DOSECHO 25 - Wanaadi A'deddu

Jeetu je’taca Paudo wei’jödö

¹ Yääje mma yaawä aaduwaawä anooto acu’shänääje töwääwaaca’jeje Jeetu Jeduusadén ña cöntämä Seesadeea ñanno.

² Yäätä Wanaadi wwä töwa’deuwaamo edhaajotoncomo, anejjacoomo judhío täneejuca’como mmaja, cöna’deuwöicho chäwwä Paudo jäcä.

³ Tönwanno chäwwä cöne’catoicho Jeduusadén ña Paudo ene’jotoojo, ääma tai yeejödö ema’se töweichomjäcä.

⁴ Töwö Jeetu cönä’döaacä chäwwäiñe: —Paudo no’nomja yäätä Seesadeea ña; öwö dea wöta iiña äächädä anooto yä’döa’jäcä.

⁵ Yääje yeijäcä adhantawäiñe cajiichaanaja’como jaadä täjai ñaato töwö ñeetadööje ecammaiyeto conemjönö liñö’jödö; quee cönä’döaacä Jeetu chäwwäiñe.

⁶ Amoojadä mma Jeetu cönnöcöi Jeduusadén ña; Seesadeea ña cöntämä yaawä. Yääwä yää jenamma naadöje äcamma’jonei a’täi ye’wä töwaatajiimadö’jo töwö Jeedi Paudo cöna’dejjajoi yaawä.

⁷ Paudo wä’döa’jäcä ñanno judhío Jeduusadén ñancomo wä’döa’como cönaawodhentoicho yaawä. Tönwanno jooje Paudo cöneementa’to conemjönö jäcä; chäänöngato jaiñoone a’que cönä’jaacä dha’dedducoomo.

⁸ Paudo cöneemetaacamai yaawä ya’deuwödööcomo. Töwö cönä’döaacä: —Cone’da a’deuwö’da töweiye wäänene judhío wätunnäichomo jäcä, Wanaadi weichojo jäcä mmaja, acu’shänä jäcä mmaja; quee cönä’döaacä.

⁹ Ñäädä Jeetu judhío jadäiñe aashicha töwei’she töweijäcä cönä’döaacä Paudo wwä: —¿Jeduusadén ña äätä’se manä, iiña maneecamma’joiye mädä jäcä? quee cönä’döaacä.

¹⁰ Yaawä Paudo cönä’döaacä: —Chäänönge dajaane eetä yeecamma’jojai ma, acu’shänä necamma’jotoojo tacaane. Amäädä odhoowanääcä na judhío jäcäiñe conemjönö ännö’da weichö.

¹¹ Conemjönö tönnöe wei’jo oowontä’da weichö wäämadö jäcä. Yää yeementaatoodö mmaane chäänönge’da na; yääje yeijäcä anejja yu’jai’cha na chäwwäiñe. Acu’shänä Awuutu wwadäädääne öötä’se wa, töwööne yeecamma’joiye; quee cönä’döaacä Paudo Jeetu wwä.

¹² Yaawä ta’deddu eccunnamo jadä töwa’deuwödö’jo Jeetu cönä’döaacä Paudo wwä: —Ñäädä acu’shänä döiña manenno’ja’de, iiña äätä’se aweiyajä; quee cönä’döaacä.

Aaquidiipa je’taca Paudo wei’jödö

¹³ Yääje mma yaawä äächädä anooto ’jeje Seesadeea ña cajiichaana Aaquidiipa cöneejä, töjiiñamo Weedeniise acä, Jeetu ene.

¹⁴ Yäätä cönä’ja’to äächädä anooto mma. Yaawä chäwwäiñe Jeetu cöneecammajäätöi Paudo jäcä. Töwö cönä’döaacä: —Eetä na dhanwa, jedeesoje, Jeedi niyäämä’jödö.

¹⁵ Jeduusadén ña weiyaquennawä Wanaadi wwä töwa’deuwaamo edhaajotoncomo, judhío ntonta’como mmaja, jooje cone’da cöna’deuwöicho öwwä chääjäcä.

¹⁶ Edääje wä’döaaquene yaawä chäwwäiñe: “Täcamma’jodö’jo’da mmädä soto aneema’da domaano weichö nai. Täcamma’joone awa’de ecamma’jodö töweiye nai ñäädä chu’de’tänei je’taca, emeetacaamadö wetä yaawä chäwwä, töwa’deuwö’se töweiya’jäcä;” quee wä’döaaquene chäwwäiñe.

¹⁷ Yaawä tönwanno ye’a’comjäcä numa onwomoocö’da weiyaqueene. Yää jenamma naadöje mma ecamma’jotoojo taca waatajiima’jäcä Paudo wene’jone yaawä.

¹⁸ Yaawä ñanno chääjäcä töwa’deuwaamo choone’nadiiyö ecammajai’cha cönä’ja’to; öwö tö’tajä’aquennö je’da cöna’deuwöicho.

¹⁹ Töwäätunnäichomo jäcä mma cöna’deuwa’to, Jesuuquidiito täätö jäcä mmaja. Ñäädä töwääma cönä’jaacä; Paudo mmaane nudä yeichö töneecamma weneene.

²⁰ Yoowanääcä’da cönä’jaacä mädä nöngato choonecaadö; yääje yeijäcä Paudo wecamma’jone: “Jeduusadén ña äätä’se manä, iiña maneecamma’joiye mädä jäcä?” quee wä’döaaquene.

²¹ Töwö cöne’catäi yaawä acu’shänä Awuutu wwadäädä töötotoojo. Yääje yeijäcä jedeesojeedä önnödö na acu’shänä wwadäädä enno’jadö wa’cä; quee cönä’döaacä Jeetu Aaquidiipa wwä.

²² Yaawä cajiichaana Aaquidiipa cönä’döaacä Jeetu wwä: —Öwö mmaja eta’se wa dea yäätunnäi; quee. Yaawä Jeetu cönä’döaacä: —Jenamma etaacä’de; quee.

²³ Yää jenamma naadöje Aaquidiipa cöneejä töjiiñamo Weedeniise jadä. Tönoiñe cöne’jummaicho ecamma’jotoojo taca, tameedä suddau edhaajotoncomo jadä, yää jataawoncomo täneejuca’como jadä mmaja. Jeetu cönaanontäi yaawä Paudo eneejödö wetä;

²⁴ yaawä cönä’döaacä: —Amäädä cajiichaana Aaquidiipa, änwanno mmaja eetä ñaa jadä awe’jumma’como maatoodö: Määdhä ñäädä dhanwa judhío chääjäcä töwa’deuwe weneenetoodö, Jeduusadén ñancomo, Seesadeea ñancomo mmaja. Tönwanno yäämatoojo tuncu’nä’tä weneeneto.

²⁵ Öwö mmaane iiñödö aneedantä’da weiyaqueene yää ijo’tädööje emaatojo. Töwö dea cöne’catäi acu’shänä Awuutu döiña töötotoojo; yääje yeijäcä ñäädä wwadäädä wenno’ja’de.

²⁶ Yaawääne’, acu’shänä wwadäädä chääjäcä tömennäämö ’je’da na öwwä. Yääje yeijäcä weneejä äwwadäädäiñe, cajiichaana Aaquidiipa, amäädä jaiñoone mecamma’joiye; yää ’jeje tömennäämö töweiye yeichö wetä acu’shänä wwadäädä.

²⁷ Edääje mmädä adoojojai’cha tö’ta, töwö iiñö’jödö jäcä imennaajä ’je’da; quee cönä’döaacä Jeetu Aaquidiipa wwäiñe.