CAADATA 3 - Wanaadi A'deddu

Ecamjödö que quedeiyente weichö

¹ Änwanno jimmä, Cadaasiya ñancomo, ¿aaquene mädä wa’cä aneene’jutu’da maato? ¿Änääcö ä’jedäätäne chäänöngato wätunnä woije’da aweichöcoomo wetä? Aneetadööcomooje ñaa cöneecammajäätöi Jesuuquidiito cuduusa jäcä yääma’jödö. Yää cönä’jaacä äwwäiñe eneedö wa’cä.

² Edääje yeichö mma eta’se wa: ¿Ane’cäämö jäcäinchädä Wanaadi cuntui äwwäiñe Epíiditu Santo, jenaado’jä waanontänä tödöödö jäcäinchädä ’ja, Wanaadi a’deddu etaajä ecamjödö jäcäinchädääne?

³ ¿Aneene’jutu’da mmädä ca maato? Änwanno Epíiditu Santo woije awaajänto’jocoomo weichaame, ¿chäänönge ä’döjai ätö’taato eduuwa ajuunucoomo jäduudu woije mma?

⁴ ¿Töwäädämmaane’ jooje mäntunaanö’täne? Töwäädämma’daane yei’she wa.

⁵ Wanaadi wwä Epíiditu Santo u’a’jäcä äwwäiñe, aashichaato adhantawäiñe tödööa’jäcä mmaja, ¿ane’cäämö jäcäinchädä yää tönnöe weneene? Jenaado’jä waanontänä tödöödö jäcäinchädä’da yää nödööa, ta’deddu aneeta’jocoomo ecamjödö jäcäinchädä mmaane.

⁶ Aawadán cönä’ja’dö naane’; töwö Wanaadi cöneecamjöi; yää ñeecamjödö jäcäinchädä Wanaadi töjaadonooje cönnöi.

⁷ Yääje yeijäcä odhoowanääcäiñe tödööjai maato ñanno Wanaadi ecaanö’nnamo Aawadán nnacoomoje yeichöcoomo.

⁸ Jenaadä Wanaadi a’deddu imennaajä jäcä cönäätäcammai töjaadonooje judhíojöncomo tödööto’como Wanaadi wwä, ñeecamjödööcomo jäcäinchädä. Edääje aashichaato wätunnä cönäätäcammai Aawadán wwä: “Äjääcäinchädä aashichaato wödööa’de tameedä soto jäcäiñe;” quee.

⁹ Yääje yeijäcä tameedä ecaanö’nnamo wwä töweiye na aashichaato, Wanaadi aashichaato cuntuichöje mmaja Aawadán wwä, ñäädä ecamjödööcato.

¹⁰ Ñanno jenaado’jä waanontänä tödö’sa’como töwännanö’e naato. Edääje Wanaadi a’deddu imennaäjä nä’döa: “Ñäädä jenaado’jä waanontänä tödö’sato töwännanö’e na tameedäädä ännö’da yeiya’jäcä;” quee.

¹¹ Owaanäcä na jenaado’jä waanontänä tödöödö jäcäinchädä Wanaadi jadoonoje soto ä’döjai’cha yeichö. Edääje Wanaadi a’deddu imennaajä nä’döa: “Ñäädä Wanaadi jadoono töneecamjödö jäcäinchädä töweichö neneea’de;” quee.

¹² Yää Moisé nimennä’jödö jenaado’jä waanontänä tödöödö töweiye na ecamjödö jadäädotooje’da. Edääje imennaajä nä’döa mädä jäcä: “Ñäädä edä waanontänä tödöönei yää tödöödö jäcäinchädä töweichö neneea’de;” quee.

¹³ Yää jenaado’jä waanontänä tödööjai’cha cöweijäcäiñe töwännanö’aamoje cä’ja’quene. Yääje cöweichöcoomo jonno Quidiito cäwaanacaatäne. Töwö dea töwännanö’emö nönge cönä’döjoi cöjääcäinchädäiñe. Edääje Wanaadi a’deddu imennaajä nä’döa: “Ñäädä cuduusa jäcä ajoijaajä, töwännanö’emö ecammaajä ñäädä;” quee.

¹⁴ Yää cönä’jaacä yää aashichaato Aawadán wwä Wanaadi necamma’jödö wä’tudu wetä judhíojöncomo wwä, Jesuuquidiito ai. Tameedä cöwwäiñe ecamjödö jäcäinchädä Epíiditu Santo nä’tua, ñäädä Wanaadi necamma’jödö.

Aawadán wwä Wanaadi necamma’jödö

¹⁵ Jimmä, yö’seeno joi wecammajäätö’ñojo eduuwa äwwäiñe, weiñä joi. Soto wääcamma’jödö imennaajä naichö naane’, anejja töwäädämmatooje tödööjai’cha, ye’wä mmaja ecammajai’cha.

¹⁶ Mädääje mmaja Wanaadi necamma’jödö. Töwö Wanaadi Aawadán wwä cöneecammai aashichaato, dhatöödö wwä mmaja. Yääje ä’dö’da imennaajä na, “dhatöödö wwäiñe,” ca’da, wanna ecammancädä’da; “dhatöödö wwä”, queene nä’döa, tooni ecammancädä, Quidiito ecammancädä.

¹⁷ Edääje wä’dö’se weichö mädä: Wanaadi cöneecammai aashichaato Aawadán wwä. Yää ’jeje, 430 wedu ’jeje, jenaado’jä waanontänä cönä’tui, yää Moisé nimennä’jödö naadö. Yääje yeijäcä yää jenaado’jä waanontänä töwäädämmatooje tödööjai’cha na Aawadán wwä Wanaadi wääcamma’jödö; Wanaadi necamma’jödö täje’da tödööjai’cha mmaja.

¹⁸ Jenaado’jä waanontänä tödöödö jäcäinchädä cöwwäiñe Wanaadi nutuudu ei’jo, Wanaadi nutuuduje ätä’tä’da eichö. Yääje’daane na; Wanaadi yää cöneecammai Aawadán wwä täjeemajoomöje’daane, töneecamma’jödö nönge dea.

¹⁹ Yääje yeiya’jäcä, ¿ane’cotoojo jenaado’jä waanontänä tujunne nai, quee ’ja? Äcuude yää cönä’tui conemjönö ene’ju’to’me. A’dhe töweiyemööje mma cönä’jaacä, Aawadán atöödö weejödö wa’cä mma, ñäädä Wanaadi necamma’jödö. Yää jenaado’jä waanontänä cönä’tui Wanaadi amoodedö ai; Moisé cönä’jaacä soto wwäiñe ecammajä’neije.

²⁰ Ñäädä anejja a’deddu ecammanei töweiye nai aacä yeichöcoomo antawä; Wanaadi mmaane tooni ña.

Waanontänä waajäntä’jödö

²¹ ¿Yääje yeiya’jäcä ca jenaado’jä waanontänä Wanaadi necamma’jödö acä ääjuntaca nai? Ng’jn, ääjuntaca’da yeichaame. Weichojo ecammaneije waanontänä ä’tu’jo mmaane yaawääne Wanaadi jadoonoje wä’döjoonä eichö waanontänä tödöödö que.

²² Wanaadi a’deddu imennaajä necamma tameedä soto jedeeso nönge yeichöcoomo töcoone’nadiiyöcoomo awä. Yääje yeijäcä Jesuuquidiito ecamjödö queene Wanaadi necamma’jödö aashichaato nä’tua ecaanö’nnamo wwäiñe.

²³ Yää ecamjödö que weiñä eejö’dadä jenaado’jä waanontänä necammadö woije dea jedeeso nönge cä’ja’quene, ecamjödö que weiñä wä’dödö wa’cä.

²⁴ Yää jenaado’jä waanontänä cönä’jaacä cä’se’täneichomooje, mude’cä’cä edai’chänei töweiye naichöje. Yää cä’se’tätääne Quidiito weejödö wa’cä, Wanaadi jadoncomooje cöwä’dödööcomo wetä yaawä Quidiito ecaanö’a’jäcä cöwwäiñe.

²⁵ Quidiito ecamjödö que weiñä cu’nädö wä’dö’jödö weijäcä tujunne’da na eduuwa yää cä’se’täneichomooje cönä’ja’dö.

²⁶ Ecamjödö jäcäinchädä tameedä änwanno Wanaadi nnacoomoje maato, Jesuuquidiito jadä äwä’dödööcomo que.

²⁷ Tameedä änwanno Quidiito jadoncomooje äwä’dödööcomo wetä wautisaaje mä’döjootäneedö Quidiito weichö nönge dea aweichöcoomo na.

²⁸ Quidiito jadä weiñä töweiye nai judhíoje’da, quidiiyeecoje’da mmaja, tädhaajäque weiñä ’je’da mmaja, töwö daja weiñä ’je’da mmaja; wodiije weiñä a’que mmaja, dhanwaaje weiñä a’que mmaja. Jesuuquidiito jadä äwä’dödööcomo que tameedä änwanno äänöngeiñe maato.

²⁹ Quidiito sotoije aweijäcäiñe Aawadán atö’jödööje mmaja maato dea. Yääje yeijäcä äwwäiñe nä’tua’de aashichaato, Aawadán wwä Wanaadi cöneecammaichö dea.