DOMAANO 8 - Wanaadi A'deddu

Epíiditu Santo woije weiñä

¹ Yääje yeijäcä ännanö’jai’cha naato eduuwa ñanno Jesuuquidiito jadoncomo, ñanno tujuunucoomo nijummadö woijemjöncomo, Epíiditu Santo woija’como.

² Töwö Epíiditu Santo Jesuuquidiito jadä cöwä’dödööcomo que cöweicho’como cuntui; töwö töjäädudu que yu’cane conemjönö jäduudu jonno, wäämanä jonno mmaja.

³ Yääje cödööjaiñe’da cönä’jaacä waanontänä, yää Moisé nimennä’jödö, cujuunucoomo nijummadö tämu’däneije yeijäcä. Wanaadi mmaane yääje cödöötäne Tönnedö anontädö que. Töwö Tönnedö cönaanontäi sadä. Ñäädä Iiñedö cönä’jaacä sotooje, cönwanno cönöngeiñe, conemjönö tödööjaicho mmaja. Töwö saaquidiijiisiyooje cönäämai yaawä, conemjönö coccatoojoje. Mädääje Wanaadi conemjönö cöne’jodheinchai Jesuuquidiito ai, ñäädä sotooje cönä’ja’dö ai.

⁴ Töwö mädääje cönnöi waanontänä wä’dödö tödööjai cöweichöcoomo wetä. Cujuunucoomo woije’da caato eduuwa, Epíiditu Santo woijeene.

⁵ Ñanno tujuunucoomo woija’como tujuunucoomo nödöödö mma nencano’taato; ñanno Epíiditu Santo woija’como mmaane Wanaadi nödöödö daja tödö’se naato.

⁶ Yää tujuunu nödöödö encano’tädö wäämatoojoje noowonö’jaca; Wanaadi nödöödö encano’tädö mmaane yeichöödoto weiñä daja nejoodöja, täncanoode’da weichojo mmaja.

⁷ Ñäädä tujuunu nödöödö encano’tänei Wanaadi tu’dedööje na, Wanaadi waanontädö wwä ä’tu’da yeijäcä, ä’tujai’cha mmaja.

⁸ Yääje yeijäcä ñäädä tujuunu woijato Wanaadi a’cwaimajai’cha na.

⁹ Änwanno mmaane ajuunucoomo woije’da maato, Epíiditu Santo woijeene, Epíiditu Santo ataacaiñe yeijäcä, ñäädä Wanaadi dö’sennoto we’ajä. Ñäädä Epíiditu Santo ’jemjönö Quidiito jadoonojöönö ñäädä.

¹⁰ Quidiito ataacaiñe yeiya’jäcä aweichöcoomo töweiye na, Wanaadi jadoonoje aweijäcäiñe, adheejöcoomo töwäämaamöje yeichaame conemjönö jäcäinchädä.

¹¹ Töwö Wanaadi Quidiito cönaadoncai yäämaajo jonno. Wanaadi nanontädö Epíiditu Santo ataacaiñe yeiya’jäcä töwö Wanaadi adheejöcoomo nadonca’dede Epíiditu Santo ataacaiñe naadö ai.

¹² Yääje yeijäcä jimmä, cöwwäiñe tödööemö töweiye na, cujuunucoomo nijummadööjönööne.

¹³ Ajuunucoomo woije aweiya’comjäcä mä’ja’aato’de. Dha’da Epíiditu Santo jäduudu que ajuunucoomo nödöödö e’jodheincha’jäcä äwwäiñe, yaawääne aweichöcoomo meneeato’de.

¹⁴ Tameedä ñanno Epíiditu Santo nanontädö woija’como Wanaadi nnacoomoje naato.

¹⁵ Ñäädä Epíiditu Santo, äwwäiñe cönä’tuichö, conemjönö anoonöje ayöödöneichomoojönö, tösaade aweichöcoomo wetä; Wanaadi nnedööje cödööneichomoone töwö. Ñäädä Epíiditu Santo woije Jaajaje Wanaadi que’taato.

¹⁶ Töwö Epíiditu Santo cötö’tamme’jotäiñe weneene Wanaadi nnedööje cöweichöcoomo.

¹⁷ Wanaadi nnacoomoje cöweijäcäiñe cöwwäiñe töweiyemööje na yää Wanaadi necamma’jödö tu’emö. Yää cöwwäiñe nä’tua’de Quidiito wwä utuudu jadä. Eduuwa Quidiito jäcäinchädä cöwäntunaanö’a’comjäcä, chääjadä mmaja aashicha caato’de

¹⁸ Joojemjönööje öwwä nichö’ta eetä töwäntunaanö’e cäänetäänedö, äcuude aashicha cöweicho’como naadö o’näde.

¹⁹ Tameedä amoode’naajä naadö jooje niyoomo’ca Wanaadi nnacoomo wä’nejoncadööcomo.

²⁰ Mädä amoode’naajä naadö töwoije’da töwäädämmatooje cönä’döi, Wanaadi woijeene. Yääje yeichaame aashicha yeichojo töweiye dea na.

²¹ Mädä amoode’naajä naadö töwaatameemöje’da nä’döa’de töwaatameemöje töweichö jonno. Yääje na’de Wanaadi nnacoomo wwä aashicha töweicho’como ejoodöa’jäcä.

²² Cönwanno cowaanäcäiñe na tameedä amoode’naajä naadö yentumöödö eduuwa naadö jona tödööene, wodi wensu’dato töweiye naichöje.

²³ Amoode’naajä mmajöönö mädääje na, cönwanno mmajaane, Epíiditu Santo ’je cöweichaameiñe. Epíiditu Santo ñäädä cöwwäiñe töweiyemö utuudu waajäntädö. Cönwanno mmaja quentungato dea; cöwwäädäiñe Wanaadi nnacoomoje cöwä’dödööcomo quiiyomo’cato, yää cäjööcomo wecoonecaatojo.

²⁴ Cönwanno cääwanaacatääne yää womoocödö wetä. Yaawääne’ yää täneeto o’womoocö’da töweiye nai. ¿Änääcö ca täneeto tönwomo’que töweiye nai?

²⁵ Äänejöönööne quiiyomo’cato; yääje yeijäcä chincha’da yoomo’jai caato.

²⁶ Epíiditu Santo cö’wa’tätäiñe weneene jäduuje’da cöweichöcoomo. Cönwanno cowaanäcäiñe’da na Wanaadi wwä wa’deunä. Töwö Epíiditu Santo dea cöjääcäiñe Wanaadi wwä töwa’deuwe weneene wa’deuto’jönö que.

²⁷ Ñäädä Wanaadi tameedä tö’tajä’nä dhowaanäcä na; töwö dhowaanäcä na Epíiditu Santo wa’deuwödö töwwä, ñäädä Epíiditu Santo Wanaadi woije dea töwa’deuwe yeijäcä shootoi jäcäiñe.

E’jodheinchannamooje cöweichöcoomo

²⁸ Cönwanno cowaanäcäiñe na tameedä tujummannamo jäcäiñe töweeja’dä’e weneenedö aashichaatoje Wanaadi tönnöe yeichö, ñanno tumjummadö woije töna’dejja’jödö jäcäiñe.

²⁹ Ñanno jenaadä töne’tä’jödö töwö Wanaadi cönnöicho Tönnedö nönge töwä’döaamoje, ñäädä Iiñedö tameedä yuichoncomooje yeichö wetä.

³⁰ Ñanno töne’tä’jödö Wanaadi cöna’dejjaicho dea; töna’dejja’jödö töjaadonooje cönnöicho; töjaadonooje tönnö’jödö aashicha töweiyaamoje mmaja cönnöicho dea.

³¹ ¿Aaquene yaawä, quee ’ja? Wanaadi cöjaadäiñe yeiya’jäcä ¿änääcö cutu’de’tätäädö deeade’ ?

³² Wanaadi cöwwäiñe Tönnedö jadä’jödöödä aneewontä’da cöneiyacä; tu’eene cuntui cöjääcäinchädäiñe töwäämaamöje. ¿Aaquene mmaja tameedä anejja cöwwäiñe äntu’da eijai ñai Tönnedöödä cuntuiñe’ ?

³³ ¿Änääcö Wanaadi nei’jödö jäcäiñe cone’da a’deujai ñai? Wanaadi chea töjaadonooje cönnöicho,

³⁴ ¿änääcö mmaja töwännanö’aamoje ane’tädööto deeade’ ? ¿Quidiito ’ja? Ng’jn, Quidiito dea dajaane cöjääcäinchädäiñe cönäämai, töwäämaajo jonno cönaadoncai chea. Töwö na eduuwa Wanaadi nnäcä, ämu’demjönö dö’se, chäwwä cöjääcäiñe wa’deunäje.

³⁵ Yääje yeiya’jäcä ¿ane’cäämö cösancwajoojai ñai Quidiito jonno, cujummatäiñe’da yeichö wetä yaawä? ¿Wäntunaanö’nä ’ja, cone’da weiñä ’ja, wätä’maminchajoonä ’ja, ämi dhetuncadö ’ja, töwonque’da weiñä ’ja, tönoiñato ’ja, wäämanä ’ja? Ng’jn, tameedä mädoocomo cösancwajoojaiñe’da na Quidiito jonno, cujummatäiñe’da yeichö wetä.

³⁶ Edääje Wanaadi a’deddu imennaajä nä’döa: Amäädä adheecamjödö jo’tädööje ñaa ja’tä weneeneto weiñäje. Oweeja tamiiñä’caamo nönge ñaa dötä weneeneto; quee imennaajä nä’döa.

³⁷ Yääje yeichaame, töwäntunaanö’emööje cöweichaameiñe, to’jodheinchaane e’jodheinchajai caato ñäädä cujummaneichomo ni’wa’tädö que.

³⁸ Yoowanääcä na anejja cönsancwajoojaiñe’da yeichö Wanaadi jonno, cujummatäiñe’da yeichö wetä yaawä. Wäämanä cösancwajoojaiñe’da na chojonno, edä nono de’wä weiñä mmaja, amoode caju ñancomo mmaja, odo’shancomo jäduuja’como mmaja, eduuwa weiñä naadö mmaja, äcuude weiñä na’dedö mmaja,

³⁹ cawoono mmaja, co’dhejeiñano mmaja, tameedä Wanaadi namoode’nädö mmaja cösancwajoojaiñe’da na dea Wanaadi jonno. Tameedä yää jona’da yeichöje Wanaadi nijummadööje caato’de. Cujummatäiñe töweichö töwö Wanaadi cöneenejoi Cädhaajotoncomo Jesuuquidiito ai.