APOOCADIISI 4 - Wanaadi A'deddu

Caju ñancomo wecanta’ño’jocoomo

¹ Yääje mma yaawä caju ña weneeaqueene mönaatata, ta’duque’da. Yää a’deu, janau’cwa wäätadö nönge awa’de öwwä cönäätaichö mmaja, cönäätai chea yaawä; edääje cönäätaacä: —Sadä adhäänu’cä, äwwä weneejoiye äcuude töweeja’dä’emö; quee cönäätaacä.

² Yaawä dea caju ña wataadojoone, Epíiditu Santo woije. Iiña weneeaqueene Cajiichaana mudei; yää mude de’wä cönä’jaacä soto wataajimaajä.

³ Ñäädä shuucu ye’wä cönä’ja’dö tawaane cönääneaacä, widiiqui ta’dawaanato töweiye naichöje. Mude awoodhecääcä cönä’jaacä jasuudi, medaada nöngato, sheene.

⁴ Cajiichaana mudei awoodhecääcä cönä’jaacä anejja mude mmaja, tooni sotooto de’wä aacäichea. Yää de’wä shuucu weneeaquento tooni sotooto de’wä aacäichea inchoncomo, tajääde’dato awäiñe. Iju’jocoomo de’wä cönä’jaacä canaanadi, oodo döaajä.

⁵ Yaawä Cajiichaana mudei acanno yäncucuudu cöneeja’caacä, yeetötöömadö mmaja, cadeemedu mmaja. Mude je’taca cönä’jaacä aacä amoojato adhaawa emjannäjä’ajä, ñanno aacä amoojato’como Epíiditu cu’tädö.

⁶ Mude je’taca cönä’ja’dea dama nöngato. Ta’dawaane cönääneaacä, jeteiya wa’cä, widiiqui töweiye naichöje mmaja. Mude dö’tä, dhawoodhecääcä mmaja, cönä’ja’to aacäichea amoode’na’como. Tönwanno cönä’ja’to tänuuqueiñe eese mmaja, inchadheedäiñe mmaja, wanna chäänuduucomo.

⁷ Awa’deenato amoode’naajä cönä’jaacä cawaadiimä nönge yäänedö. Yää ’jejaato cönä’jaacä jaaca nönge. Aaduwaawoto jedö cönä’jaacä soto jedö nönge. Aacäicheeato cönä’jaacä jiyaana nönge, waiñönnäje.

⁸ Ñanno aacäicheea’como amoode’na’como cönä’ja’to ta’denqueiñe, chääwaadäiñe tooni amoojato dhajä’saichomo. Dhajä’saichomo jäcä cönä’jaacä chäänuduucomo, jooje, ye’wä mmaja, dho’nä mmaja. Etaajö’da cönä’ja’to töweecanta’ñädööcomo, ano, cöijai’jödöödä. Edääje cöneecanta’ña’to: Aashichaato, aashichaato, aashichaato, Cajiichaana Wanaadi jäduujato, ñäädä jenaadä cönä’ja’dö, eduuwa naadö dea, äcuude na’dedö dea; quee cöneecanta’ña’to.

⁹ Weiñäje ñanno amoode’na’como aashicha na’deuwaato ñäädä mude de’wä shuucu naadö jäcä, ñäädä Yeichöödoto. Tönwanno o’jodhaatoje ne’taato, iiñödö niya’deme’caato dea.

¹⁰ Yääje ya’deuwödööcomo waadäi, ñanno tooni sotooto de’wä aacäicheea’como inchoncomo tä’mudhe nä’döaato ñäädä mude de’wä shuucu naadö je’taca; niya’deme’caato ñäädä Yeichöödoto. Töcaananaadiyööcomo mude o’wawä tödöödö’jo edääje necanta’ñaato:

¹¹ Ñäädä mma amäädä Cajiichaana Wanaadi; aashicha wa’deutojooje ma, aashicha tödööto’me mmaja ma dea, jäduujatooje täcammaamöje mmaja, tameedä tödöönei’jödööje aweijäcä. Amäädä ämjummadö woije cönaamodeetai tameedä naadö; quee cöneecanta’ña’to.