DOMAANO 12 - Wanaadi A'deddu

Wanaadi woije weiñä

¹ Yääje yeijäcä jimmä, edääje äwäätuuja’seiñe wa, Wanaadi wwä wentumje adheene’jocoomo weijäcä: Chäwwä ä’tutääcä, saaquidiijiisiyo nudootoje, tösooma, Wanaadi wacö’je mmaja. Mädääje chäwwä tödööjai maato.

² Edä nono de’wono woije’da eichäcä; tösa’duminchaane ätö’tajäätödööcomo sha’duminchatääcä, aweichöcoomo mmaja esa’duminchaiyede yaawä. Yaawä Wanaadi woijato odhoowanääcäiñe ä’döjai ña, töwö yaacötö mmaja, yää aashichaato, chäänöngato mmaja.

³ Aashichaato Wanaadi nutuudu öwwä naadö woije edääje wä’döa äwwäiñe: Anejja mma to’jodheene chö’tajäätöi’che. Acu’shämjeene ätö’tajä’täcä, ecamjödö Wanaadi nutuudu äwwäiñe naadö ’cäwa’cä mma.

⁴ Cönwanno cäjööcomo na wannato ejoodöjaajä. Yää cäjööcomo jäcoono yää dea tödööneije’da na.

⁵ Mädääje mmaja cönwanno quedeiyentecoomo; wanna cöweichaameiñe tooni chääjö caato, Quidiito jadä cöweichomjäcä. Tojoodöjoojä’e caato yää dea ejööje cöweichöcoomo wetä.

⁶ Cöwwäiñe Wanaadi cuntui cöwaadäiñe cöweicho’como, utu’se töweichö woije. Chäänönge tödööjai caato yää cöweicho’como u’ajä. Ñäädä Wanaadi nutuudu woije ecammajä’nei, töneecamjödö ’cäwa’cä ecammajä’jai ña;

⁷ ñäädä anejja ’wa’tänei, chäänönge yää tödööjai ña. Ñäädä quedeiyente owaanomaaneichomo, owaanomaadö jäcä oowoinchajai ña;

⁸ ñäädä quedeiyente yäätuujaneichomo ’quene, yää jäcä daja oowoinchajai ña dea. Ñäädä täjemjönö u’jä’nei, ewontancädä’da u’jä’jai ña. Ñäädä quedeiyente e’se’täneichomo, towaadäädä töweiyancädä e’se’täjai ñaato. Ñäädä wentumja’como i’wa’täneichomo, ta’cwaiñe töweiyancädä yää tödööjai ña.

Quedeiyente weichojo

⁹ Wätäncu’tänä que’da ä’jummatääcä. Conemjönö chiiñu’tätääcä; aashichaatoone ijummatääcä.

¹⁰ Ä’jummatääcä töweichacoono ijummadö töweiye naichöje deaane, äwä’jummadö e’jodhe’cä aweichacoono ijummancädä, owo’nontancädäiñe mmaja.

¹¹ Ä’jädu’tätääcä; töquiiñe’da eichäcä; tödö’se aweichöcoomo que Cajiichaana Jesuuquidiito wwä tödöötäcä.

¹² Ta’cwaiñe eichäcä onwomoocödööcomo jäcä. Aashicha shinchätääcä äwäntunamjödööcomo. Yeichöje Wanaadi wwä adha’deutäcä.

¹³ Quedeiyentecoomo i’wa’tätääcä chäwwäiñe a’que yeichawä. Aashicha tödöötäcä adöiñancomo wä’döa’como.

¹⁴ Aashicha adha’deutäcä amaaminchannamo jäcä; aashicha Wanaadi wwä chääjäcäiñe adha’deutäcä, cone’da’daane.

¹⁵ Ta’cwaiñe eichäcä ta’cwaiña’como jadä; wentumja’como jadä mmaane töwaamo daja aamotääcäde.

¹⁶ Ä’tu’de’tä’daane eichäcä änwannoje dea. O’jodhe awei’sheiñe’da eichäcääde; ema’jödööja’como jadä mmaja ääweichacoonoje eichäcä. Äwwäädäiñe mma towaanojo’ne määcanö’täi.

¹⁷ Conemjönö que mmaja conemjönö maneemetaacamaatäi’che. Aashichaato tödöödö encano’tätääcä tameedä soto neneedöcoomoje.

¹⁸ Täncanoode’da eichäcä tameedä soto jäcäiñe, eijai aweichöcoomo woije.

¹⁹ Jimmä umjummadö, änwanno dea mma moojo’tätäi’che, Wanaadiiñe ojo’toto’ñojo. Edääje Wanaadi a’deddu imennaajä nä’döa: “Öwö öwwono yää woojo’tänä; öwö wejeema’de; quee Cajiichaana nä’döa;” quee imennaajä wä’dödö na.

²⁰ Edääje mmaja Wanaadi a’deddu imennaajä nä’döa dea: “Ämiije ätu’dedö weiya’jäcä, ewanshinchäcä; emjätö’se yeiya’jäcä, yoocödö änu’cä. Mädääje äwwä tödööa’jäcä ijöichojoojai ma yaawä; cone’da töwö ä’döjoojai ña yaawä;” quee imennaajä wä’dödö na.

²¹ Conemjönö wwä mma moto’jodheinchajoi; amäädääne conemjönö e’jodheinchacä aashichaato que.