CAADATA 1 - Wanaadi A'deddu

Yaajäntä’jödö

¹ Öwö Paudo, anontaajä, soto nanontädööcomoojönö, soto ne’tädööcomoojönö mmaja, Jesuuquidiito nanontädööne, Cumöötoncomo Wanaadi nanontädö mmaja, ñäädä yäämaajo jonno Jesuuquidiito adoncanei’jödö.

² Öwö mmaja, tameedä quedeiyentecoomo jaadä naatoodö mmaja, ñaa nimenna äwwadäädäiñe, änwanno quedeiyentecoomo Cadaasiya ñancomo.

³ Aashichaato, täncanoode’da aweicho’como mmaja, äwwäiñe yei’she ñaa na, Cumöötoncomo Wanaadi nutuudu, Cädhaajotoncomo Jesuuquidiito nutuudu mmaja.

⁴ Ñäädä Jesuuquidiito töwäämaamöje cönä’tui cöcoone’nadiiyöcoomo jäcäinchädä, cäwaanacaadöcoomo wetä edä conemjönö weiñä naadö acanno, Cumöötoncomo Wanaadi woije dea.

⁵ Wanaadi aashicha wa’deutojooje na yeichöödäje. Amén.

Anejja wätunnä chäänöngato a’que yeichö

⁶ Öwö jooje cone’da wa numa’da äwwäiñe Wanaadi e’nomjadö weijäcä, ñäädä Jesuuquidiito nutuudu aashichaato que adha’dejjaneichomo’jödö. Anejja wätunnä jäcä daja määsecaato eduuwa.

⁷ A’que yeichaame anejja wätunnä chäänöngato; anejjacoomoone adhaaquiimaato, Quidiito wätunnäi aashichaato inwacaama’se naato.

⁸ Ñäädä äwwäiñe anejja wätunnä ecammajä’nei, öwö jadä’jödöödä mädääje weiya’jäcä, Wanaadi amoodedö jeiñe mma, äwwäiñe awa’deene ñaa cöneecammaichö nönge’da yeiya’jäcä, töwännanö’e na ñäädä.

⁹ Jenaadä äwwäiñe wecammaneedöje mmaja wecamma dea eduuwa: Anejja wätunnä äwwäiñe ecammajä’nei, awa’deene metaatäneedö nönge’da yeiya’jäcä, töwännanö’e na ñäädä.

¹⁰ ¿Änääcö ca wiya’daanä mädääje wä’dödö que, soto ’ja, Wanaadiiñe? ¿Soto a’cwaima’seiñe ca wäänene? Soto a’cwaimaneichomooje wei’jo mmaane Jesuuquidiito anoonöje’da weichö.

Anontaajäje Paudo wääwaacajo’jödö

¹¹ Edääje yeichö odhoowanääcäiñe yei’she wa, jimmä: Mädä aashichaato wätunnä töneecammajä’e wääneneedö soto nejoodödööjönö.

¹² Soto wwä’da wetaane, owaanomaajäje’da mmaja; Jesuuquidiitoone yoowanoomane.

¹³ Änwanno metaatäne jenaadä wei’jödö, judhío wätunnäichomo tönnöe weichö. Odhoowanääcäiñe quedeiyentecoomo jooje tömmaminchaiñe töweiye wei’jödö, quedeiyenteje weiñä acoicha’se’jödö.

¹⁴ Anejjacoomo jimmä öwö wa’co’como dea e’jodheiñe tönnöe wä’jaaquene judhío weichö, yaadai’chomo jano wätunnäichomo jooje töneecanö’e wei’jödö weijäcä.

¹⁵ Yääje yeichaame wennudu owaajodä dea Wanaadi ye’täne; aashicha töweichö woije töwö ya’dejjane. Yaawä, tumjummadö woije

¹⁶ Wanaadi Tönnedö cöneenejoi öwwä, judhíojöncomo wwä aashichaato wätunnä ecammajä’neije weichö wetä. Yää ’jeje yää jäcä soto aneecamma’jojäätö’da weiyaqueene.

¹⁷ Jeduusadén ña tä’da weiyaquennea yaawä ñanno anonta’como yoowajoodo’como döiñaiñe. Adaawiya ña mma wötääne, sa’donna. Yää ’jeje yennacaane dea Damaacu ña.

¹⁸ Aaduwaawä weduuto ai jeene Jeduusadén ña wötääne, Peedhodo ene. Chääjadä wä’jaaquene juujatonnä anooto.

¹⁹ Anejja anonta’como mmaane aneene’da weiyaquento; Jacoowo mma weneeaqueene, ñäädä Cajiichaana acoono.

²⁰ Wäätäncu’tädööjönö mädä wimennaadö; Wanaadi dhowaanäcä na yääje yeichö.

²¹ Yää ’jeje wötääne Siidiya ña, Sidiisiya ña mmaja.

²² Yeene’da dea cönä’ja’to Quidiito ecaanö’nnamo Judheea ñancomo.

²³ Edääje mma yeecadö töweecata töweiye cönä’jaacä chäwwäiñe: “Ñäädä awa’de cömaaminchatäiñe töweiye cönä’ja’dö eduuwa ecamjödö jäcä ecammajä’neije na, yää jenaadä acoichajo’se töweiye cönä’ja’dö;” quee mma yeecadö töneeta cönä’ja’to.

²⁴ Yääje yeijäcä o’jodhe Wanaadi töne’tä cönä’ja’to öwö jääcäinchädä.