DOMAANO 2 - Wanaadi A'deddu

Chäänönge Wanaadi tönemmenca yeichö

¹ Yääje yeijäcä awa’deutojo ’je’da na amäädä töweichacoono a’de’tänei. Aweichacoono a’de’tädö que amäädä mmaja mata’de’ta dea, yää dea tönnöeene aweiyajä. Amäädä äwwä a’de’tätaame mödööa dea töwö iiñödö nönge.

² Cönwanno cowaanäcäiñe na chäänönge Wanaadi tömmaminchaiñe yeichö ñanno yää tödönnamo.

³ ¿Wanaadi amaamincha’da ca nichö’taanä amäädä yää dea tödööancädä töweichacoono a’de’tänei?

⁴ ¿Aashicha Wanaadi weichö ca michiiñeme’canä’, ocoone’nadiiyö tönshinchä yeichö mmaja? ¿Mädä tönshinchä yeichö ätö’tajäätödö sha’duminchatoojoje yeichö äntö’tammecö’da ca manä?

⁵ Töwäätuujacoone’da aweijäcä dajaane aweichö änsa’dumincha’da ma; yääje yeijäcä äwäätä’maminchajootojo mejoodöja wätämmencajootojo anootoi’chadö jona tödööene. Yää anooto awä Wanaadi neneeja’de chäänönge tönemmenca töweichö.

⁶ Yaawä töwö soto nejeemaato’de iiñö’jocoomo nönge.

⁷ Töwö Wanaadi yeichöödäje weiñä nu’a’de ñanno töquinchancädäiñe’da aashichaato tödönnamo wwäiñe, ñanno aashichaato encano’tännamo, aashicha töweicho’como encano’tännamo mmaja, töwaatamemjönö encano’tännamo mmaja.

⁸ Conemjönö jäcä cone’da töweijäcä töwö Wanaadi nimaaminchaato’de ñanno töwoijemjöncomo, chäänöngato wätunnä woije eijöncomo, ñanno chäänöngemjönö woija’como.

⁹ Ñanno conemjönö dönnamo nätä’maminchajaato’de, yeetunu neneeaato’dede, judhío awa’de, judhíojöönö mmaja.

¹⁰ Tameedä chäänöngato tödönnamo mmaane aashicha töweichö’como neneeaato’de, aashichaato mmaja, täncanoode’da töweicho’como mmaja, judhío awa’de, judhíojöönö mmaja.

¹¹ Töwö Wanaadi ooto’jodhe soto ämjumma’da naato.

¹² Ñanno jenaado’jä waanontänä towaanäcäiñe’da yeiyancädä conemjönö tödönnamo nännanö’aato’de yää waanontänä ’je’da yeichaame chäwwäiñe. Ñanno jenaado’jä waanontänä towaanäcäiñe yeiyancädä conemjönö tödönnamo mmaja nätämmencajaato’dede yää waanontänä imennaajä wä’dödö nönge.

¹³ Waanontänä etannamoojönööne Wanaadi jadoonoje nä’döaato, ñannoone, waanontänä tödönnamoone.

¹⁴ Ñanno judhíojöncomo, waanontänä ’jemjöncomo, aneedawä tönnöe weneeneto yää waanontänä imennaajä aca naadö. Tönwanno towoinchadäiñe töweichaameiñe waanontänä necammadö woije nödööaato, yää a’que yeichaame chäwwäiñe.

¹⁵ Mädääje tönwanno neneejaato yää waanontänä tötö’tajäätödööcomo jäcä yeichö. Yaawä wätämmencajootojo anootoi’chädö awä chö’tajäätödööcomo dea iiñödööcomo nichö’tamme’ja’de cone’da yeichö, aashicha yeichö jeiñe mma.

¹⁶ Yää anooto awä töwö Wanaadi Jesuuquidiito wwä nemmencaja’de tameedä tacaademjönö soto nödöödöcoomo. Mädääje na; mädääje dea aashichaato wätunnä töneecammajä’e wäänene.

Judhío wwoncomooje Moisé waanontä’jödö yeichö

¹⁷ Amäädä judhíojaato wätä’tädö; waanontänä Moisé nimennä’jödö mecaanö’a, Awaanadiiyö jäcäinchädä o’jodhe ätö’tajä’a dea.

¹⁸ Amäädä odhoowanääcä na Wanaadi waanontä’jödö. Waanontänä que owaanomaajäje aweijäcä tameedä aashichaato imencadö odhoowanääcä na.

¹⁹ Amäädä tänuuquemjöncomo adääneichömooje äwääcamjödö, tööjano’tacancomo iweijoneichomooje mmaja.

²⁰ Towaanojo’nemjöncomo owaanomaadö odhoowanääcä mmaja äwääcamjödö na dea, aneene’ju’jöncomo owaanomaadö mmaja, towaanojo’ne aweijäcä, tameedä weiñä odhoowanääcä yeijäcä mmaja, waanontänä jäcä owoowanoomaatö’da.

²¹ Yääje yeijäcä anejja tönoowanooma aweichaame ¿aaquene amäädä dea oowanooma’da manä? Tämeene’da weiñä jäcä töneecammajä’e aweichaame ¿aaquene’ tämeene mmaja määnene dea amäädä?

²² “Amaasuduichai’che,” queeto wä’dödö aweichaame ¿aaquene’ masuuduije mmaja määnene dea amäädä? Amäädä chu’taajä awaacö’je’da na; yääje yeichaame yeicho’como tacaano töneememme’que määnene.

²³ Jenaadö’jä waanontänä imennaajä äwwä yeijäcä o’jodhe tötö’tajä’e määnene; yääje yeichaame yää waanontänä woije ännö’da aweijäcä cone’da soto töna’deudeme’jo määnene Wanaadi jäcä.

²⁴ Mädääje dea Wanaadi a’deddu imennaajä jäcä nä’döa: “Änwanno owoija’comooje Wanaadi jäcä cone’da töwa’deuwe weneeneto judhíojöncomo;” quee imennaajä nä’döa.

²⁵ Yää siicunsidaadoje weiñä aashicha töweiye nai Moisé nimennä’jödö waanontänä tödö’jödööde. Yaawääne’ yää waanontänä ännö’da aweiya’jäcä siicunsidaadojemjönö nönge dea ma yaawä.

²⁶ Yääje mmaja ñäädä siicunsidaadojemjönö; waanontänä chäwwä tödööa’jäcä, siicunsidaadojaato wa’cä yaawä töwö, siicunsidaadoje’da yeichaame.

²⁷ Ñäädä tujuunu jäcä siicunsidaadoje’da töweichaame waanontänä tödöönei adheene’ju’ja waanontänä ännö’da aweichö, yää waanontänä imennaajä äwwä yeichaame, ajuunu jäcä siicunsidaadoje aweichaame mmaja.

²⁸ Ñäädäjöönööne judhío neeneje na, täneeto jäcäinchädooto mma judhíojaato wätä’tädööjönööne; siicunsidaadoje weiñä neenejöönö mmaja yää täneeto, tujuunu jäcä tödöödö naichö.

²⁹ Ñäädääne judhío neeneje na, tötö’tajäätödö aiño wäänejoodööne; tötö’tajäätödö jäcoono mmaja yää siicunsidaadoje weiñä chäänöngato. Yääje weiñä töweiye nai waanontänä imennaajä woije weiñä que’da, Epíiditu Santo ne’se’tädö woijeene. Ñäädä yääjato jäcä Wanaadi aashicha na’deuwa, sotoojönööne.