DOMAANO 9 - Wanaadi A'deddu

Wanaadi wwä iisadaaediitacoomo ei’jödö

¹ Chäänönge ya’deuwa, Quidiito sotoi wa’deuwödö töweiye naichöje; ätäncu’tä’da wa. Tö’tajäätödö jaiñoone wecamma äwwäiñe, Epíiditu Santo woije.

² Jooje wentumje wäänene; weiñäje yeewanö jäcä cone’da wäänene dea jimmä jäcäinchädäiñe.

³ Quidiito jonno töwä’sancwa wei’she tötö’tajä’e wäänene aneedawä, jimmä nwacancomooje, ñanno öwö wä’jimmä’tädö, yääje eijai yeiya’jäcä.

⁴ Tönwanno naato Iisadaaeeda atöödöje; Wanaadi tönnedööje cönnöicho; chääjadäiñe töwö töweiye cönä’jaacä aashicha töweichö eneejancädä chäwwäiñe. Töwö Wanaadi chäwwäiñe cöneecammai töwwä tödöötojo, waanontänä Moisé nimennä’jödö mmaja, Wanaadi weichojo taca chäwwäiñe tödööemö mmaja, töneecamma’jödö mmaja, yää aashicha tödööto’como jäcä.

⁵ Ñanno iisadaaediitacoomo naato ñaa adaichö atöödöje. Ñanno atöödöje mmaja Äwaanacaanei cönennui, ñäädä Wanaadi, tameedä Ädhaajä, yeichöje aashicha wa’deutojooje naadö. Amén.

⁶ ¿Aaquene yaawä, quee ’ja? ¿Chäänönge’da ca cöneiyacä yää iisadaaediita wwäiñe Wanaadi necamma’jödö? Ng’jn, chäänönge’da’da yeichaame. Edääjeene na: Tameedä’da Iisadaaeeda atöödö iisadaaediita neeneje naato.

⁷ Tameedä’da mmaja Aawadán atöödö iiñacoomo neeneje naato. Edääje Wanaadi cönä’döaacä Aawadán wwä: “Isaaca nnacoomoone adhaatödööje me’taato’de;” quee.

⁸ Yääje yeijäcä owaanäcä na tadai’jödö jäcäinchädä mma Wanaadi nnedööje ätä’täjai’cha cöweichöcoomo. Ñannoone Aawadán atöödö neeneje naato, Wanaadi necamma’jödö woija’como wennua’comoone.

⁹ Edääje Wanaadi necamma’jödö cönä’jaacä Aawadán wwä: “Chu’nä’tä’jödö aca yä’döa’jäcä we’a’de; yaawä ajiiñamo Saada dhanwaaje nenneca’de;” quee.

¹⁰ Edääje mmaja na dea ñanno wei’jocoomo: Ñanno Deweeca nnacoomo cönä’ja’to ñäädä dea yuumötoncomooje, ñäädä cadai’choncomo Isaaca.

^11-13 Ñanno Deweeca nnacoomo ennu’dadooto Wanaadi yeicho’como cöneecammai, iiñödööcomo ’je’da dea yeichaame, aashichaato, conemjönö jeiñe mma. Edääje Wanaadi cönä’döaacä Deweeca wwä: “Yui ña’de tacoono anoonöje;” quee. Edääje mmaja aneetaja Wanaadi a’deddu imennaajä na’döa dea: “Jacoowo wijummane, Esaú mmaane wichiiñeme’ne;” quee. Mädääje na; mädääje tumjummadö woije mma Wanaadi tösootoije töweiyemö töna’dejja weneene, iiñödö jäcäinchädä’da.

¹⁴ ¿Aaquene yaawä ä’döjai caato? ¿Chäänönge’da Wanaadi ña, quee ’ja? Ng’jn, yääje’daane.

¹⁵ ¿Edääje jönca Wanaadi cönä’döaacä Moisé wwä: “Ñäädä wentumje ene’se weichö woije wentumje weneea’de; ñäädä i’wa’tä’se weichö woije wi’wa’ta’de;” quee jönca Wanaadi cönä’döaacä?

¹⁶ Mädääje na. Töwoije mma’daane wääwanaacanä töweiye nai, wä’jädu’tänä que’da mmaja, Wanaadi wentumje äneetä yeichö woijeene.

¹⁷ Ñäädä Ejiito ñano cajiichaanai’chädö cönä’ja’dö naane’. Edääje imennaajä nä’döa chäwwä Wanaadi wa’deuwö’jödö jäcä: “Mädääjatooje dea cajiichaanaje männöne, jäduuje weichö wäänejooto’me, tameedä nono weichö wa’cä yeecadö wecaatadö wetä yaawä;” quee imennaajä nä’döa.

¹⁸ Mädääje na; töwö Wanaadi wentumje soto neneea wentumje ene’se töweichö woije; chäijannä’ca’se töweichö woije mmaja nichäijannä’ca dea.

¹⁹ Edääje ä’döjai’cha ma amäädä: “ ¿Ane’que’nei Wanaadi cäutäiñe dea weneene, yääje yeiya’jäcä, tameedä mädä tumjummadö woije tönnöe töweichaame? ¿Änääcö Wanaadi nödöödö äiñe’wononcadööde’ ?” quee ä’döjai’cha ma.

²⁰ Amäädä mmädä, soto mmädä, Wanaadi maneccujäätödööde’. ¿Yääje ca ädiiñä amoode’naajä ä’döjai ñai tamoode’nänei’jödö wwä: “ ¿Ane’cotoojo mädääje camoode’näne?” quee?

²¹ ¿Tödö’se töweichö woije jönca ädiiñä tödööjä’nei tönnöe töweiye nai, anejja aashichaato ewöötöje, anejja ’quene conemjönö ewöötöje, yää chäccädiiñaajä que dea?

²² Töwö Wanaadi ñanno tömaaminchaamoja’como tönshinchä cönä’jaacä, ñanno töwännanö’aamo, chääjäcäiñe cone’da töweichö eneejo’se töweichaame, töjäädudu eneejo’se töweichaame mmaja.

²³ Töwö ñanno conemjöncomo tönshinchäiñe cönä’jaacä aashicha töweichö eneejodö wetä cöwwäiñe. Ñanno cönwanno wentumje ñeenedö. Töwö jenaadä cödöötäne aashicha töweichö enennamooje.

²⁴ Töwö Wanaadi ca’dejjatääne judhíocoomo, judhíojöncomo mmaja.

²⁵ Osea nimennä’jödö jäcä edääje Wanaadi wa’deuwödö nä’döa: Sootoijemjöncomo’jödö sootoije we’taato’de; tujunnemjönö’jödö umjummadööje we’ta’de.

²⁶ “Sootoijönö änwanno,” quee chäwwäiñe cönäätäcamma’dö dö’tä dea Wanaadi nudooto nnacoomoje nätä’täjaato’de; quee Osea nimennä’jödö nä’döa.

²⁷ Iisadaaediita weicho’como jäcä mmaane edääje Isaía cöneecammai: “Sa’dada wa’cä Iisadaaeeda atöödö weichaame wanna’da mma nääwanaacaato’de.

²⁸ Töwö Cajiichaana jadheedä töwa’deuwö’jödö nönge nödööa’de, yää edä nono de’wä töweeja’dä’emö;” quee Isaía wä’dö’jödö na.

²⁹ Edääje mmaja Isaía cöneecammai chea: Ñäädä Wanaadi, töweewänä’taamo Cajiichaanaichomo, catöödöcoomo aneedetö’da ei’jo, Sodhooma ñancomo wei’jocoomo nönge queichädö, Comooda ñancomo wei’jocoomo nönge mmaja; quee Isaía cömmennäi.

Aashichaato wätunnä aneecamjö’da judhío wei’jocoomo

³⁰ ¿Aaquene yaawä, quee ’ja? Ñanno judhíojöncomo Wanaadi jadoonoje töwä’dödööcomo anuuji’cha töwei’jocoomo weichaame cöneejodöicho. Tönwanno cöneejodöicho ecamjödö que.

³¹ Iisadaaediitacoomo mmaane waanontänä tödöödö que daja Wanaadi jadoonoje töwä’dödööcomo cunuujiya’todö’je, aneejodö’daane cöneiya’to.

³² ¿Ane’que’nei, quee ’ja? Ecamjödö que’da uji’jödö weijäcä chäwwäiñe; tödöödö que mma yää cunuujiya’to. Tönwanno cöneeju’cätoicho yää täju soto weju’co’to’como jona,

³³ yää Wanaadi a’deddu imennaajä jäcä nätääcammaadö. Edääje yää imennaajä nä’döa: Siyon ña dhanwa wödööa, soto weju’co’to’me; täju soto emajjoneichomo töweiye naichöje mmaja na’dede. Ñäädä ecaanö’nei ämjöichojo’da wa’de; quee imennaajä nä’döa.