DOSECHO 23 - Wanaadi A'deddu

¹ Paudo cöneene’ma’to ñanno äcamma’jonnamo. Töwö cönä’döaacä chäwwäiñe: —Jimmä, aashicha weichö que töweiye wäänene Wanaadi owaadäädä, eduuwa waadö jona tödööene; quee Paudo cönä’döaacä.

² Yaawä Aananía, ñäädä Wanaadi wwä töwa’deuwaamo edhaajotoncomo iiñancomo wwä Paudo cönaiju’jojootöi inchadö jäcä.

³ Yaawä Paudo cönä’döaacä ñäädä Wanaadi wwä töwa’deuwaamo edhaajotoncomo wwä: —Wanaadi adhaiju’jä’a’de amäädä, yääjönö wa’coto wäänejoodö. Amäädä meejä yeecamma’jodö wetä, imennaajä wä’dödö nönge dea. Eduuwa caiju’jä’ja imennaajä wä’dödö nönge’da; quee Paudo cönä’döaacä.

⁴ Yaawä yäätoncomo cönä’döa’to Paudo wwä: —¿Ane’cotoojo Wanaadi wwä töwa’deuwaamo edhaajotoncomo cone’da meccujä’anä? quee cönä’döa’to.

⁵ Paudo cönä’döaacä yaawä: —Yoowanääcä’da nä’jaanä Wanaadi wwä töwa’deuwaamo edhaajotoncomooje yeichö; dha’da ei’jo mmaane aneccujäätö’da eichö weiya, yääje imennaajä wä’dödö weijäcä: “Adheedhajootoncomo jäcä cone’da adha’deuwöi’che;” quee yeijäcä; quee cönä’döaacä Paudo.

⁶ Töwö Paudo dhowaanäcä cönä’jaacä dhantai ñanno äcämma’jonnamo saadhuseeoje yeichöcoomo, dhantai jaadiseeoje yeichöcoomo mmaja. Yääje yeijäcä töwö cönä’döaacä chäwwäiñe: —Änwanno jimmä, jaadiseeo öwö, jaadiseeo nnedö mmaja. Eduuwa maamincha’se maato yäämaajo jonno waadoncanä töneecanö’e weijäcä; quee cönä’döaacä.

⁷ Yääje töwö yä’döa’jäcä ñanno saadhuseeo, jaadiseeo mmaja, tönwannoje dea cönäätäccujä’a’to; äänönge’da chö’tajäätödööcomo cönä’jaacä.

⁸ Ñanno saadhuseeo aneecamjö’da naato yäämaajo jonno waadoncanä, amoode töweiye yeichö aneecamjö’da mmaja, soto täcaatoque yeichö aneecamjö’da mmaja. Jaadiseeo mmaane tameedä yää töneecanö’e.

⁹ Jooje cöneewodoicha’to yaawä. Yaawä anejjacoomo jaadiseeo, ñanno judhío owaanomannamo, cönammöicho; cönä’döa’to: —Määdhä dhanwa conemjönö iiñö’jödö ’je’da na. Wanaadi amoodedö’da ca cöna’deuwöichö jääcä chäwwä, anejja Wanaadi nanontädö jeiñe mma. Yääje yeiya’jäcä Wanaadi chu’de’täjai’cha caato; quee cönä’döa’to Paudo jäcä.

¹⁰ Jooje’cä yaawä cönäätäccujä’a’to; yääje yeijäcä ñäädä suddau edhaajotoncomo tösaade cönä’jaacä, Paudo ajääcä’jä’aatäi chäwwäiñe. Yääje yeijäcä töwö suddau cönaanontäi yaawä soto antawonnoiñe Paudo u’cadö wetä, waadiya weicho’como taca adäädö wetä yaawä.

¹¹ Yää ’jejaato coijaichawä Cajiichaana Jesuuquidiito cönäänejoi Paudo wwä; cönä’döaacä chäwwä: —Cone’da’da eichä Paudo. Ya’deddu mecammajä’a’de Dooma ña, eetä Jeduusadén ña mecammajä’nedööje mmaja; quee cönä’döaacä.

Paudo emaadö a’de’tä’jödö

¹² Yää jenamma naadöje anejjacoomo judhío cöna’deuwöicho Paudo emaadö jäcä. Tönwanno cönä’döa’to: —Ääwashinchä’da queichäiye, cöwoocödööcomo aneenö’da mmaja, Paudo emaadö wa’cä cöwwäiñe; quee cönä’döa’to.

¹³ Ñanno yääje töwa’deuwaamo’jödö cönä’ja’to aacä sotooto de’wä.

¹⁴ Tönwanno cöntonto yaawä Wanaadi wwä töwa’deuwaamo edhaajotoncomo döiñaiñe, judhío ntonta’como döiñaiñe mmaja; cönä’döa’to chäwwäiñe: —Ñaa cöna’deuwöi äwanshi onooneja’da ñaa weichö jäcä Paudo emaadö wa’cä ñaa wwä.

¹⁵ Yääje yeijäcä änwanno mmaja, anejjacoomo äcamma’jonnamo mmaja, suddau edhaajotoncomo wwadäädä adhaanonööcomo anontätääcä, Paudo eneejödö wetä. “Aashicha jeene ecamma’jo’se ñaa na;” quee caichäcä’de chäwwäiñe. Yaawä ñaa niiñoshincha’de, yä’dödööje dea mma ñaa emaiye; quee cönä’döa’to ñanno dhanwaacomo.

¹⁶ Yaawä Paudo jonö cöneetaacä yääje ya’deuwödööcomo; cöntämä yaawä waadiya weicho’como taca. Töwoodö wwä töneeta’jödö cöneecammajäätöi yaawä.

¹⁷ Yaawä Paudo suddau cöna’dejjai; cönä’döaacä chäwwä: —Määdhä mude’cä’cä adääcä adheedhajootoncomo döiña; chäwwä töwa’deuwö’se na; quee cönä’döaacä.

¹⁸ Yaawä ñäädä suddau mude’cä’cä cönaadäi suddau edhaajotoncomo döiña; cönä’döaacä chäwwä: —Ñäädä Paudo, jedeesoje naadö, ya’dejjai. Töwö yaanontäi määdhä mude’cä’cä eneejödö wetä äwwadäädä; äwwä töwa’deuwö’se na; quee cönä’döaacä suddau tädhaajä wwä.

¹⁹ Yaawä ñäädä suddau edhaajotoncomo mude’cä’cä töudäje cönaadäi töjämjäcä. Töwö cöneecamma’joi yaawä: —¿Aaquene äwä’dö’se manä öwwä? quee cönä’döaacä.

²⁰ Ñäädä mude’cä’cä cönä’döaacä chäwwä: —Jenamma judhíocoomo äcamma’jonnamo wwadäädä Paudo nadääjaato’de äwwä, ecamma’jo’satooje mmädä.

²¹ Maneecamjöi’che dha’dedducoomo. Aacä sotooto de’wä shootoichomo naato iiñoshinchännamo. Tönwanno ya’deuwö’jocoomo na ääwashinchä’da töweichöcoomo jäcä töwwäiñe Paudo emaadö wa’cä. Awa’deuwödö mma niyoomo’caato eduuwa; quee cönä’döaacä Paudo jonö.

²² Yaawä suddau edhaajotoncomo cönenno’jai ñäädä mude’cäcä. —Anejja wwä maneecammajäätöi’che mädä; quee cönä’döaacä chäwwä.

Jeedi wwadäädä Paudo enno’ja’jödö

²³ Yääje mma yaawä suddau edhaajotoncomo cöna’dejjai aacä tösootoi; suddau edhaajotoncomooje mmaja ñanno cönä’ja’to dea. Töwö cönä’döaacä chäwwäiñe: —Amoojadä soto suddau aneejodöötäcä tu’juduucomo que töötaamo, yää ’jeje amoojadä sotooto de’wä amoojadä cawaayu de’wä töötaamo mmaja, yää ’jeje amoojadä soto suddau sucuuji edhaamo mmaja. Seesadeea ña nötä’ña’to’de coijai, yo’taca ä’döjai yä’döa’jäcä.

²⁴ Paudo wötootojo änu’täcä’de cawaayu. Aashicha adäätäcä’de Jeedi wwadäädä, ñäädä acu’shänä; quee cönä’döaacä suddau edhaajotoncomo tösootoi wwäiñe.

²⁵ Jajeeda töwö cönaadojoi chäwwäiñe; edääje immennädö cönä’jaacä:

²⁶ “Öwö Cadaudiyo Diisiya wimenna äwwadäädä, amäädä acu’shänä Jeedi, aashichaato. ¿Aashicha jemma manä?

²⁷ Määdhä dhanwa judhío cönaajoicho; emaadö cöneiya’todö’je. Yaawä domaanoje yeichö eta’jäcä öwwä suddau jadäiñe weiyaqueene, wewontäne yaawä chäwwäiñe.

²⁸ Yoowanääcä tödö’se wä’jaaquene; ¿ane’cäämo jo’tädööje cone’da naicho chääjäcä? quee tö’tajä’aqueene. Yääje yeijäcä äcamma’jonnamo döiñaiñe wadääne.

²⁹ Yoowanääcä wödööne yaawä töwäätunnäichomo jäcä mma yääje ya’deuwödööcomo. Ijo’tädööje emaatojo ’je’da cönä’jaacä, jedeesoje tödöötojo ’je’da mmaja.

³⁰ Yaawä judhío ema’se yeichöcoomo eta’jäcä öwwä äwwadäädä wadoojoi. Chu’de’tännamo wwä mmaja ya’deune dea äwwä ecammaiyeto chääjäcä cone’da töweichöcoomo. Mädääje mma wä’dö’se wä’jaanä; quee suddau edhaajotoncomo cömmennäi.

³¹ Yaawä ñanno Paudo cönaadoicho tanonto’jocoomo nönge dea; coijai cöntonto Antipaatidi ña.

³² Yää jenamma naadöje ñanno tu’juduuca’como wöto’jocoomo cönennacaicho yaawä waadiya weicho’como döiña. Ñanno cawaayu de’woncomo mmaane cöntonto Paudo jadä.

³³ Yaawä Seesadeea ña töwä’döa’comjäcä acu’shänä wwä jajeeda cuntuicho, Paudo mmaja.

³⁴ Yää jajeeda a’de’tädö’jo acu’shänä wwä töwö Paudo cöneecamma’joi yaawä: —¿Äshano amäädä? quee cönä’döaacä. Yaawä Sidiisiya ñanooje yeichö eta’jäcä acu’shäna cönä’döaacä chäwwä:

³⁵ —Ätu’de’tännamo wä’döa’comjäcä jeene meneecamma’ja’de; quee cönä’döaacä. Yaawä suddau wwäiñe Paudo cöneedai’chojoi Edoodhe mmai’jödö taca.