DOSECHO 13 - Wanaadi A'deddu

Saudo acä Waanawé miisiyooneedoje iicho’jocoomo

¹ Yaawä Antiyooquía ña quedeiyente antawäiñe cönä’ja’to anejjacoomo Wanaadi a’deddu ecammannamo, Wanaadi a’deddu jäcä owaanomannamo mmaja. Ñanno cönä’ja’to: Waanawé; Simón mmaja, ñäädä Juduumatooje mmaja chäätö conä’ja’dö; Duusiyo mmaja cönä’ja’dea, ñäädä Sideene ñano; Maanaén mmaja, ñäädä Edoodhe Caadideea ñano acu’shänäi’chädö jadoono wennejenca’jödö; Saudo mmaja cönä’ja’dea.

² Yaawä yäänemaadawäiñe, yeecanta’ñädaawäiñe mmaja Epíiditu Santo cönä’döaacä chäwwäiñe: —Waanawé, Saudo mmaja, ewaacatääcä tadaawaaju neecammadö dönnamooje; quee cönä’döaacä.

³ Yää ’jeje Wanaadi wwä töwa’deuwö’jejeiñe, töwäänema’jejeiñe mmaja, tamäädöcoomo cönnöicho ñanno Waanawé, Saudo de’cäcäiñe; cönenno’jaicho yaawä.

Chiipede ña anonta’como necammajäätö’jocoomo

⁴ Yääje mma yaawä Epíiditu Santo nanontädö woije Sedeusiya ña cöntonto Waanawé, Saudo mmaja. Yäätonno Chiipede ña cöntonto yaawä jidaawa awä.

⁵ Yaawä Saadami ña töwä’döa’comjäcä Wanaadi a’deddu cöneecammajä’a’to judhío we’jummato’como taca. Juan mmaja chääjadäiñe cönä’ja’dea, i’wa’täneichomooje.

⁶ Yaawä tameedä dhantadö weichö wa’cä töwäämannäjö’jejeiñe cönä’döicho Paujo ña. Yäätä jöwai cöneedantoicho, judhío töwö, Waajesú täätö, Wanaadi a’deddu ecammaneijato wätä’tädö.

⁷ Ñäädä Waajesú cönä’jaacä acu’shänä Seejiyu Paudo jadoono. Tösejjecaato ñäädä Seejiyu Paudo cönä’jaacä. Töwö cöna’dejjaicho Waanawé, Saudo mmaja, Wanaadi a’deddu ecammajäätödö eta’se töweijäcä.

⁸ Ñäädä jöwai, Ediimaje mmaja chäätö cönä’ja’dö, Wanaadi a’deddu etaajo’se’da cönä’jaacä acu’shänä wwä, chäwwä ecamjödö queiñe.

⁹ Yaawä Saudo, Paudoje mmaja chäätö cönä’ja’dö, Epíiditu Santo jäduudu ’je cönä’jaacä; yäätäädä cöneene’maacä ñäädä jöwai;

¹⁰ cönä’döaacä chäwwä: —Amäädä äncu’tänei, yännanö’ajä mmaja, odo’sha nnedö. Tameedä aashichaato tödöödö tu’de’tänei amäädä dea. ¿Ane’que’nei ane’nomja’da manä Wanaadi a’deddu sa’donnato ashiichuudädö?

¹¹ Eduuwa Cajiichaana Jesuuquidiito amaamincha; tänuuque’da ma’de numa; shii niweijodö aneene’da ma’de; quee cönä’döaacä Saudo ñäädä jöwai wwä. Yaawä dea mma tööjato cöne’duccai ñäädä Ediima jäcä, ca’dutu nönge. Töjämjäcä tamännä’nei tunuujiye cönä’jaacä, tänuuque’da töweijäcä.

¹² Yaawä yää eneeä’jäcä acu’shänä cöneecamjöi, ñäädä Seejiyu Paudo täätö. Töwö yaacö’je cönä’jaacä Cajiichaana Jesuuquidiito jäcä ecammajäätödö etaadö.

Antiyooquía Pisiidiya ña Paudo acä Waanawé wei’jocoomo

¹³ Yaawä jidaawa awä Paujo ñanno Paudo cönääma’täi, chääjadoncomo mmaja. Peedeje ña cöntonto yaawä, yää Pamjiidiya ñano jata. Yäätä cönooto’nomjoicho Juan wwä; Jeduusadén ña cönennacai yaawä ñäädä.

¹⁴ Yää ’jeje Peedeje ñanno Paudo cöntonto yaawä Antiyooquía ña, yää Pisiidiya ñano jata. Iiña we’jummatoojo taca cönoomomöicho wäädeetatoojo anooto awä; cönaatajiimaicho yaawä.

¹⁵ Ñanno we’jummatoojo tacancomo cöna’de’ta’to jenaado’jä waanontänä imennaajä, Wanaadi wa’deuwödö ecammannamo nimenno’jocoomo mmaja. Yää ’jeje we’jummatoojo edhaamo cönä’döa’to Paudo wwä: —Jimmä, soto wätuujato’como äwwäiñe töweiye yeiya’jäcä adha’deutäcä; quee cönä’döa’to.

¹⁶ Yaawä Paudo cönammöi; tamäädö que eneejojäätödö que cöneeta’jöichajoicho yaawä; cönä’döaacä chäwwäiñe: —Etaatäcä jimmä, iisadaaediitacoomo, änwanno Wanaadi ñontännamo.

¹⁷ Ñäädä iisadaaediitacoomo Wanaadiyö cadai’choncomo cöneicho tösootoije. Töwö Wanaadi jooje cöneejannäjöicho töjaatawäiñe’da cönä’ja’todaawä Ejiito ña. Yaawä töjäädudu que Ejiito ñanno cunu’caicho.

¹⁸ Aacä soto wedu töwö cönshinchoicho jata ’jemjönö aca yeichöcoomo.

¹⁹ Cadai’choncomo wwä töwö Wanaadi cöne’jodheinchajoicho aacä amoojato jata Canaán ñancomo, chäwwäiñe yää ñoonodööcomo’jödö utuudu wetä yaawä.

²⁰ Yää ’jeje tooni soto sotooto wedu Wanaadi cönnöi ñanno äcamma’jonnamo chäädhajootoncomooje. Mädääje cönä’ja’to Samueede jona tödööene, ñäädä Wanaadi wa’deuwödö ecammanei.

²¹ Yaawä soto cajiichaana cöne’ca’a’to tädhaajotoncomooje töweiyemööje. Yääje yeijäcä Saudo Wanaadi cöneewaacai chaajichaanaichomooje, ñäädä Siisi nnedö, Wemjamín weichö. Saudo cajiichaanaje cönä’jaacä aacä soto wedu.

²² Yää ’jeje Wanaadi Saudo cunu’cai cajiichaanaje yeichö jonno; Dawí cöneewaacai inwacaanoje. Edääje Wanaadi cönä’döaacä Dawí jäcä: “Määdhä Dawí, Isaí nnedö, waacö’je wedantäne. Töwö nödööa’de tameedä umjummadö nönge;” quee cönä’döaacä Wanaadi Dawí jäcä.

²³ Dawí weichöje Jesuuquidiito cönä’jaacä, ñäädä iisadaaediitacoomo Ewaanacaaneichomooje Wanaadi cönaanontäichö, jenaadä töneecamma’jödö nönge dea.

²⁴ Jesuuquidiito weejödö owaajo Juan töneecammajä’e cönä’jaacä tameedä iisadaaediitacoomo wwä; töwö töwä’döe cönä’jaacä: “Wautisaaje ä’dojootäcä; ätö’tajäätödööcomo sha’duminchatääcä;” quee Juan Wautiita töwä’döe cönä’jaacä.

²⁵ Yaawä äämajai töwä’döa’jäcä edääje daja Juan cönä’döa’dea: “Ñäädäjöönö öwö, cäcaanö’atoodöjöönö. Öncäcä anejja dhanwa na’de; shaajatui u’caneije jadä’jödöödä eijai’cha wa, ye’jodhe töwö yeijäcä;” quee cönä’döaacä Juan.

²⁶ “Änwanno jimmä, Aawadán weichö nnacoomo, änwanno mmaja Wanaadi ñontännamo, edääje wä’dö’se wa äwwäiñe: Äwwoncomo mädä wääwanaacatoojo jäcä ecammajäätödö naadö.

²⁷ Ñanno Jeduusadén ñancomo, chäädhajootoncomo mmaja, dhowaanäcäiñe’da cönä’jaacä Äwaanacaaneije Jesuuquidiito weichö. Chäwwäiñe ääta’da töweiye cönä’jaacä Wanaadi wa’deuwödö ecammannamo nimenno’jocoomo, yää wäädee tatoojo anooto waadäi töwaata’de’tä weneenedö. Töwwäiñe Jesuuquidiito tämaamöje yeichö e’ta’jäcä tönwanno cönnöicho ñanno nimenno’jocoomo wä’dödö nönge.

²⁸ Conemjönö iiñö’jödö aneedantä’da töwei’jocoomo weichaame tönwanno Pidaato wwä cöneemajoicho.

²⁹ Yaawä tameedä Wanaadi a’deddu imennaajä wä’dödö naichö nönge tödööa’jäcä cuduusa jäconno cöneenö’toicho, ewaacadö wetä.

³⁰ Yaawä Wanaadi cönaadoncai yäämajo jonno.

³¹ Yää ’jeje wanna anooto Jesuuquidiito cönäänejoi ñanno Caadideea ñanno Jeduusadén ña töjaadoncomo wöto’jocoomo wwaiñe. Ñanno naatoodö eduuwa chääjäcä soto wwäiñe ecammajä’nnamooje.

³² “Mädääje na; äwwäiñe ñaa necammajä’a eduuwa aashichaato wätunnä, yää cadai’choncomo wwä Wanaadi necamma’jödö.

³³ Cönwanno caato ñanno atöödöje. Töwö Wanaadi yäämaajo jonno Jesuuquidiito adoncadö que chäänönge cönnöi cöwwäiñe töneecamma’jödö. Aacoto saadomo jäcä yääje nä’döa: “Önnedö amäädä; edä anooto awä aweichö wutui;” quee nä’döa yää wecanta’ñotoojo jäcä.

³⁴ Töwö Wanaadi yäämaajo jonno Jesuuquidiito cönaadoncai yeichöje chääta’da töweiyemööje yaawä. Wanaadi a’deddu imennaajä yääje nä’döa: “Äwwäiñe wu’a’de aashichaato, yää Dawí wwä wecammaneedö;” quee.

³⁵ Anejja saadomo jäcä mmaja yääje nä’döa: “Adhaanonö aashichaato äncä’nojo’da ma’de;” quee nä’döa yää wecanta’ñotoojo jäcä.

³⁶ Ñäädä Dawí Wanaadi woije töweiye cönä’jaacä nudä töweichö wadaadäädä. Yaawä yääma’jäcä ijimmä cöneewaacaicho dhadai’jödö dö’tä; chääjö cöncätai yaawä.

³⁷ Ñäädä mmaane chääta’da cöneiyacä, Wanaadi yäämaajo jonno cönaadoncaichö mmaane.

³⁸ Änwanno jimmä, odhoowanääcäiñe tödöötäcä ñäädä Wanaadi nadonca’jödö eetö joi ocoone’nadiiyöcoomo encwanno’jotoojo wätääcammadö.

³⁹ Jesuuquidiito jäcäinchädä tameedä ñanno ecaanö’nnamo wwä töweiye na iiñödööcomo encwanno’jotoojo, yää Moisé waanontädö woije weiñawä ätäncwanno’jojaichojöönö’jödö.

⁴⁰ Yääje yeijäcä odhoowoinchadäiñe’da eichäcä, Wanaadi wa’deuwödö ecammannamo cöneecamma’todööje mma meicho’no. Edääje ñanno cömmennoicho:

⁴¹ Eneetäcä änwanno quimmajä’nnamo; ääcatoncatääcä, ännanö’täcääde. Öwö, Wanaadi, ene’ju’tojo wödööa’de aneenedööcomooje. Änwanno aneecamjö’da maato’de äwwäiñe yäätäcammataame; quee cömmennoicho Wanaadi wa’deuwödö ecammannamo; quee cönä’döaacä Paudo ñanno we’jummatoojo tacancomo wwä.

⁴² Yaawä we’jummatoojo tacanno töjimmä jadä Paudo weja’ca’comjäcä ñanno judhíoje yääwaaca’como cönä’döa’to chäwwäiñe: —Yää ’jejaato wäädeetatoojo anooto awä yää jäcä dea ecammajä’tantäcä’dede ñaa wwä; quee cönä’döa’to.

⁴³ Yaawä we’jummatoojo tacanno tameedä soto weja’ca’comjäcä jooje judhío cöntonto Paudo, Waanawé jadäiñe, jooje mmaja judhíoje yääwaaca’como cöntonto dea; ñanno cönä’ja’to chäänönge judhío wätunnäichomo tödönnamo. Yaawä Paudo ñanno cönwätuujaicho ejääduqueejö’da töweiyancädäiñe aashicha Wanaadi weichö ecamjödö wetä chäwwäiñe.

⁴⁴ Yaawä yää ’jejaato semaana awä, wäädeetatoojo anooto awä, tameedäiche yää jataawoncomo cöne’jummaicho Wanaadi a’deddu ecammajäätödö etaadö wetä.

⁴⁵ Yaawä jooje soto we’jumma’como eneea’jäcä ñanno judhío Paudo cöni’ñeimma’to. Tönwanno cönaajäntoicho dha’deddu eccujäätödö, chimmajäätödö mmaja.

⁴⁶ Yaawä Paudo, Waanawé mmaja, tösaade’da cöna’deuwöicho; cönä’döa’to: —Wanaadi a’deddu täcammajä’emje cönä’jaacä äwwäiñe awa’de, änwanno judhíocoomo, töwäädä eta’se’da maatoone’; ämjumma’da maato töwaatamemjönö aweicho’como. Yääje yeijäcä judhíojöncomo wwä ñaa necammajä’ta eduuwa.

⁴⁷ Mädääje dea Cajiichaana Jesuuquidiito ñaa anontäne. Töwö cönä’döaacä ñaa wwä: Öwö mane’täne judhíojöncomo weijoneichomooje, wääwanaacatoojo jäcä ecammajä’neije aweichö wetä tameedä yeichö wa’cä edä nonoodö de’wä; quee cönä’döaacä Cajiichaana ñaa wwä; quee cönä’döa’to Paudo, Waanawé mmaja.

⁴⁸ Yää eta’jäcä ñanno judhíojöncomo ta’cwaiñe cönä’ja’to yaawä; aashicha cöna’deuwa’to Cajiichaana a’deddu jäcä. Tameedä ñanno töwääwanaacaamoje cönä’ja’todö cöneecamjöicho.

⁴⁹ Mädääje Cajiichaana a’deddu cönäätäcammai tameedä yää jata weichö wa’cä.

⁵⁰ Yaawä ñanno judhíocoomo cöna’deuwöicho anejjacoomo wodiiñamo täneejuca’como wwäiñe, aashicha’como wwäiñe, dhanwaacomo täneejuca’como wwäiñe mmaja. Tönwanno cöni’jedoicho Paudo, Waanawé jäcäiñe, cone’da yeichöcoomo wetä chääjäcäiñe. Yää ’jeje ñanno täneejuca’como Paudo cönenno’jaicho töjaatadööcomo jonno.

⁵¹ Yaawä Paudo tösaajatuichomo cönse’secaicho, yäätoncomo soto eta’se’da yeichöcoomo ene’ju’tojooje. Yaawä Icooniyo ña cöntonto.

⁵² Tameedä quedeiyentecoomo ta’cwaiñe töweiye cönä’ja’to, Epíiditu Santo jäduudu ’je mmaja.