CODOOSENSE 3 - Wanaadi A'deddu

¹ Yääje yeijäcä Quidiito jadä töwaadonca aweichomjäcä caju ñanoone encano’tätääcä, yää Wanaadi ämu’demjönö dö’se Quidiito wataajimaajä döiñanoone.

² Caju ñano jäcääne ätö’tajä’täcä, edä nono de’wono jäcä’daane.

³ Änwanno töwääma maato, aweichöcoomo tösooma na Wanaadi wwä Quidiito jadä.

⁴ Ñäädä Quidiito cöweicho’comooje naadö we’a’jäcä, änwanno mmaja aashicha määnejaato’dede chääjadä.

Jenaado’jä weiñä, eduuwaato weiñä mmaja

⁵ Yääje yeijäcä tameedä edä nono de’wono ännödööcomo emaatäcä: yää masuuduichanä, nossaje tö’tajä’nä mmaja, conemjönö tödö’se weiñä mmaja, conemjönö ijummadö mmaja, ane’cä’cä ijummadö jäcä töwäätätäädä weiñä mmaja. Chu’taajä ijummadö wa’cä mmaja yää töwäätätäädä weiñä.

⁶ Tameedä mädoocomo jo’tädööje Wanaadi woijemjöncomo nätä’maminchajaato’de chäwwä.

⁷ Jenaadä mädä tönnöe ma’ja’quene änwanno, yää aca aweichöcoomo.

⁸ Eduuwaane tameedä mädä e’nomjajai maato, yää tääde’cwade weiña, wäätömaanä mmaja, wä’tushiimanä mmaja, cone’da wa’deunä mmaja, nossaje wa’deunä mmaja.

⁹ Änwannoje dea mätäncu’täjä’täi eduuwa, jenaadä awei’jocoomo to’nomja yeijäcä äwwäiñe, jenaadä tönnöe mä’ja’quennö mmaja.

¹⁰ Yää me’nomjatääne eduuwaato weiñä äwwäiñe tödöödö wetä. Yää eduuwaato weiñä, äwwäiñe naadö, wecoonecaanäje weneene, ñäädä Wanaadi tamoode’nänei’jödö nönge töwä’dödö wa’cä, ñäädä towaanäcä yä’dödö jonaane mmaja.

¹¹ Yääje weiñä töweiye nai quidiiyeecoje’da, judhíoje’da mmaja, siicunsidaadojaatoje’da mmaja, yääjemjönööje’da mmaja, ema’jödööje’da mmaja, shidiishanaaje’da mmaja, dhanoonöje’da mmaja, töwö dajaatoje’da mmaja. Quidiitoone na; töwö na tameedä cötaacaiñe.

¹² Wanaadi nijummadö änwanno, töwö ñei’jödö mmaja, töwwonooje aweichöcoomo wetä. Yääje yeijäcä aashicha weiñä äwwäiñe tödööjai maato, yää wentumje äneetä weiñä, soto jäcäiñe ta’cwaiñe weiñä mmaja, o’jodhe chö’tajäätö’da weiñä mmaja, soto jäcäiñe jäduuje’da weiñä mmaja, aashicha shinchädö mmaja.

¹³ Äwwäädäiñe ä’shinchätääcä; conemjönö tödö’jödö encwanno’jocoije eichäcä, ajimmotoncomo jäcä cone’da aweiya’comjäcä. Quidiito cöcoone’nadiiyöcoomo cönencwanno’joichöje mmaja encwanno’jojai maato ajimmotoncomo nödöödö.

¹⁴ Tameedä mädä de’wä mmaja jeene töwä’jummaane eichäcä. Yää wä’jummanä na tameedä chäänönge ejoodöjoojä’neije.

¹⁵ Wanaadi nutuudu täncanoode’da weiñä ätö’tajäätödööcomo e’se’täneije nei’ñojo. Mädääje töweiyaamoje Wanaadi adha’dejjatääne, tooni chääjöje mma aweichöcoomo wetä. Yeichöje Wanaadi wwä aashicha adha’deutäcä.

¹⁶ Ätö’tajäätödööcomo acaadä Quidiito a’deddu tödöötäcä; yäätä ejannä’catääcä. Ajimmotoncomo owaanomaatäcä, yäätuujatääcäde tameedä asejjedööcomo que. Adheewanööcomo jäcä aashicha Wanaadi jäcä ätö’tajä’ancädäiñe adheecanta’ñätääcä saadomo jäcä, anejja wecanta’ñotoojo jäcä mmaja, ätö’tajäätödööcomo ai mmaja.

¹⁷ Tameedä awa’deuwödööcomo, ännödööcomo mmaja, Cajiichaana Jesuuquidiito wwonooje tödöötäcä, Cumöötoncomo Wanaadi wwä aashicha awa’deuwancädäiñe Quidiito joi.

Quidiito sotoi weicho’como

¹⁸ Änwanno töiñoca’como, oiñonootoncomo woije eichäcä, Cajiichaana ecaanö’nei weichö nöngeene.

¹⁹ Änwanno tö’dha’como, ijummatääcä ajiiñantoncomo; tääde’cwade’daane eichäcä chääjäcäiñe.

²⁰ Änwanno mudeeshi’chä, oomotoncomo woije eichäcä, aanötoncomo woije mmaja, ya’deuwödööcomo waadäi; yääje weiñä Cajiichaana wacö’je na.

²¹ Änwanno töwenneca’como, ännacoomo maneetömaajotäi’che, aashicha töwei’sheiñe töweichöcoomo mma ane’nomja’noto.

²² Änwanno tädhaajäca’como, edä nono de’woncomo adheedhajootoncomo woije eichäcä, töwö ñeenedööje mma’da, soto mma a’cwaimadaawoto töweiye naichöje’daane, chäänönge ätö’tajäätödööcomo yeiyancädääne, Wanaadi ñontancädä.

²³ Tameedä ännödööcomo tödö’se aweichöcoomo que tödöötäcä, Cajiichaana wwonooje, soto wwonooje’daane,

²⁴ odhoowanääcäiñe yeijäcä Cajiichaana wwono adheeje’jocoomo eichojo, yää tameedä äwwäiñe tu’emööje naadö. Quidiito sotoijeene maato; töwö Adheedhajootoncomo neeneje na.

²⁵ Ñäädä conemjönö tödöönei mmaane nääjemaaja’da chäänöngemjönö tönnö’jödö woije; Wanaadi aatantawä soto ännö’da na.