DOMAANO 1 - Wanaadi A'deddu

Yaajäntä’jödö

¹ Öwö, Paudo, Jesuuquidiito anoonö, anontaajäje Wanaadi ne’tädö; Wanaadi chea yaanontäne ta’deddu ecammajä’e, yää aashichaato wätunnä.

² Jenaadä yää wätunnä Wanaadi cöneecammajoi töwa’deuwödö ecammannamo wwäiñe, dha’deddu imennaajä jäcä naadö.

³ Yää wätunnä na Cädhaajotoncomo Jesuuquidiito jäcä, ñäädä Wanaadi nnedö. Töwö Jesuuquidiito cönä’jaacä Dawí atöödöje.

⁴ Töwäämaajo jonno Jesuuquidiito waadoncadö que Epíiditu Santo cöneecadeeme’joi Wanaadi nnedö jäduujatooje yeichö.

⁵ Jesuuquidiito jäcäinchädä Wanaadi ñaa anontäne aashicha töweichö woije. Töwö ñaa anontäne Jesuuquidiito joi, tameedä soto wwäiñe ta’deddu ecammajä’e, ecamjödö wetä yaawä chäwwäiñe, Wanaadi woije yeichöcoomo wetä mmaja.

⁶ Ñanno mmaja änwanno dea chäwwäiñe täcammajä’aamo, Jesuuquidiito sotoije Wanaadi ne’tädö.

⁷ Edä wimenna äwwadäädäiñe, tameedä änwanno Dooma ñancomo, Wanaadi nijummadö, tösootoije Wanaadi ne’tädö. Aashichaato, täncanoode’da aweicho’como mmaja äwwäiñe yei’she wa, Cumöötoncomo Wanaadi nutuudu, Cajiichaana Jesuuquidiito nutuudu mmaja.

Dooma ña töötä’se Paudo necamma’jödö

⁸ Edääje wä’dö’se wa awa’de: Jesuuquidiito joi aashicha töwa’deuwe wäänene Waanadiiyö wwä äjääcäinchädäiñe, tameedä yeichö wa’cä tacaade aweijäcäiñe Wanaadi töneecanö’e aweichöcoomo.

⁹ Tödö’se weichö que Wanaadi wwä tönnöe wäänene, mädä Iiñedö jäcä aashichaato wätunnä töneecammajä’e wääneneedö. Töwö Wanaadi dhowaanäcä na weiñäje töwwä töwa’deuwe weichö.

¹⁰ Chäwwä töne’ca’e wäänene töwö yoije adöiñaiñe öötotoojo aneedawä.

¹¹ Adheene’seiñe wa jooje, quedeiyenteje aweichöcoomo jäcä ä’wa’tädööcomo wetä, äjäädu’täneichomooje mmaja.

¹² Yaawä äämetaacai quejäädu’taato’de yää dea cöneecamjödööcomo que.

¹³ Jimmä, edääje wä’dö’se wa äwwäiñe: Weiñäje adöiñaiñe öötä’se töweiye wä’jaaquennö’je, yaawääne’ eduuwa naadö jona tödööene täjai’cha töweiye wä’jaaquene. Adöiñaiñe öötä’se wäänene adhantawäiñe quedeiyenteje neewaacadö töweiye yei’she weijäcä, aneiñaja quedeiyenteje önnödö töweiye naadöje mmaja.

¹⁴ Öwwä tödööemö töweiye na sotooja’como jäcäiñe, sotoojemjöncomo jäcäiñe mmaja, towaanojo’na’como jäcäiñe, towoinchado’como jäcäiñe mmaja.

¹⁵ Yääje yeijäcä öwö tö’tajäätödö na aashichaato wätunnä ecammajäätö’se äwwäiñe, änwanno Dooma ña maatoodö.

Aashichaato wätunnä jäduuje yeichö

¹⁶ Aashichaato wätunnä jöichajo’da na yää Wanaadi töjääduduuje tönnöe yeijäcä tameedä ecaanö’nnamo ewaanacaato’comooje, judhío ewaanacaato’comooje awa’de, judhíojöncomo ewaanacaato’comooje mmaja.

¹⁷ Yää aashichaato wätunnä necamma ecamjödö jäcäinchädä mma Wanaadi töjaadonooje cödöötäiñe yeichö, anejja jäcäinchädä’da. Edääje Wanaadi a’deddu imennaajä jäcä nä’döa: “Ñäädä Wanaadi jadoono töneecamjödö jäcäinchädä töweichö neneea’de;” quee.

Cone’da soto weichöcoomo

¹⁸ Töwö Wanaadi caju ñanno neneeja chäänöngemjöncomo jäcä cone’da töweichö, ñanno conemjöncomo, töcoone’nadiiyöcoomo que chäänöngato wätunnä etaatannä’cannamo.

¹⁹ Ñanno owaanäcäiñe na Wanaadi jäcä owaanäcä eijai ñaadö, Wanaadi wwä eneejo’jödö weijäcä chäwwäiñe.

²⁰ Tameedä tödööajä naadö que Wanaadi weichö äänejöönö täne na. Edä nono tödö’jödö jonnoto’jödöödä ijäädudu töwaatamemjönö täne na, Wanaadije yeichö mmaja. Yääje yeijäcä ñanno chäänöngemjöncomo wa’deuto’como ’je’da na.

²¹ Tönwanno Wanaadi towaanäcäiñe yeichaame aashicha ännö’da naato, Wanaadi tödöödö töweiye naichöje. Töjääcäiñe iiñödö änwa’demeecö’da mmaja naato dea. Tösaadijange mma cönsadiijamöicho töwäädämmato jäcä; chö’tajäätödööcomo chäänöngemjönö cöntööjamöi yaawä.

²² Towaanojo’ne töwäätä’tä’jödö mma naato, tämje töweichaameiñe.

²³ Tönwanno Wanaadi weichö aashichaato töwaatamemjönö cöninwacaamaicho soto töwaatameemö cu’taajä töwwäiñe tödöödö wetä, tadiiñemö cu’taajä mmaja, äcääyu cu’taajä mmaja, odoocojaato cu’taajä mmaja.

²⁴ Yääje yeijäcä Wanaadi cöneetömaicho yaawä tujuunucoomo nijummadö woije conemjönö tödöödö wetä töwwäiñe, tönwannoje dea täjööcomo choone’madö wetä yaawä.

²⁵ Tönwanno weshi’jonä mma cöneecamjöicho, Wanaadi chäänöngato aneecamjö’da töweichöcoomo wetä. Wanaadi namoode’nädö mma tädhaajotoncomooje tönnöe weneeneto, tönwa’deme’que mmaja, Wanaadi jaiñoone änwa’demeecö’da töweichaameiñe, ñäädä yeichöödäje aashicha wa’deuto’me naadö. Amén.

²⁶ Yääje yeijäcä Wanaadi cöneetömaicho ñanno soto, conemjönö tumjummadööcomo tödöödö wetä chäwwäiñe. Wodiiñamo jadä’jödöödä cönääsecaicho dhanwa jadä töweicho’como jonno, tödöödö töweiye naichöje’da tödöödö wetä.

²⁷ Yääje mmaja dhanwaacomo, wodiiñamo jadä töweicho’como jonno cönääsecaicho dea, tönwannoje dea töwä’jummadööcomo wetä, tönwannoje dea conemjönö tödöödö wetä mmaja. Yääje yeijäcä chäänöngemjönö tönnödööcomo que necoone’maato.

²⁸ Tujumma’se’da yeichomjäcä töwö Wanaadi cöneetömaicho tötö’tajäätödööcomo wecoone’maajä woije mma yeichöcoomo wetä, tödööemjönö tödöödö wetä chäwwäiñe.

²⁹ Tönwanno chäänönge’da weneeneto, masuuduije mmaja, conemjönö tönnöe mmaja, anejja nödöödö töni’ñeimma mmaja. Tönwanno tö’neiñe weneeneto dea, soto töneema mmaja, töwäätäccujä’e mmaja, äncu’tätä mmaja, tumjunne’da mmaja, wätunnä dha’me mmaja.

³⁰ Tönwanno anejja jäcä cone’da töwa’deuwe weneeneto dea, Wanaadi ämjumma’da mmaja; töwäätuujacoone’da mmaja weneeneto dea, töweewacööma mmaja, o’jodhe tötö’tajä’e mmaja. Conemjönö töneejannä’e mmaja weneeneto dea, tumöötoncomo a’deddu aneeta’da, senöötoncomo a’deddu mmaja.

³¹ Aneene’jutu’da weneeneto dea, ta’deujocoomo nönge ännö’da mmaja, ta’cwaiñe’da mmaja, töjääcä conemjönö tödöödö anencwanno’jo’da mmaja, wentumje äneetä’da mmaja.

³² Tönwanno dhowaanäcäiñe na Wanaadi wä’dö’jödö mädä tödöödö jäcä; dhowaanäcäiñe na mädä tödönnamo töwäämaamöje yeichöcoomo. Yääje yeichaame tödöödöje dea weneeneto, yaacö’comje mmaja töjimmotoncomo wwä tödöödö eneea’jäcä.