DOSECHO 17 - Wanaadi A'deddu

Teesadoonica ñancomo wewoodoicha’jocoomo

¹ Yääje mma yaawä töötädaawäiñe Amjiipodi ñano cömja’dätoicho, Aapodooniya ñano mmaja; cönä’döicho yaawä Teesadoonica ña. Yäätä cönä’jaacä judhío we’jummato’como.

² Yaawä töweichö nöngeedä Paudo cöntämä we’jummatoojo taca. Aaduwaawä semaana töwö cöneecammajäätöi chäwwäiñe, wäädeetatoojo anooto waadäi.

³ Wanaadi a’deddu imennaajä jäcä ecammajä’ancädä töwö cöneecammajä’acä chäwwäiñe jenaado’jä jonnoto’jödöödä Quidiito wäntunaanö’tojo dea yei’jödö, töwäämaajo jonno yaadoncatoojo mmaja. Töwö töwä’döe cönä’jaacä chäwwäiñe: —Ñäädä dea Jesuuquidiito, äwwäiñe töneecammajä’e wääneneedö, Äwaanacaaneije na; quee Paudo töwä’döe cönä’jaacä.

⁴ Yaawä anejjacoomo judhío cöneecamjöicho; Paudo, Siida jadäiñe cönä’ja’to yaawä. Jooje quidiiyeecocoomo Wanaadi nontännamo cöneecamjöicho dea, wanna wodiiñamo täneejuca’como mmaja.

⁵ Yääje yeijäcä ñanno judhío quedeiyentejöncomo tö’neiñe cönä’ja’to. Töjaadäiñe dhanwaacomo conemjöncomo cönaadoicho; i’she’jocoomo ñanno cönä’ja’to. Tönwanno cöneewodoicha’to yaawä jataawä, soto aquimmadööcomooje; cöntonto yaawä Jasón mmai yöiña Paudo, Siida u’cadööcomo wetä jödo’na, soto wwäiñe utuuducoomo wetä yaawä.

⁶ Paudo aneedantä’da töweijäcäiñe Jasón mma cöni’ji’chöicho yaawä, anejjacoomo quedeiyente mmaja. Yää jata acu’shänäi’chädö döiña cönaadoicho; cönä’döa’to: —Canno dhanwaacomo tameedä nono weichö wa’cä ansu’dännamo sadä daja cöneejoto dea.

⁷ Mä’dä Jasón tömmai chaca cömjata’ta’to. Tönwanno tönnöe weneeneto domaanocomo cajiichaanaichomo waanontä’jödö nönge’da; anejja cajiichaanaje töneecamma weneeneto, ñäädä Jesuuquidiitoje ñe’tädööcomo; quee cönä’döa’to.

⁸ Yää etaadö’jo tameedä soto cöneewodoicha’to, chäädhajootoncomo mmaja.

⁹ Yää ’jeje Jasón wwä yeeja’cato’como ejeemajoodö’jo cönenno’jaicho yaawä.

Wedeea ña Paudo, Siida wei’jocoomo

¹⁰ Yaawä coijai yä’döa’jäcä Wedeea ña quedeiyentecoomo Paudo cönenno’jaicho, Siida mmaja. Iiña Paudo wä’döa’comjäcä judhío we’jummato’como taca cönoomomöicho yaawä.

¹¹ Ñanno judhío cönä’ja’to Teesadoonica ñancomo e’jodhe aashicha yeichöcoomo. Tönwanno aashicha cöneeta’to Wanaadi a’deddu ecammajäätödö. Anooto waadäi tönemmenca cönä’ja’to Wanaadi a’deddu imennaajä, chäänönge Paudo necammajäätödööcomo yeichö eneedö wetä.

¹² Wanna cöneecamjöicho tönwanno; wanna mmaja quidiiyeecocoomo, wodiiñamo täneejuca’como mmaja, dhanwaacomo mmaja.

¹³ Yaawä judhío Teesadoonica ñancomo cöneeta’to Wedeea ña Paudo wwä Wanaadi a’deddu ecammajäätödö. Tönwanno cöntonto yaawä iiña; soto cöni’jedoicho yaawä Paudo jäcäiñe.

¹⁴ Yaawä dea mma quedeiyentecoomo Paudo cönaanontoicho dama jacäi. Siida mmaane cöno’somjoi Wedeea ña, Tiimoteo acä.

¹⁵ Ñanno Paudo adännamo Ateena ña cönaadoicho; yäätä Paudo ñänga’jäcä tönwanno cönennacaicho yaawä ya’deuwö’jödö dha’me. Edääje Paudo cönä’döaacä chäwwäiñe: —Eduuwaiche mma döiña neejö’ña’to Siida, Tiimoteo mmaja; quee.

Ateena ña Paudo wei’jödö

¹⁶ Yaawä Ateena ña Siida womoocödaawäiñe Paudo cone’da cönä’jaacä jooje chu’taajä döjä’ajä yeijäcä yää jataawä.

¹⁷ Yääje yeijäcä we’jummatoojo taca töwa’deuwe töwö cönä’jaacä judhío wwäiñe, anejjacoomo Wanaadi ya’deme’nnamo wwäiñe mmaja. Anooto waadäi töwa’deuwe cönä’ja’dea jödoodo aca, yäätä ye’jumma’como wwäiñe.

¹⁸ Yäätä cönä’ja’to anejjacoomo eepicuudeo wätunnäichomo jäconcomo woowanoomadö, etoico wätunnäichomo jäconcomo woowanoomadö mmaja. Ñanno cöna’deuwa’to Paudo jadä. Dhantai cönä’döa’to: —¿Aaquene nä’döaanä määdhä töwentaame’cato? quee. Anejjacoomo ’quene cönä’döa’to: —Töwö necammajä’a anejjeja’como wanaadi jäcä; quee cönä’döa’to. Tönwanno yääje cönä’döa’to Jesuuquidiito jäcä Paudo wwä ecammajäätödö e’nei, töwäämaajo jonno waadoncanä jäcä ecammajäätödö e’nei mmaja.

¹⁹ Yaawä tönwanno Paudo cönaadoicho Aadeoopaco döiña, yää töwe’jummato’como döiña. Tönwanno cönä’döa’to yaawä chäwwä: —Eta’se ñaa na mädä aneecammajäätödö, aneeta’da ñaa naadö.

²⁰ Ñaa owaanojöönö mädä; yääje yeijäcä towaanäcä tödö’se ñaa na; quee cönä’döa’to Paudo wwä.

²¹ Ñanno Ateena ñancomo, iiñancomo wejaata’ta’como mmaja, yeichöcoomo cönä’jaacä anejja wätunnä töneecammajä’e weiñäje, töneetadööcomoojönö etaajätö’se mmaja. Yää jäcä mma töwoowoincha cönä’ja’to, anejja ännö’da.

²² Yaawä Paudo cönammöi dhantawäiñe, Aadeoopaco taca. Töwö cönä’döaacä chäwwäiñe: —Änwanno Ateena ñancomo, öwö adheene’matäiñe wäänene jooje töwäätunnäiche aweichöcoomo.

²³ Awe’jummato’como do’tai wäämannäjöödawä saaquidiijiisiyo dötoojo weneeaqueene; imennaajä chääjäcä cönä’jaacä: “Wanaadi owaanojöönö wwono edä;” quee. Ñäädä odhoowanoocomoojönööje yeichaame chäwwä tönnöe määnetäänedö wecammajä’a äwwäiñe.

²⁴ “Ñäädä Wanaadi tameedä edä nono tödöönei’jödö, tameedä yeichö wa’cä dhaca naadö mmaja. Caju edhaajä ñäädä, nono edhaajä mmaja. Töwö ei’cha na soto namäädö taca.

²⁵ Töwwä a’que yeiyancädä’da töwö tumjumma weneene töwwä soto nödöödöcoomo, töwö deaane nudä cöweicho’como u’neije yeiyajä, cöwäädenwato’como mmaja. Tameedä yeichö wa’cä tödöönei’jödö töwö.

²⁶ “Töwö Wanaadi cönnöi tameedä soto yää dea dhaquiiyöje, tameedä nono weichö wa’cä yeichöcoomo wetä. Töwö cuncu’nä’täi yeicho’como, ijaatadööcomo weichojo mmaja.

²⁷ Töwö mädääje cönnöicho Wanaadi ujiiyö wetä chäwwäiñe, töwwadäädä yä’jedennacaadöcoomo wetä mmaja, tädantädö wetä yaawä chäwwäiñe, amoinche’da cöjääcäiñe yeichaame mma’ne.

²⁸ Töwö yoije cöweichöcoomo töweiye na, mädä nudä caatoodö; töwö yoije mmaja cä’jimi’chato dea. Änwanno äjimmotoncomo dea yääje cömmennäi: “Cönwanno Wanaadi jimmäje caato;” quee.

²⁹ Wanaadi jimmäje cöweijäcäiñe oodo döaajäje Wanaadi weichö chö’tamme’jai’cha caato, jödaata döaajäje jeiñe mma, täju jeiña mma, yää töntö’tammecöödöcoomo woije soto tuncu’tä weneenetoodö.

³⁰ Jenaadä töshinchääne Wanaadi tönshinchä cönä’jaacä towaanojo’ne’da soto weichöcoomo. Eduuwa mmaane töwö nanonta tameedä soto weichöcoomo wa’cä tötö’tajäätödööcomo sha’duminchadö jäcä.

³¹ Töwö Wanaadi cuncu’nä’täi soto emmencato’como anootoi’chädö. Chäänönge töwö nemmencajaato’de ñäädä dhanwa emmencaneichomooje töne’tädö wwä. Yääje yeichojo tacaade cönnöi yäämaajo jonno ñäädä dhanwa adoncadö que; quee cönä’döaacä Paudo Ateena ñancomo wwä.

³² Yaawä ñanno soto wwäiñe yäämaajo jonno waadoncanä jäcä ecammajäätödö eta’jäcä, dhantai tönwanno cönenno’jä’a’to. Anejjacoomo ’quene edääje cönä’döa’to Paudo wwä: —Aneedawä anooto awä mädä jäcä dea aneecammajäätödö ñaa neta’dede; quee.

³³ Yaawä Paudo cöntämä choojonnoiñe.

³⁴ Dhantai etannamo’jödö chääjadä cöntonto. Tönwanno ñeecammajäätödö cöneecamjöicho. Ñanno antawäiñe cönä’jaacä dhanwa Diiyoniisiyo täätö; Aadeoopaco edhaamo jimmäje cönä’jaacä töwö. Wodi cönä’ja’dea, Dáamadi täätö; anejjacoomo soto cönä’ja’to dea.