APOOCADIISI 8 - Wanaadi A'deddu

Aacä amoojatooto ajoijo’jödö ajämjaca’jödö

¹ Yaawä aacä amoojatooto ajoijo’jödö ajämjaca’jäcä Oweeja nnedö’cä wwä, cönsöötai yaawä caju ña, tooni shii wääseca’jödö.

² Yaawä weneeaquento ñanno aacä amoojato’como amoode Wanaadi je’tacancomo. Chäwwäiñe cönä’tui aacä amoojato janau’cwa.

³ Anejja amoode daja cöneejä yaawä juu shimi’jotoojo tödau’cwaamö ewöötö dha’me, oodo döaajä. Cöneedennai yaawä saaquidiijiisiyo dötoojo dö’tä. Chäwwä cönä’tui yaawä jooje juu shimi’jotoojo tödau’cwaamö, chäwwä oimadö wetä tameedä Wanaadi sotoi chäwwä ya’deuwödööcomo jadä, tödöödö wetä yaawä saaquidiijiisiyo dötoojo de’wä, yää oodo döaajä, mude dö’tä cönä’ja’dö.

⁴ Yää juu shimi’jotoojo, amoode enwawä cönä’ja’dö, cönwedeiñacä Wanaadi neneedöje, Wanaadi sotoi wa’deuwödööcomo jadä.

⁵ Yaawä ñäädä amoode juu shimi’jotoojo ewöötö cönannäjöi. Wa’to que cuntu’cannäjöi, yää saaquidiijiisiyo dötoojo de’wä cönä’ja’dö que. Cömje’moi yaawä nono de’cäi. Cöneetötöömai yaawä; cadeemedu cönäätai chea; cönäncucui chea; nono cönäätu’mei chea.

Amoode wwäiñe janau’cwa etöödö

⁶ Yaawä ñanno aacä amoojato’como amoode, aacä amoojato janau’cwa dha’me cönä’ja’todö, cöneesomaajätöicho yaawä janau’cwa etöödö wetä.

⁷ Yaawä awa’deeto amoode wwä töjaanau’cwai etööa’jäcä, i’chajö töwä’medö cönaajäntäi yaawä nono de’cäi, wa’to jadä, munu jadä mmaja. Nono cöiñatui yaawä jooje, annaicho dö’se chuuta mmaja, woi mmaja.

⁸ Yaawä yää ’jejaato amoode wwä töjaanau’cwai etööa’jäcä, jöö wätuudeaajä nöngato cöneejuccai yaawä dama ’cwaca. Dama munuuje cönä’döi yaawä, annaicho dö’se.

⁹ Annaicho dö’se mmaja na’cwacancomo cönä’jajoicho dea. Cudiiyadaacomo cöniiñadööjätöi chea, yää ’cäwa’cä mmaja.

¹⁰ Yaawä aaduwaawoto amoode wwä töjaanau’cwai etööa’jäcä, caju ñanno cöne’duccai yaawä shidiichä adai’joto. Tänne cönä’jaacä, adhaawa emjannaajä wa’cä. Na’cwaca cöneejuccai, tunaacomo juduucomo ’cwaca mmaja, annaicho dö’se tödööene.

¹¹ Ñäädä shidiichä eetö cönä’jaacä Tutuunatooje. Annaicho dö’se tuna tutuune cönä’döi yaawä. Jooje soto cönä’jajoicho yää tutuunato enö’jödö canaadöje, tutuune yä’dö’jödö weijäcä.

¹² Yaawä aacäicheeato amoode wwä töjaanau’cwai etööa’jäcä, shii dato cöneecone’mai yaawä, nuunä dato mmaja, annaicho dö’se; shidiichäcoomo mmaja cöneecone’maicho dea. Anooto annaicho dö’se mma shii tönweijo cönä’jaacä yaawä. Chäänönge mmaja nuunä, coijaicho annaicho dö’se mma.

¹³ Weneeaqueene yaawä amoode, caju dawä waiñönnäje. Töcä’de cöna’deuwacä; cönä’döaacä: —Jooje wentumje naato’de nono de’woncomo, canno aaduwaawä amoode wäädetööa’como naatoodö wwäiñe töjaanau’cwaichomo etööa’jäcä; quee cönä’döaacä.