DOSECHO 10 - Wanaadi A'deddu

Peedhodo acä Conneediyo wei’jocoomo

¹ Yaawä Seesadeea ña cönä’jaacä dhanwa, Conneediyo täätö. Töwö cönä’jaacä suddau Itaadiya ñancomo edhaajotoncomooje.

² Aashichaato töwö cönä’jaacä; Wanaadi tönoiñe töneene, tameedä yä’jimmä’tädö mmaja. Jooje jödaata tunu’e cönä’jaacä wentumja’como wwä; weiñäje Wanaadi wwä töwa’deuwe cönä’ja’dea.

³ Yaawä anunnaque yei’jeje yeichö Wanaadi amoodedö cönäänejoi chäwwä; yöiña cönoomomöi; cönä’döaacä: —Conneediyo; quee.

⁴ Töwö Conneediyo tösaadöje yäätäädä amoode cöneene’maacä; cönä’döaacä chäwwä: —¿Ane’cä mädä, Cajiichaana? quee cönä’döaacä. Yaawä ñäädä amoode cönä’döaacä: —Wanaadi töneeta weneene töwwä awa’deuwödö; töneene weneene dea wentumja’como i’wa’tädö äwwä.

⁵ Eduuwa soto anenno’jacä Joope ña, Simón ene’jöiyeto sadä, ñäädä Peedhodooje mmaja chäätö naichö.

⁶ Töwö na anejja Simón mmai chaca, ñäädä iji’jä choonecaanei, dama jawä immai ñaichö. Ñäädä Simón Peedhodo necamma’de äwwä tödööemö; quee cönä’döaacä amoode Conneediyo wwä.

⁷ Yaawä ñäädä amoode wöta’jäcä Conneediyo cöna’dejjai aacä tanoonö, tooni mmaja suddau. Ñäädä suddau cönä’jaacä Wanaadi tujunne mmaja; Conneediyo wacöötö töwö cönä’jaacä töwoije yeijäcä.

⁸ Töwö Conneediyo tameedä chäwwäiñe ecammajäätödö’jo Joope ña cönaanontoicho yaawä.

⁹ Yää jenamma naadöje ñanno Conneediyo anoonö wötäädawäiñe, Joope ña ä’döjai yä’döa’comjäcä, Peedhodo cönäncui yaawä maa acaanajaato de’cäi, Wanaadi wwä a’deuwe. Anunnaque yeichö cönä’jaacä.

¹⁰ Töwö Peedhodo ämiije cönä’jaacä jooje; töwääwashinchä’se cönä’jaacä. Yaawä töjimmä wwäiñe täwanshiñö ejoodötaame wäneetönaawoto nönge cönä’jaacä.

¹¹ Töwö caju cöneeneaacä töwaata’duca; cawonno saawana nöngato wä’tädö cöneedantäi yaawä, ijootödö waadäi inchö’dajä’ajä.

¹² Yää saawana nöngato de’wä cönä’ja’to tameedä odoocoja’como weichö wa’cä, äcääyu mmaja, tadiiñaamo mmaja.

¹³ A’deu cönäätaacä yaawä; cönä’döaacä: —Aanöncä Peedhodo, odhootö anaiju’cä, mänäiye; quee.

¹⁴ Peedhodo cönä’doaacä yaawä: —Ng’jn, Cajiichaana; öwö weichö nossajaato änäänä’da; mäccö mmädä änäänä’da mmaja; quee cönä’döaacä.

¹⁵ Yaawä a’deu cönääta’dea: —Wanaadi nichoonecaadö nossaje e’täjai’cha ma; quee.

¹⁶ Mädääje aaduwaawäde cönä’jaacä; yaawä yää saawana nöngato cönäncui chea caju ña.

¹⁷ Yää jäcä Peedhodo cöntö’tajä’acä yaawä: ¿Aaquene töwä’dö’se yeichö mädä? quee. Yääje chö’tajäätödaawä ñanno Conneediyo anoonö cönä’döicho mönaatata döiña Simón jäcä ecamma’jancädä.

¹⁸ Mönaatata döiña yä’döa’comjäcä ñanno cöneecamma’ja’to yäätä Peedhodo weichö jäcä. Töcä’de cöna’deuwa’to; cönä’döa’to: —¿Sadä ca Simón wä’döaajä nai, ñäädä Peedhodooje mmaja töne’tä weneenetoodö? quee cönä’döa’to.

¹⁹ Yää töneene’jödö jäcä tö’tajä’näje dea Peedhodo cönä’jaacä, maa de’cäi. Yaawä Epíiditu Santo cönä’döaacä chäwwä: —Aaduwaawä dhanwaacomo adhuujiyaato.

²⁰ Aanöncä, ädhä’täcä; äwäämu’däjä’ancädä’da äjääne’de chääjadäiñe. Öwö önne’jodö canno; quee cönä’doaacä Epíiditu Santo Peedhodo wwä.

²¹ Peedhodo cönä’täi yaawä Conneediyo nenno’jadö döiñaiñe; cönä’döaacä chäwwäiñe: —Öwö ñäädä mujiiyatoodö. ¿Ane’cä döe me’to? quee cönä’döaacä.

²² Ñanno cönä’döa’to yaawä chäwwä: —Conneediyo woije ñaa neejä, ñäädä suddau edhaajotoncomo. Aashichaato töwö, Wanaadi tönoiñe töneene. Tameedä judhíocoomo aashicha töwa’deuwe weneeneto chääjäcä, tumjumma mmaja. Wanaadi amoodedö chäwwä cönä’döaacä: “Peedhodo ene’jocä’de adöiña, chäwwä ecammajäätödö metaiye;” quee cönä’döaacä ñäädä amoode; quee cönä’döa’to ñanno Conneediyo sotoi.

²³ Yaawä Peedhodo cönaamonno’joicho ä’saca; yäätä coijaicho cömja’do’joicho. Jenamma naadöje Peedhodo cöntämä chääjadäiñe. Anejjacoomo quedeiyente Joope ñancomo cöna’nontoicho dea.

²⁴ Yää jenamma naadöje cönä’döicho yaawä Seesadeea ña. Yäätä Conneediyo yoomocöödöcoomoje cönä’jaacä töwä’jimmä’tädö jadäiñe, töjaatawoncomo jadäiñe mmaja, ñanno ña’dejjadö dea.

²⁵ Peedhodo wä’döa’jäcä Conneediyo cöneeja’cai yaawä a’dejja. Tä’mudhe cönä’döi ije’taca, ya’demeecödööje.

²⁶ Peedhodo cönaanömjoi yaawä; cönä’döaacä chäwwä: —Aanöncä, soto mmaja öwö dea, anöngato mma; quee.

²⁷ Yaawä töwa’deujä’ancädäiñe ä’saca cönoomomöicho. Jooje soto we’jumma’como Peedhodo cöneedantäi yäätä.

²⁸ Töwö cönä’döaacä chäwwäiñe: —Änwanno odhoowanääcäiñe na judhío töwäätunnäi woije anejja jadä oojodö’da yeichö, chä’saca omoomö’da yeichö mmaja. Yääje yeichaame Wanaadi yoowanoomane anejja soto nossaje e’täjai’cha weichö.

²⁹ Yääje yeijäcä, äwwäiñe ya’dejja’jäcä wäämu’däjä’ancädä’da sadä we’ne. Edääje adheecamma’jo’seiñe wa eduuwa: ¿Ane’que’nei cäne’joto sadä? quee cönä’döaacä Peedhodo.

³⁰ Yaawä Conneediyo cönä’doaacä: —Aacäichea anooto na eduuwa ye’saca wei’jödö wäänemaanäje; eduuwa naadöje cönä’jaacä. Wanaadi wwä wa’deunäje wä’jaaquene, cho’momöödö waadäi tödöödö töweiye naichöje. Yaawä dhanwa cönäänejoi öwwä, tajääde’dato awä.

³¹ Töwö cönä’döaacä öwwä: “Conneediyo, Wanaadi töneeta weneene töwwä awa’deuwödö; töneene weneene dea wentumja’como i’wa’tädö äwwä.

³² Joope ña soto anenno’jacä Simón wetä, ñäädä Peedhodooje mmaja chäätö naichö. Anejja Simón mmai chaca yä’döaajä nai, ñäädä iji’jä choonecaanei, dama jawä immai ñaichö. Ñäädä Simón Peedhodo we’a’jäcä töwö na’deuwa’de äwwä;” quee cönä’döaacä ñäädä dhanwä öwwä.

³³ Yääje yeijäcä yaawä dea mma maneijone; dhamma meejäne’. Eetä ñaa na eduuwa tameedä, Wanaadi owaadäädä. Eta’se ñaa na tameedä Cajiichaana necammajoojätöödö äwwä; quee cönä’döaacä Conneediyo Peedhodo wwä.

Conneediyo mmai chaca Peedhodo necammajäätö’jödö

³⁴ Yaawä Peedhodo cönaajäntäi töwa’deuwödö; cönä’döaacä: —Eduuwa yoowanääcä na Wanaadi ooto’jodhe soto ämjumma’dá yeichö.

³⁵ Töwö Wanaadi tameedä soto weichö tumjumma, tönoiñe täneea’jäcä, aashichaato tödööa’jäcä mmaja.

³⁶ Töwö Wanaadi Isadaaeeda atöödö wwäiñe cöneecammai yää Jesuuquidiito ecamjödö que täncanoode’da weichojo, ñäädä tameedä Ädhaajäje naadö.

³⁷ Änwanno odhoowanääcäiñe na tameedä judhío jataadöcoomo waadäi cöneeja’dätäichö, yää Caadideea ña awa’deene cönaajäntäichö Juan wwä ecammajäätö’jeje, wautisaaje soto tödö’jejeiñe mmaja.

³⁸ Odhoowanääcäiñe mmaja Jesuuquidiito Naasade ñano wwä Wanaadi nutuudu Epíiditu Santo jäduudu. Ñäädä Jesuuquidiito, Wanaadi töjaadä yeijäcä, aashichaato tödööancädä töwäämannä’e cönä’jaacä, tameedä odo’sha wäntunamjödö adoncancädä mmaja.

³⁹ Ñaa cöneeneaacä tameedä Jesuuquidiito nödö’jödö Judheea ña, Jeduusadén ña mmaja. Yaawä soto cöneemaicho cuduusa jäcä ajoijodö que.

⁴⁰ Aaduwaawä anoototo ai Wanaadi cönaadoncai yaawä yäämaajo jonno. Yää ’jeje töwö Wanaadi cöneenejoi ñaa wwä.

⁴¹ Tameedä soto wwäiñe’da mma töwö cönäänejoi, ecammannamooje töweiyaamoje jenaadä Wanaadi neichö wwäiñe dea mmaane. Ñanno ñaa Wanaadi neichö, töwäämaajo jonno yaadonca’jeje Jesuuquidiito jadoono wääwashinchä’jödö.

⁴² Töwö Jesuuquidiito ñaa anontäne soto wwäiñe ecammajä’e soto emmencaneichomooje tödö’jödö yeichö Wanaadi wwä, nudo’como emmencaneichomooje, yä’ja’a’como mmaja.

⁴³ Mädääje dea jenaadä Jesuuquidiito jäcä töneecammajä’e cönä’ja’to tameedä Wanaadi wa’deuwödö ecammannamo’jödö. Tönwanno töneecammajä’e cönä’ja’to tameedä Jesuuquidiito ecaanö’nei cone’nadiiyö choccatoojo, Jesuuquidiito jäcäinchädä dea; quee cönä’döaacä Peedhodo Conneediyo wwäiñe.

Epíiditu Santo ’je judhíojöncomo wä’dö’jocoomo

⁴⁴ Peedhodo wwä ecammajä’taame dea Epíiditu Santo cönä’täi yaawä tameedä Peedhodo a’deddu etannamo’jödö jäcäiñe.

⁴⁵ Yaawä judhío quedeiyentecoomo, ñanno Peedhodo jadoncomo we’a’como, cönääwammajoicho Epíiditu Santo wä’tudu weijäcä mmaja judhíojöncomo wwä.

⁴⁶ Tönwanno cöneeta’to anejja a’deucwe ya’deuwödööcomo, aashicha Wanaadi jäcä ya’deuwödööcomo mmaja.

⁴⁷ Yääwä Peedhodo cönä’döaacä: —Wautisaaje ännöjo’da eijai’cha caato canno, tönwanno mmaja Epíiditu Santo ’je yä’döeetöcoomo’da, cönwanno caatoodöje mmaja; quee cönä’döaacä Peedhodo ñanno Conneediyo jäcäiñe.

⁴⁸ Töwö Peedhodo wautisaaje cönnöjoicho yaawä Jesuuquidiito eetö joi. Yää ’jeje ñanno cönä’döa’to Peedhodo wwä: —Ñaa jadä eichä äächädä anooto; quee.