CAADATA 4 - Wanaadi A'deddu

¹ Edääje wä’dö’se weichö mädä: Tumö nsomaadö’jödö edhaajä’täneije töweiyemö töweiye naichö naane’; mude’cä’cäje töweichö tumö sotoi nönge dea töweiye nai, tameedä chäädhajootoncomooje töweichaame.

² Töwö mude’cä’cäje töweichö töweiye nai towaanomaanei woije, tädai’chänei woije mmaja, tumö nichu’nä’tä’jödö jona tödööene.

³ Mädääje mmaja cä’ja’quene cönwanno; chäänönge cä’dötä’dadä töwaatashiichuudä töweiye cä’ja’quene edä nono de’wono äänejöönö jäduudu que.

⁴ Yaawä chu’nädö aca yä’döa’jäcä Wanaadi Tönnedö cönaanontäi; wodi ai cönennui. Töwö cönä’jaacä judhíoje, jenaado’ja waanontänä woije.

⁵ Jesuuquidiito cöneejä tameedä jenaado’jä waanontänä woija’como ewaanacaaneichomooje, Wanaadi wwä tönnacoomoje cödöödöcoomo wetä yaawä.

⁶ Yääje yeijäcä tönnacoomoje aweijäcäiñe Wanaadi cönaanontäi Epíiditu Santo odo’tacaiñe, ñäädä Iiñedö nutuudu. Yääje yeijäcä Epíiditu Santo woije Jaajaje Wanaadi que’taato.

⁷ Yääje yeijäcä Wanaadi nnacoomojeene maato eduuwa, dhanoonöje’daane. Iiñacoomoje aweijäcäiñe Quidiito jäcäinchädä töwö Wanaadi nu’a’de tameedä äwwäiñe töweiyemö.

Quedeiyentecoomo jäcä wentumje Paudo tö’tajäätö’jödö

⁸ Jenaadä, Wanaadi odhoowanääcäiñe’da yeichö, wanaadija’como anoonöje töweiye mä’ja’quene, wanaadi ñeeneje’da yeichaameiñe ñanno.

⁹ Eduuwa mmaane Wanaadi odhoowanääcäiñe na, Wanaadi owaanäcä mmaja änwanno maato dea. Yääje yeichaame, ¿ane’que’nei yää weicho’jönö weiñä aca awennaca’seiñe maato dea, tödööto’jönö weiñä aca mmaja, yoije tödöödö que awaatashiichuudädööcomo wetä mmaja?

¹⁰ Änwanno tönaamoi’chä määnetääne anooto, nuunä mmaja, chu’nä’taajä mmaja, wedu mmaja.

¹¹ Töwäädämmato nönge äjääcäiñe weetadaawa’cajo’jödö nichö’ta öwwä.

¹² Jimmä, öwö wei’yeje mmaja ä’dötääcä, öwö awei’yejeiñe wä’döneedöje mmaja. Änwanno conemjönö ännö’da meiya’quene jääcä.

¹³ Änwanno odhoowanääcäiñe na cädäije weichö woije awa’deene äwwäiñe aashichaato wätunnä ecammajäätö’jödö öwwä.

¹⁴ Cone’da cäädäichö weichaame änwanno quiiñemeecö’da mä’ja’quene, jo’ma’da mmaja. Wanaadi amoodedö tödöödö wa’cä mmaane cödöötäne, Jesuuquidiito tödöödö wa’cä mmaja.

¹⁵ ¿Äsha ca’ nai eduuwa yää ta’cwaiñe mä’ja’quennö? Yoowanääcä na adheenuduucomo u’cajaicho wa’cä awei’jocoomo, öwö yeenuduuje, yääje eijai yeiya’jäcä.

¹⁶ ¿Ätu’dedööcomooje ca wanä eduuwa chäänöngato ecammadö weijäcä öwwä?

¹⁷ Ñanno chäänöngemjöncomo awa’deme’caato aashicha ayöödödööcomo wetä’da. Tönwanno ñaa jonno asancwajo’seiñe naato shootoichomooje aweichöcoomo wetä yaawä.

¹⁸ Aashicha wä’wa’deme’nä yeichaame, öwö ajaadäiñe weichawä mma’da; yaawääne’, aashichaato tödööjoto’me yeiya’jäcä mmaane’.

¹⁹ Önnacoomo’cä, wodi töwensu’dato tönnedö’cä töiñe’ma töweiye naichö wa’cä wäntunaanö’a dea eduuwa äjääcäinchädäiñe, Quidiito nönge äwä’dödööcomo wa’cä.

²⁰ Ajaadäiñe jeene wei’she, anejjejaiche wa’deuwödö wetä yaawä äwwäiñe. Ayöödöto’como ’je’da öwwä na.

Acaada acä Saada wei’jocoomo

²¹ Änwanno jenaado’jä waanontänä woije töwei’sha’como, ¿aneeta’da ca maato yää jenaado’jä waanontänä wä’dödö?

²² Yää imennaajä necamma aacä Aawadán nnacoomo wei’jocoomo. Tooni cönä’jaacä Acaada nnedö, ñäädä Aawadán sotoi nnedö, yeichacoono cönä’jaacä ijiiñamo Saada nnedö, shootoijönö nnedö.

²³ Ñäädä shootoi nnedö cönennui soto woijatooje mma, weiñä weneenedööje mma. Shootoijönö nnedö mmaane Wanaadi necamma’jödö woije cönennui.

²⁴ Tameedä mädä yei’jödö naadö yö’seeno joi täcammajä’emööje na. Ñanno wodiiñamo naato aacä weiñä ecammaajä cu’tädööje. Ñäädä Acaada Sinaí ’jödö de’cäi weiñä ecammaajä cönä’tuichö cu’tädööje na. Ñanno Acaada nnacoomo naato anooje, töwoijeiñe’da, yennu’jocoomoodä.

²⁵ Ñäädä Acaada Sinaí ’jödö cu’tädööje na, yää Adaawiya ñano jöö. Yää jöö Jeduusadén ñano jata cu’tädööje na. Tameedä yää jataawoncomo jedeesoja’como nönge naato.

²⁶ Ñäädä Aawadán jiñamo neene mmaane caju ñano Jeduusadén ñanoi’chädö cu’tädööje daja na dea. Ñäädä nnacoomo cönwanno.

²⁷ Wanaadi a’deddu imennaajä jäcä yääje nä’döa: Ta’cwaiñe eichä amäädä töwennecamjönö, ennecaajai’chojöönö; ta’cwaiñe adheecanta’ñäcä amäädä shiichu dhe’numuudu onoonejaajönö. Ñäädä e’nomjaajä nnacoomo jooje’cä naato’de, töiñocaato nnacoomo e’jodhe’cä; quee nä’döa imennaajä.

²⁸ Jimmä, cönwanno caato Wanaadi necamma’jödö woija’como wennua’como, Isaaca cönä’ja’döje mmaja, ñäädä Saada nnedö.

²⁹ Yaawä jenaadä ñäädä Aawadán nnedö, soto woijato wennuaajä cönä’ja’dö, tömmamincha cönä’jaacä Epíiditu Santo woijato wennuaajä. Yääje dea eduuwa.

³⁰ ¿Aaquene Wanaadi a’deddu imennaajä nä’döaanä Aawadán wwä Acaada tödöötojo jäcä, quee ’ja? Edääje nä’döa: “Enno’jacä ñäädä osootoi, iiñedö mmaja. Ñäädä shootoi nnedö tumö nsomaadö’jödö edhaajä’täjai’cha na ijiiñamo neene nnedö acä;” quee nä’döa Aawadán wwä Wanaadi necamma’jödö imennaajä.

³¹ Yääje yeijäcä jimmä, cönwanno caato shootoi nnedö nönge’da, ijiiñamo neene nnedö nöngeene.