DOSECHO 11 - Wanaadi A'deddu

Jeduusadén ñancomo Quidiito sotoi wwä Peedhodo necammajäätö’jödö

¹ Yääje mma yaawä ñanno anonta’como, anejjacoomo quedeiyentecoomo Judheea ñancomo mmaja, cöneeta’to judhíojöncomo wwä aashicha eta’jödö Wanaadi a’deddu ecammajäätödö.

² Yaawä Jeduusadén ña Peedhodo wennaca’jäcä iiñancomo quedeiyentecoomo cönincha’me’ca’to;

³ cönä’döa’to chäwwä: —¿Ane’que’nei judhíojöncomo mmädä ene meiyaqueene? Chääjadäiñe määwashinchäne dea; quee cönä’döa’to Peedhodo wwä.

⁴ Yaawä Peedhodo chäwwäiñe cöneecammajäätöi yaajäntä’jödö jonnoto’jödöödä töjääcä yeeja’dätä’jödö. Töwö cönä’döaacä:

⁵ —Joope ña weichö, Wanaadi wwä wa’deunäje weichawä, wäneetönaawoto nönge wä’jaaquene. Yaawä saawana nöngato weneeaqueene, ijootödö waadäi inchö’dajä’ajä. Öwwadäädä cöne’acä caju ñanno.

⁶ Yaawä yäätäädä wene’maaquene; ye’wä weneeaqueene tameedä yeichö wa’cä odoocoja’como tääde’cwada’como, äcääyu mmaja, tadiiñaamo mmaja.

⁷ Yaawä a’deu cönäätaacä öwwä: “Aanöncä Peedhodo, odhootö anaiju’cä, mänäiye;” quee cönäätaacä.

⁸ Yääje wä’döaaquene yaawä: “Ng’jn, Cajiichaana; öwö weichö nossajaato änäänä’da, mäccö mmädä änäänä’da mmaja;” quee wä’döaaquene.

⁹ Yää ’jeje cönäätai chea öwwä: “Ñäädä Wanaadi nichoonecaadö nossaje e’täjai’cha ma;” quee cönäätaacä.

¹⁰ Yää aaduwaawäde yääje cöneiyacä. Yaawä yää saawana nöngato cöntännea caju ña.

¹¹ Yaawä dea mma aaduwaawä dhanwaacomo cönä’döicho ömmai yöiña, yuujiyööje. Seesadeea ñanno enno’ja’como cönä’ja’to.

¹² Epíiditu Santo yaanontäne yaawä wäämu’däjä’ancädä’da chääjadäiñe öötädö wetä. Tooni amoojato quedeiyente cöneiya’to jaadä, canno naatoodö. Tameedä ñaa cönoomomöi yaawä soto e’saca.

¹³ Ñäädä tömmaichemö ñaa wwä cöneecammajäätöi Wanaadi amoodedö töneene’jödö tömmai chaca. Ñäädä amoode jiidi cönääneaacä; cönä’döaacä chäwwä: “Joope ña soto anenno’jacä, Simón a’dejja, ñäädä Peedhodooje mmaja chäätö naichö.

¹⁴ Ñäädä Peedhodo äwwä necamma’de äwääwanaacatoojo, äwä’jimmä’tädö wääwanaacato’como mmaja;” quee cönä’döaacä amoode chäwwä.

¹⁵ Yaawä chäwwäiñe ecammajäätödö waajänta’jäcä Epíiditu Santo cönä’täi chääjäcäiñe, awa’deene cöjääcäiñe cönä’täichöje mmaja.

¹⁶ Yaawä tö’tane Cajiichaana Jesuuquidiito wa’deuwö’jödö jäcä: “Juan wautisaaje tönnöe cönä’ja’to tuna quee mma; änwanno mmaane Epíiditu Santo queene wautisaaje mä’döaato’de,” quee yä’dö’jödö jäcä tö’tane.

¹⁷ Epíiditu Santo Wanaadi cuntui chäwwäiñe, ñanno judhíojöncomo wwäiñe, cöwwäiñe Cajiichaana Jesuuquidiito ecamjödaawä cuntuichöje mmaja. Edääje tö’tajä’aqueene yaawä: ¿Aaquene mmaja Wanaadi woijatooje yeichaame wanincha’mecöödö deeade’ ? quee tö’tajä’aqueene; quee cönä’döaacä Peedhodo chäwwäiñe.

¹⁸ Yaawä yää eta’jäcä Jeduusadén ñancomo quedeiyentecoomo cöneeta’jöjäätöicho; aashicha cöna’deuwa’to yaawä Wanaadi jäcä. Tönwanno cönä’döa’to: —Judhíojöncomo wwä mmaja Wanaadi cuntui chea chö’tajäätödööcomo sha’duminchatoojo, yääwanaacadööcomo wetä; quee cönä’döa’to.

Antiyooquía ñancomo Quidiito sotoi wei’jocoomo

¹⁹ Yaawä soto wwäiñe Eteewa ema’jeje anejjacoomo quedeiyentecoomo maminchädööcomo mmaja cönaajäntoicho dea; yääje yeijäcä ñanno quedeiyentecoomo cönäänejeicho Jeniisiya ña, Chiipede ña mmaja, Antiyooquía ña mmaja. Iiña tönwanno Wanaadi a’deddu töneecammajä’e cönä’ja’to, tameedä soto wwäiñe’da, judhíocoomo wwä mma.

²⁰ Dhantawäiñe cönä’ja’to anejjacoomo Chiipede ñancomo, Sideene ñancomo mmaja. Ñanno Antiyooquía ña töwä’döa’comjäcä judhíojöncomo wwä mmaja cöneecammajäätöicho aashichaato wätunnä Cajiichaana Jesuuquidiito jäcoono.

²¹ Tönwanno Cajiichaana jäduudu ’je cönä’ja’to; jooje soto töwäätunnäichomo jonno Cajiichaana Jesuuquidiito cöneecamjöicho.

²² Yaawä chääcadööcomo eta’jäcä Jeduusadén ñancomo quedeiyentecoomo Waanawé cönaanontoicho Antiyooquía ña.

²³ Iiña ñäädä wä’döa’jäcä cöna’cwainchai yaawä chääjäcäiñe Wanaadi nödöödö aashichaato eneea’jäcä. Töwö cönwätuujaicho yaawä ejääduqueejö’da yeiyancädäiñe Cajiichaana woije yeichöcoomo wetä.

²⁴ Töwö Waanawé cönä’jaacä aashichaato, Epíiditu Santo jäduudu ’je, ecamjödö ’je mmaja. Jooje soto Cajiichaana Jesuuquidiito cöneecamjöicho.

²⁵ Yää ’jeje Waanawé cöntämä Taadoso ña, Saudo ujiiye. Yaawä edanta’jäcä Antiyooquía ña cönaadäi.

²⁶ Yäätä tönwanno cönä’ja’to tooni wedu Quidiito sotoi jadäiñe; jooje soto cönoowanoomaicho. Antiyooquía ña awa’deene soto quedeiyentecoomo quidiitiyaanoje cöne’toicho. Quidiito jadoonoje, quee töwä’dö’se yeichö.

²⁷ Yääje mma yaawä Jeduusadén ñanno anejjacoomo Wanaadi wa’deuwödö ecammannamo Antiyooquía ña cöntonto.

²⁸ Dhantawäiñe cönä’jaacä Aacawo täätö. Ñäädä cönammöi dhantawäiñe; Epíiditu Santo woije cöneecammai tameedä nono weichö wa’cä ämi weichojo. Yää ämi cöneeja’dätäi yaawä Cadaudiyo acu’shänääje yeichö.

²⁹ Yaawä quedeiyentecoomo Antiyooquía ñancomo cöna’deuwöicho töjimmotoncomo Judheea ñancomo wwadäädä jödaata adoojodö wetä, i’wa’toto’comooje yää ämi awä. Töwaadäiñe cuntuicho u’jai töweichöcoomo woije.

³⁰ Yää töni’jumma’jocoomo ansiyaano Judheea ñancomo wwadäädä cönaadojoicho yaawä Waanawé wwä, Saudo wwä mmaja.