CAADATA 6 - Wanaadi A'deddu

E’wa’täjai cöweichöcoomo

¹ Jimmä, conemjönö wwä ajimmotoncomo woto’jodheinchaja’jäcä änwanno chäänönga’como yeeconeecadö jäcä i’wa’täjai maato yaawä, cho’jodhe ätö’tajä’ancädäiñe’da. Awaadäiñe äädai’chätääcä, änwanno mmaja mä’yunaacajooto’node.

² Äämetaacäi adhe’wa’tätääcä anaadädööcomo jäcä, mädääje Quidiito waanontädö tödööjai maato.

³ Ñäädä o’jodhaato tö’tajäätödö, o’jodhe’da töweichaame, töwö dea nätäncu’ta.

⁴ Awaadäiñe ätämmencajai maato ännödööcomo jäcä; yaawä chäänönge äwäädanta’comjäcä ta’cwaiñe eijai maato ännödööcomo jäcä, ajimmotoncomo nödöödö jäcä’daane.

⁵ Cöwaadäiñe töweiye na cönaadädööcomo.

⁶ Ñäädä Wanaadi a’deddu jäcoono woowanoomadö towaanomaanei i’wa’täjai ña tameedä aashichaato que.

⁷ Mätäncu’tojootäi änwanno, Wanaadi otonno’jojäätö’da na. Soto niñaatö’tädö yää dea neja’ca.

⁸ Tujuunu nijummadö woije ñaatö’ta’jäcä yää noowonö’jaca’de wäämatoojoje, tujuunu nijummadö woijato dea mma. Epíiditu Santo nijummadö woije ñaatö’ta’jäcä mmaane ñäädä dea Epíiditu Santo yeichöödäjaato weiñä daja nija’canö’ja’de.

⁹ Yääje yeijäcä chincha’da queicho’ñojo aashichaato tödöödö jäcä. Chu’nädö aca yä’döa’jäcä aashichaato nä’tua’de cöwwäiñe, ejääduqueejö’da cöweiya’comjäcä.

¹⁰ Yääje yeijäcä, tödööjai caatoodawäädä, aashichaato cöödötäiye tameedä soto jäcäiñe; quedeiyentecoomo jäcä jooje’cä jeene aashichaato tödööjai caato.

Yä’ca’jödö

¹¹ Eneetäcä’ma adai’jocoomo ömmennädö naadö; öwö dea edä wimenna.

¹² Ñanno siicunsidaadoje ayöödöjo’sa’como yää nödööjaato soto jadäiñe aashicha töweichöcoomo wetä mma, cuduusa jäcä Quidiito wääma’jödö jäcä ecammajäätödö jäcäinchädä töwäntunamjö’seiñe’da töweichomjäcä.

¹³ Ñanno siicunsidaadoje töwä’döja’como jadä’jödöödä ei’cha weneeneto tameedä jenaado’jä waanontänä woije. Yääje yeichaame siicunsidaadoje ayöödöjo’seiñe naato tönwanno, o’jodhe tötö’tajäätödööcomo wetä yaawä töwwäiñe mädääje äwä’döjo’jocoomo weijäcä.

¹⁴ Öwö mmaane anejja jäcäinchädä o’jodhe tö’tajäätö’se’da wa; cuduusa jäcä Cädhaajotoncomo Jesuuquidiito wääma’jödö jäcäinchädä mmaane yääje chö’tajä’jai wa. Cuduusa jäcä Quidiito wääma’jödö weijäcä edä nono de’wono yäämaajä nönge cönä’döi öwwä; öwö mmaja yäämaajä nönge wa dea edä nono de’wono tödöödö jäcä.

¹⁵ Jesuuquidiito jadä weiñawä siicunsidaadoje weiñä täje’da na, yääje’da weiñä täje’da mmaja; eduuwaatoje cöweichöcoomo tödööajä mmaane täje na.

¹⁶ Täncanoode’da yeicho’como, wentumje Wanaadi wwä yääneto’como mmaja, yei’she wa tameedä edä waanontänä tödönnamo wwäiñe, tameedä Wanaadi sotoi ñeene wwäiñe mmaja.

¹⁷ Eduuwa naadö jonno anejja yaaquiima’da nei’ñojo, jääcä töweiye yeijäcä yeetunui’chäjäätö’jödö we’jöjä’ajä, Cajiichaana Jesuuquidiito sotoije weichö yeene’ju’tojo.

¹⁸ Jimmä, Cädhaajotoncomo Jesuuquidiito nutuudu aashichaato äwwäiñe yei’she wa. Amén.