DOMAANO 4 - Wanaadi A'deddu

Töneecanö’e Aawadán wei’jödö

¹ Ñäädä cadai’choncomo Aawadán cönä’ja’dö naane’.

² Töwö tönnödö que’da Wanaadi jadoonoje cönä’döi. Yääje tönnödö que mma Wanaadi jadoonoje ä’dö’jo mmaane töwö Aawadán o’jodhe chö’tajä’jai cönä’jaacä, Wanaadi owaadäädä’da yeichaame.

³ Edääje Wanaadi a’deddu imennaajä nä’döa: “Aawadán Wanaadi cöneecamjöi; yää ñeecamjödö jäcäinchädä Wanaadi töjaadonooje cönnöi;” quee imennaajä nä’döa.

⁴ Ñäädä töweetadaawa’cajoomö ejeemadö töweiye naichö naane’, chäwwä täjemjönö utuudujöönö yää, chaadawaajui’jödö ejeemadööne.

⁵ Yääje’daane Wanaadi jadoonoje wä’dönä. Ñäädä aashichaato ännö’da töweichaame Wanaadi ecaanö’nei, yää ñeecamjödö jäcäinchädä Wanaadi töjaadonooje nödööa. Wanaadi töjaadonooje tönnöe ñäädä conemjönö tödöönei.

⁶ Dawí mmaja ta’cwaiñe cöne’ta’dea ñäädä soto iiñödö jäcäinchädämjönö töjaadonooje Wanaadi nödöödö.

⁷ Edääje cönä’döaacä töwö Dawí: Ta’cwaiñe naato ñanno choone’nadiiyöcoomo encwanno’ja’como, ñanno choone’nadiiyöcoomo ta’due naadö.

⁸ Ta’cwaiñe ñäädä choone’nadiiyö Cajiichaana aneejemaajo’da naadö; quee cönä’döaacä Dawí.

⁹ Siicunsidaadoja’como mmajöönö ta’cwaiñe töweiyaamoje naato; ñanno yääjemjöncomo mmaja ta’cwaiñe töweiyaamoje naato dea. ¿Yääjönca wä’döaanä: Aawadán necamjödö jäcäinchädä Wanaadi töjaadonooje cönnöi; quee?

¹⁰ ¿Aaquene töweichö Wanaadi jadoonoje Aawadán cönä’döjoi, siicunsidaadoje töweichö ’ja, siicunsidaadoje ä’dö’dadääne? Töwö Aawadán Wanaadi jadoonoje cönä’döjoi siicunsidaadoje ä’dö’dadä.

¹¹ Yää ’jejeene siicunsidaadoje wä’dönä cönäätäcammai chäwwä. Yää siicunsidaadoje wä’dönä cönä’jaacä ecamjödö que Wanaadi jadoonoje töweichö yääne’ju’jotoojoje mma. Yääje yeijäcä tameedä quedeiyentecoomo siicunsidaadojemjöncomo adaichöje mmaja Aawadán na dea, ñanno töneecamjödööcomo que Wanaadi jadoonoje yä’döja’como naatoodö.

¹² Ñanno siicunsidaadoja’como adaichöje mmaja Aawadán weichaame mma’ne, ñanno tujuunucoomo jäcä siicunsidaadoja’como mmajöönööne, Wanaadi a’deddu ecaanö’nnamo deaane, siicunsidaadoje ä’dö’dadä cadai’choncomo Aawadán necamjo’jödö nönge ecaanö’nnamo.

Ecamjödö jäcäinchädä Wanaadi necammadö utuudu yeichö

¹³ Aawadán wwonooje töweiyemööje edä nonoodö Wanaadi cöneecammai, dhatö’jödö wwoncomooje töweiyemööje mmaja. Chäwwäiñe jenaado’jä waanontänä tödöödö jäcäinchädä’da yää Wanaadi cöneecammai, chäwwäiñe ecamjödö weijäcääne. Yää jäcäinchädä töwö Wanaadi töjaadonooje cönnöicho.

¹⁴ Ñanno jenaado’jä waanontänä woija’como wwonooje mma Wanaadi necamma’jödö weiya’jäcä, ecamjödö töwäädämma eichö, Wanaadi necamma’jödö täje’da mmaja.

¹⁵ Yää waanontänä wätä’maminchanä mma necamma. Waanontänä ’je’da yeiya’jäcä mmaane ija’do’jo’jödö ’je’da mmaja.

¹⁶ Yääje yeijäcä yää Wanaadi necamma’jödö cönäätäcammai ecamjödö jäcäinchädä, täje’da yä’tudu wetä yaawä, tameedä Aawadán atö’jödö wwoncomoojeene yeichö wetä mmaja. Jenaado’jä waanontänä woija’como wwonooje mma’da yää Wanaadi necamma’jödö, Aawadán necamjö’jödö nönge ecaanö’nnamo wwonooje mmajaane. Yääje yeijäcä ñäädä Aawadán tameedä cadai’choncomooje na,

¹⁷ Wanaadi owaadäädä, ñäädä Aawadán cöneecamjöichö dea. Edääje Wanaadi a’deddu imennaajä nä’döa: “Wannacoomo soto adaichöje männöne;” quee. Ñäädä Wanaadi yäämaajo jonno adoncatä, a’cato töncatu’nacaajo mmaja.

¹⁸ Ñäädä Aawadán cöneecamjöi, täcaanö’emje’dato wa’cä yeichaame. Mädääje wannacoomo soto adaichöje töwö cönä’döi, Wanaadi necamma’jödö nönge dea: “Yää ’cäwa’cä adhaatödö naato’de;” quee yä’dö’jödö nönge dea.

¹⁹ Yaawä Aawadán cönä’jaacä ijaatoodea sotooto wedu ejoodöjai. Yääje yeichaame aneecamjö’da’da töwö cönä’jaacä, towaanäcä yeichaame inchomje töweichö, töjiiñamo Saada no’samje yeichö mmaja. Tönwanno yä’ja’a’como töweiye naichodööje cöntö’ta’to, yää ennecaajai’cha töweichöcoomo jäcä.

²⁰ Töwö Aawadán aneecamjö’da’da cönä’jaacä Wanaadi necamma’jödö; täcaanö’e’cä mmaane cöneecamjöi. Aashicha cöna’deuwöi chea Wanaadi jäcä.

²¹ Töwö dhowaanäcä cönä’jaacä töneecamma’jödö nönge Wanaadi tödööjai yeichö.

²² Yääje yeijäcä täcamjödö jäcäinchädä Wanaadi Aawadán töjaadonooje cönnöi.

²³ Töwö Aawadán jäcä mma’da yää tömennä na: “Ñeecamjödö jäcäinchädä Wanaadi töjaadonooje cönnöi;” quee naadö;

²⁴ cönwanno cöjääcäiñe mmajaane yää tömennä na. Cöneecamjödööcomo jäcäinchädä mmaja Wanaadi töjaadonooje cödööato, cönwanno Wanaadi ecaanö’nnamo, ñäädä töwäämaajo jonno Cädhaajotoncomo Jesuuquidiito adoncanei’jödö.

²⁵ Ñäädä Jesuuquidiito cöcoone’nadiiyöcoomo jäcäinchädä cönä’tui töwäämadö que. Töwö töwäämaajo jonno cönaadoncai Wanaadi jadoonoje cöwä’döto’comooje.