CODOOSENSE 4 - Wanaadi A'deddu

¹ Änwanno ädhaamo, aashicha osootoichomo tödöötäcä, chäänöngeene, odhoowanääcäiñe yeijäcä änwanno mmaja tädhaajäque aweichöcoomo, ñäädä caju ña naadö.

² Yeichöje Wanaadi wwä adha’deutäcä, töwö ya’deme’cancädä, odhoowadäädäiñe aweiyancädäiñe mmaja.

³ Ñaa jäcä mmaja chäwwä adha’deutäcä, ñaa wwä ta’deddu ecammajo’tojo Cajiichaana äntuiye, Quidiito jäcä owaanojöönö’jödö ñaa wwä ecammajo’tojo äntuiyede, yää chääjäcäinchädä jedeesoje waadö.

⁴ Jääcä Wanaadi wwä adha’deutäcä tätaane neecammajäätödö eiye, tödöödö nöngeene wödöiye.

⁵ Odhoowadäädäiñe eichäcä quedeiyentejöncomo jadä aweichawäiñe. Anooto mma mämmacuudätäi’che.

⁶ Aashicha adha’dedducoomo tödöötäcä, tösejjejä’nato töweiye naichöje; oowanoomatääcä tameedä adheecamma’jonnamo eccujäätödööcomo jäcä.

Yä’ca’jödö

⁷ Ñäädä Tíiquico tameedä öwö weichö necammajä’a’de äwwäiñe. Yaanonö chäänöngato töwö, Cajiichaana tadaawaajui jäcä ö’wa’tänei mmaja.

⁸ Yääje yeijäcä adöiñaiñe wanonta, odhoowanääcäiñe yeichö wetä sadä weichö, äjäädu’täneichomooje mmaja.

⁹ Chääjadä nöta dea ajimmotoncomo Onéesimo. Quedeiyente chäänöngato töwö, tujunnato mmaja. Tönwanno necammajä’aato’de tameedä sadä weiñä jäcä.

¹⁰ Aaditaaducu, ñäädä yaacä jedeesoje naadö, ta’deujödö nadääja äwwadäädäiñe; Maadoco mmaja, ñäädä Waanawé weichacoono, ta’deujödö nadääja dea. Jenaadä manaanontätääne ñäädä Maadoco tödöötojo jäcä; adöiñaiñe iicha’jäcä aashicha tödöötäcä’de.

¹¹ Jesú mmaja ta’deujödö nadääja dea äwwadäädäiñe, ñäädä Juusutu täätö mmaja. Ñanno mma canno judhío quedeiyentecoomo jaadoncomo wetaadawa’cajoodö Wanaadi tadaawaajui jäcä. Tönwanno naato jäädu’tännamooje.

¹² Epaujada mmaja ta’deujödö nadääja dea, ñäädä Quidiito anoonö, ajimmotoncomo dea. Töwö weiñäje Wanaadi wwä töwa’deuwe weneene äjääcäiñe, ejääduqueejö’da aweichöcoomo wetä, chäänönge aweichöcoomo wetä mmaja, tameedä Wanaadi waanontädö tödööcoije aweichöcoomo wetä mmaja.

¹³ Öwö yoowanääcä na äjääcäiñe jooje Epaujada tötö’tajä’e yeichö, Daodiseea ñancomo jäcä mmaja, Yedaapodi ñancomo jäcä mmaja.

¹⁴ Cöjimmotoncomo tujunnato Duuca, ñäädä äjiichö’tänei, ta’deujödö nadääja äwwadäädäiñe, Deema mmaja.

¹⁵ Ya’deujödö ecammatääcä’de quedeiyentecoomo Daodiseea ñancomo wwä, Nimja wwä mmaja, tameedä quedeiyente immai chaca töweecanta’ñä weneenetoodö wwä mmaja.

¹⁶ Äwwäiñe edä ömmennädö a’de’ta’jäcä, Daodiseea ñancomo wwadäädäiñe adoojotääcä’de, wecanta’ñotoojo taca a’de’täiyeto’de. Änwanno mmaja a’de’tätääcä’de Daodiseea ñancomo wwadäädä naadojo’jödö.

¹⁷ Edääje caichäcä’de Aadiquiipo wwä: “Aashichaane tödööcä ataadawaajui, yää Cajiichaana nutuudu äwwä; tödööeene tödööcä;” quee caichäcä’de chäwwä.

¹⁸ Öwö Paudo dea edä yä’catoojo wimenna. Jedeesoje weichö jäcä mma ätö’taque’täi’che. Wanaadi nutuudu aashichaato äwwäiñe yei’she wa. Amén.