DOSECHO 5 - Wanaadi A'deddu

Aananía acä Saujiida conemjönö iiñö’jocoomo

¹ Anejja dhanwa mmaja tönaudädö cöneejemaajoi chea. Ñäädä cönä’jaacä Aananíaje chäätö; ijiiñamo eetö ’quene Saujiida.

² Ñäädä Aananía cönäätäncu’täi yää töneejemaajo’jödö jäcä. Töwö anonta’como wwä cuntui yaato mma, tameedäädotooje e’tancädä; yaato mmaane töwwä cönnoi. Ijiiñamo dhowaanäcä cönä’jaacä yäätäncu’tädö.

³ Yaawä Peedhodo cönä’döaacä Aananía wwä: —Aananía, ¿aaquene Caajuushawa ätö’tajäätödö aca nä’döi chea Epíiditu Santo encu’tädo wetä äwwä anaudä’jödö eje’jödö jäcä?

⁴ Awa’de ännödööje yää cönä’jaacä. Yää ’jeje, ejeemaja’jäcä, ännödööje dea cönä’jaacä yää jödaata chääje’jödö. ¿Ane’que’nei mädääje ätö’tajä’anä? Sotoojönö mencu’ta, Wanaadiiñe; quee cönä’döaacä Peedhodo Aananía wwä.

⁵ Yää eta’jäcä Aananía cöne’duccai töwäämadööje mma. Tameedä yää jäcä etannamo’jödö cönääcatoncaicho jooje.

⁶ Yaawä chääquejöödö yontädö’jo ääjömannamo cönaadoicho ewaacadö wetä.

⁷ Yääje mma yaawä aaduwaawä shii wä’seca’jödö yeichö Aananía jiñamomjödö cönoomomöi yaawä. Töwö dhowaanäcä’da cönä’jaacä töiño wääma’jödö.

⁸ Yaawä Peedhodo ñäädä cöneecamma’joi: —¿Yää ’cäwa’cä dämma cönä’jaacä anaudo’jocoomo eje’jödö? quee cönä’döaacä. Ñäädä wodi cöneccujä’acä: —Ee, yää ’cäwa’cä mma’ne; quee cönä’döaacä.

⁹ Yaawä Peedhodo cönä’döaacä chäwwä: —¿Ane’que’nei adha’deutäne Epíiditu Santo oneejadö wetä? Canno ñanno oiño jaano ewaacannamo’jödö; amäädä daja adhaadäaato dea eduuwa; quee Peedhodo cönä’döaacä.

¹⁰ Yaawä dea mma ñäädä wodi cöne’duccai Peedhodo o’wawä, töwäämadööje mma. Ñanno ääjömannamo womonga’comjäcä yäämaajä cöneedantoicho; cönaadoicho yaawä iiño’jödö nnäcä ewaacadö wetä.

¹¹ Tameedä quedeiyentecoomo, anejjacoomo yää jäcä etannamo mmaja, cönääcatoncaicho jooje.

Anonta’como wwä ene’ju’tojo tödö’jödö

¹² Ñanno anonta’como jooje aashichaato tönnöe cönä’ja’to, ene’ju’tojo mmaja. Tameedä quedeiyentecoomo töwe’jumma cönä’ja’to Saadomón Jesai’chädö tawä.

¹³ Anejjacoomo soto mmaane tösaade töweiye cönä’ja’to, chääjadäiñe töwoojodö’seiñe’da. Yääje yeichaame tameedä soto wacö’comje ñanno quedeiyentecoomo cönä’ja’to.

¹⁴ Jooje töwääwaaca cönä’ja’to quedeiyenteje, dhanwaacomo, wodiiñamo mmaja.

¹⁵ Ñanno soto cädäija’como tömja’ca cönä’ja’to jödo’na; ääma taawä tönnöe cönä’ja’to chä’wötööcomo jo, Peedhodo owaajo, yeeja’dätäädawä chääcato ajoojodö wetä.

¹⁶ Anejjacoomo amoinchemjöncomo ijaatadööcomo töwe’e cönä’ja’to Jeduusadén ña, cädäija’como dha’me, odo’sha ’ja’como dha’me mmaja. Tameedä töwaadonca cönä’ja’to.

Peedhodo, Juan imaamincha’jocoomo

¹⁷ Yaawä Wanaadi wwä töwa’deuwaamo edhaajotoncomo, ijimmotoncomo saadhuseeo mmaja, tö’neiñe cönä’ja’to.

¹⁸ Yääje yeijäcä tönwanno anonta’como cönaajoicho; jedeeso ewöötö’tädö taca cöneewaacaicho yaawä.

¹⁹ Yaawä, coijai, Cajiichaana Jesuuquidiito amoodedö mönaatata cöna’ducai anonta’como wwäiñe; cönä’döaacä chäwwäiñe:

²⁰ —Ojoncomo Wanaadi weichojo taca; soto wwäiñe ecammajä’tantäcä edä eduuwaato weichojo jäcä; quee cönä’döaacä amoode chäwwäiñe.

²¹ Yää eta’jäcä ñanno anonta’como cöneeja’caicho. Jenamma naadöje tönwanno cöntonto yaawä Wanaadi weichojo taca, jenaadäne; yäätä soto cönoowanooma’to. Yaawä Wanaadi wwä töwa’deuwaamo edhaajotoncomo, chääjadoncomo mmaja, cöni’jummaicho tameedä äcamma’jonnamo, ñanno iisadaaediitacoomo ntonta’como. Yää ’jeje jedeeso ewöötö’tädö tacanno anonta’como cönne’ja’to.

²² Waadiya cöntonto yaawä ñanno wetäiñe; a’que cöneedantoicho. Tanontännamo’jödö döiña cönennacaicho dea yaawä;

²³ cönä’döa’to: —Yää jedeeso ewöötö’tädö ñaa nedantäi ta’duqueedä; tajoijo nä’jaanä. Yäätä suddau nä’janto, mönaatata edai’chännamo. Yaawä ñaa wwä a’duca’jäcä tasse’da ñaa nedantäi; soto ’je’da nä’jaanä chaaca; quee cönä’döa’to ñanno waadiya.

²⁴ Yää eta’jäcä Wanaadi wwä töwa’deuwaamo edhaajotoncomo wwä, Wanaadi weichojo edai’chännamo edhaajotoncomo wwä mmaja, anejjacoomo Wanaadi wwä töwa’deuwaamo wwäiñe mmaja, tönwanno cöntö’tajä’a’to: “ ¿Aaquene töwä’döeemö mädä?” quee.

²⁵ Yaawä dhanwa cönä’döi yöiñaiñe; cönä’döaacä: —Ñanno dhanwaacomo mujiiyatoodö Wanaadi weichojo taca naato, soto owaanomaadöcoomoje; quee cönä’döaacä.

²⁶ Waadiya edhaajotoncomo cöntonto yaawä suddau jadäiñe ñanno anonta’como wetäiñe. Cönaadoicho yaawä imaaminchancädäiñe’da soto wwäiñe täju que töwääjätöödöcoomo queiñe.

²⁷ Yaawä adääa’comjäcä äcamma’jonnamo je’tacaiñe cönnöicho. Ñäädä Wanaadi wwä töwa’deuwaamo edhaajotoncomo cönä’döaacä chäwwäiñe:

²⁸ —“Jesuuquidiito jäcä soto monoowanoomatäi’che eduuwa;” que jönca ñaa cönä’döaacä äwwäiñe. Yääje yeichaame tameedä Jeduusadén ñancomo mi’jedaato äwäätunnäichomo que. Ñaa woijatooje töne’tä määnetääne ñäädä Jesuuquidiito ema’jödö; quee cönä’döaacä.

²⁹ Yaawä Peedhodo, anejjacoomo anonta’como mmaja, cöneccujä’a’to; cönä’döa’to: —Wanaadi woijeene eijai ñaa na, soto woije’daane.

³⁰ Cadai’choncomo Wanaadiyö Jesuuquidiito cönaadoncai yäämaajo jonno, ñäädä cuduusa jäcä ajoijodö que memaatäneedö.

³¹ Ñäädä Wanaadi Jesuuquidiito cönnöi tönnäcä, ämu’demjönö dö’se; o’jodhe cönnöi, Cajiichaanaje mmaja, Äwaanacaaneije mmaja, tötö’tajäätödööcomo sha’duminchadö wetä iisadaaediitacoomo wwä, choone’nadiiyöcoomo ätäncwanno’joiye yaawä.

³² Mädä jäcä ecammajä’neije ñaa na, Epíiditu Santo mmaja. Wanaadi Epíiditu Santo tunu’e weneene tameedä töwoije tödöönei wwä; quee Peedhodo cönä’döa’to äcamma’jonnamo wwä.

³³ Yää eta’jäcä ñanno wwäiñe jooje cönäätömaicho yaawä, anonta’como ema’seiñe tödööene.

³⁴ Yaawä äcamma’jonnamo antawäiñe cönä’jaacä jaadiseeo, Camaadiyeede täätö. Töwaanojo’ne töwö cönä’jaacä jenaado’jä waanontänä owaanomaadö jäcä. Tameedä soto tönoiñe töneene cönä’ja’to. Ñäädä Camaadiyeede cönammöi yaawä; anonta’como jödo’na cömja’canö’joicho a’dhe.

³⁵ Yaawä töwö cönä’döaacä ñanno cajiichaanacoomo wwäiñe: —Änwanno iisadaaediitacoomo; odhoowadäädäiñe eichäcä, canno dhanwaacomo jäcä conemjönö männöto’no.

³⁶ Odhoowanääcäiñe na eduuwaiche mma Teuda wei’jödö, ñäädä täneejucaatoje töwäätä’tä cönä’ja’dö. Jooje shootoi cönä’ja’to, tooni soto soto. Ñäädä Teuda cönäätämaajoi yaawä; ñanno shootoi’jödö cönäämecantoicho yaawä, a’que tödööene.

³⁷ Yää ’jeje yaawä soto ime’cu’tädööcomo awä Juudha cönä’ja’dea, ñäädä Caadideea ñano. Jooje cönä’ja’to dea shootoi. Ñäädä mmaja cönäätämaajoi chea yaawä; shootoi’jödö cönäämecantoicho dea.

³⁸ Yääje yeijäcä edääje wä’döa äwwäiñe: Canno dhanwaacomo jäcä’daane eichäcä; conemjönö männötäi’che chääjäcäiñe. Soto woijato mma yeiya’jäcä mädä naatoodö nataamea’de.

³⁹ Dha’da ’quene Wanaadi woijato yeiya’jäcä änwanno acoichajoojai’cha maato mädä. Odhoowadäädäiñe eichäcä, Wanaadi jäcä mma conemjönö männöto’no; quee cönä’döaacä Camaadiyeede chäwwäiñe.

⁴⁰ Ñanno cöneeta’to dha’deddu. Anonta’como cöna’dejjaicho yaawä; taiju’jä’e mma cönaiju’jätöicho; cönä’döa’to chäwwäiñe: —Jesuuquidiito jäcä mma maneecammajä’täi’che eduuwa; quee cönä’döa’to. Cönenno’jaicho yaawä.

⁴¹ Ñanno anonta’como cöntonto yaawä täcamma’jonnamo jonnoiñe. Tönwanno ta’cwaiñe cönä’ja’to Jesuuquidiito ecamjödö jo’tädööje töwäntunamjödööcomo weijäcä, Wanaadi woije dea.

⁴² Tönwanno ane’nomja’da cöneiya’to anooto waadäi Jesuuquidiito jäcä ecammajäätödö, chääjäcä soto owaanomaadöcoomo mmaja Wanaadi weichojo taca, immaichomo waadäi mmaja.