DOSECHO 19 - Wanaadi A'deddu

Eujeeso ña Paudo wei’jödö

¹ Yääje mma yaawä Codinto ña Apoodo weichö Paudo cönäämannä’acä aneiñaja; töwö cönä’döi yaawä Eujeeso ña. Yäätä cöneejodöicho anejjacoomo quedeiyentecoomo.

² Paudo cönä’döaacä chäwwäiñe: —¿Epíiditu Santo ’je mä’dötääne yaawä mecaanö’täneedawä? quee cönä’döaacä. Ñanno cönä’döa’to yaawä chäwwä: —Epíiditu Santo töweiye yeichö aneeta’da mmädä ñaa na; quee.

³ Yaawä Paudo cöneecamma’joicho: —¿Aaquene wautisaaje mä’döjootäne? quee cönä’döaacä. Tönwanno cönä’döa’to: —Juan Wautiita necammajäätö’jödö woije wautisaaje ñaa cönä’döjoi; quee cönä’döa’to.

⁴ Yaawä Paudo cönä’döaacä chäwwäiñe: —Juan Wautiita wautisaaje soto tönnöeiñe cönä’jaacä chö’tajäätödööcomo tösa’dumincha yeichö ene’ju’tojooje mma. Töwö töwä’döe cönä’jaacä: “Ecaanö’täcä’de ñäädä öncäcä ne’aadö;” quee töwä’döe cönä’jaacä Juan Wautiita, Jesuuquidiito ecammancädä, ñäädä Äwaanacaanei; quee cönä’döaacä Paudo chäwwäiñe.

⁵ Yää eta’jäcä ñanno wautisaaje cönä’döjoicho yaawä Jesuuquidiito eetö joi.

⁶ Paudo tamäädö tödööa’jäcä ye’cäcäiñe Epíiditu Santo cönä’täi yaawä chääjäcäiñe; anejja a’deucwe cöna’deuwa’to yaawä; Wanaadi nutuudu woije cöneecammajä’a’to dea.

⁷ Ñanno cönä’ja’to amoojadooto de’wä aacä dhanwaacomo.

⁸ Yaawä we’jummatoojo taca Paudo töötä cönä’jaacä aaduwaawä nuunä. Yäätä jäduuje töneecammajä’e cönä’jaacä. Töwö töwa’deuwe cönä’jaacä Wanaadi töcaajichaanaije tödöödö jäcä.

⁹ Anejjacoomo eta’se’da cönä’ja’to; aneecamjö’da cöneiya’to. Tameedä soto netaadöcoomoje cone’da töwa’deuwe tönwanno cönä’ja’to quedeiyenteje weiñä jäcä. Yaawä Paudo cönsancwaicho. Töwö quedeiyentecoomo cönaadoicho Tidaano nowaanomaatojo taca; iiña anooto waadäi töneecammajä’e cönä’jaacä chäwwäiñe.

¹⁰ Mädääje töwö cönä’jaacä aacä wedu; tameedä Aasiya ñancomo cöneeta’to Jesuuquidiito a’deddu, judhíocoomo mmaja, judhíojöncomo mmaja.

¹¹ Wanaadi jooje aashichaato tönnöjo cönä’jaacä Paudo wwä.

¹² Ñanno soto tönaadä cönä’ja’to Paudo ajoojo’jödö jaiñuweeda, camiisha mmaja. Yää que cädäija’como tönaadonca cönä’ja’to; odo’shancomo töweeja’ca cönä’ja’to dhacannoiñe.

¹³ Yäätä cönä’ja’to anejjacoomo judhíocoomo töjaatacoonemjöncomo. Tönwanno cönä’ja’to odo’sha ija’canö’jonnamo. Jesuuquidiito eetö joi odo’sha ija’canö’jo’seiñe töweiye cönä’ja’to. Edääje töwä’döe cönä’ja’to odo’shancomo wwä: —Jesuuquidiito eetö joi adheeja’catääcä, ñäädä Paudo töneecammajä’e weneenedö; quee.

¹⁴ Mädääje cönnöa’to Eseewa nnacoomo, aacä amoojato’como. Judhío cönä’jaacä ñäädä Eseewa, Wanaadi wwä töwa’deuwaamo edhaajotoncomo.

¹⁵ Yaawä yääje Eseewa nnacoomo wä’döa’comjäcä odo’sha cönä’döaacä chäwwäiñe: —Jesuuquidiito yoowanääcä na, Paudo mmaja. Änwanno mmaane yoowanääcä’da maato; quee cönä’doaacä odo’sha Eseewa nnacoomo wwäiñe.

¹⁶ Yääje töwa’deuwödö’jo ñäädä odo’sha ’jano cönaajammöi chäwwädäädäiñe. Töjäädudu que cöne’jodheinchaicho tameedä; jooje cömmaminchaicho. Yaawä ñanno Eseewa nnacoomo cönäänejeicho töwonqueiñe’da, tätuunui’chäjä’eiñe mmaja.

¹⁷ Tameedä Eujeeso ñancomo yää jäcä cöneeta’to, judhíocoomo mmaja, judhíojöncomo mmaja; jooje cönääcatoncaicho yaawä. Aashicha töwa’deuwe cönä’ja’to Cajiichaana Jesuuquidiito jäcä.

¹⁸ Jooje ñanno ecaanö’nnamo cöneecamma’to conemjönö tönnö’jocoomo.

¹⁹ Dhantai cönä’ja’to jöwaiñamo’jödö. Ñanno cöni’jummaicho töjaajedaichomo, yää tö’waichöcoomo jajeedai’chädö’jödö. Cöiñau’cwaicho yaawä tameedä soto neneedöcoomoje. Yää jajeeda cönä’jaacä täje, aacä sotooto de’wä amoojadä miide jödaata ’cäwa’cä.

²⁰ Mädääje Cajiichaana Jesuuquidiito a’deddu cöneejangacä; jäduuje cönä’jaacä jooje.

²¹ Yää ’jeje Paudo töötä’se cönä’jaacä Maasedooniya ña, Acaaya ña mmaja, Jeduusadén ña töötädö wetä yaawä. Edääje cöntö’tajä’acä: Jeduusadén ña ööta’jäcä Dooma ña täjai wa yaawä; quee.

²² Yaawä towaajo Maasedooniya ña töwö cönaanontäi aacä tö’wa’tännamo: Tiimoteo, Edaasato mmaja. Paudo mmaane Aasiya ña cöno’somjoi numa’cäiche.

Eujeeso ñancomo wewoodoicha’jocoomo

²³ Yaawä soto jooje cöneewodoicha’to quedeiyenteje weiñä jäcä,

²⁴ Demeetediiyo nejoodöjoodö woije. Ñäädä Demeetediiyo cönä’jaacä jödaata döaajä chu’täjä’nei. Töwö tuncucui’chäjä’e cönä’jaacä Diyaana weichojo, ñäädä wodi töwaanadiiyöcoomoje töne’tä cönä’ja’todö. Yää tödöödö que jooje jödaata töncana’ca cönä’jaacä, chääjadoncomo wetaadawa’cajoodö mmaja.

²⁵ Yaawä ñäädä Demeetediiyo cöni’jummaicho tameedä yää dea tödönnamo, anejjacoomo yää nöngato tödönnamo mmaja. Töwö cönä’döaacä chäwwäiñe: —Jimmä, odhoowanääcäiñe jooje jödaata töncana’ca cöweichöcoomo mädä cötaadawaajuichomo tödöödö que.

²⁶ Änwanno meneea’quene, metaatäne dea Paudo necammajäätödö. Töwö töneecammajä’e weneene wanaadije’da yeichö soto namoode’nädö. Mädääje töwö soto ni’jedaato, Eujeeso ñancomo mma’da, tameedä Aasiya weichö waadoinchomo mmajaane.

²⁷ Tönoiñe na mädääje yeichö. Mädääje emaacudääjai ña mädä cötaadawaajuichomo. Yaawä soto ämjumma’da eijai ñaato Diyaana, yeichojo amääajä cu’taajä mmaja. Tönwanno nichiiñeme’caato’de yaawä ñäädä tameedä Aasiya ñancomo, tameedä nono weichö wa’co’como wanaadiyööcomooje naadö; quee cönä’döaacä Demeetediiyo ñanno chu’täjä’nnamo wwäiñe.

²⁸ Yää eta’jäcä ñanno chu’täjä’nnamo cönäätömaicho jooje; tönwanno cöncä’tömjä’a’to yaawä: —Adai’joto ñäädä Diyaana, Eujeeso ñancomo wanaadiyö; quee cönä’döa’to.

²⁹ Yaawä tameedä jataawoncomo cöneewodoicha’to jooje. Tönwanno cönaajoicho Caayo, Adiitaaducu mmaja, ñanno Maasedooniya ñancomo, Paudo jadoncomo. Cöni’jiichöicho yaawä töwe’jummato’como taca.

³⁰ Paudo mmaja iiña töötä’se cönä’jaacä, soto wwäiñe töwa’deuwödö wetä, töwäädä quedeiyentecoomo anaadojo’da cöneiya’tone’.

³¹ Yäätä cönä’ja’to dea anejjacoomo Aasiya ñancomo cajiichaanacoomo; Paudo jummannamo cönä’ja’to ñanno. Tönwanno tösootoichomo cönaanontoicho Paudo döiña. Edääje ñanno cönä’doa’to Paudo wwä: —Ye’jummato’como taca mma mötäi’che; quee cönä’döa’to.

³² Yaawä ñanno ye’jumma’como dhantai cöncä’tömjä’a’to anejjeja, anejjacoomo ’quene anejjeja daja; i’jeta’jödö nönge cönä’ja’to. Tönwanno jadä’jödöödä dhowaanäcäiñe’da cönä’jaacä töwe’jumma’jocoomo.

³³ Yaawä judhíocoomo Aadejantudu cönaadimaicho soto do’tacannoiñe; anejjacoomo yäätoncomo cöneecamma’to yaawä chäwwä. Töwö Aadejantudu tamäädö eneejojäätödö que cöneeta’jöichajoicho, chäwwäiñe töwa’deuwö’se töweijäcä.

³⁴ Yaawä ñanno soto cöneene’jutuicho judhíoje yeichö; yääje yeijäcä tujuumä cöncä’tömjä’a’to aacäde shii wääseca’jödö: —Adai’joto ñäädä Diyaana, Eujeeso ñancomo wanaadiyö; quee cönä’döa’to.

³⁵ Yaawä acu’shänä jajeedai imennänei soto cöneeta’jöichajoicho yeewodoichadööcomo jonno. Töwö cönä’döaacä chäwwäiñe: —Änwanno Eujeeso ñancomo; tameedä soto dhowaanäcäiñe na Eujeeso ñancomo Diyaana weichojo edhaamoje cöweichöcoomo, Diyaana cu’taajä edhaamoje cöweichöcoomo mmaja, yää caju ñanno cöne’duccaichö.

³⁶ Anejja mädä ijoome’däjai’cha na. Yääje yeijäcä täncanoode’da eijai maato, ewoodoicha’daane.

³⁷ Canno dhanwaacomo sadä mene’toodö conemjönö ännö’da naato awaanadiiyöcoomo jäcä, chääjäcä cone’da a’deuwö’da mmaja.

³⁸ Soto jäcä cone’da Demeetediiyo weiya’jäcä, chääjadoncomo wetaadawa’cajoodö mmaja, äcamma’jonnamo wwadäädäiñeene täjai ñaato, yääje yeiya’jäcä. Ñanno cajiichaanacoomo wwäiñe choonecaajojai ñaato yää cone’da töweichöcoomo.

³⁹ Anejja jäcä awa’deuwö’seiñe aweiya’comjäcä cajiichaanacoomo jadäiñeene e’jummajai maato.

⁴⁰ Cätoujotantäi’cha ca’dö jääcä eduuwa mädä wewoodoicha’jä jo’tädööje. Cäcamma’ja’comjäcä cöwa’deuto’como ’je’da eijai ña, ijo’tädööje cöweewodoicha’jocoomojöönö; quee cönä’döaacä ñäädä acu’shänä jajeedai imennänei soto wwäiñe.

⁴¹ Yääje töwä’döa’jäcä ñanno soto we’jumma’como cönenno’jaicho yaawä.