé waanontä’jödö ninwacaama’dede;” quee yä’dö’jödö ñaa cöneetaacä; quee cönä’döa’to ñanno Eteewa ementännamo.

¹⁵ Yaawä tameedä ñanno cajiichaanacoomo, anejjacoomo yaatajiima’como mmaja, cöneene’ma’to Eteewa jedö; Wanaadi amoodedö jedö nönge ijeedö cönä’jaacä.