DOSECHO 26 - Wanaadi A'deddu

Cajiichaana Aaquidiipa netaadöje Paudo nemeetacaama’jödö

¹ Yääje mma yaawä Aaquidiipa cönä’döaacä Paudo wwä: —Awa’deuwö’se aweiya’jäcä adha’deucwä; quee. Yaawä tamäädö eneejojäätödö que Paudo soto cöneeta’jöichajoicho; cönä’döaacä:

² —Ta’cwaiñe wa eduuwa cajiichaana Aaquidiipa, aneetadööje emeetacaamajai weijäcä tameedä mädä yeementädö judhío wwäiñe.

³ Yoowanääcä na towaanojo’ne aweichö tameedä judhío wätunnäichomo jäcä, ñaa wätäccujo’tojo jäcä mmaja. Yääje yeijäcä edääje wä’dö’se wa äwwä: aashicha etaacä ya’deddu.

Quedeiyenteje’da töwei’jödö Paudo necammajäätö’jödö

⁴ “Tameedä judhío dhowaanäcäiñe na jaatacäi dhantawäiñe wei’jödö, Jeduusadén ña wei’jödö mmaja, mude’cä’cäje weichö jonnoto’jödöödä.

⁵ Tönwanno dhowaanäcäiñe mmaja na dea mude’cäje weichö jonnoto’jödöödä jaadiseeoje wei’jödö. Ñanno jaadiseeo ñanno judhío wätunnäichomo tönoiñe tödönnamo, anejjacoomo e’jodhe’cä. Tönwanno dea ecammajai ñaato yääje wei’jödö.

⁶ Eduuwa tönwanno jääcä cone’da na’deuwaato töneecanö’e weijäcä yä’ja’a’como adoncato’como Wanaadi wwä, ñaa adai’jödö wwä töwö Wanaadi cöneecamma’döje dea.

⁷ Tameedä Iisadaaeeda weichö, ñanno amoojadooto de’wä aacä iju’jä naatoodö, niyoomo’caato dea yääje töneecamma’jödö tödöödö Wanaadi wwä. Yääje yeijäcä Wanaadi wwä tönnöe weneeneto ano, coijai mmaja. Mädä töneecanö’e weijäcä cone’da na’deuwaato eduuwa jääcä, cajiichaana Aaquidiipa.

⁸ ¿Aaquene aneecamjö’da maato dea Wanaadi yä’ja’a’como adoncajai yeichö?

Quedeiyente tömmaminchaiñe Paudo wei’jödö

⁹ “Jenaadä öwö mmaja tötö’tajä’e wä’jaaquene Jesuuquidiito Naasade ñano sotoi maminchadööcomo aashicha yeiyaatäi.

¹⁰ Mädääje dea tönnöe wä’jaaquene Jeduusadén ña. Jooje quedeiyentecoomo jedeesoje wödööneto, Wanaadi wwä töwa’deuwaamo edhaajotoncomo woije. Quedeiyente emaadawä aashicha mma töneene’ma wä’jaaquene.

¹¹ Aneedawä quedeiyentecoomo tömmaminchaiñe töweiye wä’jaaquene ye’jummato’como waadäi, quedeiyenteje yeichöcoomo e’nomjajoodö wetä. Jooje cone’da töweiye wä’jaaquene chääjäcäiñe, imaaminchadööcomo wetä anejja jataaca töötääne.

Quedeiyenteje töwä’dö’jödö Paudo necammajäätö’jödö

¹² “Yääje mma yaawä yää tödöödö wetä mmaja Damaacu ña wötaaquene, Wanaadi wwä töwa’deuwaamo edhaajotoncomo woijeiñe, ñaanontädööcomooje.

¹³ Yaawä ääma tai öötädaawä anunnaque yeichö tawaanato weneeaqueene caju ñanno we’ajä, shii e’jodhe’ca tawaane yeichö. Cönweijoi yaawä yaawodheecäcä, jaadoncomo’jödö awoodhecääcäiñe mmaja.

¹⁴ Yaawä nono jo ñaa cöne’duccai tameedä. Eewedeeo a’deucwe wa’deunä wetaaquene yaawä; cönä’döaacä: “Saudo, Saudo, ¿ane’cotoojo cuyuunacaanä? Amäädä dea adheecone’ma, ñäädä jaaca tuju’yu’motoojo töjoosa’dato etaaja’jäcä chäwwä töwoije dea töwäätunui’chä töweiye naichöje mmaja;” quee cönä’döaacä.

¹⁵ “ ¿Änääcö amäädä Cajiichaana;” quee wä’döaaquene yaawä. Töwö cönä’döaacä öwwä yaawä: “Jesuuquidiito öwö, miyuunacaadö dea.

¹⁶ Aanöncä; öwö wäänejoi äwwä yaanonööje aweichö wetä, ecammajä’neije aweichö wetä mädä meneeannö jäcä, äcuude äwwä weneeja’dedö jäcä mmaja.

¹⁷ Öwö maneewonta’de äjimmä judhío wwäiñe, judhíojöncomo wwäiñe mmaja, ñanno chäwwadäädäiñe manaanontaadö wwäiñe.

¹⁸ Chäwwadäädäiñe manaanonta menu’täiyeto yaawä, tööjano’tacanno eejöiyeto tawaanato aca, odo’sha woije töweichöcoomo jonno Wanaadi woije eiyeto. Yaawä chäwwäiñe ecaanö’a’jäcä choone’nadiiyöcoomo necocca’de; öwö wu’a’de chäwwäiñe tameedä önconeecadö wwäiñe töwä’tue weneene dea; quee cönä’döaacä Jesuuquidiito öwwä.

Tanontä’jödö woije Paudo nödö’jödö

¹⁹ “Yääje yeijäcä cajiichaana Aaquidiipa, yää caju ñano neene’jödö ännö’da’da weiyaqueene.

²⁰ Awa’deene wecammajä’ne Damaacu ñancomo wwä; yää ’jeje Jeduusadén ñancomo wwä mmaja, tameedä Judheea ñancomo wwä mmaja; judhíojöncomo wwä wecammajä’ne dea. Edääje töwä’döe wä’jaaquene chäwwäiñe: “Ätö’tajäätödööcomo sha’duminchatääcä, Wanaadi wwadäädä ä’jedennacaatäcä. Aashichaato tödöötäcä chö’tajäätödööcomo wesa’dumincha’como weichö nönge deaane;” quee töwä’döe wä’jaaquene chäwwäiñe.

²¹ Yää jo’tädööje judhíocoomo yaajäiñeto Wanaadi weichojo taca; yeema’se cönä’ja’to,

²² töwäädä Wanaadi ö’wa’täneene’. Yääje yeijäcä eduuwa naadö jona tödööene ejääduqueejö’da wa; Wanaadi a’deddu ecammajäätödööje dea wäänene tameedä soto wwäiñe, mudeeshi wwäiñe, inchoncomo wwä mmaja. Anejja jäcä aneecammajäätö’da wa, ñanno Wanaadi wa’deuwödö ecammannamo necammajäätö’jocoomo nönge deaane, Moisé necammajäätö’jödö nönge mmaja, yää töweeja’dä’emö jäcä.

²³ Edääje töneecammajä’e ñanno cönä’ja’to: “Äwaanacaanei näntunaanö’a’de; töwö na’de awa’deenato töwäämaajo jonnoto waadoncadööje. Töwö judhío wwäiñe necammajä’a’de tawaanato aca weiñä jäcä, judhíojöönö wwäiñe mmaja;” quee töneecammajä’e cönä’ja’to ñanno Wanaadi wa’deuwödö ecammannamo; quee cönä’döaacä Paudo.

Aaquidiipa wwä ecaanö’jo’se Paudo wei’jödö

²⁴ Yääje Paudo wa’deuwa’jäcä Jeetu töcä’de cöncä’tömöi: —Tö’jeta ma Paudo. Jooje owoowanoomadö ä’jeda; quee cönä’döaacä.

²⁵ Yaawä Paudo cönä’döaacä: —I’jeta’da wa, Jeetu aashichaato. Chäänöngato mädä wecammajä’aadö.

²⁶ Määdhä cajiichaana Aaquidiipa dhowaanäcä na mädä jäcä; yääje yeijäcä sa’donna ya’deuwa ñeetadööje. Mädä wecammajä’aadö täcaademjönööjönö mädä.

²⁷ Cajiichaana Aaquidiipa, ¿töneecanö’e manä Wanaadi wa’deuwödö ecammannamo necammajäätö’jocoomo? Yoowanääcä na töneecanö’e aweichö; quee cönä’döaacä Paudo.

²⁸ Yaawä Aaquidiipa cönä’döaacä Paudo wwä: —Eetä’cä’cä mmädä quedeiyenteje yöödödö meiya; quee cönä’döaacä.

²⁹ Paudo cönä’döaacä yaawä: —Eduuwa mmädä jeiñe mma, äcuude’cä jeiñe mma, chäänönge mmaja. Yaawääne’, öwö waadöje mmaja awei’she wa, jedeesoje’da mmaane. Amäädä mmajöönö yääje awei’she wa, tameedä canno eduuwa ya’deddu netaatoodö mmajaane; quee cönä’döaacä Paudo.

³⁰ Yaawä Paudo wa’deuwö’jeje Aaquidiipa cönammöi, Jeetu mmaja, Weedeniise mmaja, tameedä chääjadoncomo mmaja.

³¹ Töudäje cöntonto yaawä yää jäcä töwa’deuwödööcomo wetä. Edääje cönä’döa’to tönwannoje dea: —Määdhä dhanwa conemjönö iiñö’jödö ’je’da na. Emaatojo ’je’da na; jedeesoje’jödöödä eijai’cha na; quee cönä’döa’to.

³² Yaawä Aaquidiipa cönä’döaacä Jeetu wwä: —Acu’shänä döiña töötotoojo ane’catä’da ei’jo cu’catäädö; quee cönä’döaacä.