DOSECHO 21 - Wanaadi A'deddu

Jeduusadén ña Paudo wötä’jödö

¹ Yaawä ñanno quedeiyentecoomo jonnoiñe ñaa wöta’jäcä, sa’donna ñaa cöntämä Cooso ña; yää jenamma naadöje ñaa cönä’döi yaawä Dooda ña. Yäätonno ñaa cöntämä Paatada ña.

² Yäätä ñaa cöneedantäi jidaawa, Jeniisiya ña iichädö. Ñaa cönä’täi yaawä; yää awä ñaa cöntämä.

³ Chiipede ña töwä’döa’jäcä ñaa cöneeja’dätäi ämu’demjönö dö’se; Siidiya ña ñaa cöntämä yaawä. Ñaa cönaajäi yaawä Tiido ña, yäätä jidaawa acaano encatoojo yeijäcä.

⁴ Yäätä ñaa cönoojodöi quedeiyentecoomo jadä; chääjadäiñe ñaa cönä’jaacä aaca amoojato anooto. Tönwanno Epíiditu Santo woije cönä’döa’to Paudo wwä: —Mötäi’che Jeduusadén ña; quee cönä’döa’to.

⁵ Yaawä aacä amoojato anoototo ai ñaa cöntämä yäätönno. Tameedä ñanno quedeiyentecoomo ñaa a’nontäneeto jata tö’cäi tödööene, ijiiñantoncomo mmaja, iiñacontoncomo mmaja. Tä’mudhe ñaa cönä’döi yaawä sa’dada de’wä; Wanaadi wwä ñaa cöna’deuwöi yaawä.

⁶ Yaawä ajoojancädäiñe ñaa cönääcammai chäwwäiñe; ñaa cönä’täi yää ’jeje jidaawa aca. Tönwanno cönennacaicho yaawä tömmaichomo taca.

⁷ Yaawä Tiido ñanno na’cwai ñaa cöntämä Toodemaiya ña. Iiñancomo quedeiyente ñaa cöna’dejjaicho; tooni anooto ñaa cönä’jaacä chääjadäiñe.

⁸ Yää jenamma naadöje yäätonno Paudo cöntämä Seesadeea ña; ñaa mmaja ñaa cöntännea chääjadä. Iiña ñaa cönoomomöi Jediipe mmai chaca, ñäädä Wanaadi a’deddu ecammajä’neije anontaajä. Töwö Jediipe cönä’jaacä diyaacono jimmä. Ñäädä jadä ñaa cönä’jaacä yaawä.

⁹ Iiñacoomo cönä’ja’to aacäichea ajei’choto’ja’como, töiñoquemjöncomo. Ñanno töneecammajä’e cönä’ja’to Wanaadi nutuudu woije.

¹⁰ Äächädä anooto chääjadäiñe ñaa wä’döa’jäcä Judheea ñanno Wanaadi wa’deuwödö ecammanei cöneejä, Aacawooje chäätö.

¹¹ Töwö cöneejä ñaa ene. Yaawä töwö cunu’cai Paudo ’dha’cäcoono. Yää que tu’judu cömmöi, tamäädö mmaja. Yaawä töwö cönä’döaacä: —Epíiditu Santo yääje nä’döa: Edääje judhíocoomo Jeduusadén ñancomo nimööaato’de edä cudeiya edhaajä; anejjacoomo soto wwäiñe nu’aato’de yaawä; quee cönä’döaacä Aacawo Paudo jäcä.

¹² Yää eta’jäcä edääje ñaa cönä’döaacä Paudo wwä: —Mötäi’che Jeduusadén ña; quee ñaa cönä’döaacä.

¹³ Yaawä töwö Paudo cönä’döaacä: —¿Ane’que’nei maamoaato? ¿Ane’que’nei wentumje cödööjaato? Täncanoode’da wa öwö. Yääje’ mööaatoone’ Jeduusadén ña. Jesuuquidiito junnei äämajai wa dea; quee cönä’döaacä.

¹⁴ Ye’wononcajai’cha ñaa weijäcä ñaa cöneeta’jöjäätöi yaawä; edääje mmaane ñaa cönä’döaacä: —Cajiichaana woije nei’ñojo; quee.

¹⁵ Yää ’jeje ñaa cönääma’täi yaawä Jeduusadén ña ñaa wötäädö wetä.

¹⁶ Ñaa jadä cöntonto anejjacoomo Seesadeea ñancomo quedeiyentecoomo. Dhantawäiñe cönä’jaacä Masón, Chiipede ñano. Töwö Masón cönä’jaacä quedeiyente jenaado’jä. Ñäädä mmai chaca ñaa wä’dötoojo cönä’jaacä.

Jacoowo ene Paudo wötä’jödö

¹⁷ Yääje mma yaawä Jeduusadén ña ñaa wä’döa’jäcä tameedä quedeiyentecoomo ñaa a’dejjaneeto ta’cwaiñe töweichöcoomo que.

¹⁸ Yaawä yää jenamma naadöje Paudo jadä ñaa cöntämä Jacoowo döiña; yäätä cönä’ja’to tameedä ansiyaano.

¹⁹ Ñanno a’dejja’comjäcä Paudo cöneecammajäätöi tameedä Wanaadi nödööjo’jödö töwwä judhíojöncomo jäcäiñe.

²⁰ Yää eta’jäcä aashicha ñanno cöna’deuwa’to yaawä Wanaadi jäcä. Tönwanno cönä’döa’to Paudo wwä: —Eneecä’ma, jooje naatoodö judhío quedeiyentecoomo, Moisé waanontä’jödö tödönnamo.

²¹ Tönwanno adheecadö töneeta weneeneto judhío aneiñajancomo Moisé waanontä’jödö e’nomjajoodöje tönoowanoomaiñe aweichö, siicunsidaadoje iiñacoomo ännöjo’da aweichö mmaja; judhío wätunnäichomo ännöjo’da aweichö mmaja töneeta weneeneto dea.

²² ¿Aaquene yaawä, quee ’ja? Äwä’dö’jödö eta’jäcä tameedä jataawoncomo noojodööaato’de.

²³ Yääje yeijäcä ñaa necammadö woije tödööcä. Eetä naato aacäichea dhanwaacomo; Wanaadi wwä töwääcamma’jocoomo nödööaato.

²⁴ Chääjadäiñe aamoichacä. Amäädä ejeemacä’de yaawä chääjetö, tuju’jocoomo töcaiyeto yää ’jeje. Yaawä soto dhowaanäcäiñe na’de chäänönge’da yeichö yää äjääcä töwääta weneenedö. Tönwanno dhowaanäcäiñe na’de yaawä jenaado’jo waanontänä woije tönnöe aweichö.

²⁵ Ñanno judhíojöncomo quedeiyentecoomo wwadäädäiñe mmaane ñaa cömmennäi yää chäwwäiñe tödööjojai’cha ñaa weichö jäcä; chu’taajä wwä u’ajä mmaane änämjo’da ñaa cöneiyacä chäwwäiñe, munu anaamejo’da mmaja, awö’cajä änämjo’da mmaja. “Amaasuduichatäi’che,” quee mmaja ñaa cömmennäi chea chäwwadäädäiñe; quee cönä’döa’to ñanno ansiyaano Paudo wwä.

Wanaadi weichojo taca Paudo ajäi’jödö

²⁶ Yaawä Paudo cönoojodöi ñanno töwaatamoichaamo jadäiñe. Yää jenamma naadöje töwö cönaatamoichai chääjadäiñe. Yää ’jeje töwö cönoomomöi Wanaadi weichojo taca, töwaamoichato’como wä’catoojo cu’nädö ecammadö wetä, yää töwaadäiñe saaquidiijiisiyo tödöötojo anooto.

²⁷ Yääje mma yaawä aacä amoojato anooto yä’döa’jäcä, töwaamoichato’como jäcä ä’cajai töwä’döa’comjäcä, anejjacoomo judhío Aasiya ñancomo Paudo cöneedantoicho Wanaadi weichojo taca. Tönwanno soto cönwodoichajoicho Paudo jäcä. Paudo cönaajoicho yaawä;

²⁸ töcä’de cöna’deuwa’to; cönä’döa’to: —Änwanno iisadaaediitacoomo, ñaa ’wa’tätääcä. Määdhä dhanwa tameedä jata weichö wa’cä cone’da soto tönoowanoomaiñe weneene judhío jäcäiñe, jenaado’jä waanontänä jäcä mmaja, Wanaadi weichojo jäcä mmaja. Eduuwa Wanaadi weichojo taca judhíojöncomo namonno’joicho; mädääje Wanaadi weichojo nichoone’ma; quee cönä’döa’to ñanno Paudo jäcä.

²⁹ Tönwanno yääje cönä’döa’to Paudo jadä Todóojimo ene’jödö weijäcä jataawä. Judhíojöönö cönä’jaaca Todóojimo, Eujeeso ñano. Tönwanno cöneecanö’a’to Wanaadi weichojo taca ñäädä amonno’jaatäi Paudo wwä.

³⁰ Yaawä tameedä soto cöneewodoicha’to; tujuumä cöneeca’tömöicho Paudo wwadäädä. Tönwanno cönaajoicho yaawä; Wanaadi weichojo tacanno cöni’jiichöicho. Yaawä dea mma Wanaadi weichojo nata’tadö cöna’duicho.

³¹ Yaawä chäwwäiñe Paudo emaadawä anejjacoomo soto suddau edhaajotoncomo wwä cöneecammaicho tameedä Jeduusadén ñancomo wewoodoichadööcomo.

³² Yaawä ñäädä tösootoi cöni’jummaicho; ñanno tösootoi nanontädööcomo jäcä tö’wa’tännamo cöni’jummaicho dea. Tamjä’ne cöntonto yaawä yeewodoichadööcomo döiña. Yaawä soto wwäiñe suddau eneea’comjäcä, chäädhajootoncomo mmaja, tönwanno cöne’nomjaicho Paudo aiju’jätöödö.

³³ Yaawä suddau edhaajotoncomo cöntämä yoiñaiñe; töwö Paudo cömmöjoojätöi aacä cadheena que, jedeesoje adäädö wetä. Töwö Paudo cöneecamma’joi: —¿Änääcö amäädä? ¿Ane’cäämö mödöi? quee cönä’döaacä.

³⁴ Soto cöncä’tömjä’a’to yaawä, dhantai anejjeja, dhantai ’chene anejjeja daja. Aashicha ääta’da yeijäcä suddau edhaajotoncomo Paudo cönaadojoi waadiya weicho’como taca.

³⁵ Yaawä cadeeda joi töwäncudaawäiñe ñanno suddau töncawäiñe Paudo cönaadäa’to soto wwäiñe ewontädööje, jooje töwäätöma ñanno soto weichomjäcä.

³⁶ Ñanno soto suddau ncäcäiñe cöne’a’to töcä’tömjä’ancädäiñe: —Tämamje na; quee töwä’döancädäiñe, Paudo ecammancäda.

Soto wwäiñe Paudo wa’deuwö’jödö

³⁷ Yaawä waadiya weicho’como taca tadäädawä Paudo cönä’döaacä suddau edhaajotoncomo wwä: —Wa’deuwö’se wa äwwä; quee. Yaawä töwö suddau edhaajotoncomo cönä’döaacä Paudo wwä: —¿Quidiiyeeco a’deucwato ca amäädä?

³⁸ ¿Ñäädäjöönö ca amäädä yääje yeiya’jäcä, Ejiito ñanoojönö, jenaadä jata ’jemjönö aca cöntännö aacä soto soto emannamo tönwodoichadö jadäiñe? quee cönä’döaacä suddau edhaajotoncomo Paudo wwä.

³⁹ Yaawä Paudo cönä’döaacä chäwwä: —Judhío dajaane öwö, Taadoso ñano, yää Sidiisiya ñano jata täneejucaato. Yääje yeijäcä ya’deuwö’ñojo canno soto wwäiñe; quee cönä’döaacä Paudo.

⁴⁰ Töwö suddau edhaajotoncomo cönä’döaacä yaawä: —Adha’deucwä yääje yeiya’jäcä; quee. Yaawä Paudo cönä’jaacä cadeeda de’wä; töwö tamäädö eneejojäätödö que soto cöneeta’jöichajoicho yaawä. Yeeta’jöa’comjäcä Paudo cönä’deuwöi chäwwäiñe eewedeeo a’deucwe. Töwö cönä’döaacä: