DOSECHO 14 - Wanaadi A'deddu

Icooniyo ña Paudo acä Waanawé wei’jocoomo

¹ Yääje mma yaawä Icooniyo ña Paudo wä’döa’comjäcä Waanawé acä a’nädä cönoomomöicho judhío we’jummato’como taca. Yaawä chäwwäiñe jäduuje Wanaadi a’deddu ecammajäätödö weijäcä jooje judhío cöneecamjöicho, judhíojöncomo mmaja.

² Ñanno judhío aneecanö’jöncomo mmane judhíojöncomo cöni’jedoicho cone’da chö’tajäätödööcomo wetä quedeiyente jäcäiñe.

³ Yääje yeijäcä yäätä Paudo cönä’ja’to numa. Cajiichaana ecaanö’ancädä jäduuje töneecammajä’e cönä’ja’to aashicha Wanaadi weichö jäcä. Cajiichaana chäänönge ñeecammajäätödö weichö töneenejo cönä’jaacä ene’ju’tojo tödööjodö que chäwwäiñe, aashichaato tödööjodö que mmaja.

⁴ Yää jataawoncomo äänönge’da chö’tajäätödööcomo cönä’jaacä; dhantai cöneecamjöicho judhío a’dedducoomo, dhantai ’chene anonta’como a’dedducoomo daja.

⁵ Yaawä judhíojöncomo mmaja, cajiichaanacoomo jadä cöna’deuwöicho Paudo maminchadööcomo wetä, täju que töwääjätöödöcoomo wetä mmaja.

⁶ Yaawä täma’seiñe yeichöcoomo eta’jäcä Paudo cönäänejeicho Waanawé acä; Diitada ña cöntonto, Deedewe ña mmaja, yää Dicaaoniiya ñano jata. Tameedä yää weichö wa’cä cönäämannäjöicho

⁷ aashichaato wätunnä ecammajä’ancädä.

Diitada ña täju que Paudo töwääjätö’jödö

⁸ Yaawä Diitada ña cönä’jaacä dhanwa secumjato, yennu’jödöödä. Shuucu töweiye cönä’jaacä yeichöje; woojoimanä onoonejaajönö cönä’jaacä.

⁹ Töwö cöneetaacä Paudo wwä ecammajäätödö. Yaawä Paudo yäätäädä ñäädä cöneene’maacä; cöneeneaacä töneecanö’e yeichö aadoncajai töweichö.

¹⁰ Yaawä Paudo töcä’de cöna’deuwöi; cönä’döaacä: —Aanöncä, jiidi eichä, sa’donna; quee cönä’döaacä Paudo secumjato wwä. Ñäädä cönammöi yaawä töwoojoimadööje mma.

¹¹ Yaawä soto wwäiñe yää eneea’jäcä tönwanno jäduuje cöncä’tömjä’a’to Dicaaoniiya ñancomo a’deucwe: —Wanaadija’como canno, caju ñanno sotooje yä’ta’como cödöiñaiñe; quee cönä’döa’to ñanno soto Paudo jäcäiñe.

¹² Tönwanno Juupiteedoje Waanawé cöne’ta’to yaawä, Paudo ’quene Mecuudiyuuje, töwö ecammajä’neije yeijäcä. Ñanno Juupiteedo, Mecuudiya mmaja Diitada ñancomo töne’tä cönä’ja’to töwaanadiiyöcoomoje.

¹³ Yaawä ñäädä Juupiteedo wwä töwa’deuwemö cöneejä jaaca dha’meiñe, chääjödö dha’me mmaja. Ñäädä cönä’jaacä Juupiteedo weichojo tawoono wetaadawa’cajoodö, yää jata nata’tajo amääajä cönä’ja’dö. Soto jadäiñe töwö saaquidiijiisiyooje ñanno jaaca amiiñä’ca’seiñe cönä’ja’to Paudo wwoncomooje, ya’deme’to’comooje.

¹⁴ Yää eneea’jäcä ñanno anonta’como wwä tönwanno töwoomöcoomo cönshiijätöicho, cone’da töwä’döjoodöcoomo ene’ju’tojooje. Soto do’tacaiñe cöneeca’tömöicho töcä’tömjä’ancädäiñe:

¹⁵ —Mädääje’daane jimmä, quee cönä’döa’to, soto mmaja ñaa dea, anönga’como mmaja. Mädä nöngato jäcä ecammajä’nnamooje ñaa cöneejä sadä, mädä weicho’jönö mödööaatoodö me’nomjatäiye yaawä, Wanaadi nudootoone mecaanö’täiye, ñäädä caju tödöönei’jödö, nono mmaja, dama mmaja, tameedä dhacaiñe naadö mmaja.

¹⁶ Jenaadä töwö Wanaadi tameedä soto imjummadööcomo woije tönnöeiñe cönä’ja’to.

¹⁷ Yääje yeichaame töjääcä chö’tajä’to’como tönnöe dea cönä’jaacä, yää chääjäcäiñe aashichaato tönnöe weneenedö. Töwö conoojo töniiñanö’jo weneene, cönaatadööcomo töna’tanö’jo mmaja. Cäwanshiñööcomo mmaja tunu’e weneene dea cöwwäiñe, ta’cwaiñe cöweicho’como mmaja; quee cönä’döaacä Paudo chäwwäiñe.

¹⁸ Yääje Paudo wä’dö’jödö weichaame ñanno soto wejiiñäje saaquidiijiisiyooje jaaca amiiñä’ca’se cönä’ja’to, ya’deme’to’comooje.

¹⁹ Yääje mma yaawä anejjacoomo judhío cöneejoto Antiyooquía ñanno, Icooniyo ñanno mmaja; tönwanno soto cöni’jedoicho yaawä Paudo jäcäiñe. Yaawä ñanno soto Paudo cönwäjäätöicho täju que. Jata tö’cäi cöni’ji’chöicho yaawä, yäämaatäi.

²⁰ Yaawä quedeiyentecoomo tawoodhecääcä ye’jumma’comjäcä Paudo cönammöi; jataaca cöntäma yaawä. Yää jenamma naadöje Deedewe ña cöntäma Waanawé acä.

²¹ Yaawä Deedewe ña aashichaato wätunnä ecammajä’a’jäcä jooje soto cöneewaacaicho quedeiyenteje. Yäätonno cönennacaicho Diitada ña, Icooniyo ña mmaja, Antiyooquía ña mmaja.

²² Iiñancomo quedeiyentecoomo cömjädu’ta’to, cönwätuuja’to dea ejääduqueejö’da yeichöcoomo wetä töneecamjödööcomo jonno. Edääje töwä’döe cönä’ja’to chäwwäiñe: —Cönwanno jooje cäntunaanö’aato Wanaadi döiña cöwä’döeejeiñe; quee Paudo töwä’döe cönä’ja’to quedeiyente wwäiñe.

²³ Tönwanno ansiyaano cöneewaacaicho quedeiyente jataadöcoomo waadäi. Yaawä Wanaadi wwä töwa’deuwö’jejeiñe, töwäänema’jejeiñe mmaja, Cajiichaana Jesuuquidiito wwä cöneedai’chäja’to, ñäädä ñeecamjödööcomo.

Paudo acä Waanawé Siidiya Antiyooquía ña yennaca’jocoomo

²⁴ Yaawä Pisiidiya chäcä töweeja’dätä’jejeiñe Pamjiidiya ña cönä’döicho yaawä.

²⁵ Peedeje ña Wanaadi a’deddu ecammajä’a’jäcä cöntonto yaawä Ataadiya ña.

²⁶ Yäätonno jidaawa awä cöntonto Antiyooquía ña, Wanaadi wwä tädai’chojo’jejeiñe tadaawaaju döe tanonto’jocoomo ña. Tönwanno töwä’ca cönä’ja’to yaawä yää tadaawaaju dödö jäcä.

²⁷ Yaawä Antiyooquía ña töwä’döa’comjäcä Quidiito sotoi cöni’jummaicho; chäwwäiñe cöneecammajäätöicho tameedä Wanaadi nödö’jödö töjääcäiñe. Cöneecammajäätöicho dea judhíojöncomo wwä Cajiichaana wwä utu’jödö ta’deddu etaatojo, ecamjödö wetä chäwwäiñe.

²⁸ Yaawä Paudo, Waanawé numa cönä’ja’to yäätä quedeiyente jadäiñe.