CODOOSENSE 1 - Wanaadi A'deddu

Yaajäntä’jödö

¹ Öwö Paudo, Wanaadi woije Jesuuquidiito nanontädö, cöjimmotoncomo Tiimoteo acä

² edä ñaa nimenna äwwadäädäiñe, änwanno Codoosa ñancomo, Wanaadi sotoi, Jesuuquidiito ecaanö’nnamo. Aashichaato, täncanoode’da aweicho’como mmaja, äwwäiñe yei’she wa Cumöötoncomo Wanaadi nutuudu.

Quedeiyente jäcäiñe Wanaadi wwä Paudo wa’deuwö’jödö

³ Äjääcäiñe Wanaadi wwä töwa’deuwödö waadäi aashicha töwa’deuwe ñaa weneene chäwwä, ñäädä Cädhaajotoncomo Jesuuquidiito umö wwä,

⁴ ñaa wwä eta’jödö weijäcä Jesuuquidiito töneecanö’e aweichöcoomo, tameedä Wanaadi sotoi tumjumma aweichöcoomo mmaja.

⁵ Änwanno mädääje maato onwomoocödööcomo töweiye yeijäcä, yää caju ña äwwoncomooje tösooma naadö. Jenaadä änwanno metaatäne yää töwoomo’quemö jäcä chäänöngato wätunnä ecammajäätödö que.

⁶ Yää aashichaato wätunnä, äwwäiñe cönäätäcammaichö, tameedä yeichö wa’cä wäämecantänääje na eduuwa, wäädhe’manääje mmaja, äjääcäiñe weneenedööje dea. Mädääje äjääcäiñe aashichaato wätunnä cönaatö’näjöi awa’deene aashicha Wanaadi weichö jäcä metaatäneedö jonnoto’jödöödä, chäänönge yeichö metaatäneedö jonnoto’jödöödä mmaja.

⁷ Änwanno yää jäcä moowanoomajootäne Epaujada wwä, ñäädä ñaa nijummadö, ñaa wetaadawa’cajoodö weichacoono. Töwö ñaa ’wa’täneije na, Quidiito anoonö chäänöngatooje mmaja.

⁸ Töwö dea ñaa wwä cöneecammai Wanaadi woije töwä’jumma aweichöcoomo.

⁹ Yääje yeijäcä yääje aweichöcoomo ñaa wwä eta’jödö jonnoto’jödöödä Wanaadi wwä äjääcäiñe töwa’deuwödö ane’nomja’da ñaa na. Töne’ca’e ñaa weneene Wanaadi woijato odhoowanääcäiñe yeichojo, Wanaadi nödöödö jäcä tösejjeque aweicho’como mmaja, towaanojo’ne aweicho’como mmaja.

¹⁰ Cajiichaana sotoi weichö nönge aweicho’como mmaja töne’ca’e ñaa weneene dea, imjummadö äwwäiñe tödöötojo mmaja, aashichaato ännödööcomo wejantojo mmaja, jooje’cä jeene Wanaadi odhoowanääcäiñe yä’dötoojo mmaja.

¹¹ Töne’ca’e ñaa weneene dea Wanaadi wwä äjäädu’toto’como töwö ijäädudu aashichaato que, adha’cwaniiyöcoomo que tameedä tönshinchä aweichöcoomo wetä yaawä, chincha’da aweichöcoomo wetä mmaja.

¹² Mädääje eijai maato aashicha awa’deuwancädäiñe Cumöötoncomo wwä, ñäädä tösootoi wwä tu’emö eiñamooje cödööneichomo’jödö, tawaanato aca cödööneichomo’jödö mmaja.

¹³ Töwö Wanaadi cäwaanacaatäne tööjato jäduudu jonno; töwö cödöötäne yaawä Tönnedö tumjummadö sotoije.

¹⁴ Ñäädä Iiñedö cäwaanacaatäne töwäämadö que; töwö cöcoone’nadiiyöcoomo cönencwanno’joi.

Jesuuquidiito wääma’jödö jäcäinchädä Wanaadi jadä ääweichacoonoje cöweichöcoomo

¹⁵ Töwö Jesuuquidiito na Wanaadi äänejöönö cu’taajäje, tameedä tödööajä naadö e’jodhaato mmaja.

¹⁶ Jesuuquidiito ai Wanaadi cönnöi tameedä tödööajä naadö, caju ña naadö mmaja, nono de’wä naadö mmaja, äänejöönö, täneeto mmaja. Jesuuquidiito ai mmaja Wanaadi cönnöi chea acu’shänääcomo, o’jodha’como mmaja, jäduuja’como mmaja, cajiichaanacoomo mmaja, nanno amoode. Töwö iiñödö mädä tameedä, töwö chäwwono mmaja.

¹⁷ Töwö Quidiito cönä’jaacä tameedä tödööajä naadö owaajodä; töwö yoije tameedä töweiye weneene.

¹⁸ Quidiito na chääjö ju’jäje, ñanno quedeiyentecoomo ju’jäje. Töwö na yeicho’como u’neije, awa’deenato töwäämaajo jonnoto waadoncaajä mmaja, tameedä o’jodhaatoje töweichö wetä.

¹⁹ Wanaadi woije dea tameedä Wanaadi weichö Quidiito wwä na.

²⁰ Quidiito ai mmaja töwö Wanaadi töjaadä ääweichacoonoje cönnöicho tameedä yeichö wa’cä, tameedä nono de’wä naatoodö, caju ña naatoodö mmaja. Töwö Wanaadi Jesuuquidiito aquiiyö choonecaato’me cönnöi, yää cuduusa jäcä Jesuuquidiito cömjajoichö.

²¹ Jenaadä Wanaadi jadä’da mä’ja’quene; conemjönö tönnöe aweichomjäcä Wanaadi tuntu’de’tä töweiye mä’ja’quene ätö’tajäätödööcomo ai. Yääje yeichaame eduuwa töwö Wanaadi töjaadä ääweichacoonoje ayöödötääne

²² Quidiito wäämadö que, yaawä sotooje cönä’ja’dawä cönäämaichö. Töwö Wanaadi mädääje ayöödötääne töwwonooje aweichöcoomo wetä, tösoomaiñe, conemjönö ’je’da mmaja, täcammajä’aamoje’da mmaja.

²³ Töwö mädääje ayöödöaato’de ecamjödööje dea aweiya’comjäcä, jäduuje aweiya’comjäcä mmaja, wo’womo’nä jonno ääsecaajo’da aweiya’comjäcä mmaja, yää aashichaato wätunnä necammajäätödö metaatäneedö jonno. Yää aashichaato wätunnä tameedä soto wwäiñe nätääcammajä’a, öwö Paudo ecammajä’neije waadö.

Wanaadi sotoi i’wa’täneichomooje Paudo weichö

²⁴ Mädä äjääcäinchädäiñe wäntunamjödö cone’da yöödö’da na. Eduuwa öwö daja woneeja dea Quidiito wäntunamjö’jödö, chääjö jäcäinchädä, ñanno quedeiyentecoomo.

²⁵ Öwö wa quedeiyentecoomo anoonöje, äjääcäinchädäiñe taadawaajui Wanaadi nutuudu woije, tameedä Wanaadi a’deddu ecammajäätödö wetä öwwä,

²⁶ ecaademeecödö wetä mmaja yää owaanojöönö’jödö, yaajäntä’jödö jonnoto’jödöödä tacaade’da töweiye cönä’ja’dö. Eduuwaane töwö Wanaadi yää owaanojöönö’jödö cöneecadeeme’joi tösootoi wwäiñe.

²⁷ Töwö tösootoi wwäiñe ecaademe’jo’se cönä’jaacä joojato aashichaato tönnödö judhíojöncomo jäcäiñe. Edä yää owaanojöönö’jödö wecammaadö: Quidiito ataacaiñe yeichö. Yää na aashichaato äwwäiñe töweiyemö onwomo’to’comooje.

²⁸ Näädä Quidiito töneecammajä’e ñaa weneene. Tameedä soto töwätuujaiñe ñaa weneene dea, tönoowanoomaiñe mmaja, chäänönge chäwwäiñe etaadö wetä, tameedä chäänönge yeichöcoomo wetä mmaja Quidiito jadä.

²⁹ Mädä jäcäinchädä jooje töweetadaawa’cajo wäänene; töwä’jädu’tä wäänene tameedä jäädudu Quidiito nutuudu que.