DOMAANO 15 - Wanaadi A'deddu

Cöjimmotoncomo weichö encano’täjai cöweichöcoomo

¹ Cönwanno ecamjödö jäcä jäduuja’como i’wa’täjai caato ñanno jäduujemjöncomo iiñödööcomo jäcä; cönwanno cöweichöcoomo mma encano’täjai’cha caato.

² Cöwaadäiñe cöjimmotoncomo weichö encano’täjai caato, aashicha yeichöcoomo wetä, yaatö’näjöödöcoomo wetä mmaja töneecamjödööcomo jäcä.

³ Quidiitode töweichö mma anencano’tä’da cöneiyacä. Wanaadi a’deddu imennaajä wä’dödö naadöje töwö cönä’jaacä, yää edääje yä’dödö naichö: “Ñanno äjääcä cone’da töwa’deuwe weneenetoodö öwö jääcä mmaja cone’da na’deuwaato dea;” queeto imennaajä nönge Quidiito cönä’jaacä.

⁴ Yää jenaadä Wanaadi a’deddu imennaajä jäcä cönä’mennäichö tömennä na cöwoowanoomato’comooje, yäätäädä cöweichöcoomo wetä cönwomoocödööcomo jäcä, Wanaadi a’deddu ni’wa’tädö que.

⁵ Ñäädä Wanaadi yäätäädä aweicho’como nu’a, äwä’wa’dätö’como mmaja. Töwö ä’wa’taato aata’deucwe aweichöcoomo wetä, Jesuuquidiito jadoncomo töweiye naichodööje deaane.

⁶ Yaawä tameedä änwanno tujuumä aashicha a’deujai maato Cädhaajotoncomo Jesuuquidiito Wanaadiyö jäcä, ñäädä Yuumö.

Judhíojöncomo wwä aashichaato wätunnä ecammajäätö’jödö

⁷ Yääje yeijäcä aashicha Wanaadi weichö eneejodö wetä aashicha ajimmotoncomo tödöötäcä, Quidiito aashicha cödöötäneedöje mmaja.

⁸ Edääje wä’döa äwwäiñe: Quidiito cöneejä judhío wwäiñe tödööneije, chäänönge tödöödö wetä yää ñaa adaichö wwäiñe Wanaadi necamma’jödö, eneejodö wetä mmaja chäänönge Wanaadi töneecamma’jödö tönnöe yeichö.

⁹ Töwö Quidiito cöneejä judhíojöncomo mmaja aashicha Wanaadi jäcä a’deuwöiyeto wentumje äneetä yeichö jäcä. Edääje Wanaadi a’deddu imennaajä nä’döa: Yääje yeijäcä aashicha äjääcä ya’deuwa’de soto antawäiñe; ojoi yeecanta’ña’de, awa’demeecödööje; quee imennaajä nädöa.

¹⁰ Edääje mmaja imennaajä nä’döa dea: Änwanno judhíojöncomo, ta’cwaiñe eichäcä Wanaadi sotoi jadäiñe; quee.

¹¹ Edääje mmaja imennaajä na dea: Cajiichaana jäcä aashicha adha’deutäcä, tameedä änwanno judhíojöncomo; tameedä soto na’deuwö’ña’to o’jodhe Cajiichaana weichö jäcä; quee imennaajä nä’döa.

¹² Isaía mmaja edääje cömmennäi chea: Töweiye na’de Isaí atöödö, judhíojöncomo edhaajotoncomooje töweiyemö; ñanno judhíojöncomo necaanö’aato’de töwö; quee Isaía cömmennäi.

¹³ Ñäädä Wanaadi, cönwomoocödööcomo u’neije na; töwö adha’cwaniiyöcoomo nu’a, täncanoode’da aweicho’como mmaja, täcamjödö jäcäinchädä. Yaawä Epíiditu Santo woije wo’womo’nä ’je eijai maato.

¹⁴ Jimmä, öwö yoowanääcä na aashichaato tönnöe aweichöcoomo, töseedujä’ne aweichöcoomo mmaja, änwannoje dea ä’wätuujajai aweichöcoomo mmaja.

¹⁵ Yääje yeichaame tösaade’da mädä jäcä wimennäi äwwadäädäiñe, chö’taqueejö’da aweichöcoomo wetä. Mädääje mänwätuujaato Wanaadi nanontädö woije, yää aashicha töweichö woije taadawaajuije inchudu naadö.

¹⁶ Töwö Wanaadi yöödöne Quidiito anoonöje, judhíojöncomo wwäiñe ecammajäätödö wetä Wanaadi wätunnäi, yää aashichaato wätunnä. Yää töneecammajä’e wäänene Wanaadi wwä judhíojöncomo utuudu wetä yaawä öwwä, saaquidiijiisiyo utuudu töweiye naichöje, Wanaadi wacö’je, Epíiditu Santo nishoomadööje mmaja.

¹⁷ Quedeiyenteje weijäcä ta’cwaiñe wa Wanaadi tadaawaajui wödööaadö jäcä.

¹⁸ Anejja jäcä a’deujai’cha wa, yää jäcä mmaane, Quidiito ni’wa’tädö que önnö’jödö jäcä mma, yää judhíojöncomo Wanaadi woije naatoodö. Yää wödööne ecammajäätödö que, tödööjätöödö que mmaja,

¹⁹ ene’ju’tojo tödöödö que mmaja, täneemö tödöödö que mmaja; Epíiditu Santo jäduudu que yää wödööne. Mädääje wä’cane Quidiito wätunnäi ecammajäätödö, yää aashichaato wätunnä. Yää wecammajä’ne Jeduusadén ña, tameedä yeichö wa’cä mmaja, Idíidico ña tödööene.

²⁰ Öwö tönencano’tä wä’jaaquene aashichaato wätunnä ecammajäätödö Quidiito dhowaanojöncomo wwäiñeene, anejja najäntä’jödö de’wä mma taadawaajui wännö’no, quee öucwadööje.

²¹ Edääje Wanaadi a’deddu imennaajä nä’döa: Ñanno chääcadö aneetajöncomo’jödö neneeaato’de; aneetajöncomo’jödö dhowaanäcäiñe nä’döa’de; quee imennaajä nä’döa.

Dooma ña töötä’se Paudo wei’jödö

²² Mädä taadawaajui wecammaadö yeemu’dätä weneene, adöiñaiñe yaadojo’da.

²³ Eduuwaane taadawaajui ’je’da na eetä. Wedu nä’döi adöiñaiñe öötä’se weichö;

²⁴ yääje yeijäcä Epaña ña öötädaawä ädö’täcäiñe wöta’de. Yaawä numa’cäiche ajaadäiñe wä’döa’jäcä änwanno ö’wa’täjai maato Epaña ña öötädö jäcä.

²⁵ Eduuwa mmaane Jeduusadén ña wöta, iiñancomo quedeiyentecoomo i’wa’toto’como imö’que.

²⁶ Ñanno Maasedooniya ñancomo, Acaaya ñancomo mmaja, töjöödataichomo cöni’jummaicho Jeduusadén ñancomo quedeiyente wäntunamjödööcomo i’wa’toto’comooje.

²⁷ Aashicha chäwwäiñe cöntö’taacä yääje töwwäiñe tödöödö. Chäänönge mädääje nichö’tajä’aato; ejeeque’näjöödöcoomo nönge mädä na. Ñanno judhío quedeiyentecoomo judhíojöncomo wwä cuntuicho Wanaadi a’deddu; yääje yeijäcä judhíojöncomo yää inwacaamajai ñaato eduuwa edä nono de’wono que.

²⁸ Yääje yeijäcä edä jödaata imö’que yöiñaiñe wöta’dedö wä’ca’jäcä, Epaña ña wöta’de yaawä ädö’täcäiñe.

²⁹ Yoowanääcä na adöiñaiñe ööta’jäcä Quidiito nutuudu aashichaato dha’me täjai weichö.

³⁰ We’wa’tojo’se wa äwwäiñe, jimmä, Cädhaajotoncomo Jesuuquidiito jäcäinchädä, wä’jummanä Epíiditu Santo nutuudu jäcäinchädä mmaja; mädä wewäänä’tänä wödööaadö jäcä cö’wa’tätääcä Wanaadi wwä öwö jääcä awa’deuwödööcomo que.

³¹ Wanaadi wwä adha’deutäcä Judheea ñancomo quedeiyentejöncomo wwä yeewontäiye. Chäwwä e’ca’täcä’dede quedeiyentecoomo Jeduusadén ñancomo aashicha tödöiyeto edä i’wa’toto’como yöiñaiñe wadääaadö.

³² Yaawä, Wanaadi woije yeiya’jäcä, ta’cwaiñe adöiñaiñe ä’döjai wa; wäädeetaiye yaawä ajaadaiñe.

³³ Wanaadi, ñäädä täncanoode’da weichojo u’nei, ajaadäiñe yei’she wa. Amén.