CODOOSENSE 2 - Wanaadi A'deddu

¹ Odhoowanääcäiñe yei’she wa äjääcäinchädäiñe jooje töweetadaawa’cajo weichö, tameedä Daodiseea ñancomo jäcäinchädä mmaja, tameedä yeenejöncomo jäcäinchädä mmaja.

² Tötö’tajäätödööcomo jäcä yä’jädu’tä’seiñe wa, äänönge töwä’jummancädäiñe. Chäwwäiñe yeejamö’se wa ecamjödö chäänöngato, yää towaanojo’ne weiñawä töweiye naichö. Quidiito dhowaanäcäiñe yei’she wa dea, ñäädä Wanaadi woije jenaadä owaanäcä’da cönä’ja’dö.

³ Quidiito ñäädä tameedä sejje edhaajä, towaanojo’ne weiñä edhaajä mmaja.

⁴ Mädääje wä’döa äwwäiñe anejja mma adhencu’toto’no aashichaato wa’cä ta’deddu que.

⁵ Öwö ajaadäiñe’da weichaame tö’tajäätödööne ajaadäiñe na. Ta’cwaiñe wäänene chäänönge aweichöcoomo yoowanääcä yeijäcä, Quidiito ecamjödö jäcä yäätäädä aweichöcoomo yoowanääcä yeijäcä mmaja.

⁶ Yääje yeijäcä Cajiichaana Jesuuquidiito mecaanö’täneedöje dea chääjadäädä eichäcä.

⁷ Choojonno ä’sancwa’da eichäcä, dee tömiichato yäätäädä töweiye naichöje, töwö ñi’wa’tädö que awaatö’nä’ancädäiñe. Jäduuje eichäcä aneecamjödööcomo jäcä, yeichöje Wanaadi wwä aashicha awa’deuwancädäiñe, moowanoomatäänedööje dea.

Quidiito jadä weiñä

⁸ Odhoowoinchadäiñe’da eichäcä; anejja wenta’mecöödö que mma ätö’tajäätödööcomo mänsadiijannä’cajootäi’che, ñanno soto wätunnäichomo que mma adhencu’tä’seiñe weneenetoodö. Quidiito woija’comoojönö ñanno, soto wätunnäichomo woija’como mma, edä nono de’wono tö’tajä’nä woija’como mmaja.

⁹ Quidiito wwääne na tameedä Wanaadi weichö.

¹⁰ Änwanno äwwäiñe chäänönge aweicho’como töweiye na Quidiito jadä aweichomjäcä. Töwö na tameedä jäduuja’como e’jodhe, cajiichaanacoomo e’jodhe mmaja, ñanno amoode.

¹¹ Quidiito jadä aweichomjäcä mmaja siicunsidaadoje mä’dötääne dea, adheejöcoomo jäcä’daane, ajuunucoomo nijummadö jonno töwääwanaaca aweichöcoomo queene; yää yää Quidiito nödöödö siicunsidaadoje weiñä.

¹² Änwanno wautisaaje wä’dönä que Quidiito jadä määwaacajootäne; chääjadä mmaja maadoncatääne dea, Wanaadi jäduudu töneecanö’e aweichomjäcä, ñäädä töwäämaajo jonno Quidiito adoncanei’jödö.

¹³ Jenaadä töwääma mä’ja’quene ocoone’nadiiyöcoomo awä, ajuunucoomo nijummadö jäcä siicunsidaadoje’da awei’jocoomo weijäcä mmaja. Eduuwaane Wanaadi aweichöcoomo cuntui Quidiito jadä, tameedä ocoone’nadiiyöcoomo encwanno’jodö’jo.

¹⁴ Töwö Wanaadi cönaacoichajoi cöneejeque’näjöödöcoomo, yää töwaanontädö que cämu’däneichomooje cönä’ja’dö. Töwö yää cönaacoichajoi cuduusa jäcä ajoijodö que.

¹⁵ Cuduusa jäcä töwäämadö que Quidiito cömjäduucaicho tameedä jäduuja’como, cajiichaanacoomo mmaja, ñanno odo’shancomo. Tameedä täneemöje töwö cöne’jodheinchaicho.

Caju ñano encano’täjai cöweichöcoomo

¹⁶ Yääje yeijäcä anejja äwwäiñe amoi’chäjoojai’cha na äwanshi, wocö jeiñe mma, we’jummatoojo anooto jeiñe mma, nuunä muntadö jeiñe mma, wäädeetatoojo anooto jeiñe mma.

¹⁷ Tameedä mädoocomo cönä’jaacä töwe’emö ecaato mma; Quidiitoone na täcaatoqueemöje.

¹⁸ Wanaadi wwä adheejemaato’como que mätänwajiiñajootäi adhencu’tä’sa’como wwä. Ñanno adhencu’tä’sa’como o’jodhe chö’tajä’jönö wa’cä yäänejoodöcoomo; amoode ya’deme’nnamo mmaja tönwanno. Tönwanno na’deuwaato towaanojöncomo jäcä. Iiña mmädä adai’joto wa’cä nääcanö’aato, tötö’tajäätödööcomo woije mma.

¹⁹ Ñäädä yääjato Quidiito jadä’da na, ñäädä iju’jäje naadö. Töwö Quidiito chääjö ju’jäje töweijäcä tameedä chääjö natö’nä’ja ewanshinchädö que; töwö dea chääjö nejoodöja chu’nädööcomo ai, Wanaadi nijummadö woije.

²⁰ Quidiito wäämadö jadä äwääma’jocoomo weijäcä tösancwa maato edä nono de’wono tö’tajä’nä jonno. Yääje yeichaame ¿ane’que’nei edä nono de’woncomo nönge dea maato? ¿Ane’que’nei edä nono de’wono wätunnä waanontädö woije dea määnetääne,

²¹ yää edääje weneenedö: “Ñäädä tö tänämje’da na,” quee, “Edä mmaja täu’cwemje’da na dea,” “Yää ’quene tajoojomje’da na,” quee weneenedö?

²² Tameedä mädä waanontänä tödöödö que töwaatameemö jäcä mma. Soto tö’tajäätödööcomo woijato mma yää, soto wätunnäichomo woijato mmaja.

²³ Tameedä yää nöngato tödöödö tösejjeque weiñä wa’cä chö’tadö, yää töneejodööjodö que mma Wanaadi wwä tödöödö, o’jodhe chö’tajä’jönö wa’cä weiñä mmaja, töwwäädä täjö imaaminchadö mmaja; yaawääne’ yääcomo tujuunu nijummadö choonecaajai’chaane na.