DOSECHO 12 - Wanaadi A'deddu

Jacoowo ema’jödö, Jedeesoje Peedhodo tödö’jödö mmaja

¹ Yaawä cajiichaana Edoodhe cönaajäntäi Quidiito sotoi maminchadööcomo.

² Sauda que Jacoowo cöneemajoi, ñäädä Juan dui.

³ Judhío wacö’comje quedeiyente maminchadööcomo eneea’jäcä, töwö Edoodhe Peedhodo daja jedeesoje cönnöjoi yaawä. Yaawä cönä’jaacä uu ummannä’cajootojo ’jemjönö tau’tojo comjedensiyai’chädö.

⁴ Yää ’jeje Peedhodo ajäiya’jäcä jedeeso ewöötö’tädö taca Edoodhe cöneewaacai yaawä, soto wwadäädäiñe u’cadö wetä yaawä Weja’dätä’jä anootoi’chädö ’jeje, ecamma’jodö wetä. Jooje suddau cönnöicho Peedhodo edai’chännamooje; aacäichea iju’jä cönä’ja’to, aacäichea suddau mmaja iju’jä waadäi.

⁵ Mädääje jedeeso ewöötö’tädö taca Peedhodo cöneedai’cha’to. Quedeiyentecoomo mmaane jooje Wanaadi wwä cöna’deuwa’to chääjäcä.

Jedeeso ewöötö’tädö tacanno Wanaadi wwä Peedhodo u’ca’jödö

⁶ Yaawä Edoodhe wwä soto wwadäädäiñe tu’catoojo coijaichawä Peedhodo wönö’näje cönä’jaacä aaconcomo suddau antawäiñe. I’wadö’taajä cönä’jaacä aacä cadheena que, sejaadadi döaajä. Mönaatajo anejjacoomo suddau mmaja cönä’ja’to dea, jedeeso ewöötö’tädö edai’chännamo.

⁷ Jadheedä Cajiichaana Jesuuquidiito amoodedö cönäänejoi yaawä; tawaane cönweijoi yaawä jedeeso ewöötö’tädö taca. Ñäädä amoode Peedhodo cönaajojoi yaawä shuudadö jäcä; cönemjacai yaawä; cönä’döaacä chäwwä: —Ma’da’cä ä’jäcä; quee. Yaawä cadheena cönaajämjacai Peedhodo ajäädo jäconno.

⁸ Amoode cönä’döaacä chäwwä: —Adheesomaajä’cä; asaajatui ewaacacä; quee. Yaawä yää tödööa’jäcä Peedhodo wwä, amoode cönä’döaacä chäwwä: —Owoomö de’wono que adheewontäcä; ma’che eduuwa öncäcä; quee cönä’döaacä.

⁹ Peedhodo cöneeja’cai yaawä amoode ncäcä. Töwö dhowaanäcä’da cönä’jaacä ñeene amoode wwä tödöödö; töwäänetöödö atäi mma cöneecanö’acä.

¹⁰ Tönwanno cömja’dätoicho ñanno awa’deena’como suddau, yää ’jeja’como mmaja. Yaawä jödo’na weja’catoojo nata’tajo cönä’döicho, yää sejaadadi döaajä. Töwoije yää mönaatata cönaata’ducai yaawä. Cöneeja’caicho yaawä; jata antai cönta’to. Yää ’jeje tooni ääma sha’dumiiñe tööta’comjäcä amoode Peedhodo cönnämäi yaawä töjääcäjeene.

¹¹ Yaawä Peedhodo towaadäädä cönä’döi; cöntö’tajä’acä: —Eduuwa yoowanääcä na ñeeneje yeichö, wäänetöödö mmajöönö. Cajiichaana tamoodedö nanontäi Edoodhe jonno yeewanaaca, tameedä öwö jääcä judhío tödö’se nä’jantodö jonno mmaja; quee cöntö’tajä’acä.

¹² Yääje tötö’tajä’ancädä töwö Peedhodo cöntämä Madía mmai yöiña, ñäädä Juan dhenö, Maadocooje mmaja chäätö cönä’ja’dö. Yäätä cönä’ja’to jooje soto Wanaadi wwä wa’deunäje.

¹³ Yaawä Peedhodo wwä mönaatata yeu’cwa’jäcä ajei’choto’jaato cöneeja’cai ene, Doodeje töwö chäätö.

¹⁴ Peedhodo a’dedduje yääta’jäcä ta’cwaiñe töweichö e’nei a’ducaadö jäcä cöntö’taqueejöi. Ä’saca mma cöneeca’tömöi; yäätoncomo wwä cöneecammai Peedhodo mönaatajo yeichö.

¹⁵ Ñanno cönä’döa’to yaawä ñäädä Doode wwä: —Ä’jeta; quee. Yääje yeichaame ñäädä Doode wejiiñäje Peedhodooje cöne’taacä. Yaawä ñanno soto cönä’döa’to: —Peedhodoojönö mä’dä, chääcato mma; quee.

¹⁶ Peedhodo a’dejjadööcomooje dea cönä’jaacä jödö’na, mönaatajo. Yaawä mönaatata a’duca’jäcä ñanno soto wwaiñe tönwanno cönääcatoncaicho Peedhodo eneea’jäcä.

¹⁷ Töwö Peedhodo tamäädö eneejojäätödö que cöneeta’jöichajoicho; yaawä chäwwäiñe cöneecammajäätöi Cajiichaana wwä jedeeso ewöötö’tädö tacanno tu’ca’jödö. Töwö cönä’döaacä chäwwäiñe: —Ecammajä’täcä’de Jacoowo wwä, anejjacoomo quedeiyente wwäiñe mmaja; quee cönä’döaacä. Cöneeja’cai yaawä aneiñaja töötädö wetä.

¹⁸ Yaawä yaawaana’jäcä ñanno suddau jooje cöneewodoicha’to towaanäcäiñe’da yeijäcä Peedhodo wötä’jödö.

¹⁹ A’que Edoodhe Peedhodo cunuujijaacä yaawä. Aneedantä’da töwei’jödö weijäcä töwö cöneecamma’jojäätöicho ñanno waadiya; cömja’joicho yaawä. Yää ’jeje Judheea ñanno Edoodhe cöntämä yaawä, Seesadeea ña ejaata’tä.

Edoodhe wääma’jödö

²⁰ Yaawä Edoodhe töwäätöma cönä’jaacä Tiido ñancomo jäcäiñe, Sidhón ñancomo jäcäiñe mmaja. Ñanno cöna’deuwöicho yaawä Edoodhe wwadäädä töötädööcomo wetä. Tönwanno jödaata que cöneemu’näjöicho Wadaasato, Edoodhe anoonö täneejucaato. Ñäädä ai cöne’catoicho yaawä Edoodhe jadä aashicha töweicho’como. Tönwanno chääwanshiñööcomo töwe’e cönä’jaacä Edoodhe jata wwono; yääje yeijäcä äätu’dedööje töwei’she’da cönä’ja’to Edoodhe jadä.

²¹ Yaawä töwwadäädä ñanno we’to’como anooto Edoodhe cuncu’nä’täi. Yää anooto awä töwö cöneewontäi yaawä aashichaato töwoomö awä, cajiichaana womööje töweiye naichö awä. Cönaatajiimai yaawä tumuudei ye’wä; cöna’deuwöi chäwwäiñe.

²² Yaawä soto töcä’de cöncä’tömjä’a’to: —Sotoojönö määdhä na’deuwaadö, wanaadiiñe; quee soto cönä’döa’to Edoodhe jäcä.

²³ Yaawä jadheedä Cajiichaana Jesuuquidiito amoodedö Edoodhe cöncädäi’ñäi, Wanaadije töwei’she yeijäcä. Töwö cönäämai yaawä acö otööcomooje.

²⁴ Cajiichaana a’deddu ecammajäätödö mmaane jooje’cä cöneejamöi; tameedä yeichö wa’cä cönäätäcammajäätöi.

²⁵ Yaawä töwwäiñe tödööemö jäcä töwä’ca’comjäcä ñanno Waanawé, Saudo mmaja, cöntonto dea Jeduusadén ñanno; töjaadäiñe Juan cönaadoicho, ñäädä Maadocooje mmaja chäätö cönä’ja’dö.