DOSECHO 28 - Wanaadi A'deddu

Maadata antadö ña Paudo wei’jödö

¹ Yääje mma yaawä nono de’cäi tameedä ñaa wä’döa’jäcä ñaa owaanäcä cönä’döi yaawä Maadata antadööje yeichö.

² Ñanno yää de’woncomo aashicha ñaa döneeto. Tönwanno jooje wa’to cönqueme’toicho cämme yeijäcä, conoojoje yei’jödö weijäcä mmaja. Tönwanno ääsunuue ñaa a’dejjaneeto yaawä.

³ Yaawä Paudo wa’to cöni’jummaacä; ya’tädaawä chäwwä äcääyu cöneeja’cai yää antai, ta’nato e’nei. Paudo cöneecai yaawä dhamäädö jäcä.

⁴ Äcääyu wwä eecadö eneea’jäcä ñanno yää antadö de’woncomo tönwannoje dea cönä’döa’to: —¿Soto emaanei’chaane mä’dä? Töwö nääwanaacai na’cwacanno; yääje yeichaame eduuwa Wanaadi woije nääma äcääyu canaadöje; quee cönä’döa’to.

⁵ Paudo tamäädö u’mamöödö que äcääyu cöneemai wa’to nwaca; se’ne’da cönä’jaacä chäwwä.

⁶ Ñanno soto Paudo cöneene’ma’to: “ ¿Ächännauwä’cä awootai? ¿Ächännauwä’cä äämatai?” quee cöntö’tajä’a’to. Yää ’jeje numa’cä yä’döa’jäcä ääma’da cöneiyacä. Edääje daja ñanno soto cöntö’tajä’a’to yaawä: “Wanaadi’chaane mä’dä;” quee daja.

⁷ Yäätä amoinche’da cönä’jaacä audaajä, yää antadö de’woncomo cajiichaanai’chädööcomo naudädö, ñäädä Puupidiiyu tääto. Ñäädä tömmai chaca ñaa amonno’jone; aashicha ñaa döne. Chääjadä ñaa cönä’jaacä aaduwaawä anooto.

⁸ Töwö yuumö cönä’jaacä tä’wötö jo, cädäije; töweedö’que cönä’jaacä, töweeca mmaja. Paudo cöntämä ñäädä cädäijato döiña. Töwö tamäädö cönnöi ye’wä; Wanaadi wwä cöna’deuwöi chääjäcä. Ñäädä cädäijato cönaadoncai yaawä.

⁹ Yää ’jeje anejjacoomo cädäija’como cöneejoto dea yaawä, yää antadö de’woncomo dea. Tameedä cönaadoncaicho.

¹⁰ Tönwanno jooje aashichaato cönnöicho ñaa jäcä. Yaawä yäätonno ñaa wääma’tädaawä tönwanno ñaa wwä cunu’jätöicho tameedä ñaa wötäädawä tujunnato.

Dooma ña Paudo wä’dö’jödö

¹¹ Yääje mma yaawä aaduwaawä nuunä yää antadö de’wä töwä’döa’jäcä ñaa cönääma’täi yäätonno jidaawa Aadejantidía ñano awä. Yäätä Maadata antadö ña tu’que yeichö ija’do’jonei’jödö cönä’jaacä yää jidaawa. Chääjäcä cönä’jaacä yaanadiiyöcoomo cu’taajä, ñanno Caatudu, Poodu mmaja.

¹² Yaawä ñaa cönaajäi Siidacuusa ñano wä’täi awä. Yäätä ñaa cönä’jaacä aaduwaawä anooto.

¹³ Yäätonno ñaa cöntämä ije’wacääcä Deejiyo ña tödööene. Yää jenamma naadöje aashicha jejeichä cöna’jimmaacä, shii weja’catoojo suda’wawonno. Yää ’jejaato anooto awä ñaa cönä’döi yaawä Puuteoodi ña.

¹⁴ Yäätä quedeiyentecoomo ñaa cöneejodöi. Ñanno tödöiñaiñe ñaa amonno’joneeto; chääjadäiñe ñaa cönä’jaacä tooni semaana. Yää ’jeje ñaa cönääma’täi Dooma ña.

¹⁵ Ñanno Dooma ñancomo quedeiyentecoomo wwä tacaade ñaa wä’dödö cönä’jaacä. Yääje yeijäcä tönwanno amoinche cöneejoto ääma tai, ñaa ejoodödö wetä. Aapiyo ’Dodoi yöiña tödööene cöneejoto, Aaduwaawä Maa Wönö’tojo döiña tödööene mmaja. Ñanno quedeiyente eneea’jäcä Paudo ta’cwaiñe cönä’jaacä yaawä; aashicha cöna’deuwöi yaawä Wanaadi wwä.

¹⁶ Yaawä Dooma ña ñaa wä’döa’jäcä ñanno suddau jedeesoja’como cuntuicho waadiya edhaajotoncomo wwä. Paudo mmaane töudäje chä’sadö cöneecammaicho; tooni suddau edai’chäneije cönä’jaacä.

Dooma ña Wanaadi a’deddu Paudo necammajäätö’jödö

¹⁷ Yääje mma yaawä aaduwaawä anooto yä’döa’jäcä Paudo cöna’dejjaicho ñanno judhío Dooma ñancomo, täneejuca’como dea mma. Ye’jumma’comjäcä Paudo cönä’döaacä chäwwäiñe: —Jimmä, judhío jäcäiñe conemjönö ännö’da weichaame, cadai’choncomo wätunnäichomo jäcä cone’da a’deuwö’da weichaame mmaja, Jeduusadén ñancomo yu’neto domaanocoomo wwä, jedeesoje yöödödö wetä yaawä chäwwäiñe.

¹⁸ Yaawä domaanocoomo wwä yeecamma’jojä’a’jäcä, tönwanno yu’ca’se cönä’ja’to, yeemajai’cha töweichomjäcä, conemjönö tödö’jödööjönö öwwä.

¹⁹ Judhío mmaane yu’cajo’se’da cönä’ja’to. Yääje yeijäcä acu’shänä wwadäädä we’tojo we’ca’ne, a’que yeichaame öwwä jimmä jäcä täcammaamö.

²⁰ Yääje yeijäcä mana’dejjato öwö, adheenedööcomo wetä, äwwäiñe wa’deuwödö wetä mmaja. Öwö jedeesoje wa jönaawä mmädä, töneecanö’e weijäcä Wanaadi necamma’jödö, yää tameedä iisadaaediitacoomo mmaja necaanö’aatoodö dea; quee cönä’döaacä Paudo ñanno judhío Dooma ñancomo wwäiñe.

²¹ Yaawä ñanno cönä’döa’to Paudo wwä: —Judheea ñancomo jajeeda änne’jo’da naato ñaa wwadäädä amäädä äjääcä. Ñaa jimmä iiñancomo we’a’como conemjönö äjääcä aneecammajäätö’da mmaja naato dea.

²² Eta’se ñaa na äwäätunnäi. Tacaade ñaa wwä na tameedä yeichö wa’cä cone’da töwa’deuwe yeichöcoomo mädä eduuwaatoje weichojo jäcä; quee cönä’döa’to.

²³ Yaawä töwe’jummato’como anooto cuncu’nä’toicho. Yää anooto awä jooje soto cöne’jummaicho Paudo wä’döaajä cönä’ja’dö döiña. Yaawä chäwwäiñe Paudo cöneecammajäätöi Wanaadi töcaajichaanaije tödöödö jäcä; jenaadäne yaajäntä’jödö töco’mannä’eene cöneecammajäätöi. Wanaadi nnedööje Jesuuquidiito yeichö töwö cöneecammajäätöi chäwwäiñe, Äwaanacaaneije yeichö mmaja. Moisé nimennä’jödö ai chea töwö cöneecammajä’acä yääje yeichö, Wanaadi wa’deuwödö ecammannamo nimenno’jocoomo ai mmaja.

²⁴ Anejjacoomo aashicha cöneeta’to ñeecammajäätödö; anejjacoomo ’quene aneecamjö’da cöneiya’to.

²⁵ Äänönge’da chö’tajäätödööcomo cönä’jaacä. Cönaajäntoicho yaawä töweeja’cadööcomo. Yaawä Paudo cönä’döaacä chäwwäiñe: —Chäänönge Epíiditu Santo cöna’deuwöi cadai’choncomo Isaía ntai, ñäädä Wanaadi wa’deuwödö ecammanei’jödö. Edääje töwö cönä’döaacä:

²⁶ Äjääne ñanno soto wwadäädäiñe; edääje caichä’de chäwwäiñe: Änwanno äwwäiñe etaajä’taame aneeta’da maato’de; äwwäiñe ene’mataame mmaja, äntö’tammecö’da maato’dede; quee caichä’de chäwwäiñe.

²⁷ Canno soto töwäätuujacoone’da naato, töjaanaque’daiñe mmaja, tänu’dueiñe mmaja naato dea, tänuuducoomo que aneene’da töweichöcoomo wetä, töjaanadööcomo que aneeta’de töweichöcoomo wetä mmaja, chö’tajäätö’noto yaawä, äntö’tammecö’noto yaawä, töweichöcoomo änsa’dumincha’notoode tadoncadööcomo wetä yaawä öwwä; quee cönä’döaacä Epíiditu Santo Isaía ntai.

²⁸ Yääje yeijäcä jimmä, odhoowanääcäiñe tödöötäcä eduuwa naadö jonno mädä Wanaadi nutuudu wääwanaacatoojo judhíojöncomo wwä yäätäcammadö. Ñannoone netaato’de; quee cönä’döaacä Paudo judhío Dooma ñancomo wwäiñe.

²⁹ Yääje Paudo wa’deuwödö’jo judhío cöntonto yaawä. Tönwannoje dea jooje cönäätäccujä’a’to yää jäcä.

³⁰ Yäätä Dooma ña Paudo cönä’jaacä aacä wedu tömmaije ecammaajä tawä. Töwö töjöödatai che yää tawä töweichojo töneejema cönä’jaacä. Tameedä tödöiñano wä’dödö tönaamonno’jo cönä’jaacä.

³¹ Chäwwäiñe töneecammajä’e cönä’jaacä Wanaadi töcaajichaanaije tödöödö jäcä. Cajiichaana Jesuuquidiito jäcä tönoowanoomaiñe cönä’ja’dea. Anejja aneecammajoojätö’da töweiye cönä’jaacä chäwwä.