APOOCADIISI 9 - Wanaadi A'deddu

¹ Yaawä ijaatoodeaato amoode töjaanau’cwai cöneetöi. Weneeaqueene yaawä caju ñanno shidiichä we’duccaajä nono de’wä. Chäwwä cönä’tui yaawi, ya’tadö inwadö ’jemjönö nata’tadö a’ducaatojo.

² Cöna’ducai yaawä yää ya’tadö inwadö ’jemjönö nata’tadö. Wedeinchä cöneeja’caacä yaawä ya’tadö acanno, jötaadi adai’joto o’coiño wedeinchä töweeja’ca töweiye naichö wa’cä. Yää ya’tadö wedeimödö shii cöntööjannä’cai; tööje cönä’jaacä yaawä.

³ Yaawä wedeinchä do’tai cödaatai cöneeja’ca’to; nono de’cäi cönä’meicho. Chäwwäiñe u’ajä cönä’jaacä mönäätä nono de’woncomo nönge yeicho’como, jä’dutä.

⁴ Edääje cönaatanontojoicho: “Woi mänäu’täi’che, chuu adö mmaja, dee mmaja. Ñanno mmaane ijä’dutääcä’de, ijaawäiñe Wanaadi eetö que tömaadaca’ñäjöncomo mmaane;” quee cönaatanontojoicho.

⁵ Ñanno cödaatai wwäiñe cönä’jaacä ijaatoodea nuunä soto maminchato’como, ämjajo’daiñe töweichaameiñe. Yää imjä’du’jocoomo se’ne cönä’jaacä, mönäätä nijä’du’jödö wa’cä.

⁶ Yää anooto awä soto a’que nujiiyaato’de töwäämato’como. Töwääma’se naato’de jooje, äämajai’chaane.

⁷ Ñanno cödaatai wäänedööcomo cönä’jaacä wänä döeeje cawaayu coneeca’como töweiye naichodööje. Iju’jocoomo de’wä cönä’jaacä canaanadi nöngato, oodo döaajä. Ijeedöcoomo cönä’jaacä soto jedö nönge.

⁸ Töwa’saqueiñe cönä’ja’to, wodi ju’jädö nönge. Yeedöcoomo mmaane cawaadiimä dhedö nönge cönä’jaacä.

⁹ Chäädäji’jocoomo cönä’jaacä woowontotoojo sejaadadi döaajä töweiye naichö nönge. Jooje yeetutuucadööcomo cönäätaacä, tadaada töwääta naichö wa’cä, wänä dödaawä cawaayu wwä tadaada ijiiñadö töwääta naichö wa’cä mmaja.

¹⁰ Dha’cödööcomo, chäädhacöödöcoomo mmaja, cönä’jaacä mönäätä edhaacödö nönge. Ijaatoodea nuunä wadaadäädä chäwwäiñe cönä’jaacä soto entunaanö’to’como ta’cödööcomo que.

¹¹ Tönwanno chaajichaanaichomo cönä’jaacä amoode, ñäädä ya’tadö inwadö ’jemjönö ijaatadö. Aawadón, quee töwö chäätö eewedeeo a’deucwe; quidiiyeeco a’deucwe mmaane Apoodiyón, quee. Yuunacaanei, quee töwä’dö’se yeichö.

¹² Eduuwa awa’deeto wäntunäänö’tojo töweeja’dä’e na; aacä eja’dätä’da dea na.

¹³ Yaawä tooni amoojatooto amoode töjaanau’cwai cöneetöi. A’deu wetaaquene yaawä. Aacäicheeato saaquidiijiisiyo detai antawä cönäätaacä, yää oodo döaajä, Wanaadi dö’tono.

¹⁴ Edääje cönä’döaacä ñäädä tooni amoojatooto amoode wwä, ñäädä janau’cwa dha’me cönä’ja’dö wwä: —Shaacacooto ñanno aacäicheea’como amoode, Eujadaate jawä i’wadö’ta’como naatoodö; quee cönä’döaacä.

¹⁵ Yääje mma yaawä cöne’wadö’caicho ñanno aacäicheea’como amoode, annaicho dö’se tödööene soto töjaajodööcomo wetä. Ñanno amoode tödööa’como cönä’ja’to yää wedui’chädö awä tösaacaamoje; nuunä mmaja tucu’näque cönä’ja’dea, anooto mmaja, shaacato’como anootoi’chädö.

¹⁶ Ñanno amoode sotoi cawaayu de’wä töweewänä’taamo cönä’ja’to 200,000,000. Öwö wetaaquene wanna yeichöcoomo ime’cu’tä’jödö.

¹⁷ Edääje weneeaquento ñanno cawaayu, yää ene’madaawä öwwä: Ye’woncomo cönä’ja’to sejaadadi döaajä tö’do’wäiñe, seweichato, sheenato mmaja, cönooto a’cödööjato mmaja. Cawaayu ju’jocoomo cönä’jaacä cawaadiimä ju’jä nönge. Inchaiñe cöneeja’caacä wa’to, wedeinchä mmaja, acuudajaadä dhatu’jödö joccato mmaja.

¹⁸ Yää aaduwaawoto wäntunaanö’tojo canaadöje jooje soto cönä’jajoicho, annaicho dö’se tödööene, yää wa’to canaadöje, wedeinchä canaadöje mmaja, acuudajaadä dhatu’jödö joccato canaadöje mmaja.

¹⁹ Ñanno cawaayu jäduuducoomo cönä’jaacä inchadööcomo, dha’cödööcomo mmaja. Dha’cödööcomo äcääyu nöngeiñe cönä’jaacä, tuju’jäqueiñe. Yää que soto cömmamincha’to.

²⁰ Ñanno soto, yääcomo awä ä’ja’jöncomo’jödö, tötö’tajäätödööcomo änsa’dumincha’da dea cöneiya’to; aneetöma’da cöneiya’to dea conemjönö tönnödööcomo. Odo’shancomo wa’demeecödö mmaja ane’nomja’da cöneiya’to dea, chu’taajä wa’demeecödö mmaja, yää oodo döaajä, jödaata döaajä mmaja, sejaadadi döaajä mmaja, täju döaajä mmaja, dee döaajä mmaja; yää aneenejöönö, aneetajöönö mmaja, oojoimajöönö mmaja.

²¹ Tötö’tajäätödööcomo änsa’dumincha’da cöneiya’to dea soto töneema töweichöcoomo jonno, tö’waichöcoomo jonno mmaja, tömaasuduichadööcomo jonno mmaja, tämeene töweichöcoomo jonno mmaja.