APOOCADIISI 7 - Wanaadi A'deddu

Iisadaaediitacoomo wä’madaaca’ño’jocoomo

¹ Yääje mma yaawä weneeaquento aacäichea amoode, jiidi, nono juntai waadäi. Jejeichä nono de’wono cönoowatääa’to, ana’jimma’da yeichö wetä nono de’wä, dama de’wä mmaja, chuuta de’wä mmaja.

² Yaawä weneeaquennea anejja amoode daja; cönäänu’cacä shii weja’catoojo dö’senno. Töwö tömaadaca’ñä cönä’jaacä Wanaadi nudooto nimaadaca’ñädö que. Ñäädä amoode töcä’de cöna’deuwacä ñanno aacäicheea’como amoode wwäiñe, chäwwäiñe u’ajä cönä’ja’dö nono cone’matoojo, dama cone’matoojo mmaja. Edääje ñäädä amoode cönä’döaacä ñanno wwäiñe:

³ —Äcuudemma, awa’dennodämma nono moncone’matäi, dama mmaja, chuuta mmaja, tuna mmaja, ijaawäiñe Wanaadi sotoi imaadaca’ñädööcomo wa’cä ñaa wwä; quee cönä’döaacä.

⁴ Wetaaquene yaawä wanna yeichöcoomo ñanno ñaadaca’ño’jocoomo ime’cu’tä’jödö; 144 miide cönä’ja’to, tameedä Iisadaaeeda nnacoomo weichöcoomo.

⁵ Judhá weichö madaaca’ño’jocoomo cönä’ja’to amoojadooto de’wä aacä miide. Duwén weichö madaaca’ño’jocoomo cönä’ja’to amoojadooto de’wä aacä miide. Caadha weichö madaaca’ño’jocoomo cönä’ja’to amoojadooto de’wä aacä miide.

⁶ Aseede weichö madaaca’ño’jocoomo cönä’ja’to amoojadooto de’wä aacä miide. Neutadí weichö madaaca’ño’jocoomo cönä’ja’to amoojadooto de’wä aacä miide. Maanaseese weichö madaaca’ño’jocoomo cönä’ja’to amoojadooto de’wä aacä miide.

⁷ Simeón weichö madaaca’ño’jocoomo cönä’ja’to amoojadooto de’wä aacä miide. Dewí weichö madaaca’ño’jocoomo cönä’ja’to amoojadooto de’wä aacä miide. Iisacaada weichö madaaca’ño’jocoomo cönä’ja’to amoojadooto de’wä aacä miide.

⁸ Saawudón weichö madaaca’ño’jocoomo cönä’ja’to amoojadooto de’wä aacä miide. José weichö madaaca’ño’jocoomo cönä’ja’to amoojadooto de’wä aacä miide. Wemjamín weichö madaaca’ño’jocoomo cönä’ja’to amoojadooto de’wä aacä miide. Yää wa’cä cönä’ja’to ñanno yä’madaaca’ño’jocoomo.

Ñanno jooja’como soto tajääde’da’como yoomö

⁹ Yää ’jeje weneeaquento jooje soto, ime’cu’tädö e’jodhe jooje yeichöcoomo. Jiidi cönä’ja’to mude je’taca, Oweeja nnedö’cä je’taca. Ñanno soto cönä’jato tameedä nono weichö de’woncomo’jödö, tameedä soto weichöcoomo wa’cä, tameedä jata waadoinchomo’jödö, tameedä aata’deucwemjöncomo’jödö. Yoomöcoomo cönä’jaacä tajääde’deiñe; wasai adö dha’me cönä’jato.

¹⁰ Tönwanno töcä’de cöna’deuwa’to tujummä; cönä’döa’to: Äwaanacaanei mä’dä Cöwaanadiiyöcoomo, mude de’wä naadö, mä’dä Oweeja nnedö’cä mmaja; quee cönä’döa’to.

¹¹ Tameedä amoode cönä’ja’to jiidi mude awoodhecääcä, inchoncomo awoodhecääcäiñe mmaja, ñanno aacäicheea’como amoode’na’como awoodhecääcäiñe mmaja. Tä’mudhe cönä’döicho mude je’taca, Wanaadi wa’demeecödööje.

¹² Edääje cönä’döa’to: Amén. Aashicha wa’deutojooje ma, amäädä ñaa Wanaadiyö. O’jodhaato amäädä, töseedujä’nato mmaja. Töwa’demeequemööje ma amäädä, aashicha tödööto’me mmaja, yeichöödäje. Ñäädä mma amäädä jäduujato, tameedä tödööjaicho. Amén; quee cönä’döa’to.

¹³ Yaawä tooni inchomo cönä’döaacä öwwä: —¿Änä’camo canno tajääde’deiñe yoomöcoomo naadö? ¿Äshancomo we’a’como canno? quee cönä’döaacä.

¹⁴ Öwö wä’döaaquene yaawä: —Amäädä odhoowanääcä na; quee. Yaawä edääje cönä’döaacä töwö: —Ñanno canno yää wäntunaanö’nä tacaadato acancomo we’a’como. Tönwanno töwoomöcoomo tajääde’deiñe cöncoccaicho Oweeja nnedö’cä aquiiyö que.

¹⁵ Yääje yeijäcä Wanaadi mudei je’taca naato. Wanaadi wwä netaadawa’cajaato ano, coijai mmaja, töwö yeichojo taca. Ñäädä mude de’wä naadö niñeejontaato’de.

¹⁶ Tönwanno ämiije’da naato’de yeichöje, emjätö’se’da mmaja; shii wwä ä’dhau’cwajo’da naato’dede,

¹⁷ Oweeja nnedö’cä tädai’chäneichomooje yeijäcä, ñäädä mude dö’tä naadö. Töwö nadääaato’de acuuwena judu wwadäädä, yää weichojo tuna. Wanaadi nichocca’de yaawä tameedä chäänacuuducoomo; quee cönä’döaacä inchomo öwwä.