DOSECHO 16 - Wanaadi A'deddu

Paudo, Siida jadäiñe Tiimoteo wei’jödö

¹ Yaawä Paudo, Siida mmaja cönä’döicho Deedewe ña, Diitada ña mmaja; yäätä quedeiyente cöneejodöicho, Tiimoteo täätö. Ñäädä dhenö cönä’jaacä judhío, quedeiyente cönä’jaacä; yuumö ’quene cönä’jaacä quidiiyeeco.

² Tameedä quedeiyente Diitada ñancomo, Icooniyo ñancomo mmaja aashicha töwa’deuwe cönä’ja’to Tiimoteo jäcä.

³ Ñäädä Paudo adä’se cönä’jaacä töjaadä. Yääje yeijäcä siicunsidaadoje cönnöi yaawä ñanno töötoto’como ña judhío cönä’ja’todö jäcäinchädäiñe, tameedä dhowaanäcäiñe yeijäcä quidiiyeecoje yuumö weichö.

⁴ Tameedä jata töötädööcomo waadäi quedeiyentecoomo wwä töneecammajä’e cönä’ja’to yää Jeduusadén ñancomo anonta’como necamma’jocoomo jäcä, ansiyaano necamma’jocoomo jäcä mmaja.

⁵ Mädääje tameedä Quidiito sotoi cönä’jädu’ta’to; anooto waadäi quedeiyentecoomo cöneejanga’to.

Maasedooniya ñano jäcä Paudo wäneetö’jödö

⁶ Yaawä Aasiya ña Epíiditu Santo Wanaadi a’deddu aneecammajoojätö’da cöneiyacä Paudo wwäiñe. Jidiijiya ñano cömja’dätoicho yaawä, Cadaasiya ñano mmaja;

⁷ Miisiya ñano wä’cunnacaadö döiña cönä’döicho yaawä. Yäätonno Witiiniya ña töötä’se cönä’ja’todö’je, Epíiditu Santo anaadojo’daiñe cöneiyacä.

⁸ Yaawä Miisiya ñano ija’dätä’jeje Todoowa ñano wä’täi aca cönä’döicho.

⁹ Iiña coijai Paudo cönwäneetöi. Dhanwa cönääneaacä, Maasedooniya ñano; ñäädä cönä’döaacä Paudo wwä: “Maasedooniya ña ä’cäde; ñaa ’wa’täta;” quee cönä’döaacä ñäädä dhanwa.

¹⁰ Yääje Paudo wäänetö’jeje Maasedooniya ña ñaa cönääma’täi yaawä. Ñaa owaanäcä cönä’jaacä iiña ñaa anontädö Wanaadi wwä, ñeetadööcomooje aashichaato wätunnä ecammajäätödö wetä.

Jidiipo ña Paudo, Siida wei’jocoomo

¹¹ Yaawä jidaawa awä ñaa cönääma’täi Todoowa ñanno; sa’donna ñaa cöntämä Samootadaasiya ña. Jenamma naadöje ñaa cönä’döi yaawä Neaapodi ña.

¹² Yäätonno ñaa cöntämä Jidiipo ña, domaanocoomo jataadöcoomo, yää jata täneejucaato jaiñoone Maasedooniya ñano. Yäätä ñaa cönä’jaacä äächädä anooto mma.

¹³ Yaawä wäädeetatoojo anooto awä ñaa cöntämä jata tö’cäi, tuna jacäi, Wanaadi wwä wa’deutojo döiña. Yäätä ñaa cönaatajiimai; ñaa cöneecammajä’acä yaawä wödiiñamo we’jumma’como wwä.

¹⁴ Ñanno antawäiñe cönä’jaacä wodi, Diidiya täätö, Tiiyatiida ñano. Töwö cönä’jaacä camiisha seweichato ejeemajooneije. Wanaadi tumjumma cönä’jaacä. Yaawä Cajiichaana cuntui chäwwä Paudo wwä ecammajäätödö aashicha etaatojo.

¹⁵ Yää ’jeje töwö wautisaaje cönä’döjoi, yä’jimmä’tädö mmaja. Yaawä töwö cönä’döaacä ñaa wwä: —Cajiichaana ecaanö’nei chäänöngatooje äwwäiñe tö’ta’jäcä, ömmai chaca odhoomontäcä, iiña määwa’tätäiye; quee cönä’döaacä. Töwö ñaa amonno’jone yaawä tä’saca.

¹⁶ Aneedawä anooto awä Wanaadi wwä wa’deutojo döiña ñaa wötäädawä ajei’choto’jaato ñaa ejoodöne. Töwö cönä’jaacä odo’sha töntö’tamme’cato ’jano. Tädhaajä que ñäädä cönä’jaacä; töntö’tamme’que töweichö que jooje tädhaajä jödaatai töncana’ca cönä’jaacä.

¹⁷ Ñäädä ajei’choto’jaato Paudo ncäcä töwäämannä’e cönä’jaacä, ñaa ncäcä mmaja. Töwö töcä’tömjä’e cönä’jaacä: —Wanaadi o’jodhaato anoonö canno dhanwaacomo. Tönwanno wääwanaacatoojo necammaato äwwäiñe; quee töwä’döe cönä’jaacä soto wwäiñe.

¹⁸ Jooje anooto mädääje cönä’jaacä. Yaawä Paudo cönquinchai yää etaadö. Töwö cönä’jedennacai ñäädä ajei’choto’jaato wwadäädä; odo’sha wwä cöna’deuwöi, ñäädä chaaca cönä’ja’dö wwä; cönä’döaacä: —Jesuuquidiito eetö joi mämja’canö’ja; quee. Yaawä dea mma ñäädä odo’sha cöneeja’cai.

¹⁹ Yaawä ñäädä wodi edhaamo dhowaanäcäiñe cönä’jaacä ñäädä ajei’choto’jaato ai töjöödataichomo chaana’cajai’cha töweichöcoomo. Yääje yeijäcä tönwanno Paudo cönaajoicho, Siida mmaja; cönaadoicho yaawä acu’shänä wwadäädäiñe, jata jödoodoi’chädö aca.

²⁰ Tönwanno cönä’döa’to ñanno soto ecamma’jonnamo wwä: —Canno judhíocoomo cöjaatawoncomo newoodoichajaato.

²¹ Tönwanno töneecammajä’e weneeneto cönwanno domaano etaajaichojöönö, tödööjaichojöönö mmaja; quee cönä’döa’to Paudo jäcäiñe.

²² Yaawä tameedä jataawoncomo cönäätömaicho Paudo jäcäiñe. Ñanno acu’shänä Paudo cönwoncajoojätöicho dee que aiju’jätöödöcoomo wetä.

²³ Yaawä jooje aiju’jätö’jocomje jedeeso ewöötö’tädö taca cöneewaacaicho. Aashicha cöneedai’chäja’to jedeeso edai’chäneichomo wwä, yäänejeedöcoomo queiñe.

²⁴ Yääje tanontä’jödö weijäcä ñäädä jedeeso edai’chäneichomo Paudo cöneewaacaicho yä’cadö aca jeene. I’juduucomo jäcä cömmöjäätöicho cadheena sejaadadi döaajä que.

²⁵ Yaawä yo’tawääne Paudo, Siida mmaja Wanaadi wwä cöna’deuwa’to; cöneecanta’ña’to dea. Anejjacoomo jedeeso cöneeta’to yeecanta’ñädööcomo.

²⁶ Yaawä jadheedä nono cönäätu’mei jooje, jedeeso ewöötö’tädö o’wadö tu’mejoone. Yaawä tameedä mönaatata cönaata’ducaajätöi, tameedä jedeesoja’como imööjä’a’como cöneesacaajätöi chea.

²⁷ Jedeeso edai’chäneichomo cönä’jäi yaawä. Tameedä mönaatata ta’duqueiñe’da edanta’jäcä töwö tösaudai cunu’cai yaawä töweewädö wetä. Töwö cöntö’tajä’acä jedeeso wäänejeeaatäiñe.

²⁸ Yaawä Paudo töcä’de cöna’deuwöi; cönä’döaacä chäwwä: —Adheewäi, tameedä eetä ñaa na; quee cönä’döaacä.

²⁹ Yaawä adhaawa e’catäädö’jo ñäädä jedeeso edai’chäneichomo cönoomomöi Paudo döiñaiñe tötäätä’nöngancädä. Tä’mudhe cönä’döi yaawä Paudo, Siida o’wawäiñe.

³⁰ Töwö cunu’caicho yaawä jedeeso ewöötö’tädö tacanno; cöneecamma’joicho: —¿Ane’cäämö tödööjai wanä wääwanaacatoojoje? quee cönä’döaacä.

³¹ Yaawä Paudo cönä’döa’to chäwwä: —Cajiichaana Jesuuquidiito ecaanö’cä; töwääwanaaca eijai ma yaawä, äwä’jimmä’tädö mmaja; quee cönä’döa’to.

³² Yaawä tönwanno Wanaadi a’deddu cöneecammajäätöicho chäwwä, tameedä chä’sacancomo wwä mmaja.

³³ Yaawä dea mma, yää coijaichawä dea mma, ñäädä jedeeso edai’chäneichomo cöncoccai Paudo aiju’jätö’jocoomo. Yää ’jeje wautisaaje cönä’döjoi yaawä tameedä töwä’jimmä’tädö jadäiñe.

³⁴ Yää ’jeje töwö Paudo cönaadoicho tä’saca ewanshinchädööcomo wetä. Töwö ta’cwaiñe cönä’jaacä, yä’jimmä’tädö mmaja, Wanaadi ecamjödö weijäcä töwwäiñe.

³⁵ Yaawä yaawaana’jäcä ñanno äcamma’jonnamo waadiya cönaanontoicho Paudo u’cajoodöcoomo wetä.

³⁶ Yaawä jedeeso edai’chäneichomo cönä’döaacä Paudo wwäiñe: —Ñanno äcamma’jonnamo adhu’cajaato ñaa wwä. Yääje yeijäcä täncanoode’da täjai maato eduuwa; quee cönä’döaacä.

³⁷ Yaawä Paudo cönä’döaacä waadiya wwäiñe: —Ng’jn, eja’cajai’cha ñaa na. Tönwanno ñaa ecamma’jodö’jo’da mmädä ñaa aiju’jä’neto tameedä soto neneedöcoomoje, domaanoje ñaa weichaame; jedeeso taca ñaa döneeto yaawä. Eduuwa tacaade’da ñaa ja’canö’jo’se naato. Tönwannoone neejö’ña’to ñaa u’ca; quee Paudo cönä’döaacä.

³⁸ Ñanno waadiya äcamma’jonnamo wwä cöneecammajäätöicho yaawä Paudo wa’deuwö’jocoomo. Äcamma’jonnamo cönääcatoncaicho yaawä domaanoje yeichöcoomo eta’jäcä.

³⁹ Tönwanno cöntonto yaawä Paudo, Siida döiñaiñe yää chääjäcäiñe tönnö’jocoomo encwanno’jojoodö wetä. Cunu’caicho yaawä; töjaatädööcomo jonno enno’jadööcomooje mma.

⁴⁰ Yaawä jedeeso ewöötö’tädö tacanno töweeja’ca’comjäcä Paudo cöntonto Diidiya e’saca. Yää ’jeje quedeiyentecoomo eneea’jäcä töwö cönwätuujaicho; cöntonto yaawä aneiñaja.