APOOCADIISI 6 - Wanaadi A'deddu

Aacä amoojatooto ajoijo’jödö wei’jödö

¹ Yaawä weneeaqueene Oweeja nnedö’cä wwä tooni ajoijo’jödö ajämjacaadö, yää aacä amoojatooto jimmä. Yaawä wetaaquene ñanno aacäicheea’como amoode’na’como jimmä wa’deuwödö; yeetötöömadö wa’cä cönäätaacä dha’deddu. —Ä’cäde; eneeta; quee cönä’döaacä.

² Weneeaqueene yaawä cawaayu tajääde’dato. Ñäädä ye’wono cönä’jaacä shimaada ejuudu dha’me. Chäwwä cönä’tui canaanadi. Cöneeja’cai yaawä e’jodheinchancädä, e’jodheinchaneije töweiyemööje mmaja.

³ Yaawä yää ’jejaato ajoijo’jödö ajämjaca’jäcä Oweeja nnedö’cä wwä, anejja amoode’naajä daja cöna’deuwöi chea yaawä; cönä’döaacä: —Ä’cäde; eneeta; quee cönä’döaacä.

⁴ Anejja cawaayu cöneeja’cai yaawä, seweiche daja. Ñäädä ye’wono wwä u’ajä cönä’jaacä soto wänä’tojooto’como, yeewänä’tädööcomo wetä töwwäädäiñe. Chäwwä cönä’tui sauda adai’joto.

⁵ Yaawä aaduwaawoto ajoijo’jödö ajämjaca’jäcä Oweeja nnedö’cä wwä, cönäätai chea aaduwaawoto amoode’naajä wa’deuwödö; cönä’döaacä: —Ä’cäde; eneeta; quee cönä’döaacä. Weneeaqueene yaawä cawaayu juduumato. Ñäädä ye’wono cönä’jaacä oneejatoojo tänwawä.

⁶ A’deu wetaaquene yaawä ñanno aacäicheea’como amoode’na’como do’tacaiñe; edääje cönäätaacä: —Tooni ecauwö’jödö uu, tooni anooto wetaadawa’cajoojä ’cäwa’cä täje yeichö. Aacä ecauwö’jödö äiña, tooni anooto wetaadawa’cajoojä ’cäwa’cä täje yeichö. Chaatö mmaane mämmacuudäi, chääjedöödö eccudu mmaja; quee a’deu cönäätaacä.

⁷ Yaawä aacäicheeato ajoijo’jödö ajämjaca’jäcä Oweeja nnedö’cä wwä, cönäätai chea yaawä aacäicheeato amoode’naajä wa’deuwödö. —Ä’cäde; eneeta; quee cönä’döaacä.

⁸ Weneeaqueene yaawä cawaayu tacaada’sato. Ñäädä ye’wono eetö cönä’jaacä Wäämanä Momo, quee. Inchäcä cöne’acä yä’ja’a’como weicho’como edhaajä. Chäwwä u’ajä cönä’jaacä dhantai nono de’woncomo töja’to’como, annaicho annai. Yää töja’to’como cönä’jaacä wänä que, ämi che mmaja, cädäi che mmaja, nono de’woncomo odoocoja’como que mmaja.

⁹ Yaawä ijaatoodeaato ajoijo’jödö ajämjaca’jäcä Oweeja nnedö’cä wwä, saaquidiijiisiyo tödöötojo o’nä weneeaquento ñanno Wanaadi a’deddu jo’tädööja’como wä’jajo’jocoomo ecaatocoomo, ñanno dha’deddu ecammajäätödö ane’nomjajöncomo ecaatocoomo.

¹⁰ Tönwanno töcä’de cöna’deuwa’to; cönä’döa’to: —¿Ächännauwä’coto mädä, amäädä Cajiichaana aashichaato, chäänöngato mmaja, ñaa jo’tä’da manä nono de’woncomo jäcäiñe, ñaa jajo’jödö jäcä? quee cönä’döa’to.

¹¹ Yaawä chääwaadäiñe cönä’tui yoomöcoomo tajääde’da’como. Edääje cönäätäcammai chäwwäiñe: —Äädeetatääcä a’dhe, chääwa’cä ñanno ajimmotoncomo wä’jajoodöcoomo wa’cä, ñanno Quidiito sotoi, äwä’jajo’jocoomo nönge töwä’ja’aamo; quee chäwwäiñe cönäätäcammai.

¹² Yaawä tooni amoojatooto ajoijo’jödö ajämjaca’jäcä Oweeja nnedö’cä wwä, weneeaqueene yaawä joojato nono wätu’medö. Shii cöntööjamöi yaawä, camiisha juduumato wa’cä; nuunä jenwaajä munuuje cönääneaacä.

¹³ Shidiichä caju ñancomo cönä’meicho yaawä nono de’cäi, chääjedöödö shaacudaadö töwä’me töweiye naichöje jejeichä joojato awä.

¹⁴ Caju cönännamjöi yaawä, jajeeda wemoomödö töweiye naichöje. Tameedä jöö, tameedä dhantadö mmaja, cönääsecaajätöi töweichojo dö’tonno.

¹⁵ Yaawä nono de’woncomo cajiichaanacoomo, täneejuca’como mmaja, tönsomaaca’como mmaja, suddau mmaja, jäduuja’como mmaja, tameedä tädhaajäca’como mmaja, tädhaajäquemjöncomo mmaja, cönootone’toicho yaawä ya’tadö aca, yaadö ’jano do’taca mmaja.

¹⁶ Tönwanno cönä’döa’to jöö wwä, täju wwä mmaja: —Adheejuccacä ñaa de’cäi, ñaa nejoonöje, aneene’da ñaa eiye mude de’wä naadö jedö, Oweeja nnedö’cä wwä ñaa wätä’maminchajo’node; quee cönä’döa’to.

¹⁷ Wätä’maminchajootojo anootoi’chädö cu’nädö aca yä’döaajä mädä eduuwa. ¿Änääcö yää änshinchädööde’?