DOMAANO 16 - Wanaadi A'deddu

Quedeiyente wwadäädäiñe ta’deujocoomo adoojo’jödö

¹ Määdhä cöjaadui’choncomo Jeewe wecamma äwwäiñe; quedeiyente Senquedea ñancomo i’wa’täneichomo töwö.

² Cajiichaana Jesuuquidiito jäcäinchädä aashicha tödöötäcä’de, quedeiyente weichö nönge deaane. I’wa’tätääcä’de tameedä iiñödö jäcä. Quedeiyente i’wa’täneichomo töwö; öwö mmaja ö’wa’tätä weneene dea.

³ Ya’deujödö wadääja Pidiisiida wwadäädä, Aquiida wwadäädä mmaja, ñanno Quidiito tadaawaajui jäcä weetadaawa’cajoodö jimmä.

⁴ Wäämadö jonno yeewanaacadö wetä tönwanno äämadö cöneiya’to; yääje yeijäcä öwö mmajöönö ta’cwaiñe chääjäcäiñe wa, tameedä quedeiyente judhíojöncomo mmajaane.

⁵ Ya’deujödö wadääja dea Pidiisiida, Aquiida e’sacaiñe töweecanta’ñä weneenetoodö wwadäädäiñe mmaja, umjummadö Eepeneeto wwadäädä mmaja, ñäädä Acaaya ñano awa’deene Quidiito ecaanö’nei’jödö.

⁶ Madía wwadäädä mmaja ya’deujödö wadääja dea, ñäädä äjääcäinchädäiñe jooje töweetadaawa’cajo weneenedö.

⁷ Ya’deujödö ecammatääcä’de Antodoonico wwä, Juuniya wwä mmaja; jaatacoinchomo ñanno, jedeesoje weichö jaadoncomo’jödö. Täneejuca’como tönwanno anonta’como wwäiñe. Tönwanno yoowajoodä Quidiito cöneecamjöicho.

⁸ Amjidiiya wwä mmaja ya’deujödö ecammatääcä’dede, ñäädä Cajiichaana jäcäinchädä weichacoono umjummadö.

⁹ Ya’deujödö wadääja dea Uuduwaano wwadäädä, Quidiito tadaawaajui jäcä ñaa ’wa’tänei; Etaaqui wwadäädä mmaja, ñäädä umjummadö;

¹⁰ Apeede wwadäädä mmaja, ñäädä chäänönge Quidiito ecaanö’nei tacaadato; Aaditóowudu wä’jimmä’tädö wwadäädäiñe mmaja.

¹¹ Ñäädä jaatacoiño Edoodiyón wwä mmaja ya’deujödö ecammatääcä’dede, Naadisiiso wä’jimmä’tädö wwäiñe mmaja, ñanno quedeiyentecoomo;

¹² Tidiijeena wwä mmaja, Tidiijoosa wwä mmaja, ñanno Cajiichaana tadaawaajui jäconcomo wetaadawa’cajoodö; Jeesida wwä mmaja, ñäädä Cajiichaana tadaawaajui jäcä töweetadaawa’cajo weneenedö.

¹³ Duuju wwadäädä mmaja ya’deujödö wadääja dea, ñäädä quedeiyente täneejucaato; yeenö wwadäädä mmaja, ñäädä maama nönge mmaja öwwä naadö;

¹⁴ Asinquidiito wwadäädä mmaja, Jedeeconte mmaja, Eedama mmaja, Paatodoowa mmaja, Eedeme mmaja, tameedä quedeiyentecoomo chääjadäiñe naatoodö wwadäädäiñe mmaja.

¹⁵ Ya’deujödö ecammatääcä’dede Jidoodoco wwä, Juudiya wwä mmaja, Nedeeo wwä mmaja, ijaaduichö wwä mmaja, Odimja wwä mmaja.

¹⁶ Ata’dejjatääcä töwä’jumma aweichöcoomo äwäänejancädäiñe. Tameedä quedeiyentecoomo, Quidiito ecaanö’nnamo, ta’deujocoomo nadääjaato äwwadäädäiñe.

¹⁷ Edääje wä’dö’se wa äwwäiñe jimmä: Odhoowadäädäiñe tödöötäcä ñanno tönwannoje dea quedeiyente chu’de’tojonnamo, ñanno odhoowanooma’jocoomo juntaca asaadijannä’ca’sa’como. Ä’sancwatääcä ñanno jonnoiñe.

¹⁸ Ñanno yääja’como Cädhaajotoncomo Jesuuquidiito anoonöje’da naato; tumjummadööcomo woije mma weneeneto. Tönwanno towoinchado’como tönencu’täiñe weneeneto aashichaato wa’coto ta’dedducoomo que, wäämu’nä’nä que mmaja.

¹⁹ Chäänönge tönnöe aweichöcoomo tacaade na tameedä yeichö wa’cä; yääje yeijäcä ta’cwaiñe wa äjääcäiñe. Töweesomaajä’e aweichonse wa aashichaato tödöödö jäcä; conemjönö tödöödö jäcä mmaane odhoowoinchadäiñe aweichonse wa.

²⁰ Wanaadi ñäädä täncanoode’da weiñä edhaajä. Eduuwaiche mma töwö Caajuushawa odho’cäiñe nemajja’de. Cädhaajotoncomo Jesuuquidiito nutuudu aashichaato äwwäiñe yei’she wa.

²¹ Tiimoteo, ñäädä weetadaawa’cajoodö weichacoono, ta’deujödö nadääja äwwadäädäiñe, Duusiyo mmaja, Jasón mmaja, Sosíipateede mmaja, ñanno öwö jaatacoinchomo.

²² Öwö Teesiyo, Paudo necammadö woije edä jajeeda wimennäi; öwö ya’deujödö wadääja dea äwwadäädäiñe, Cajiichaana jäcäinchädä.

²³ Caayo mmaja ta’deujödö nadääja dea, ñäädä immai chaca öwö Paudo wä’döaajä waadö; tameedä quedeiyentecoomo wä’döto’comooje mmaja na dea edä Caayo mmai. Edaasato mmaja ta’deujödö nadääja dea äwwadäädäiñe, ñäädä jata jödaatai edhaajä; cöjimmotoncomo Cwaadoto mmaja.

²⁴ Cädhaajotoncomo Jesuuquidiito nutuudu aashichaato äwwäiñe na. Amén.

Yä’ca’jödö

²⁵ Aashicha wa’deutojooje Wanaadi ña; töwö äjäädu’täjaiñe na aashichaato wätunnä töneecammajä’e wääneneedö que, Jesuuquidiito ecammajäätödö que mmaja, yää edä nono tödö’jödö jonnoto’jödöödä owaanäcä’da cönä’ja’dö.

²⁶ Eduuwaane ñäädä Wanaadi yeichöödoto yää wätunnä cöneecadeeme’joi töwa’deuwödö ecammajä’nnamo nimenno’jocoomo ai. Yää cöneecadeeme’joi tameedä soto weichöcoomo wa’cä, tameedä ecamjöiyeto, Wanaadi woije eiyetoode yaawä.

²⁷ Ñäädä Wanaadi yäätonno ’jemjönö, töseedujä’nato, yeichöödäje aashicha wa’deutojooje na Jesuuquidiito jäcäinchädä. Amén.