DOSECHO 24 - Wanaadi A'deddu

Jeedi netaadöje Paudo nemeetacaama’jödö

¹ Yääje mma yaawä ijaatoodea anoototo ai Aananía cöntämä yaawä Seesadeea ña, ñäädä Wanaadi wwä töwa’deuwaamo edhaajotoncomo. Chääjadä cöntonto anejjacoomo inchoncomo. Tooni töwa’deuwemö cöntännea, Teetudu täätö. Ñanno cöntonto acu’shänä Jeedi döiña, Paudo jäcä cone’da töwa’deuwödööcomo wetä.

² Yaawä chäwwäiñe Paudo ene’ja’jäcä ñäädä Teetudu cönaajäntäi Paudo ementädö. Töwö cönä’döaacä Jeedi wwä: —Amäädä acu’shänä Jeedi, aashichaato; täncanoode’da ñaa weneene, aashicha ñaa weneene dea, ñaa cajiichaanaije aweijäcä. Amäädä tösejjeque aweichö woije aashicha edä jataawoncomo ane’se’tädö na.

³ Yääje yeijäcä ta’cwaiñe ñaa weneene, tameedä ñaa weichö wa’cä.

⁴ Jooje adhaaquimma’se’da wa; a’dhe mma ñaa wa’deuwödö etaacä.

⁵ Määdhä dhanwa aquimmatä weneene; tameedä yeichö wa’cä judhíocoomo töni’jedäiñe weneene. Töwö dea ñanno naasadeenocoomo edhaajotoncomooje na.

⁶ Wanaadi weichojo mmaja choone’ma’se cönä’ja’dea. Yääje yeijäcä ñaa cönaajäi; ecamma’jo’se ñaa cönä’jaacä, ñaa wätunnäi wä’dödö nönge.

⁷ Yaawä Cadaudiyo Diisiya, ñäädä suddau edhaajotoncomo, cöneejä; wejiiñäje ñaa jonno cönaadäi yaawä.

⁸ Yaawä äwwadäädä töwö cönenno’jaicho ñanno chääjäcä töwa’deuwaamo. Yääje yeijäcä amäädä jaiñoone ecamma’jojai ma odhoowanääcä yeichö wetä yaawä chäänönge yeichö chääjäcä ñaa wa’deuwödö; quee cönä’döaacä Teetudu.

⁹ Tameedä judhío yäätä cönä’ja’todö cönä’döa’to yaawä: —Chäänöngato mädä na’deuwaadö; quee.

¹⁰ Yaawä acu’shänä cönä’jedennacai Paudo wwadäädä; Adha’deucwä, quee töucwadööje. Yaawä Paudo cönä’döaacä: —Yoowanääcä na jooje wedu cajiichaanaje aweichö eetä; yääje yeijäcä ta’cwaiñe ya’deuwa aneetadööje.

¹¹ Amoojadooto de’wä aacä anooto yeichö Jeduusadén ña wötääne Wanaadi wwonooje aashichaato tödöödö wetä. Chäänönge yääje yeichö odhoowanääcä tödö’se aweiya’jäcä anejja ecamma’jojai ma.

¹² Ätäccujäätö’da wä’jaaquene soto jadäiñe. Wanaadi weichojo tacancomo onwodoichajootäiñe’da wä’jaaquento, we’jummatoojo tacancomo mmaja, jataawoncomo mmaja.

¹³ Mädä öwö jääcä canno na’deuwaatoodö chäänöngemjönö mädä.

¹⁴ Edääje mmaane wäänene: Yaadaichö Wanaadiyööcomo woije wäänene, eduuwaato weichojo wä’dödö nönge, yää chäänöngemjönööje töne’tä weneenetoodö. Öwö wecaanö’a tameedä jenaado’jä waanontänä, Wanaadi wa’deuwödö ecammannamo nimenno’jocoomo mmaja.

¹⁵ Öwö Wanaadi wecaanö’a canno necaanö’aatoodöje mmaja; yä’ja’a’como töwaadonca yeichöcoomo wecaanö’a dea, ñanno aashicha’como, conemjöncomo mmaja.

¹⁶ Yääje yeijäcä yoowadäädä töweiye wäänene conemjönö tödöödö queiñe Wanaadi jäcä, soto jäcä jeiñe mma.

¹⁷ “Numa jaatadö aneene’da weichö jonno aneiñajanno yennacaane yaawä täjemjönö imö’que jimmä döiñaiñe, Wanaadi wwä saaquidiijiisiyo döe mmaja.

¹⁸ Yaawä waatamoichadö’jo yää tödöödöje wä’jaaquene Wanaadi weichojo taca; wanna’da soto jaadä cönä’ja’to; ewoodoicha’da mmaja wä’jaaquennea. Yaawä iiña weichö anejjacoomo judhío Aasiya ñancomo yeejodööneto.

¹⁹ Ñannoone sadä e’jai yei’jocoomo na, tönwanno jaiñoone a’deuwöiyeto yaawä jääcä, ya’deuto’como töweiye yeiya’jäcä.

²⁰ Canno eetä naatoodö jeiñe mma ecammajai ñaato ñanno äcamma’jonnamo wwä yeecamma’jodaawä conemjönö önnö’jödö ñeedanto’jocoomo.

²¹ Edääje mma wä’döaaquene chäwwäiñe: “Änwanno maamincha’se maato töwäämaajo jonno waadoncanä töneecanö’e weijäcä;” que mma wä’döaaquene; quee cönä’döaacä Paudo acu’shänä Jeedi wwä.

²² Ñäädä Jeedi dhowaanäcä cönä’jaacä quedeiyenteje weiñä jäcä; yääje yeijäcä yaawä dea mma Paudo aneecamma’jojäätö’da cöneiyacä. Töwö cönä’döaacä Paudo wwä: —Ñäädä Diisiya, suddau edhaajotoncomo we’a’jäcääde yaawääne aashicha jeene meneecamma’ja’de; quee cönä’döaacä.

²³ Yaawä töwö Jeedi suddau edhaajotoncomo cönaanontäi Paudo edai’chädö jäcä, jedeeso neeneje’daane, ijimmä omomjai cheaane yöiña, i’wa’tädö wetä.

²⁴ Yääje mma yaawä äächädä anooto ’jeje Jeedi cöneejä töjiiñamo Duduusiida jadä; judhío cönä’jaacä ñäädä ijiiñamo. Paudo cöna’dejjaicho yaawä ecamma’jodö wetä Jesuuquidiito jadä weiñä jäcä.

²⁵ Yaawä Paudo cöneecammajäätöi chäwwäiñe chäänönge weiñä jäcä, towaadäädä weiñä jäcä mmaja, wätämmencajootojo anootoi’chädö jäcä mmaja. Yaawä Jeedi cönääcatoncai; cönä’döaacä Paudo wwä: —Chääwa’cä na; äjääne eduuwa. Aneedawä anooto awääde mana’dejja’de, täde weichö woije; quee cönä’döaacä.

²⁶ Töwö Jeedi tötö’tajä’e cönä’jaacä töwwä jödaata u’aatäi Paudo wwä, töwäätu’catoojoje. Yääje yeijäcä weiñäje Paudo töna’dejja töweiye cönä’jaacä dhacä töwa’deujätöödö wetä.

²⁷ Aacä wedu cöneeja’dätäi yaawä; yää ’jeje Poosiyo Jeetu cöneewaacaicho acu’shänääje, Jeedi emeetacaanoje. Ñäädä Jeedi acu’shänääje töweichö jonno töwäätu’cadaawä judhíocoomo a’cwaima’se cönä’jaacä; yääje yeijäcä jedeesojeedä Paudo cönnämäi.