CAADATA 5 - Wanaadi A'deddu

Jäduujeedä eijai cöweichöcoomo

¹ Jesuuquidiito cu’catääne jedeeso nönge cöweichöcoomo jonno. Yääje yeijäcä jäduujeedä eichäcä, jedeeso nönge awei’jocoomo aca mmaja awaatashiichuudojoodöcoomo queiñe.

² Aashicha cätaatäcä; öwö Paudo yääje wä’döa: Siicunsidaadoje äwä’döa’comjäcä Quidiito ayöödöjaiñe’da na’de yaawä.

³ Edääje wä’döa ñanno siicunsidaadoje töwä’döa’como wwäiñe: Ñäädä yääjato tameedäädääne nödö’ñojo jenaado’jä waanontänä wä’dödö, yää Moisé nimennä’jödö.

⁴ Änwanno jenaado’jä waanontänä tödöödö que Wanaadi jadoncomooje töwei’sha’como, Quidiito jonno töwä’sancwajo maato. Wanaadi nutuudu aashichaato jonno to’nomja maato.

⁵ Cönwanno quedeiyentecoomo mmaane ecamjödö que quiiyomo’cato aashicha cödöödöcoomo Epíiditu Santo wwä.

⁶ Jesuuquidiito jadä weiñawä siicunsidaadoje weiñä täje’da na, yääje’da weiñä täje’da mmaja; ecamjödö mmaane täje na, yää wä’jummanä que towäänejo weneenedö.

⁷ Änwanno chäänönge maajäntätäänedö’je, ¿änääcö adheemu’dojootäne chäänöngato woije’da aweichöcoomo wetä?

⁸ Anejja woije mädääje mä’döjootäne, ñäädä Wanaadi adha’dejjaneichomo’jödö woije’da.

⁹ Ätö’taque’täi’che she’caasa ummannä’cajootojo yeichaame tameedä tunummannä’ca yeichö.

¹⁰ Öwö Cajiichaana woije edääje tö’tajä’a äjääcäiñe; anejjeja ätö’tajäätödööcomo aneeseca’da eijai ätö’taato öwwä. Ñäädä adhencödööneichomo mmaane nätä’maminchaja’de Wanaadi wwä, täneejuque yeichö jona’da.

¹¹ Jimmä, siicunsidaadoje soto tödööjodööcomooje dea weiya’jäcä yaawä tu’de’tä’da judhíocoomo eichöto. Yääje weiñä jäcä ecammajäätödööje dea weiya’jäcä, chäwwäiñe se’ne’daane eichö Quidiito wääma’jödö jäcä ecammajäätödö.

¹² Siicunsidaadoje mma’da yei’she waato ñanno adhaaquiimannamo, emuucaajäje jeene.

¹³ Jimmä, Wanaadi adha’dejjatääne jedeeso nönge’da aweichöcoomo wetä. Yääje yeichaame mädääje aweichöcoomo ajuunucoomo nijummadö woije tödöötojooje tödööjai’cha maato. Ootowoije mmaane eichäcä, äwä’jummancädäiñe.

¹⁴ “Aweichacoono ijummacä amäädä äwä’jummadö nönge dea;” quee nä’döa imennaajä. Mädä waanontänä tödöödö que tameedä anejja waanontänä mödööato dea.

¹⁵ Yaawääne’, äwwäädäiñe äwäätäuwa’comjäcä, awaataiju’jä’a’comjäcä mmaja, töwaatame mma ataamejai maato yaawä.

Epíiditu Santo woije weiñä

¹⁶ Edääje wä’dö’se wa äwwäiñe: Epíiditu Santo woije eichäcä, yaawä ajuunucoomo nijummadö woije ännö’da eijai maato.

¹⁷ Ajuunucoomo nijummadö Wanaadi dö’sennoto Epíiditu Santo jäcä nä’jädu’ta. Epíiditu Santo mmaja ajuunucoomo nijummadö jäcä nä’jädu’ta dea. Tönwanno naato äätu’dedööje; yääje yeijäcä ämjummaadööcomo tödööjai’cha maato.

¹⁸ Yaawääne’, Epíiditu Santo woije äwäätä’se’ta’comjäcä jenaado’jä waanontänä adhaanontäjaiñe’da na.

¹⁹ Owaanäcä na tujuunu woija’como nödöödö, yää masuuduichanä, täjö que conemjönö tödöödö mmaja, chäänöngemjönö tödöödö mmaja,

²⁰ chu’taajä jummadö mmaja, jöwaije weiñä mmaja, wä’tu’de’tänä mmaja, wata’deutänä mmaja, wätö’neimmanä mmaja, äätömaacoije weiñä mmaja, töwö mma töwei’she weiñä mmaja, ootowoije’da weiñä mmaja, aata’deucone’da weiñä mmaja,

²¹ töweichacoono nödöödö i’ñeimmadö mmaja, soto emaadö mmaja, wä’dau’nä mmaja, ämiije’jödö mma weiñä mmaja, tameedä mädoocomo nöngato mmaja. Eduuwa mänwätuujato dea, jenaadä mänwätuujatäänedööje mmaja: Tameedä mädä nöngato tödöönei Wanaadi jataacäi täjai’cha na.

²² Epíiditu Santo nödöödö weja’caajä mmaane wä’jummanä, ta’cwaiñe weiñä mmaja, täncanoode’da weiñä mmaja, aashicha shinchädö mmaja, tamääne’da weiña mmaja, aashichaato jummadö mmaja, chäänönge weiñä mmaja,

²³ soto jäcä jäduuje’da weiñä mmaja, towaadäädä weiñä mmaja. Mädoocomo ännöjoojönö waanontänä ’je’da na.

²⁴ Ñanno Quidiito sotoi tujuunucoomo nijummadö woije weiñä cöneemaicho cuduusa jäcä, conemjönö tödö’se weiñä mmaja.

²⁵ Epíiditu Santo woije cöweichöcoomo töweiye na; yääje yeijäcä Epíiditu Santo ne’se’tädö woije deaane queicho’ñojo.

²⁶ O’jodhe chö’tajäätö’da queicho’ñojo, cöjimmotoncomo aneetömaajotäiñe’da mmaja, e’neimma’da mmaja.