DOMAANO 6 - Wanaadi A'deddu

Conemjönö wwä töwääma cöweichöcoomo

¹ Yääje yeiya’jäcä ¿aaquene ä’döjai caato? ¿Conemjönö tödöödöje dea queichäiye, jooje’cä Wanaadi nutuudu aashichaato ejaamöiye, quee ’ja?

² Ng’jn, mädääje’daane. Cönwanno conemjönö tödöödö jäcä yäämaajä nönge caato. Yääje yeijäcä ¿aaquene mmaja conemjönö tödöödöje dea queichädö deaade’ ?

³ Cönwanno wautisaaje cä’dötääne Jesuuquidiito jadä cöwä’dödööcomo wetä. Yaawä wautisaaje cöwä’dödööcomo que yääma’jödö quiichu’tätääne dea.

⁴ Wautisaaje cöwä’dödööcomo que Quidiito wääwaaca’jödö nönge mmaja cääwaacatääne dea; töwääma cä’ja’quene yaawä. Yaawä töwö Tumö jäduudu aashichaato woije töwäämaajo jonno cönaadoncai. Chääjadoonoje cöweijäcäiñe cönwanno mmaja caadoncatääne dea yaawä, eduuwaatoje cöweichöcoomo wetä.

⁵ Mädääje na. Quidiito jadoonoje cöweijäcäiñe töwö yäämadö jadä mmaja cönwanno cä’ja’täne dea. Yääje yeijäcä yaadonca’jödö nönge mmaja caadoncaato’dede.

⁶ Cönwanno cowaanäcäiñe na yää jenaadä cöwei’jocoomo Quidiito jadä cuduusa jäcä yääma’jödö. Yaawä yää conemjönö tödö’se weiñä cönäämai. Yääje yeijäcä conemjönö tödöödö anoonöje eijai’cha caato eduuwa.

⁷ Ñäädä yäämaajä conemjönö tödöödö jonno töwä’sancwa töweiye nai.

⁸ Quidiito jadä cöwääma’jocoomo weijäcä cowaanäcäiñe na chääjadä nudä cöweicho’como.

⁹ Cowaanäcäiñe na Quidiito äämajai’cha mmaja yeichö eduuwa, töwäämaajo jonno yaadoncaatö’da; wäämanä wwä oto’jodheinchajoojai’cha töwö na eduuwa.

¹⁰ Töwö tooniye cönäämai conemjönö e’jodheinchadö wetä; eduuwa nudä naadö Wanaadi wwonooje na.

¹¹ Mädääje mmaja änwanno chö’tamme’jai maato conemjönö wwä yäämaajä nönge aweichöcoomo; Wanaadi wwä mmaane nudä maato, Cädhaajotoncomo Jesuuquidiito jadä.

¹² Yääje yeijäcä conemjönö tödöödö anoonöje’daane eichäcä, ajuunucoomo nijummadö mma männöto’no yaawä.

¹³ Chäänöngemjönö tödönnamooje mma mä’tutäi’che conemjönö wwä. Wanaadi wwä mmaane ä’tutääcä, yä’ja’a’como waadonca’comoone aweiya’como. Wanaadi wwä adheejöcoomo u’täcä, aashichaato tödööneijeene meichäiye.

¹⁴ Conemjönö adhe’jodheinchajaiñe’da na eduuwa jenaado’jä waanontänä nanontädööcomooje’da aweichomjäcä; Wanaadi nutuudu aashichaato woijeene maato.

Tädhaajä que weiñä dö’seeno

¹⁵ Cönwanno jenaado’jä waanontänä nanontädööcomooje’da caato eduuwa, Wanaadi nutuudu aashichaato woijeene. ¿Conemjönö tödöödöje dea ca eijai caato, yääje yeiya’jäcä? Ng’jn, yääje’daane.

¹⁶ Änwanno odhoowanääcäiñe na anejja soto wwä äwä’tua’comjäcä shootoije aweichöcoomo wetä, ñäädä anoonöje eijai aweichöcoomo yaawä; imjummadö woije eijai yaawä. Mädääje mmaja änwanno; conemjönö woije aweiya’comjäcä wäämato’me noowonö’jaca. Dha’da ’quene Wanaadi woije aweiya’comjäcä chäänönge aweicho’comooje daja nejoodöja.

¹⁷ Jenaadä conemjönö anoonöje mä’ja’quene; eduuwa mmaane tödö’se aweichöcoomo que owoowanooma’jocoomo woije maato, yää chääque towaanoma maatoodö. Yääje yeijäcä aashicha Wanaadi tä’tämje na.

¹⁸ Conemjönö anoonöje aweichöcoomo jonno töwä’sancwajo maato eduuwa aashichaato tödöödö anoonöje daja aweichöcoomo wetä.

¹⁹ Yö’seeno joi mädääje ya’deuwa, anejjejaato ai etaajai’cha aweijäcäiñe. Jenaadä chäänöngemjönö tödöödö wetä conemjönö wwä töwä’tue mä’ja’quene; mädääje mmaja eduuwa chäänönge weiñä wwä ä’tujai maato, aashichaato tödöödö wetä daja. Mädääje Wanaadi woije jeene eijai maato.

²⁰ Yaawä conemjönö anoonöje aweichöcoomo chäänöngato weiñä ännö’da töweiye mä’ja’quene.

²¹ ¿Ane’cäämö töncana’ca töweiye mä’ja’quene yää eduuwa ajöichöcoomoje naadö tödöödö que? ¿A’que jönca? Yää tödöödö noowonö’jaca wäämatoojoje mma.

²² Eduuwa mmaane conemjönö jonno töwä’sancwa maatoodö Wanaadi anoonöje maato. Eduuwaane michaana’caato Wanaadi wwonooje aweeconeecato’como, aweichöcoomo eneetojo mmaja.

²³ Conemjönö tödöödö nääjema wäämanä que. Wanaadi nutuudu aashichaato mmaane yää, weiñä yeichöödoto, Cädhaajotoncomo Jesuuquidiito jäcäinchädä.