DOSECHO 4 - Wanaadi A'deddu

Äcamma’jonnamo je’tacaiñe Peedhodo, Juan wei’jocoomo

¹ Peedhodo, Juan wwäiñe ecammajäätödaawä ñanno Wanaadi wwä töwa’deuwaamo cöneejoto, Wanaadi weichojo edai’chännamo edhaajotoncomo jadä, saadhuseeo jadäiñe mmaja.

² Tönwanno töwäätöma cönä’ja’to soto owaanomaadöcoomo weijäcä Peedhodo, Juan wwäiñe, töwäämaajo jonno Jesuuquidiito waadonca’jödö jäcä ecammajäätödö weijäcä mmaja chäwwäiñe.

³ Ñanno saadhuseeo Peedhodo cönaajoicho, Juan mmaja; jedeeso ewöötö’tädö taca cöneewaacaicho yaawä yää jenamma tödööene, co’mannäje yei’jödö weijäcä.

⁴ Yääje yeichaame ñanno Peedhodo necammajäätö’jocoomo ecaanö’nnamo jooje cönä’ja’to. Dhanwaacomo quedeiyentecoomo cönä’ja’to ijaatoodea miideto dö’se.

⁵ Yää jenamma naadöje Jeduusadén ña cöne’jummaicho yaawä ñanno soto cajiichaanaichomo, inchoncomo mmaja, judhío owaanomannamo mmaja.

⁶ Aná mmaja chääjadäiñe cönä’ja’dea, ñäädä Wanaadi wwä töwa’deuwaamo edhaajotoncomo. Caijaasa mmaja, Juan mmaja, Aadejantudu mmaja cönä’ja’to dea, tameedä Wanaadi wwä töwa’deuwaamo edhaajotoncomo jimmä mmaja.

⁷ Ñanno Peedhodo cönne’joicho yaawä, Juan acä. Tantawäiñe tödöödöcoomo’jo cöneecamma’joicho: —¿Änääcö necamma’jödö woije mädääje maato? ¿Änääcö eetö joi tönnöe määnetääne? quee cönä’döa’to Peedhodo wwäiñe.

⁸ Yaawä Peedhodo Epíiditu Santo jäduudu que cönä’döaacä chäwwäiñe: —Etaatäcä änwanno soto cajiichaanaichomo, änwanno mmaja iisadaaediita ntonta’como.

⁹ Änwanno ñaa mecamma’jaato määdhä cädäijato’jödö adonca’jödö jäcä, chääjäcä aashichaato tödö’jödö jäcä.

¹⁰ Yääje yeijäcä aneetadööcomooje ñaa necammajä’a, tameedä iisadaaediitacoomo dhowaanäcäiñe yeichö wetä Jesuuquidiito Naasade ñano eetö joi määdhä mene’maatoodö waadonca’jödö yeichö. Ñäädä dea Jesuuquidiito änwanno majoijotääne cuduusa jäcä. Wanaadi cönaadoncai yaawä yäämaajo jonno.

¹¹ Ñäädä Jesuuquidiito yää täju änwanno maa amännamo michiiñeme’täneedö. Yää täju anno’tojooje na eduuwa.

¹² Anejja wwä wääwanaacatoojo ejoodöjai’cha caato; anejja äätö ’je’da na edä nono de’wä soto wääwanaacato’como; quee cönä’döaacä Peedhodo.

¹³ Ñanno soto cajiichaanaichomo cöneeta’jöjäätöicho yaawä jäduuje Peedhodo, Juan wa’deuwödööcomo eta’jäcä. Tönwanno dhowaanäcäiñe cönä’jaacä Peedhodo jooje oowanooma’da yei’jocoomo. Yaawä Jesuuquidiito jadoncomo’jödööje yeichöcoomo cöntö’tammecöicho.

¹⁴ Ñäädä secumjato’jödö adoncaajä mmaja yäätä cönä’ja’dea; yääje yeijäcä yää jäcä ya’deuto’como ’je’da cönä’jaacä.

¹⁵ Yaawä ñanno cajiichaanacoomo Peedhodo cömja’canö’joicho jödo’na, tönwannoje dea töwa’deuwödööcomo wetä.

¹⁶ Edääje cönä’döa’to: —¿Aaquene canno dhanwaacomo tödööemje naicho? Tameedä Jeduusadén ñancomo wwä tacaade na yää aashichaato iiñö’jocoomo; ijoome’däjai’cha caato.

¹⁷ Edääje tödööjai caato tameedä soto wwäiñe mädä wecaatadö queiñe: Täcaatoncaane queecatoncatäiye, eduuwa naadö jonno anejjacoomo wwä Jesuuquidiito jäcä aneecammajäätö’da yeichöcoomo wetä; quee cönä’döa’to Peedhodo jäcäiñe.

¹⁸ Yää ’jeje tönwanno Peedhodo cöna’dejjaicho, Juan mmaja; cönä’döa’to chäwwäiñe: —Jesuuquidiito jäcä maneecammajä’täi’che eduuwa; chääjäcä soto monoowanoomatäi’chede; quee cönä’döa’to.

¹⁹ Yaawä Peedhodo cöneccujä’a’to: —¿Änääcö a’deddu etaajai ñaa nichö’taanä äwwäiñe Wanaadi owaadäädä, änwanno ’ja, Wanaadiiñe’ ?

²⁰ E’nomjajai’cha ñaa na töneene’jödö ecammajäätödö, töneeta’jödö mmaja; quee cönä’döa’to Peedhodo, Juan mmaja.

²¹ Yaawä ñanno soto cajiichaanaichomo töwwäiñe Peedhodo euwö’jejeiñe cönenno’jaicho. Tönwanno imaaminchajaiñe’da cönä’ja’to tameedä soto aashicha töwa’deuwe yeichomjäcä Wanaadi jäcä, yää cöneeja’dätäichö jäcäinchädä.

²² Ñäädä dhanwa, yää aashichaato tödöödö que cönaadoncaichö, cönä’jaacä aacä soto weduuto e’jodhe.

Quedeiyentecoomo töjääduduucomo ñe’cato’jocoomo

²³ Yääje mma yaawä tonno’ja’comjäcä ñanno Peedhodo, Juan cöntonto töjimmotoncomo döiñaiñe. Chäwwäiñe cöneecammajäätöicho töwwäiñe tameedä Wanaadi wwä töwa’deuwaamo edhaajotoncomo wa’deuwö’jocoomo, inchoncomo wa’deuwö’jocoomo mmaja.

²⁴ Yää eta’jäcä tujuumä cöna’deuwöicho yaawä Wanaadi wwä; cönä’döa’to: —Cajiichaana, ñäädä amäädä Wanaadi, caju dönei’jödö, nono dönei’jödö mmaja, dama dönei’jödö mmaja, tameedä yeichö wa’cä tödöönei’jödö mmaja.

²⁵ Amäädä adhaanonö Dawí Epíiditu Santo woije edääje ma’deudeme’jone: ¿Ane’que’nei judhíojöncomo newoodoichanto? ¿Ane’que’nei sotoocomo tönwanno tödööjaichojööno jäcä nichö’tajä’anto?

²⁶ Tameedä cajiichaanacoomo cöne’jummaicho, soto edhaajotoncomo cöne’jummaicho dea, Cajiichaana chu’de’tädö wetä, Quidiito chu’de’tädö wetä mmaja, ñäädä Cajiichaana anoonö; quee mä’döaaquene Dawí nchai.

²⁷ “Edä jataawä dea Edoodhe cöne’jummaicho Ponsiyo Pidaato jadä, judhíojöncomo jadä mmaja, iisadaaediitacoomo jadä mmaja. Tönwanno cöne’jummaicho ännedö aashichaato Jesuuquidiito chu’de’tädö wetä, ñäädä Äwaanacaaneije ane’tä’jödö.

²⁸ Mädääje tönwanno cönnöicho tameedä jenaadä äntö’tammecöödö woije töweeja’dä’emööje cönä’ja’dö.

²⁹ Cajiichaana, eduuwa tönwanno ñaa ecaatonca’se naato; yääje yeijäcä ñaa jäduudu änu’cä, ñaa adhaanonö, tösaade’da adha’deddu ñaa ecammajäätöiye.

³⁰ Äjäädudu que cädäija’como adoncacooto, aashichaato mmaja tödööcäde, ene’ju’tojo mmaja, ännedö Jesuuquidiito eetö joi; que Wanaadi wwä cönä’döa’to ñanno quedeiyentecoomo.

³¹ Yää ’jeje töwa’deuwödööcomo jäcä töwä’ca’comjäcä conäätu’mei yaawä ye’jumma’como dö’tä. Tameedä tönwanno Epíiditu Santo jäduudu ’je cönä’döicho; tösaade’da Wanaadi a’deddu cöneecammajä’a’to.

Tameedäädotooje quedeiyentecoomo nsomaadö wei’jödö

³² Tameedä ñanno ecaanö’nnamo aata’deucwe töweiye cönä’ja’to, tooni chö’tajäätödööcomo cönä’ja’dea. Tönnödööcomo töjääcäjeene töwwoncomooje ane’tä’da cönä’ja’to; tameedäädotoojeene tönnöe cönä’ja’to.

³³ Ñanno anonta’como jooje jäduuje töneecammajä’e cönä’ja’to töwäämaajo jonno Cajiichaana. Jesuuquidiito waadonca’jödö jäcä. Wanaadi tameedä töni’wa’täiñe töweiye cönä’jaacä.

³⁴ Yäntunamjödö ’je’da cönä’jaacä dhantawäiñe. Ñanno tönaudäca’como, tömmaicha’como mmaja, yää töneejemaajo cönä’ja’to;

³⁵ chääje’jödö tunu’e cönä’ja’to yaawä anonta’como wwä. Ñanno töneecamo cönä’ja’to yaawä a’ca’como wwä.

³⁶ Ñanno quedeiyentecoomo antawäiñe cönä’jaacä dhanwa, José täätö; dewiitaje ñäädä cönä’jaacä, Chiipede antadö ña yennu’jödö. Waanaweeje cöne’ta’to ñanno anonta’como. Ya’dänei, quee töwä’dö’se yeichö.

³⁷ Ñäädä José tönaudädö cöneejemaajoi; chääje’jödö cuntui yaawä anonta’como wwä.