DOSECHO 15 - Wanaadi A'deddu

Jeduusadén ña anonta’como we’jumma’jocoomo

¹ Yaawä Judheea ñanno anejjacoomo soto cöntonto Antiyooquía ña; yäätoncomo quedeiyentecoomo cönoowanooma’to. Tönwanno töwä’döe cönä’ja’to: —Äwääwanaacato’comooje siicunsidaadoje ä’dojai maato, Moisé waanontä’jödö nönge dea; quee töwä’döe cönä’ja’to.

² Yaawä Paudo, Waanawé mmaja, jooje cönäätäccujä’a’to ñanno jadäiñe. Yää ’jeje Paudo Jeduusadén ña cönootonno’jajoi Waanawé jadä, anejjacoomo quedeiyente jadäiñe mmaja. Anonta’como Jeduusadén ñancomo ecamma’joiñe cönta’to, ansiyaanocoomo mmaja, ñanno iiñancomo quedeiyentecoomo e’se’tännamo.

³ Ñanno Paudo cöntonto Antiyooquía ñancomo quedeiyente nanontädööcomo woije. Yaawa töötädaawäiñe Jeniisiya chäcä cöneeja’dätoicho, Samaadiya chäcä mmaja. Tönwanno cöneecammajä’a’to töwäätunnäichomo e’nomja’jödö judhíojöncomo wwä, Wanaadi ecamjödö wetä töwwäiñe. Tameedä quedeiyentecoomo ta’cwaiñe cönä’ja’to yää eta’jäcä.

⁴ Yaawä Jeduusadén ña Paudo wä’döa’comjäcä aashicha quedeiyentecoomo cöna’dejjaicho, anonta’como mmaja, ansiyaano mmaja. Yaawä Paudo cöneecammajä’a’to tameedä Wanaadi nödö’jödö töjääcäiñe.

⁵ Anejjacoomo jaadiseeo quedeiyentecoomo cönammöicho yaawä; cönä’döa’to: —Ñanno judhíojöncomo quedeiyente siicunsidaadoje tödööjojai caato, Moisé waanontä’jödö chäwwäiñe tödööjojai caato dea; quee cönä’döa’to.

⁶ Yaawä anonta’como cöne’jummaicho ansiyaano jadäiñe yää jäcä töwa’deuwödööcomo wetä.

⁷ Yaawä jooje töwäätäccujäätödööcomo’jo Peedhodo cönammöi dhantawäiñe; cönä’döaacä: —Jimmä, änwanno odhoowanääcäiñe adhantawonnoiñe Wanaadi wwä ye’tä’jödö judhíojöncomo wwä aashichaato wätunnä ecammajä’neije, ecamjödö wetä chäwwäiñe.

⁸ Töwö Wanaadi dhowaanäcä na tameedä soto tö’tajäätödö. Töwö judhíojöncomo tösootoije tödööjai töweichö eneejodööje Epíiditu Santo cuntui chäwwäiñe, cöwwäiñe cuntuichöje mmaja.

⁹ Äänönge mma Wanaadi cujummaato, cönwanno mmaja, judhíojöncomo mmaja, chääwanööcomo mmaja cöncoccaichö naane’, ecamjödö weijäcä chäwwäiñe.

¹⁰ Yääje yeijäcä ¿ane’que’nei Wanaadi nödöödö aneecamjö’da maato? ¿Ane’que’nei ñanno quedeiyente wwäiñe ä’döjaichojöönö tödööjo’se maato, cönwanno tödööjaichojöönö, cadai’choncomo tödööjai’cha cönä’ja’todö mmaja?

¹¹ Cönwanno cowaanäcäiñe na Cajiichaana Jesuuquidiito nutuudu aashichaato que mma töwääwanaaca cöweichöcoomo, tönwanno chäänöngeiñe mmaja; quee cönä’döaacä Peedhodo chäwwäiñe.

¹² Yaawä tameedä ñanno cöneeta’jöjäätöicho; cöneeta’to yaawä Waanawé wwä ecammajäätödö Wanaadi nödö’jödö aashichaato töjääcäiñe; Paudo wwä ecammajäätödö cöneeta’to dea. Ñanno Paudo, Waanawé cöneecammajäätöicho Wanaadi wwä ene’ju’tojo tödööjo’jödö töwwäiñe judhíojöncomo neneedöcoomoje.

¹³ Yaawä yä’ca’comjäcä Jacoowo cönä’döaacä: —Ya’deddu etaatäcä jimmä.

¹⁴ Simón Peedhodo cöwwäiñe necammajäätöi awa’deene judhíojöncomo wentumje ene’jödö Wanaadi wwä, tösootoije töweiyaamoje ei’jocoomo mmaja chäwwä.

¹⁵ Mädääje dea Wanaadi wa’deuwödö ecammannamo nimenno’jocoomo na. Edääje ñanno cömmennoicho:

¹⁶ Yää ’jeje yennaca’dede; Dawí namä’jödö we’duccaajä wamääa’dede. Eduuwaatoje wödööa’de yää ye’ducca’jödö. Aashicha wamääa’de,

¹⁷ tameedä soto weichöcoomo wa’cä Cajiichaana Wanaadi ujiiyeto, tameedä judhíojöncomo mmaja, ñanno öwwä ecamma’como;

¹⁸ que nä’döa Cajiichaana, ñäädä jenaadä mädä cöneecadeeme’joichö; quee cömmennoicho Wanaadi wa’deuwödö ecammannamo.

¹⁹ “Yääje yeijäcä edääje wä’döa: Cönwanno aquimmajoojai’cha caato ñanno judhíojöncomo Wanaadi ecamjödö wetä töwäätunnäichomo e’nomjannamo’jödö.

²⁰ Tömennä mmaane quiimennätäiye chäwwadäädäiñe chu’taajä namoi’chädö jäcä’da yeichöcoomo wetä, masuuduije’da yeichöcoomo wetä mmaja, awö’cajä, eta’jiiñä’caajä mmaja änäänä’da yeichöcoomo wetä mmaja, munu anaame’da yeichöcoomo wetä mmaja.

²¹ Jenaado’jä’jödöödä jata waadäi töweiye na Moisé waanontä’jödö jäcä ecammajä’nei, yää wäädeetatoojo anooto waadäi töna’de’tä weneenetoodö; quee cönä’döaacä Jacoowo chäwwäiñe.

²² Yaawä ñanno anonta’como, ansiyaano mmaja, tameedä quedeiyentecoomo mmaja, cöna’deuwöicho anejjacoomo töjimmotoncomo enno’jadööcomo wetä Antiyooquía ña, Paudo, Waanawé jadäiñe. Juudha cöne’toicho yaawä töötäämöje, ñäädä Waasawaaje mmaja chäätö cönä’ja’dö. Siida mmaja cöne’toicho dea. Ñanno cönä’ja’to täneejuca’como quedeiyentecoomo wwäiñe.

²³ Tönwanno jajeeda cönaadojoicho chäwwäiñe, edääjato imennaajä: “Ñaa anonta’como, ansiyaano mmaja, eetoncomo quedeiyentecoomo mmaja, ñaa nimenna äwwadäädäiñe, änwanno quedeiyente judhíojöncomo, Antiyooquía ñancomo, Siidiya ñancomo mmaja, Sidiisiya ñancomo mmaja.

²⁴ Ñaa cöneetaacä eetonno anejjacoomo wöto’jocoomo adöiñaiñe. Ñanno töneecammajäätödööcomo que adhaaquimmatäiñe weneeneto, adhaashichuudätäiñe mmaja. Tönwanno siicunsidaadoje ayöödöjo’seiñe naato, jenaado’jä waanontänä tödööjo’se naato dea äwwäiñe. Ñaa nanontädööjönö ñanno cönä’ja’to.

²⁵ Yääje yeijäcä tameedä ñaa ne’jummai eetä, mädä jäcä töwa’deuwödö wetä. Aashicha cöntö’taacä ñaa wwä anejjacoomo töjimmä adöiñaiñe enno’jadööcomo, adheeneiñe. Ñaa nanontaato Paudo, Waanawé jadäiñe, ñanno ñaa nijummadö.

²⁶ Ñanno Paudo, Waanawé jooje töwäntunaanö’e weneeneto Jesuuquidiito junnei, äämajai tödööene.

²⁷ Äwwadäädäiñe ñaa nanonta Juudha, Siida mmaja. Tönwanno jaiñoone tameedä mädä necammajä’aato’de äwwäiñe.

²⁸ Epíiditu Santo, ñaa mmaja, tödööque’jönö tödööjo’se’da ñaa na äwwäiñe. Edä mma tödööjo’se ñaa na äwwäiñe:

²⁹ Chu’taajä wwä saaquidiijiisiyooje u’ajä mänäntäi’che; munu mmaja manaametäi’chede; awö’cajä mmaja mänäntäi’che; amaasuduichatäi’chede. Mädä tödööa’jäcä äwwäiñe aashicha maato’de. Mädääje mma töwä’dö’se ñaa nä’jaanä. Aashicha awei’sheiñe ñaa na; quee cömmennoicho ñanno anonta’como.

³⁰ Yaawä tanonta’comjäcä Paudo cöntonto Antiyooquía ña. Iiña quedeiyentecoomo cöni’jummaicho; yää jajeeda cuntuicho yaawä chäwwäiñe.

³¹ Yaawä töwwäiñe yää jajeeda a’de’ta’jäcä ñanno quedeiyentecoomo cöna’cwainchaicho töjäädu’tädööcomooje a’de’tä’jödö weijäcä töwwäiñe.

³² Ñanno Juudha, Siida mmaja töneecammajäätödööcomo que quedeiyentecoomo cönwätuujaicho, cömjädu’ta’to dea, Wanaadi wa’deuwödö ecammannamooje töweijäcäiñe.

³³ Numa’cäiche iiña Juudha wä’döa’comjäcä ñanno quedeiyentecoomo aashicha cönenno’jaicho dea yaawä tanontännamo’jödö wwadäädäiñe mmaja yennacaadöcoomo wetä.

³⁴ Siida mmaane töwoije cöno’somjoi yäätä Antiyooquía ña.

³⁵ Paudo, Waanawé mmaja yäätä cöno’somjoicho dea. Tönwanno anejjacoomo jadä soto cönoowanooma’to; Cajiichaana a’deddu töneecammajä’e cönä’ja’to dea.

Aacädeeto miisiyooneedoje Paudo wötä’jödö

³⁶ Yääje mma yaawä aneedawä anooto awä Paudo cönä’döaacä Waanawé wwä: —Jata waadäi quennacaiyede, tameedä Cajiichaana a’deddu cöneecammajäätö’jödö ai; quedeiyentecoomo queenetaiyetoode, ¿aaquene’ naicho? quee cönä’döaacä Paudo.

³⁷ Yaawä Waanawé töjaadäiñe adä’se cönä’jaacä Juan, ñäädä Maadocooje mmaja chäätö naichö.

³⁸ Paudo mmaane adä’se’da cönä’jaacä, Pamjiidiya ña to’nomja’jocoomo weijäcä chäwwä, töjaadäiñe tä’da yei’jödö weijäcä Jesuuquidiito tadaawaajui tödööe.

³⁹ Yää jäcä jooje Paudo cönäätäccujäätöicho Waanawé acä. Yääje yeijäcä cönä’sancwaicho yaawä. Waanawé cöntonto Chiipede ña Maadoco acä.

⁴⁰ Paudo mmaane Siida cönnöi töweichacoonoje. Yaawä Cajiichaana wwä töjääcäiñe quedeiyentecoomo wa’deuwö’jocomje tönwanno cönääma’toicho yäätonno.

⁴¹ Siidiya chäcä cönäämannäjöicho, Sidiisiya chäcä mmaja, quedeiyentecoomo jädu’tancädäiñe.