DOSECHO 22 - Wanaadi A'deddu

¹ —Änwanno jimmä, inchoncomo mmaja, etaatäcä eduuwa äwwäiñe wa’deuwödö; quee cönä’döaacä Paudo

² Yaawä eewedeeo a’deucwe ya’deuwödö eta’jäcä jooje’cä jeene soto cöneeta’jöjäätöicho. Paudo cönä’döaacä yaawä:

³ —Judhío öwö; Taadoso ña yennune, yää Sidiisiya ñano jataawä. Eetä Jeduusadén ña yennejencane. Camaadiyeede cönä’jaacä yoowanoomaneije. Töwö yoowanoomane tameedä cadai’choncomo wätunnäi jäcä. Weichöje Wanaadi tumjumma wäänene, yeewanö jadäädä, eduuwa maatoodöje dea.

⁴ Jenaadä quedeiyente tömmaminchaiñe wä’jaaquene, emaadö jonaane. Tömmöjä’e tönaadä wä’jaaquento dhanwaacomo, wodiiñamo mmaja, jedeeso ewöötö’tädö taca tödöödöcoomo wetä.

⁵ Wanaadi wwä töwa’deuwaamo edhaajotoncomo, tameedä inchoncomo mmaja dhowaanäcäiñe na yääje wei’jödö. Tönwanno dea jajeeda imennaajä cuntuicho öwwä cöjimmotoncomo judhío Damaacu ñancomo wwadäädä immenno’jocoomo. Damaacu ña öötädö cönä’jaacä yaawä quedeiyentecoomo ujiiye, Jeduusadén ña eneejödööcomo wetä yaawä, imaaminchadööcomo wetä.

Quedeiyenteje töwä’döjo’jödö Paudo necammajäätö’jödö

⁶ “Yaawä ääma tai öötädaawä, Damaacu ña ä’döjai wä’jaaquene anunnaque yeichö; jadheedä caju ñanno tawaanato cöne’duccai yaawodheecäcä.

⁷ Nono jo ye’duccane yaawä; a’deu wetaaquene: “Saudo, Saudo, ¿ane’cotoojo cuyuunacaanä?” quee cönäätaacä.

⁸ Öwö wä’döaaquene yaawä: “ ¿Änääcö amäädä Cajiichaana?” quee wä’döaaquene. Yaawä töwö cönä’döaacä öwwä: “Jesuuquidiito Naasade ñano öwö, miyuunacaadö dea;” quee cönä’döaacä.

⁹ Ñanno jaadoncomo’jödö cönääcatoncaicho tawaanato eneedö’jo; tönwanno aneeta’da cöneiya’to ñäädä öwwä cöna’deuwa’dö.

¹⁰ Yaawä wä’döaaquene: “ ¿Ane’cäämö tödööjai wanä, Cajiichaana?” quee. Töwö Cajiichaana cönä’döaacä yaawä: “Aanöncä, Damaacu ña äjääne. Yäätä äwwä tödööemö nätääcamma’de äwwä;” quee cönä’döaacä.

¹¹ Tänuuque’da wä’jaaquene yaawä tawaanato ene’jödö weijäcä; yääje yeijäcä ñanno jaadoncomo’jödö Damaacu ña yaadäneeto töjämjäcäiñe.

¹² “Yäätä cönä’jaacä dhanwa, Aananíaje chäätö. Ñäädä tönnöe cönä’jaacä tameedä Moisé waanontä’jödö woije. Tameedä judhíocoomo Damaacu ñancomo aashicha töwa’deuwe cönä’ja’to chääjäcä.

¹³ Töwö Aananía cöneejä döiña; cönä’döaacä öwwä: “Weichacoono Saudo, tänuuque ä’döcä eduuwa;” quee cönä’döaacä. Yaawä dea mma tänuuque wä’döne; Aananía weneeaqueene yaawä.

¹⁴ Yaawä töwö cönä’döaacä öwwä: “Ñäädä cadai’choncomo Wanaadiyö jenaadä adhe’täne töwoije tödööneije aweichö wetä, ñäädä aashichaato eneedö wetä mmaja äwwä, dha’deddu etaadö wetä mmaja.

¹⁵ Amäädä ma’de dha’deddu ecammajä’neije tameedä soto wwäiñe. Yää aneene’jödö jäcä mecammajä’a’de chäwwäiñe, aneeta’jödö jäcä mmaja.

¹⁶ Yääje yeijäcä ¿ane’cäämö miyoomo’canä? Aanöncä, wautisaaje ä’döjoocä; Jesuuquidiito ecaanö’cä ocoone’nadiiyö choccatoojoje;” quee cönä’döaacä öwwä ñäädä Aananía.

Judhíojöncomo wwadäädä tanontä’jödö Paudo necammajäätö’jödö

¹⁷ “Yaawä Jeduusadén ña wennaca’jäcä Wanaadi weichojo taca weiyaqueene Wanaadi wwä a’deuwe. Wäneetönaawoto nönge wä’jaaquene yaawä.

¹⁸ Yaawä Cajiichaana Jesuuquidiito weneeaqueene. Töwö cönä’döaacä öwwä: “Ma’da’cä äjääne eetonno, Jeduusadén ñanno. Eetoncomo aneecamjö’da naato’de adha’deddu, jääcä mecammajä’aadö;” quee cönä’döaacä öwwä.

¹⁹ Edääje wä’döaaquene yaawä: “Cajiichaana, tönwanno dhowaanäcäiñe öwö wei’jödö, we’jummatoojo waadäi töwoomonge wei’jödö jedeesoje tödöödöcomo wetä tameedä adheecanö’nnamo, aiju’jätöödöcoomo wetä mmaja.

²⁰ Adhaanonö Eteewa emaadawä yäätä wä’jaaquene; waacö’je mma ñäädä adha’deddu ecammajä’nei cöneemaicho. Ñanno emannamo’jödö womö edai’chäneije wä’jaaquene yaawä;” quee wä’döaaquene Cajiichaana Jesuuquidiito wwä.

²¹ Töwö cönä’döaacä öwwä: “Äjääne, amoinche manaanonta eetonno, judhíojöncomo döiñaiñe;” quee cönä’döaacä yaawä öwwä; quee cönä’döaacä Paudo ñanno Jeduusadén ñancomo wwä.

Suddau edhaajotoncomo wwä Paudo edai’chä’jödö

²² Määtä mma ñanno soto cöneeta’to Paudo wa’deuwödö; cönaajäntoicho yaawä töcä’tömjätöödöcoomo: —Tämamje na; määdhä nöngato nudä eijai’cha na; quee cönä’döa’to.

²³ Jooje cöncä’tömjä’a’to, töwoomöcoomo chu’mancädä. Nono cömja’a’to dea cacäi.

²⁴ Yääje yeijäcä suddau edhaajotoncomo waadiya weicho’como taca Paudo cönaadojoi. Töwö cönaiju’jojä’acä yaawä, ääcammaiye, quee töucwadööje, ¿ane’cäämö iiñö’jödö jo’tädööje soto newoodoichanto? quee.

²⁵ Yaawä taiju’jätöödö wetä tömööa’jäcä Paudo cönä’döaacä suddau wwä: —¿Mädääje ca domaano tödöödö töweiye nai, ecamma’jodö’jo’da mmädä aiju’jätöödö? quee cönä’döaacä Paudo.

²⁶ Yää eta’jäcä suddau cöntämä yaawä tädhaajä döiña; cönä’döaacä chäwwä: —Odhoowoinchadä’da eichä, domaano dajaane ñäädä; quee cönä’döaacä, Paudo ecammancädä.

²⁷ Yaawä suddau edhaajotoncomo cöntämä Paudo döiña; cöneecamma’joi: —¿Domaano ca amäädä? quee cönä’döaacä. —Ee; quee Paudo cönä’döaacä yaawä.

²⁸ Yaawä suddau edhaajotoncomo cönä’döaacä: —Öwö domaanoje wä’döne jooje jödaata que ejeemadö que; quee cönä’döaacä. Edääje Paudo cönä’döaacä yaawä chäwwä: —Öwö mmaane domaanoje yennune; quee.

²⁹ Yää etaadö’jo ñanno Paudo aiju’jätö’sa’como cöntonto yaawä. Suddau edhaajotoncomo mmaja cönääcatoncai chea töwwä imööjo’jödö weijäcä.

Äcamma’jonnamo je’tacaiñe Paudo wei’jödö

³⁰ Yää jenamma naadöje suddau edhaajotoncomo aashicha jeene eta’se cönä’jaacä cone’da judhíocoomo weichö Paudo jäcä. Yääje yeijäcä cadheena que Paudo cöni’wadööcai. Tameedä Wanaadi wwä töwa’deuwaamo edhaajotoncomo töwö cöni’jummaicho yaawä, tameedä äcamma’jonnamo mmaja. Yaawä Paudo cömja’cai; dhantawäiñe cönnöi.