DOSECHO 1 - Wanaadi A'deddu

Epíiditu Santo ecamma’jödö

¹ Edääje wä’dö’se wa äwwä amäädä Teoojido, aashichaato: Awa’deene ömmennä’jödö jäcä wimennäne tameedä yaajäntä’jödö jonnoto’jödöödä Jesuuquidiito nödö’jödö jäcä, ñeecammajäätö’jödö jäcä mmaja,

² caju ña töötädö wa’cä. Caju ña töötädö owaajo tönaanontädö cöneicho; Epíiditu Santo woije töwö cönaanontoicho chäwwäiñe tödööemö jäcä.

³ Yaawä töwääma’jeje töwö Jesuuquidiito nudä cönäänejoi chea chäwwäiñe aacä soto anooto, dhowaanäcäiñe yeichö wetä nudä töweichö. Chäwwäiñe töwa’deuwe cönä’jaacä Wanaadi töcaajichaanaije weiña jäcä.

⁴ Chääjadäiñe töweichö dea Jesuuquidiito cönä’döaacä ñanno anonta’como wwäiñe: —Mötäätäi’che Jeduusadén ñanno. Yäätä yoomo’täcä’de äwwäiñe Jaaja necamma’jödö, yää äwwäiñe töneecammajä’e wä’jaaquennö.

⁵ Juan Wautiita wautisaaje tönnöe cönä’jaacä tuna que; änwanno mmaane wautisaaje mä’döjaato’de Epíiditu Santo queene, wanna anoototo ai’cha mma; quee cönä’döaacä Jesuuquidiito chäwwäiñe.

Caju ña Jesuuquidiito wäncu’jödö

⁶ Tujuumä töweichöcoomo ñanno anonta’como Jesuuquidiito cöneecamma’joicho: —Cajiichaana, ¿eduuwaane ca iisadaaediitacoomo jäduuje mödööanto, anejjacoomo sotoije’da? quee cönä’döa’to.

⁷ Jesuuquidiito cönä’döaacä chäwwäiñe: —Änwanno odhoowanääcäiñe eijai’cha na yää cu’nädö, dhanootoi’chädö mmaja. Jaaja yää cuncu’nä’täi tumjummadö woije.

⁸ Änwanno äjääduduucomo na’de Epíiditu Santo yä’ta’jäcä äjääcäiñe. Yaawä cäcammajä’ato’de Jeduusadén ña, tameedä Judheea ña mmaja, Samaadiya ña mmaja, tameedä yeichö wa’cä edä nono de’wä; quee cönä’döaacä Jesuuquidiito.

⁹ Yääje töwa’deuwö’jeje Jesuuquidiito cönäncui caju ña ñeenedööcomooje. Yaawä ca’dutu cöna’dui; ääne’da cönä’jaacä yaawä.

¹⁰ Töwwäiñe caju ña iichädö ene’madaawä jadheedä aacä dhanwaacomo tödö’täiñe cöneedantoicho tajääde’dato awäiñe.

¹¹ Ñanno dhanwaacomo cönä’döa’to anonta’como wwäiñe: —Änwanno Caadideea ñancomo, ¿ane’que’nei caju ña mene’maato? Ñäädä dea Jesuuquidiito, ojonnoiñe caju ña nötännö, ne’a’dede caju ña aneenedööcomooje nötännöje mmaja; quee cönä’döa’to.

Juudha nwacaanoje Matía ewaaca’jödö

¹² Yääje mma yaawä Odiiwo ’jödö ñanno anonta’como cönennacaicho Jeduusadén ña. Yää jöö amoinche’da cönä’jaacä Jeduusadén ñano jäcä, wäädeetatoojo anooto awä wötootojo ecammaajä ’cäwa’cä mma.

¹³ Yaawä jataaca töwä’döa’comjäcä taawa de’cäi cönäncuicho, yää ä’sa chaaca töwä’döa’como cönä’ja’todö döiña. Chääjadäiñe cönä’ja’to Peedhodo; Jacoowo mmaja; Juan mmaja; Antedé mmaja; Jediipe mmaja; Tomá mmaja; Waadotoodomé mmaja; Mateo mmaja; Jacoowo mmaja, ñäädä Aadeujeeo nnedö; Simón mmaja chääjadäiñe cönä’ja’dea, ñäädä jäduujato dha’deddu. Juudha mmaja cönä’ja’dea, ñäädä Jacoowo acoono.

¹⁴ Tameedä ñanno weiñäje töwe’jumma cönä’ja’to Wanaadi wwä töwa’deuwödööcomo wetä Jesuuquidiito acontomo jadä, yeenö Madía jadä mmaja, anejjacoomo wodiiñamo jadäiñe mmaja.

¹⁵ Yaawä Peedhodo cönammöi quedeiyente antawäiñe; ñanno cönä’ja’to ijaatoodea sotooto de’wä tooni soto. Töwö Peedhodo cönä’döaacä chäwwäiñe:

¹⁶ —Änwanno jimmä, jenaadä Epíiditu Santo woije Dawí cöna’deuwöi Juudha weichojo jäcä, ñäädä Jesuuquidiito ajäiñamo adääneichomo’jödö. Mädääje nä’döa Wanaadi a’deddu imennaajä jäcä. Yääje yeijäcä yää imennaajä wä’dödö nönge yeeja’do’tojo cönä’jaacä.

¹⁷ Ñäädä Juudha cöjimmotoncomooje cönä’jaacä; cöjaadäiñe töwäämannä’e cönä’ja’dea.

¹⁸ Töwö nono cöneejemai yaawä jödaata conemjönö tönnö’jödö eje’jödö que; yää ’jeje tuju’sudiiche cöneejuccai, ijootö cönäätäncai yaawä.

¹⁹ Jeduusadén ñancomo wwä eta’jäcä yää nono cöne’toicho Aseedamaaje; Munu Wei’jödö, quee töwä’dö’se yeichö dha’deucweiñe.

²⁰ Edääje nä’döa Saadomo jäcä, yää wecanta’ñotoojo imennaajä jäcä: Tasse’da immai nei’ñojo, anejja mma iiña ei’che; quee. Edääje mmaja imennaajä nä’döa dea: Anejjaane inwacaanoje nääwaaca’ñojo; quee nä’döa Saadomo jäcä.

²¹ “Yääje yeijäcä anejja ewaacajai caato eduuwa Juudha nwacaanoje. Ñäädä täwaacaamö eijai ña cöjaadoncomo’jödö dea Jesuuquidiito cöjaadäiñe cönä’ja’dö wadaadäädä;

²² Juan wwä wautisaaje Jesuuquidiito wä’döjo’jödö jonnoto’jödöödä cäju ña iichä’jödö jona tödööene cöjaadoncomo’jödö dea eijai ña. Yaawä ñäädä cöjaadäiñe eijai ña töwäämaajo jonno Jesuuquidiito waadonca’jödö jäcä ecammajä’neije; quee cönä’döaacä Peedhodo quedeiyente wwäiñe.

²³ Aacä tömencaamo cöneecammaicho yaawä: José, ñäädä Waasawaaje töne’tä cönä’ja’todö. Juusutuuje mmaja chäätö cönä’ja’dea. Yeichacoono cönä’jaacä Matía.

²⁴ Edääje Wanaadi wwä cöna’deuwa’to yaawä ñanno quedeiyentecoomo: —Cajiichaana Wanaadi, amäädä odhoowanääcä na tameedä soto tö’tajäätödööcomo. Amäädä ämjummadö eneejocä ñaa wwä, canno aacä tömencaamo naatoodö,

²⁵ Juudha nwacaanoje anontaajäje eiye yaawä. Ñäädä Juudha conemjönö tödö’jödö jo’tädööje anontaajäje töweichö jonno cönäätu’cajoi, töweichojo döiña töötädö wetä; quee Wanaadi wwä cöna’deuwa’to.

²⁶ Yaawä wä’cana’canä tödöödö’jo Matía anontaajäje yääwaacatoojo cönoojodöi. Anonta’como jadäiñe töwö cönä’jaacä yaawä, ñanno amoojadooto de’wä tooni’chomo jimmäje.