DOMAANO 3 - Wanaadi A'deddu

¹ ¿Ane’cotoojo judhíoje weiñä tujunne nai, yääje yeiya’jäcä, siicunsidaadoje weiñä mmaja, quee ’ja?

² Tujunne mma’ne, tameedä yeichö mmädääne. Judhío wwäiñe Wanaadi cuntui ta’deddu.

³ Yääje yeichaame dhantai aneecamjö’da cöneiya’to. ¿Chäänönge Wanaadi weichö ca ninwacaamanto, yääje yeiya’jäcä, aneecamjö’da töweichöcoomo que?

⁴ Ng’jn, yääje’da yeichaame. Wanaadi chäänöngeedä na yeichöje, tameedä soto chäänönge’da yeichaameiñe. Edääje Wanaadi a’deddu imennaajä nä’döa: Adha’deddu jäcäinchädä chäänönge mätä’täja’de; chäänönge määneja’de äwäätämmencajoodawä; quee imennaajä nä’döa.

⁵ Edääje anejjacoomo soto töwä’döe weneeneto: “Cönwanno conemjönö cönnödööcomo que aashicha Wanaadi weichö queenejaato;” quee. Yääje yeijäcä ¿chäänönge’da ca Wanaadi ñai yää conemjönö jo’tädööje soto tömmamincha yeijäcä?

⁶ Ng’jn, chäänönge’da’da yeichaame. Chäänönge’da Wanaadi weiya’jäcä soto emmencaneichomooje eijai’cha na yaawä.

⁷ Edääje tö’tajä’a’jäcä naadö naane’: Öwö töwä’dune weichö que chäänönge Wanaadi weichö weneeja. Yääje yeijäcä ¿ane’que’nei Wanaadi conemjönööje ye’taanä chäänönge töwö yeichö eneejotoojojeene yääje weichö yeichaame? quee tö’tajä’a’jäcä,

⁸ chäänönge’da mädääje chö’tajä’jai wa. Chäänönge yääje tö’tajä’nä ei’jo mmaane edääje ä’döjai caato yaawä: Jooje’cä conemjönö cöödötäiye, jooje’cä aashichaato äänejoiye; quee ä’döjai caato, chäänönge’da mmädä. Mädääje soto tönoowanoomaiñe ñaa ecammatä weneeneto, jönaawä mmädä. Mädääja’como wä’dödö chäänönge nätä’maminchajaato’de.

Tameedä conemjönö ’je cöweichöcoomo

⁹ ¿Aaquene yaawä? ¿Anejjacoomo e’jodha’como ca ñaa judhíocoomo, yääje yeiya’jäcä? Ñg’jn, cho’jodheiñe’da. Cönwanno cowaanäcäiñe na tameedä conemjönö wwä oto’jodheinchajoojai cöweichöcoomo, judhíocoomo mmaja, judhíojöncomo mmaja.

¹⁰ Edääje Wanaadi a’deddu imennaajä nä’döa: Aashichaato ’je’da na soto, tooni’chä a’que.

¹¹ Etaanei ’je’da na; Wanaadi ujiiñei ’je’da mmaja.

¹² Tameedä soto tösaadijange naato, töweecone’ma mmaja. Aashichaato tödöönei ’je’da na, tooni’chä a’que.

¹³ Chäänöcoomo na äwa a’duccaajä nönge; töwa’deuwödööcomo quee töwäätäncu’tä weneeneto. Äcääyu ’madaawai nönge dha’dedducoomo weneene, se’ne;

¹⁴ conemjönö jäcä mma ya’deuwödööcomo weneene, wä’cu’nä’täjä’nä jäcä mmaja.

¹⁵ Tönwanno täcoije naato soto ema.

¹⁶ Töjimmotoncomo nödöödö choone’madö yaacö’comje mmaja weneene dea.

¹⁷ Täncanoode’da weiñä dhowaanäcäiñe’da na;

¹⁸ Wanaadi onnontä’da naato dea; quee nä’döa imennaajä.

¹⁹ Cönwanno cowaanäcäiñe na tameedä waanontänä imennaajä wä’dödö naadö waanontänä imennaajä woija’como wwonooje yeichö, ya’deuto’como ’je’da yeichö wetä. Yääje yeijäcä tameedä edä nono de’woncomo Wanaadi wwä tämmencaamoje naato.

²⁰ Jenaado’jä waanontänä tödöödö que Wanaadi jadoonoje ä’döjai’cha caato. Yää waanontänä conemjöncomooje cöweichöcoomo ecammaneije mma na.

Ecamjödö que wääwanaacanä yeichö

²¹ Eduuwa cowaanäcäiñe na yää Wanaadi jadoonoje wä’dönä ecamjödö que mma yeichö, waanontänä tödöödö que’da yeichö mmaja. Mädääje dea waanontänä imennaajä jäcä cönäätäcammai jenaadä; Wanaadi wa’deuwödö ecammannamo’jödö mädääje cömmennoicho dea.

²² Jesuuquidiito ecamjödö jäcäinchädä Wanaadi töjaadonooje soto nödööaato, tameedä ecaanö’nnamo. Anejjeja anejja soto weichojo ’je’da na.

²³ Tameedä soto conemjönö cönnöicho; aashicha Wanaadi weichö nönge töweicho’como ejoodöjai’cha naato.

²⁴ Yääje yeichaame Wanaadi töjaadonooje soto nödööaato ejeemajancädä’da, aashicha töweichö woije mmädääne, Jesuuquidiito wwä ewaanaca’jocoomo weijäcä.

²⁵ Wanaadi Quidiito cönnöi saaquidiijiisiyooje. Dhaquiiyö cönnöi conemjönö choccatoojoje, yää ecamjödö que tojoodöeemöje naadö. Yää Wanaadi cönnöi chäänönge töweichö ene’ju’to’me. Jenaadä mmaane tumjunne töweichö woije Wanaadi tönshinchä cönä’jaacä soto cöne’nadiiyöcoomo.

²⁶ Eduuwaane töwö Wanaadi neneeja chäänönge töweichö, Jesuuquidiito ecaanö’nei töjaadonooje tönnöe töweichö mmaja.

²⁷ Yääje yeijäcä o’jodhe chö’tajä’jai’cha caato eduuwa. ¿Ane’que’nei, quee ’ja? Waanontänä tödöödö que’da wääwanaacanä yeijäcä, ecamjödö que mmaane.

²⁸ Mädääje na; ecamjödö que Wanaadi jadoonoje cä’döjaato, jenaado’jä waanontänä woije tödöödö que’daane.

²⁹ Judhíocoomo Wanaadiyö mmajöönö ñäädä Wanaadi, judhíojöncomo Wanaadiyö mmajaane,

³⁰ tooni mmaane Wanaadi weiyajä. Ecamjödö jäcäinchädä töwö Wanaadi töjaadonooje nödööaato ñanno siicunsidaadoja’como, yääjemjöncomo mmaja.

³¹ ¿Yääje yeiya’jäcä ca ecamjödö jäcäinchädä jenaado’jä waanontänä quiichiiñeme’cato? Ng’jn, chiiñemeecödööjönö yeichaame, chäänönge mma tödöödö ecammadö mädä.