CAADATA 2 - Wanaadi A'deddu

Paudo wwä aashicha anonta’como wa’deuwö’jocoomo

¹ Amoojadooto de’wä aacäichea wedu yä’döa’jäcä Jeduusadén ña wötääne dea yaawä, Waanawé jadä; Tiito mmaja wadääne dea.

² Wanaadi nanontädö woije wötääne. Yäätä Jeduusadén ña täneejuca’como jadäiñe ñaa cöne’jummai töudäje. Chäwwäiñe wecammajä’ne yaawä aashichaato wätunnä, yää judhíojöncomo wwä töneecammajä’e wääneneedö. Yää chäwwäiñe wecammajä’ne töwäädämmatooje taadawaajui ei’ño, taadawaajui’jödö mmaja, quee öucwadööje.

³ Ñäädä Tiito, jaadä cönä’ja’nei, siicunsidaadoje ännöjo’da cöneiya’to, judhíoje’da yeichaame töwö.

⁴ Anejjacoomo quedeiyenteja’como wätä’tädö Tiito siicunsidaadoje tödööjo’se cönä’ja’todö’je. Ñanno ñaa we’jummaajä antaca cönääwaacaicho tacaade’da. Tönwanno eta’se cönä’ja’to Jesuuquidiito jadä aashicha cöweichöcoomo jäcä, cashiichuudädööcomo wetä mmaja yaawä jenaado’jä tödööjodö que.

⁵ Ñanno woijeiñe she’caasa ei’cha ñaa cöneiyacä, äjääcäinchädäiñe chäänöngeedä yeichö wetä aashichaato wätunnä.

⁶ Ñanno täneejuca’comooje cönä’ja’todö tönnöe wääneneedö de’wä anejjeja ännöjo’da cöneiya’to öwwä. Täneejuca’comooje yeichöcoomo yöödö’da cönä’jaacä; yäänedö jäcä’da Wanaadi nemmencadö.

⁷ Ñanno täneejuca’como cöntö’tammecöicho Wanaadi woije taadawaajui ecammaajäje yeichö judhíojöncomo owaanomaadöcoomo jäcä, Peedhodo wwä ecammaajä naadöje mmaja judhío owaanomaadöcoomo jäcä daja.

⁸ Ñäädä Wanaadi, judhío owaanomaaneichomooje Peedhodo cönaanontäichö dea, öwö yaanontäne dea judhíojöncomo owaanomaaneichomooje daja.

⁹ Töwwäiñe chö’tamme’ca’jäcä Wanaadi nutuudu aashichaato öwwä yeichö, ñanno ä’se’tännamo, Jacoowo, Peedhodo mmaja, Juan mmaja, aashicha cöna’deuwöicho öwwä, Waanawé wwä mmaja. Tönwanno cönä’döa’to: “Judhíojöncomo owaanomannamooje eichäcä änwanno; ñaa mmaane judhíocoomo owaanomannamooje ñaa nei’ñojo;” quee cönä’döa’to.

¹⁰ Edääje mmaja cönä’döa’to dea ñaa wwä: “Wentumje eneetäcä’de wentumja’como;” quee. Yää ñeecamma’jocoomo tönnöe wäänene yoowadäädä weichö que.

Paudo wwä Peedhodo wätäujo’jödö

¹¹ Yaawä Antiyooquía ña Peedhodo wä’döa’jäcä öwö weune yaawä chäänönge’da yei’jödö weijäcä.

¹² Jacoowo anoonö ä’dö’dadooto töwö Peedhodo töwääwashinchä cönä’jaacä judhíojöncomo jadäiñe. Jacoowo anoonö wä’döa’comjäcä mmaane Peedhodo cönääsecai yaawä ñanno judhíojöncomo jadäiñe töweichö jonno. Chääjadäiñe ääwashinchä’da töweiye cönä’jaacä yaawä, ñanno siicunsidaadoje tödööjonnamo nontädööcomooje.

¹³ Yaawä, Peedhodo eneedö’jo, anejjacoomo quedeiyentecoomo judhíocoomo yääje mmaja cönäätäncu’toicho dea. Waanawé jadä’jödöödä cönäätäncu’täi chea chääjadäiñe.

¹⁴ Öwö öwwä eneea’jäcä aashichaato wätunnä wä’dödö nönge’da chäwwäiñe tödöödö, öwö ya’deune yaawä Peedhodo wwä tameedä quedeiyentecoomo we’jumma’como netaadöcoomoje. Edääje wä’döaaquene chäwwä: “Amäädä judhíoje aweichaame judhío weichö ännö’da määnene; judhíojöönö nönge mma määnene. Yääje yeichaame, ¿ane’que’nei canno judhíojöncomo wwä tödööjo’se manä judhío weichö?” quee wä’döaaquene Peedhodo wwä.

Jesuuquidiito ecamjödö que wääwanaacanä yeichö

¹⁵ Judhíocoomo neene ñaa, judhío nnacoomo mmaja, conemjönö dönnamoojönö, anejjacoomo soto weneenetoodöje’da.

¹⁶ Yääje yeichaame cowaanäcäiñe na Wanaadi jadoonoje soto ä’döjai’cha yeichö jenaado’jä waanontänä Moisé nimennä’jödö tödöödö que, Jesuuquidiito ecamjödö que mmaane. Yääje yeijäcä ñaa, judhíocoomo mmaja Jesuuquidiito ñaa cöneecamjöi Wanaadi jadoonoje töwä’dödö wetä yaawä yää ecamjödö que, jenaado’jä waanontänä tödöödö que’daane. Anejja Wanaadi jadoonoje ä’döjai’cha na jenaado’jä waanontänä tödöödö que.

¹⁷ Ñaa judhíocoomo Quidiito jäcäinchädä Wanaadi jadoonoje ñaa wä’döjoodawä conemjönö dönnamooje töweichö ñaa cönääcammai, judhíojöncomo naatoodöje mmaja. Yääje yeijäcä, ¿Quidiito ca conemjönö döjooneije nai ñaa wwä? Ng’jn, yääje’da yeichaame.

¹⁸ Yää jenaado’jä e’nomjadö’jo, yää ’jeje dhai mmaja tödööa’jäcä öwwä, öwööne chäänönge’da wa.

¹⁹ Öwö yäämaajä nönge wa eduuwa jenaado’jä waanontänä necammadö tödöödö jäcä; yää tödööjai’cha wa eduuwa. Yää jenaado’jä waanontänä dea mädääje yöödöne, Wanaadi woije weichö wetä eduuwa.

²⁰ Quidiito jadä wäämane cuduusa jäcä. Öwööjönööne nudä wa eduuwa, Quidiitoone na do’taca. Mädä eduuwa waadö Wanaadi nnedö ecamjödö que wa, ñäädä jummanei, jääcäinchädä cönäämaichö.

²¹ Aashicha Wanaadi weichö töwäädämmatooje tödö’se’da wa. Jenaado’jä waanontänä tödöödö que wääwanaacanä yeiya’jäcä töwäädämma Quidiito wääma’jödö eichö.